Read Kissi Nsaŋ 17 Bible Online

Nsaŋ 17 - Kissi bible

Nsaŋ 17

¹Yeesu ciiyo sɔɛi lende, mó heelu hɔlla o halataala, mó dimi aa: «Pua, telenndo tiiya. Biilu Po nɔmndo haliko mi Poo biilu nɔm,

²maa mɛɛ n ke ndu kpaayaa ɲɔɔn kpow coo yɛ, haliko mo ke vanaa n ke ndu-a kpow yoomu fɛɛn-fɛɛndo.

³Nduyɛ, yoomu fɛɛn-fɛɛndo sɔlaa, kon co nɔm sinaa ni, nɔm co Hala kpeekpeiyo nɔm pilɛ kpé-o, a vana n vem-ndo vɛlɛ sinaa, Yeesu Krista pɛɛn.

⁴I biilu nɔm o lɛŋnden coo, mí i cii vali n ke ya le tosaa-o tosa.

⁵Lelan Pua, biilu ya nɔm pila ikɛi, maa biilu naa n va paandu nin naa ŋiɔn lɔ́ɔ́ pá mi ceendo fula-o.

⁶I cɔm vanndacieea n cua o ceendo nin, má sɔaa ya o ba-a diola nɔmndan. Le nɔm nda va ni, má ke ya nda, má bii sɔɛi nɔmnde.

⁷Nihau a sina maa ɲɛ-ɲɛ n ke ya, nɔm o ba o fula ni.

⁸Kani i ke nda sɔɔn n ke ya-on, má cɛl mun. Má sina lekɛ́ndɛi maa o nɔm ndo ya fula ni, má bii bila maa nɔm vem ya ni.

⁹Le nda ya co nɔm piɛiyo ni. O co le ceendo le ya co piɛilen te, kɛ le vanaa n ke ya-a, kani le nɔm nda co ni.

¹⁰Ɲɛ-ɲɛ co pɛ le ya, le nɔm o co ni, ɲɛ-ɲɛ co pɛ le nɔm, le ya o co ni. O nda nin ya co biiloo sɔlaa ni.

¹¹I co lɛ va o ceendo coo le, kɛ nda co vɔ va o ceendo coo. Ya i co hunɔɔ muungu o nɔm ndo. Fuɲa ni diandaa, manda nda o diola nɔmndan, diola n ke ya lan, haliko ma va ɲɛ pilɛ maa mɛɛ naa n co ɲɛ pilɛ naa ŋiɔn yɛ.

¹²Telen ya va latulu a nda-o, i va vanaa n ke ya-a mandaa o diola nɔmndan. Mí handu nda hɔlten coo, o pilɛ bɛɛ laasian te, fɔ o sɔɛi ndɔɛi ndíì sɛvan maa o co laasian-ndo, haliko mi sɔɛi ndíì sɛvan ken-nde ndíì peelun.

¹³Nihau, i co kɔlan o nɔm ndo, nduyɛ mɛɛ mì soo o ceendo coo, haliko mi kɔlta ndalan la pɛ a ɲaaloo mɛɛ kɔl nuu co o piaa a ɲaaloo yɛ.

¹⁴I ke nda sɔɛi nɔmnde, mí ceendo kɛɛ nda, kani a co le ceendo le, maa mɛɛ ya pila i co le ceendo yɛ.

¹⁵I co nɔm piɛi mà faŋa nda o ceendo coo le, kɛ mà manda nda le Vana vɔɔndo.

¹⁶A co le ceendo le, maa mɛɛ ya co le ceendo yɛ.

¹⁷Dindi nda a toɲaa: sɔɛi nɔmnde co toɲaa ni.

¹⁸Maa mɛɛ n vem ya o ceendo coo yɛ, ya bɛɛ i vem nda o ceendo coo.

¹⁹Ya pila i yɔngun le nda, haliko mi nda bɛɛ yɔngun nɔm o toɲaa nin.

²⁰O co ko le nda daama le ya co piɛiyo le, kɛ le vanaa laalannin ya o sɔɛi ndɛi kɔɔli-a bɛɛ.

²¹Màá nda kpow a va ɲɛ pilɛ maa nɔm, Pua, a co o ya nin, mì ya i va o nɔm nin, maa nda bɛɛ va o naa nin, haliko mi ceendo laalan maa nɔm vem ya ni!

²²Ya yɛ, i cii nda biilu n yɔngu ya-o yɔngu, haliko ma va ɲɛ pilɛ maa mɛɛ naa n co ɲɛ pilɛ naa ŋiɔn yɛ.

²³I vanin nda nin mɛɛ nɔm co ya nin yɛ, haliko ma va ɲɔɔ ndu pilɛ kpé, mì ceendo sina maa nɔm vem ya ni, maa a yeema nda mɛɛ n yeema ya yɛ.

²⁴Pua, i yeema mì vanaa n ke ya-a bɛɛ va naa ndaa latulu nɛɛ ya co-a, haliko ma mɛɛndian biilu nuu, o n ke ya-o pɛɛn, kani lɔ́ɔ́ pá mì ceendo cɔawnun, nɔm óò kaola nin ya.

²⁵Pua Sandaa, ceendo sina nɔm te, kɛ ya, i sina nɔm, vannda sina maa nɔm vem ya ni.

²⁶I cɔm nda diola nɔmndan, i cɔmnin nda lan vɛlɛ, haliko mi kaola n nɔ le ya-o va nda nin, o kon mì ya i va nda nin.»