Read Kissi Nsaŋ 18 Bible Online

Nsaŋ 18 - Kissi bible

Nsaŋ 18

¹Yeesu ciiyo sɔɛi lende, mó fula latulu nda kaandeŋaa ndɔa le kɔlan o bóllo Sedrɔn leeloo, nɛɛ nakɔɔ pum va-a. Má kɔ luɛi lenin nda ndaa.

²Yuda va ndu malɔɔ vannda o ba-o ndóò sina fonda kon, kani Yeesu ndóò kɔa lon cuɛi-cuɛi nda kaandeŋaa ndɔa.

³O kon, mí Yuda sim vanaa cɔwva a kpalilaa cumulaa bolii vanaa-solia-lasálàá nda Faliisia vem ndua laci, má kɔa lon a tɛngɛlan, a fitinalan a á ɲɛm cɔwvon o laba.

⁴Yeesu ndóò sina nin dɛnnda va ndu hunɔɔ yɔŋnɔn ndan kpow. Lelan, mó sɔɔnguu, mó ɲuna nda aa: «Nɛ̀ɛ́-nɛ̀ niaa co yɛ nuwviaa?»

⁵Má mulul ndu aa: «Yeesu Nasarɛt.» Mó dimul nda aa: «Ya ni!» Yuda va ndu malɔɔ vannda o ba-o va isisi nda ndaa.

⁶Yeesu dimullo nda lende aa ya ni, má muungu a makɔɔ, má deli lɛŋ.

⁷Mó ɲuna nda vɛlɛ aa: «Nɛ̀ɛ́-nɛ̀ niaa co yɛ nuwviaa?» Má mulul ndu aa: «Yeesu Nasarɛt.»

⁸Mí Yeesu mulul nda aa: «I cii niaa nihau dimul maa ya ni. Te ya niaa co yɛ nuwviaa ni, mɛɛ la mal vanaa tɔ̀a kɔnndan.»

⁹Hee yɔŋnun haliko mi sɔɛi ndóò dimi-e peelun aa: «Vanaa n ke ya va kpow, o pilɛ bɛɛ i mel te.»

¹⁰Simɔn Piɛr ndóò nɔ mɔɛi cɔwve o ba, mó nan ndi, mó kialu buɛi bolle vanaa-solia-lasálàá nile ba kɛndɛlen. Buɛi kalaa diolan Malkis.

¹¹Mí Yeesu dimul Piɛr aa: «Mingi mɔɛi nɔmii cɔwve o boo ndɔɔ nin. Vɛ̀ɛ̀ ya kɛɛ yɛnin kolɔɔ o taala kólaa imɔnɔ Fuɲa nuu ke ya le kolɔɔ lenin-ndo nin?»

¹²Mí kunda vanaa cɔwva, vana va nda bollen-ndo a vanaa kándà masaa-a o Yuifia tɛɛn a bii Yeesu, má yii ndu.

¹³Má kɔa fɔlɔn a ndu o Anɛɛ lo. Kani Anɛɛ kon va lefoo Kaif va vɔsi kon bolle vanaa-solia-lasálàá-o ni.

¹⁴Kaif kon yɛ, ndóò dimul simlacia Yuifia ni aa: «O co fisa mì vana pilɛ vi le lɛŋnden kpow.»

¹⁵Mí Simɔn Piɛr nda kaandennɔ celen va kɔlan Yeesu kɔɔli. Bolle vanaa-solia-lasálàá ndóò sina kaandennɔ kalaa taw. Mí kaandennɔ kon kɔa Yeesu kɔɔli o bolle vanaa-solia-lasálàá lo bɛɛ.

¹⁶Kɛ mí Piɛr lo o bɛ́ɛ̀ o dioo ikɛi. Mí kaandennɔ bolle vanaa-solia-lasálàá ndóò sina kon-ndo fula, mó dimul buɛi laandu va dioo cumullo-o le Piɛr lueiyo.

¹⁷O kon, mí buɛi laandu va kon dioo cumullo-o ɲuna Piɛr aa: «Vɛ̀ɛ̀ nɔm bɛɛ co vana pilɛ o kaandeŋaa ndɔa tɛɛn te?» Mí Piɛr vuunun aa: «Ɛ-ɛ, o co ya le!»

¹⁸Mí buɛiya a kpalilla mɛndul yinnden, má va hangɔɔ le hoeyii va-e. Mí Piɛr bɛɛ sim hangɔɔ nda tɛɛn.

¹⁹Mí bolle vanaa-solia-lasálàá va Yeesu ɲuuniaa le kaandeŋaa ndɔa a le pɛɛkuula o va yɔngoo lan.

²⁰Mí Yeesu mulul ndu aa: «Kpendekele ya va sɔɛi o vannda kpow lo ni. Lɔ́ɔ́-lɔ́ɔ̀, i va vannda pɛɛkoo o cɛila lekaanndan a o Cɛi-Hala-o nin nɛɛ Yuifia kpow bɔɔŋian-nda. I dímí ɲɛ-ɲɛ o vionnɔn nin te.

²¹Le sabu yɛɛ nɛ n co yɛ nin ya ɲunaa ho? Ɲuna vanaa tuei diomnda ya dimi lan-nda. Nda sina ɲɛ ya dimi-o.»

²²Mɛɛ Yeesu dimi lende, mí vana pilɛ o kpalilaa cumulaa va lon-nda tɛɛn soli baa, mó lɔaa ndu kpaŋnde, mó dimul ndu aa: «Nuaa n mulul bolle vanaa-solia-lasálàá ni?»

²³Mí Yeesu dimul ndu aa: «Te diom vɔɔndo ya dimi ni, mɛɛ cɔm ndɔ diom vɔɔn kon. Kɛ te i caa yɛ pɛ sɔɛi, mɛɛ le kɔlɔ yɛɛ n lɔɔ yɛ niko ya?»

²⁴Yeesu lo o yiyaa lende, mí Anɛɛ hivi ndu o Kaif bolle vanaa-solia-lasálàá lo.

²⁵Simɔn Piɛr lo isisi hangɔɔ, má ɲuna ndu aa: «Nɔm bɛɛ kaandennɔ ndɔɔ pilɛ le n co le?» Mó muli aa: «O co ya le.»

²⁶Mí buɛi bolle vanaa-solia-lasálàá pum, o Piɛr kelu vanayɛi ndɔɛi nilen-ndo ɲuna ndu aa: «O co nɔm te ya ce o nakɔɔ nin niaa ndaa le?»

²⁷Kɛ mí Piɛr vuunun vɛlɛ. Fɔ́ɔ́fɔ̀, mí sɔɔ koova.

²⁸Idiiyo púŋ, má can a Yeesu o Kaif lo, má hiaw a ndu o cɛi lemasa masa ibunga Rɔmnda. Kɛ Yuifia pila luei o cɛi lemasaa nin te. Haliko a nɔɔlian te, o kon mi ndáà de ɲɛdiaa kafo-hiavaa-coo.

²⁹Mí Pilate fula o dio, mó ɲuna nda aa: «Sɔɛi yɛɛ nɛ langbanɔɔ ho tɛɛmbuu yɛ mì la hun a ndu?»

³⁰Má mulul ndu aa: «Te ndóò tɛɛmbuu isɔɔ le, n ve hunɔɔ a ndu o nɔm ndo le.»

³¹O kon mí Pilate dimul nda aa: «Mɛɛ niaa pila kɔ a ndu mì la kelu ndu iyama mɛɛ tɔŋ niaa co yɛ.» Mí Yuifia mulul ndu aa: «Di co naa o kennan mì n kelu iyama le vanaciee diyɔɔ le.»

³²Ken yɔŋnun haliko mi sɔɛi Yeesu ndóò dimi a piɔ́m ndɔɔ o kɔɔ-e ndíì peelun.

³³Mí Pilate muungu o cɛi lemasaa nin, mó veelu Yeesu, mó ɲuna ndu aa: «Vɛ̀ɛ̀ nɔm co masa Yuifia ni?»

³⁴Mí Yeesu muli aa: «Mò va maa nɔm pila yiyan lende ni baa, vannda dimul nɔm lende a ya o kɔɔ ni?»

³⁵Mí Pilate mulul ndu aa: «Mò va maa Yuifinɔɔ ya co ni? Vanaa nɔmnda a bolii vanaa-solia-lasálàá hin a nɔm o ya lo ni. Yɛɛ n tosa yɛ?»

³⁶Mí Yeesu muli aa: «Masale nilen le co o ceendo coo nanu le. Te masale nilen léè va pɛ o ceendo ho coo, buɛyaa niaa va isisi le ya. Ndáà cɛlnin mì ndáà hin a ya o simlacia Yuifia lo le, kɛ sunsun masale nilen le co ɲɛ vaa ceen nanu le.»

³⁷O kon mí Pilate ɲuna ndu aa: «Mɛɛ masaa n co lekɛ́ndɛi ni?» Mí Yeesu muli aa: «Nɔm pila cii dimi, masaa ya co ni. Lelan ya velun ni mí hun o ceendo coo, haliko mi tɛnda seile toɲalen. Vana-vana yeema pɛ toɲaa, ndu bii sɔɛi nii ni.»

³⁸Mí Pilate ɲuna ndu aa: «Yɛɛ co yɛ toɲaa?» Pilate ciiyo dimio lende, mó fula vɛlɛ o dio, mó komal Yuifia hin a Yeesu-a, mó dimul nda aa: «Ya i ci tɛɛmbuu oo tɛɛmbuu vana yaala langbanɔɔ ho le.

³⁹Kɛ naamu niaa co ni, mì solul niaa vana kaasoo pilɛ, mì mal ndu o kafo-hiavaa-coo coo. Vɛ̀ɛ̀ la yeema mì i mel niaa masa Yuifia?»

⁴⁰Má yonda aa: «Kaali, o co ndu le! Mel naa Barabas!» Nduyɛ, vana del vannda coo-o Barabas kon va ni.