Read Kissi Nsaŋ 19 Bible Online

Nsaŋ 19 - Kissi bible

Nsaŋ 19

¹O kon mí Pilate yɔngu Yeesu, má lɔaa ndu a kɔlulen.

²Mí vanaa cɔwva lɔa mɔsil lemasaa a yɔɔn, má vow Yeesu ndu o lebol. Má vow ndu doma siaŋa sɔɔtɔtɔɔ.

³O kon kɔɔli, má va ndu kɔlan o hɔl a ndu dimullo aa: «Masa Yuifia isɛ!» Má va ndu kpaŋndon lɔɔ.

⁴Mí Pilate fula vɛlɛ o dio, mó dimul Yuifia aa: «La yaŋ ndɔ nilan, i co niaa ndu solul o bɛ́ɛ̀ haliko mi la sina maa i ci ɲɛ-ɲɛ vɔɔn o tosa le.»

⁵O kon mí Yeesu fula. Mɔsil lemasa n'yɔɔ va ndu o lebol. Doma siaŋa sɔɔtɔtɔɔ bɛɛ va ndu lekɔɔ. Mí Pilate dimul nda aa: «Má cè langbanɔ kalaa se!»

⁶Kɛ bolii vanaa-solia-lasálàá a kpalilla cɔw ndu dɔ́ɔ́, má yonda aa: «Baŋ ndu o yɔm singafilaa coo! Baŋ ndu o yɔm singafilaa coo!» Mí Pilate dimul nda aa: «Niaa pila kɔ baŋ ndu o yɔm singafilaa coo. Kani ya ya, i ci tɛɛmbuu kɛ́-kɛ̀ vana yaala ndu le.»

⁷Mí Yuifia muli aa: «N nɔ tɔŋndo, o tɔŋ naa kon nin, o bɛnda mò sɔla piɔ́mndo, le siingɔn o siingun ndu pila Po Hala-o-o.»

⁸Pilate tueyɔɔ lende, mí siòònde cɔɔlu ndu biyɔɔ,

⁹mó muungu o cɛi lemasaa nin, mó kɔ ɲuna Yeesu aa: «Kuɛɛ nɛ n fula yɛ?» Kɛ Yeesu mulul ndu le.

¹⁰O kon mí Pilate dimul ndu aa: «A co ya mulul te! Vɛ̀ɛ̀ a sina le maa i nɔ dí mì mal nɔm, mà kɔɛnnun, te kon te mì baŋ nɔm o yɔm singafilaa coo le?»

¹¹Mí Yeesu muli aa: «A nɔ kpaaya kɛ́-kɛ̀ ya coo le, te o co mò kennun nɔm fulaa o halataala le. Lelan, vana mal-la nɔm o ba-o hiow tɛɛmbuu a nɔm.»

¹²Kandɔɔ o telen kon, mí Pilate va nɛilan nuwviaa le Yeesu malɔɔ, kɛ mí Yuifia yonda o lepilɔɔ aa: «Taa mal pɛ langbanɔɔ ho kɔnndan, mɛɛ a co caaŋoo Sesar le. Vana-vana cennun pɛ ndu pila masaa, mɛɛ yaamɔɔ Sesar ndu co ni.»

¹³Pilate ciiyo sɔɔn mun tueyɔɔ, mó soli Yeesu o dio, mí ndu Pilate cal o fonda kialaa n'yama ndaa coo, o bɛ́ɛ̀ lapowvo. Fonda kon diolan o hebrei nin aa Kabata.

¹⁴Kafo-hiavaa-coo va o siɔdii-o, a telen paalen o pol kínɛí, mí Pilate dimul Yuifia aa: «Má cè masa niaa!»

¹⁵Kɛ má deŋi o lepilɔɔ aa: «Faŋa naa ndu o hɔl! Faŋa naa ndu o hɔl! Kɔ baŋ ndu o yɔm singafilaa coo.» Mí Pilate ɲuna nda aa: «Vɛ̀ɛ̀ mì baŋ masa niaa o yɔm singafilaa coo?» Mí bolii vanaa-solia-lasálàá muli aa: «Naa n nɔ masa celen o Sesar kɔɔli le.»

¹⁶O kon mó ke nda ndu le ndu baŋɔɔ o yɔm singafilaa coo. O kon, má kɔa a Yeesu.

¹⁷Mí Yeesu pila cua yɔm singafilaa ndɔɔ cɔnɔnndo o kobio nin le kɔlan o fonda nda veelu aa: «Kɔlkota-o» (kon co dimio ni aa: «Fonda Lakpokpoo»).

¹⁸Lon nda baŋ Yeesu o yɔm singafilaa coo ni. Má baŋ vɛlɛ langbaa pum nda ŋiɔn Yeesu o kpengun miunndon coo, mí ndu va nda tɛɛn.

¹⁹Mí Pilate dimi maa a sɛva o pɛngɛi pɔmbɔɛi pum coo aa: «Yeesu fula Nasarɛt-o, masa Yuifia.»

²⁰Mí Yuifia bɔɔ-bɔɔ dimi sɛva kon, kani nɛɛ ndáà baŋ Yeesu o yɔm singafilaa coo-a ve levil a kobio le. O hebrei nin, o latɛnnde nin a o krɛkiei nin ndáà sɛva sɛva kon ni.

²¹Mí bolii vanaa-solia-lasálàá Yuifia dimul Pilate aa: «Sɛva aa masa Yuifia le, kɛ sɛva aa o dimi aa ndu co masa Yuifia ni.»

²²Mí Pilate mulul nda aa: «I cii nin ɲɛ ya sɛva-o sɛva.»

²³Vanaa cɔwva ciiyo Yeesu baŋɔɔ o yɔm singafilaa coo, má cua volɔɔla ndɔla cuɛinanndan, má piɔw lan kundalan tan hiɔɔlu, vana cɔw kɛ́-kɛ̀ kundaa pilɛ. Má cua vɛlɛ doma ndɔ lebɛngoo, ndóò nɔ sɔndɔɔ le, kandɔɔ lebɛngu háá lecoo, ɲɛ pilɔɔ kpé o va ni. Má dimulan aa:

²⁴«N sɛɛsian ndu le, n malnun siondei, le sinaa vana nɔnin ndu-o.» Ken tosan, haliko mi o dimin o Sɛbɛ Hala-o nin-ndo ndóò peelun aa: «A co volɔɔla nilan piɔvanndo nda pila tɛɛn, a co siondei malɔɔ le doma ni lebɛngoo.» Lende vanaa cɔwva tosa ni.

²⁵Kalaa Yeesu, pɔmbɔɔ kalaa Yeesu, a Mari lanɔɔ Kulopas a Mari fula Makadala-o va isisi o yɔm singafilaa Yeesu-o ikɛi.

²⁶Yeesu cɔu kala ndɔ, mó ca kaandennɔ ndóò kaola-o isisi ndu ikɛi, mó dimul kala ndɔ aa: «Vuɛɛndo, má cè po nɔmndo.»

²⁷O kon kɔɔli, mó dimul kaandennɔ kon aa: «Má cè kala nɔm!» Kandɔɔ nin a telen kon, mí kaandennɔ kalaa kɔa a ndu o ndu lo.

²⁸O kon kɔɔli, mɛɛ Yeesu sina maa o cii baala ndɔɔ kpow, mó dimi aa: «Kolɔɔ bii ya.» Haliko mi ɲɛ Sɛbɛ Hala-o dimi-o peelun.

²⁹Kpángàá pum va lon o piaa cá a mɔima vaalɛiyan, má sɔaa ɲɛ fuɛn-fuɛɛndo pum o sionnde hisɔp, má yin o mɔima man nin, má yulu Yeesu o sondo.

³⁰Yeesu sɔsaa mɔima man, mó dimi aa: «Ɲɛ-ɲɛ cuu peelɔn!» O kon mó landu bollen, mó malnun kɔl.

³¹Paale pɛngiaalen le va diimandɔɔ ni. Nduyɛ Yuifia ndáà yeema mì vanaa vílɛ́yaa kan ndáà lo lende o yɔmii singafilɛi coo o paale pɛngiaalen coo le, kani paale sɔvɛlen pila paale len le va ni. Má kɔ ɲuna Pilate le nda pelon yimiyimio le nda faŋaa lon.

³²O kon mí vanaa cɔwva hun yimi vana tasoo pelon, vanaa nda baŋ Yeesu tɛɛn-nda pɛɛn, má yimi vɛlɛ o pilɔɔ pelon.

³³Kɛ ndáà tiiyaa o Yeesu lo, má ca maa o vinnun nin, a yimi lɛ ndu n'pelu le,

³⁴kɛ a kon kpow, mí vana cɔwvo pilɛ cuku ndu lungbuei a bállo, mí mɛnndan ma fula ma bingulanndan a koovan.

³⁵Mí langbanɔ ce man-ndo timbi seilen, seile ndɔlen le co toɲa. Ndu sina maa toɲaa o co dimio ni, o co ndi dimio haliko mi niaa bɛɛ laalan.

³⁶Ken yɔŋnun, haliko mi sɔɛi co o Sɛbɛ Hala-o nin-nde peelun aa: «Paa ndɔɔ pilɛ bɛɛ yomnin te.»

³⁷O co vɛlɛ o sɛvaa o Sɛbɛ Hala-o nin aa: «Vannda heelunin hɔlla mà tofa vana nda cuku-o.»

³⁸O kon kɔɔli, mí Yosɛf fula Arimatee-o kɔ ɲuna Pilate maa o cɛl mò tuisi dialun Yeesu-on. Mí Pilate cɛl, mó kɔ faŋa dialun Yeesu-on. Yosɛf kon bɛɛ kaandennɔ Yeesu-o o va ni, kɛ o vionnɔnndo nin, kani siòònde va ndu a Yuifia.

³⁹Mí Nikodɛm ndóò kɔɛ o Yeesu lo icɔllo-o bɛɛ kɔa a ɲɛm cun kɛndɔn le kilolan beleyaa, mirt a aloɛs pɛɛn.

⁴⁰Má cua dialun Yeesu-on, má simbul mun o kolala n'pɛngɛlan nin a ɲɛm cun kɛndɛn mun latulu, maa mɛɛ naamu Yuifia va le vanvílɛ́iya kumbɔɔ yɛ.

⁴¹Nduyɛ nakɔɔ pum va nɛɛ ndáà baŋ ndu-a, sɛi sɛnɛi ndáà kumbu vɔ vana lenin too va o nakɔ kon nin.

⁴²Sɛi kalaa ve levil te, nduyɛ paale bɛɛndiannden le va ɲinkon le Yuifia le paale pɛngiaalen ni, le hee má kɔ kɛsi Yeesu lon.