Read Kissi Nsaŋ 12 Bible Online

Nsaŋ 12 - Kissi bible

Nsaŋ 12

¹Ndóò lo palɛi ŋɔmpum le kafo-hiavaa-coo tiiyaa, mí Yeesu hun Betani, nɛɛ Lasar o mingi yoomu fulaa vanvílɛ́iya tɛɛn-ndo va-a.

²Má toosial ndu ɲɛdiaa isumiallo, Marte va ɲɛdiaa piɔwvo ni. Lasar va vana pilɛ o vanaa va ɲɛdiaa kon dioo nda Yeesu-a latulu-a tɛɛn.

³Mí Mari cua siani cuɛima báà kálà-kálàn mapum ma va nin-ndo, mó taaliaa man Yeesu o n'pelu. O kon kɔɔli, mó yiikpiaa ndu pelon a yiiŋii ndɔɛi. Mí cɛiyo pia cá a cun kɛndɛ cuɛima man.

⁴Mí kaandennɔɔ pilɛ, Yuda Iskariɔt, ó va hunɔɔ Yeesu malɔɔ vannda o ba-o ɲuna aa:

⁵«Le yɛɛ nda kɛɛ yɛ cuɛima cun kɛndɛan man pisi támálan kɛmɛ leyáá, mì vanáà piɔw vanaa bala fondoa volin mun?»

⁶Yiyan o sɔla kon-ndo, o co iɲíí le ndóò nɔ a vanaa bala fondoa le, kɛ le tùú o va vuiyo-o. O va ɲɛm nda va mandaa-on ciimbuuo, kani ndu óò manda bɔlɔ nda n'volio o ba ni.

⁷Kɛ mí Yeesu dimi aa: «Mal ndu. Le kumbɔɔ nuu o co man mandaa ni.

⁸La nɔnin vanaa bala fondoa iaa tɛɛn lɔ́ɔ́-lɔ́ɔ̀. Kɛ ya ya, la nɔnin ya niaa tɛɛn lɔ́ɔ́-lɔ́ɔ̀ le.»

⁹Mí Yuifia sɛ́lɛ́ bɛndoo tuɛi maa Yeesu va Betani lon. Má hun le Lasar Yeesu mingi yoomu fulaa vanvílɛ́iya tɛɛn-ndo cɔu, o ve ko le Yeesu cɔu daama le.

¹⁰Mí bolii vanaa-solia-lasálàá dimi le Lasar bɛɛ diyɔɔ,

¹¹kani Yuifia bɔɔ-bɔɔ a va nda faŋanndo ma va Yeesu laalanndo le dɛnɛ Lasar kon.

¹²Diimandɔɔ, mɛɛ sɛ́lɛ́ bɛndu óò hin le kafo hiavaa coo-o tuei maa Yeesu co kɔlan Yerusalɛm,

¹³mí nda kpow a bii siɔ̀ɔ́la vawlan o laba, má kɔa ndu bɔŋaa a yoondiaalan aa: «Biiloo co le Hala! Biiloo co le vana co hunɔɔ o diola Mɛlɛka lan-ndo, masa Israɛlla pɛɛn!»

¹⁴Mí Yeesu sɔla sofɛlɛ téndóó, mó hel lecoo, maa mɛɛ i co isɛvaa o sɛbɛlan nin yɛ aa:

¹⁵«Siòòŋii bii niaa le, niaa vannda Siɔn, la tofa vɔ masa niaa hunɔɔ, o co icali o sofɛlɛ téndóó coo.»

¹⁶Kaandeŋaa ndɔa ndáà bii sɔɛi ken bila o foofo kon te. Kɛ mɛɛ Yeesu luɛi o biilu ndɔɔ nin, má loonun dɔ́ɔ́ maa le ndu sɔɔn mun mún sɛvan ni, nduyɛ mí n peelun lende.

¹⁷Mí vanaa va o hɔl-ndɔ lɔ́ɔ́ Yeesu veelu Lasar o sɛiyo nin, mó tindi ndu vanvílɛ́iya tɛɛn-nda tɛnda seilen a ɲɛ nda ce-o o kɔɔ.

¹⁸Lelan vannda taw ndáà fula le ndu kɔlan bɔŋaa ni, le tueyɔɔ ndáà tuei a dɛnɛ kɔndɔfili ndóò tosa kon-ndo o kɔɔ-o.

¹⁹O kon mí Faliisia dimulan aa: «Kámáá la ce le! La tiwnin ɲɛ-ɲɛ ba le. La tofa vɔ mɛɛ vannda kpow a del ndu kɔɔli yɛ.»

²⁰Krɛkia pum va o vanaa ndáà kɔɛ kan Yerusalɛm le Hala biiloo o kafoo coo-a tɛɛn.

²¹Má sɔɔnguu Filipe fula Bɛtsaida o tàndá Kalile-o nin-ndo ikɛi, má dimul ndu aa: «Vana bɛndoo, n yeema le Yeesu cɔu.»

²²Mí Filipe kɔa, mó kɔ dimul Andree, o kon mí Andree nda Filipe kɔ dimul Yeesu.

²³Mí Yeesu mulul nda aa: «Telenndo tiiya, mì Po vanacieo sɔla biiloo.

²⁴I co niaa toɲaa dimul, te kulii n'malle del lɛŋ mì i vi le, i lo ndi pilɛ. Kɛ te i vi pɛ, i kom kullon taw.

²⁵Vana-vana kaola pɛ yoomu ndɔɔ, o hialunnin ndu. Kɛ vana-vana kɛɛ pɛ le yiinɔnndo a yoomu ndɔɔ o ceendo ho coo, ndu mandanin ndu le fɛɛn a fɛɛn.

²⁶Vana-vana yeema pɛ le ya baalaa tosallo, mɛɛ mò del-la kɔɔli. Nɛɛ ya co pɛ, vana baala nuu bɛɛ bɛnda mò va lon. Fuɲa nuu biilunin vana ni baalaa.»

²⁷«Sisa, kɔllo laasian ya niŋ kpede, i sina bɛɛ ɲɛ ya dimi le! Vɛ̀ɛ̀ mì dimi aa Pua baŋa ya o telenndo ho? Ɛ-ɛ, kani le sangaa ho sɔlaa ya hin ni.

²⁸Pua, cɔm vannda biilu diola nɔmndan.» O kon, mí diomndo pum soaa o halataala aa: «I cii nihau biilu ndɔɔ cɔm, la sɔlanin vɛlɛ biiloo.»

²⁹Mí sɛ́lɛ́ bɛndu va lon-ndo tuɛi, má dimi aa: «Taŋnden le piɔndi nuaa ni.» Mí a pum dimi aa: «Mɛlɛkanɔ Hala-o soo o ndu lo nuaa ni.»

³⁰Mí Yeesu cua sɔɛi, mó dimi aa: «O co le ya le diomndo ho soo le, kɛ le niaa ni.

³¹Sunsun, yamɛi ceendo hin kiolɔn, mà soli vana co masalen tosaa o ceendo ho coo-o o bɛ́ɛ̀.

³²Ya yɛ, telen ya sɔlanin heeloo faŋanndo o lɛŋnden coo-o, i tosanin mì vanndacieea kpow a muli hɔlla o ya lo.»

³³Le piɔ́m súú o va hunɔɔ sɔla-o o va dimio lende ni.

³⁴Mí sɛ́lɔ́ɔ́ mulul ndu aa: «O naa n saalun o sɛbɛ latɔŋndo nin-ndo co ni maa Krista vanin yoomu le fɛɛn a fɛɛn. Le yɛɛ n co yɛ niko naa dimullo aa: ‹Mɛɛ mì Po vanacieo sɔla heeloo? Nɛ̀ɛ́ co yɛ nin Po vanaciee kon?› »

³⁵Mí Yeesu dimul nda aa: «Ɲɛ-tengaa co vɔ niaa tɛɛn le telen bingi. La balu pɔɔ telen niaa nɔ ɲɛ-tengaa-o, haliko ɲumndan ma voolu niaa le: kani vana co balɔɔ o ɲumndan nin-ndo sina nɛɛ o co kɔlan-nda le.

³⁶Telen niaa nɔ vɔ ɲɛ-tengaa-o, la laalan ɲɛ-tengaa, haliko mi la siŋnun cuavaa ɲɛ-tengaa.» Yeesu ciiyo sɔɛi lende, mó kɔannun, mó kɔ viannun nda lándán.

³⁷A kaamaala kaakuula o tosa lan nda o hɔl-tan kpede, ndáà laalan ndu le,

³⁸haliko mi sɔɛi Esai vana-tɛɛngaa-diom Hala-o ndóò dimi-e ndíì peelun aa: «Mɛlɛka, nɛ̀ɛ́ laalan yɛ sɔɛi naa n dimi-e? Nɛ̀ɛ̀ Mɛlɛka cɔm yɛ kpaaya ndɔɔ?»

³⁹Mí Esai pilɛ kon cɔm vɛlɛ le kɔlɔ nda kɛɛ laalanndo-o aa:

⁴⁰«Hala suumiaa nda hɔltan, mó kindi nda nilan, haliko a ca le, a bii bila le, a mangalan o kon mì i singi nda le.»

⁴¹Ken Esai dimi telen o ce biilu Yeesu-o ni, mó soaa a ndu o kɔɔ.

⁴²Kɛ nduyɛ, hali simlacia tɛɛn, mí vanaa bɔɔ-bɔɔ laalan ndu. Kɛ Faliisia soli laalan ndaa kpendekele le, yɔŋii ndáà kuuna nda le kɔlan o cɛila lekaanndan nin.

⁴³Kani candɔɔla vanndacieea ndáà hiow yeema a Hala nda candɔɔ.

⁴⁴Mí Yeesu deŋi aa: «Vana laalan ya pɛ, o co ya le o laalan te, kɛ vana vem ya-o.

⁴⁵Vana ce ya pɛ, mɛɛ vana vem ya-o o ce vɛlɛ lende ni.

⁴⁶Ya ɲɛ-tengaa, i hin o ceendo coo, haliko vana-vana laalan ya pɛ, o va o maɲum nin te.

⁴⁷Te vanndo tuei pɛ sɔɔn nun, mò bii mun te, o co ya le kialu ndu iyama le, kani i hin le ceendo yaala le, kɛ le ndu ciindiaa.

⁴⁸Vana kɛɛ ya pɛ, mò bii sɔɔn nun te, ndu nɔ vana yaalanin ndu-o, sɔɔn ya pɛɛku vannda-on yaalanin vana kon o paale mɛɛlaalen ni.

⁴⁹Kani o co ya pila o ba le sɔɔn nun co fulaa le. Kɛ Pua vem ya-o, ndu pila dimul-la sɔɔn ya bɛnda le dimio-on a mɛɛ ya bɛnda le mun dimio yɛ ni.

⁵⁰Nduyɛ i sina maa sɔɔn ndɔn co cinda fɛɛn-fɛɛndo ni. Lelan sɔɔn ya co dimio-on, mɛɛ Pua vem ya mun dimio yɛ ya co mun dimio ni.»