Read Kissi Nsaŋ 14 Bible Online

Nsaŋ 14 - Kissi bible

Nsaŋ 14

¹Mí Yeesu dimul kaandeŋaa ndɔa aa: «Kɔlta niaalan la sanga le, la laalan Hala mì la laalan ya vɛlɛ.

²Fondalan la co taw o Fuɲa nuu lo cɛinin, te ndóò ve toɲa le, i va niaa dimul. Kɛ fondaa ya co lakɔ niaa toosial ni.

³Lelan, te i kɔɛ pɛ mì kɔ bɛɛndial niaa fondaa, i muungunin, mì hun kɔ a niaa, haliko mi niaa bɛɛ la kɔ va nɛɛ ya co-a.

⁴La sinà nɛiyo le kɔlan nɛɛ ya co kɔlan-nda.»

⁵Mí Tomas dimul ndu aa: «Maalii, n sinà nɛɛ n co kɔlan-nda le, vɛ̀ɛ̀ naa n sina yɛnin nɛiyo le kɔlan ndon?»

⁶Mí Yeesu dimul ndu aa: «Ya co nɛiyo, toɲaa a cindaa ni. Vana-vana kue o Pua lo le, te o co mò kei a ya le.

⁷Te la sina ya pɛ, mɛɛ la sinanin vɛlɛ Fuɲa nuu. Nduyɛ sunsun, la sinà ndu, la ce ndu.»

⁸Mí Filipe dimul ndu aa: «Maalii, cɔm naa Fuɲa nɔm mì n hini kɔl.»

⁹Mí Yeesu dimul ndu aa: «O co lɛhau le naa n co latulu naa niaa le Filipe, yee a kon kpede a sina vɔ ya le? Vana ce ya pɛ, mɛɛ Pua o ce lende ni. Le yɛɛ n co yɛ vɛlɛ dimio aa: ‹Cɔm naa Pua›?

¹⁰A laalan maa i co Pua nin, mì Pua va ya nin te? Sɔɔn ya co niaa dimullo-on, o co a ba ni le. Pua co ya nin-ndo co dɛnnda ndɔlan tosaa ni.

¹¹La làálán ya le tùú ya co dimio maa i co Pua nin, mì Pua va ya nin-ndo. Te kon te, la làálán le dɛnnda ya tosa lan.

¹²I co niaa toɲaa dimul kpendekele, vana laalan ya pɛ, ndu bɛɛ tosanin dɛnnda ya co tosaa lan. O tosanin bɛɛ la hiow lan-ndan, kani ya, i co kɔnndan o Pua lo.

¹³Ɲɛ-ɲɛ niaa ɲunanin o diola nilan, i tosanin kon, haliko mi Pua sɔla biiloo o Poo nin.

¹⁴Te la ɲuna pɛ ɲɛ o diola nilan, i tosanin ndu.»

¹⁵«Te la kaola ya pɛ, mɛɛ la biinin sɔɔn ya co niaa dimullo-on,

¹⁶o kon, i piɛinin Pua, mò ke niaa vana ɲɔɔlaa celen, o vanin niaa ikɛi le lɔ́ɔ́-lɔ́ɔ̀-o:

¹⁷ndu co Kɔl toɲaa ni, o ceendo nɔlà sɔla loo, kani o co ndu cɔ le, o sina ndu le. Kɛ niaa la sina ndu, kani o co niaa ikɛi, o vanin niaa nin.

¹⁸I mɛinin niaa n'víí le, i co niaa muungu o ibuŋ.

¹⁹O lo ɲɛ-pɔmbɔ, ceendo ci lɛnin ya le, kɛ niaa, la canin ya, kani i co yoomu, niaa bɛɛ la vanin yoomu.

²⁰Paale len, la sinanin maa ya, i co Fuɲa nuu nin, mì niaa va ya nin, mì ya va niaa nin.

²¹Vana co tɔŋnda nilan mandanndo o kɔl mò va kelaa lecoo-o, ndu kaola ya ni. Vana kaola ya pɛ, Fuɲa nuu kaolanin ndu, ya bɛɛ i kaolanin ndu mì cɔmnun ndu.»

²²Mí Yuda (o co Iskariɔt le) ɲuna ndu aa: «Maalii, le yɛɛ n co yɛ mɛi ceendo cɔmnɔnndo mà cɔmnun naa?»

²³Mí Yeesu mulul ndu aa: «Te vanndo kaola ya pɛ, o biinin sɔɛi nii, mì Fuɲa nuu kaola ndu. N hunnin o vana kon-ndo, mì n kila calta naalan o ndu lo.

²⁴Vana kaola ya le, ndu bii sɔɔn nun te. O co o ya pila nin te sɔɛi niaa co hee ya tueyɔɔ dimio-e co fulaa le, kɛ Pua vem ya-o o ba i co fulaa ni.

²⁵Le mɛɛ ya co vɔ niaa ikɛi yɛ ya co niaa hee dimullo ni.

²⁶Kɛ vana ɲɔɔlaa, Hala Kɔl-Diandaa Pua yɔŋnin o diola nilan-ndo, ndu pɛɛkunin niaa dɛnndan kpow, mò yiyalan niaa sɔɔn ya dimul niaa-on kpow.

²⁷I co niaa kɔlɲuloo mel, i co niaa kɔl ni ɲuloo ke. Ya, i kenin niaa ndu mɛɛ ceendo yɔngu yɛ le. Kɔlta niaalan la lààsian mì la buulan te.

²⁸La tuei, mí dimul niaa maa i co lakɔnnɔn mì muungu niaa o ibuŋ. Te la kaola ya pɛ, mɛɛ la dɔawnunnin ɲaale le kɔla ya co o Pua lo lan, kani Pua hiow ya vaa o bɔɔ ni.

²⁹I dimul niaa pɔɔ sɔɔn mun lɔ́ɔ́ pá n tiiya, haliko mi la laalan telen n tosannin-ndo.

³⁰I suu lɛnin sɔɔn bɔɔ o niaa lo le, kani vana co masalen tosaa o ceendo ho coo-o co hunɔɔ. O nɔ kpaaya ya coo le.

³¹Kɛ haliko mi ceendo sina maa i kaola Pua, maa mɛɛ Pua dimul-la yɛ ya co dɛnndan tosaa ni. La cɔn mì n faŋan nanu!»