Read Kissi Nsaŋ 13 Bible Online

Nsaŋ 13 - Kissi bible

Nsaŋ 13

¹Lɔ́ɔ́ pá mí Kafo-hiava-coo tiiya, Yeesu ndóò sina nin maa telen ndɔɔ tiiya le faŋanndo o ceendo coo le kɔlan o Fuɲa ndɔ lo. Ndóò kaola kaandeŋaa ndɔa va o ceendo coo-a taw, nduyɛ mó lo nda kaolaa háá o mɛɛlulan.

²Telen Yeesu nda kaandeŋaa ndɔa va ɲɛdiaa icɔl-lo dioo-o, mí ɲina vɔɔndo yɔngu Yuda po Simɔn Iskariɔt-o yiyanndo le Yeesu malɔɔ vannda o ba.

³Yeesu pila ndóò sina nin maa o Hala lo ndóò fula ni, o Hala lo o va muungoo ni, ndóò sina vɛlɛ maa Fuɲa ndɔ ndóò cii ndu ɲɔɔn kpow downɔn.

⁴Mó can o ɲɛdiaa coo, mó solin doma ndɔ lecoo-o lekɔɔ, mó cua kolaa pum, mó yiinun o caŋ.

⁵O kon kɔɔli, mó vow mɛnndan o kpángàá nin, mó tundun kaandeŋaa ndɔa pelon pulɔɔ, mó vɔɔsuu nda mun a kola va ndu kon o caŋ-ndo.

⁶Mɛɛ o tiiyaa o Simɔn Piɛr lo, mí ndu dimul ndu aa: «Nɔm Maalii, mà pulu ya pelon?»

⁷Mí Yeesu mulul ndu aa: «A sinanin ɲɛ ya co hoo tosaa-o pɛɛngu sunsun te, kɛ a hun biinin ndu bila paale pum.»

⁸Mí Piɛr dimul ndu aa: «Kɛì-kɛì bɛɛ, a bɛnda ma pulu ya pelon lɔ́ɔ́-lɔ́ɔ̀ le!» Mí Yeesu mulul ndu aa: «Te i pulu nɔm pelon te, mɛɛ a co o ni le.»

⁹Mí Simɔn Piɛr dimul ndu aa: «Maalii, mɛɛ o mɛɛlu ko pelon kínɛí le, kɛ pulu ya balan a bollen!»

¹⁰Mí Yeesu dimul ndu aa: «Vana cii nin pulɔnndo-o nɔ lɛ mako pulan te, fɔ le pelon daama pulɔɔ, kani o co nin o diandaa few. Niaa, la co a diandaa, kɛ o co niaa kpede le.»

¹¹Yeesu ndóò sina vana va ndu malɔɔ vannda o ba-o, lelan o dimi ni maa a ve a diandaa kpede le.

¹²Ciiyo nda pelon pulɔɔ, mí Yeesu mingin volɔɔla ndɔlan lekɔɔ, mó muungu, mó kɔ cal o fonda ndɔɔ, mó ɲuna nda aa: «La bii pá ɲɛ ya tosal niaa hoo-o bila?

¹³La co ya veeloo aa: ‹Vana bɛndoo›, ‹Maalii›, la nɔ dí mì la veelu ya lende, kani ndu ya co ni.

¹⁴Te ya co vana bɛndoo a Maalii-o pulu pɛ niaa pelon, mɛɛ niaa bɛɛ, o bɛnda mì la puuluan pelon vellaa-velle.

¹⁵Tɔɔmaseloo ya cɔm niaa ni, haliko mi la tosa mɛɛ ya tosal niaa yɛ.

¹⁶Mì dimul niaa toɲaa, vana baalaa ve fisa a vana ndɔ bɛndoo le, vana nda vem-ndo ve fisa a vana vem ndu-o le.

¹⁷Mɛɛ niaa cii sina nuaa yɛ, te la kela pɛ lende, mɛɛ la vanin vanaa dɛnɛ kɛndɛa.

¹⁸O co le niaa kpow le ya co sɔɛi he dimio le, i sínà vanaa ya hɛli-a. Kɛ fɔ mì Sɔɛi sɛvan-nde peelun aa: ‹Vana naa n va ɲɛdiaa dioo latulu-o heelu bɛngoo le ya nɛiyo ni.›

¹⁹I co niaa ndi pɔɔ dimul lɔ́ɔ́ pá mì dɛnɛ kon hun tosan, o kon o hun tosan pɛ, la laalan maa Ya co I co ni.

²⁰I co niaa toɲaa dimul, vana cɛl pɛ vana ya vem-ndo, mɛɛ ya o cɛl lende ni. Vana cɛl-lɛ ya pɛ, mɛɛ vana vem ya-o o cɛl lende ni.»

²¹Yeesu ciiyo sɔɔn mún dimio, mí kɔllo sanga ndu taw, mó yondal nda aa: «I co niaa toɲaa dimul, vana pilɛ o niaa tɛɛn malnin ya vannda o ba.»

²²Mí kaandennda va toofianndo vellaa-velle, a sina vana o va dimio-o le.

²³Kaandennɔ pilɛ, o Yeesu ndóò kaola taw-vo va ndu Yeesu icali ikɛi,

²⁴mí Simɔn Piɛr tuulial kaandennɔ kon a laba, mó dimul ndu le Yeesu ɲunaa haliko mi ndóò cɔm nda vana o va kon sɔɛi ndɔɛi dimio-o.

²⁵Mí kaandennɔ kon nangun Yeesu o ibuŋ, mó ɲuna ndu aa: «Ɔ́ɔ̀ vana kon nɛ Maalii?»

²⁶Mí Yeesu mulul ndu aa: «I co bulu bingio pɔɔla o taalaa nin, vana ya yɔngunin ndu-o, mɛɛ ndu ni.» O kon, mí Yeesu cua bulu bingio, mó pɔɔla ndu, mó yɔngu Yuda, po Simɔn Iskariɔt-o.

²⁷Yuda biyɔɔ dɔ́ɔ́ bulu kon, mí Setana luɛi ndu nin. Mí Yeesu dimul ndu aa: «Tosa ɲɛ n nɔ le tosa-o cɔ́-cɔ́!»

²⁸Kɛ kaandeŋaa tɔ̀a nda va dioo latulu-a kpede a sínà kɔlɔ Yeesu va ndu sɔɔn mun dimullo-o le.

²⁹Le tùú bɔlɔ n'volio va Yuda o ba-o, mí vannda pum a yiyan maa vomɔɔ Yeesu va ndu ɲɛm kafon nda nɔ makoo-on kɔlan piondɔɔ ni, te kon te vanaa bala fondoa ɲɔɔn kɔlan keu.

³⁰Mí Yuda cua bulu bingi kon, mó keleŋa fulan. Nduyɛ, ɲumndan maa tol nin.

³¹Yuda fulaa, mí Yeesu dimi aa: «Nihau, biilu Po vanacieo cɔmnun, mì biilu Hala-o va cɔmnɔnndo o ndu nin.

³²Ɛ̀ɛ̀ nduyɛ, te biilu Hala-o cɔmnun pɛ o ndu nin, mɛɛ Hala cɔmnin biilu Poo o ndu pila nin, mò cɔm biilu ndɔɔ fɔ́ɔ́fɔ̀,.

³³Cuavaa nia sei! I co vɔ niaa tɛɛn le telen bingi. La nuwviaanin ya, kɛ mɛɛ ya dimul Yuifia yɛ ya co niaa dimul ni maa la nɔlanin kɔlan nɛɛ ya co lakɔ-a le.

³⁴I co niaa sila sɛnɛiyo yɔngu: la kaolian vellaa-velle. Maa mɛɛ ya kaola niaa yɛ, niaa bɛɛ la kaolian lende.

³⁵O kon, te la kaolian pɛ vellaa-velle, vannda kpow a sina maa kaandeŋaa nia niaa co ni.»

³⁶Mí Simɔn Piɛr ɲuna Yeesu aa: «Maalii, kuɛɛ nɛ n co yɛ kɔlan?» Mí Yeesu mulul ndu aa: «A tiw-vɔ ba kɔlan ya kɔɔli sunsun te, kɛ o kon kɔɔli a hun kɔanin.»

³⁷Mí Piɛr ɲuna ndu aa: «Le kɔlɔ yɛɛ ya kɛɛ yɛnin tiwba nɔm kɔlan kɔɔli sunsun? Te vuo ni, i vi le nɔm.»

³⁸Mí Yeesu muli aa: «Toɲaa ni, a vunin lekɛ́ndɛi le ya. Kɛ nduyɛ kongillo koovanin te, mà viinun leyáá maa a sina ya le.»