Read Kissi Nsaŋ 21 Bible Online

Nsaŋ 21 - Kissi bible

Nsaŋ 21

¹O kon kɔɔli, mí Yeesu cɔmnun vɛlɛ kaandeŋaa ndɔa, o dalaa Tiberiade kɔngɔ. Mɛɛ o cɔmnun nda yɛ co hoo ni:

²Simɔn Piɛr, Tomas, o ndáà veelu aa Didim-ndo, Natanaɛl fula Kana o tàndá Kalile-o nin-ndo, poaa Sebedee-a, a kaandeŋaa ŋiɔŋaa celen a va nɛɛ pilɛ.

³Mí Simɔn Piɛr dimul nda aa: «I co lan yɔɔyaa.» Má dimul ndu aa: «N kɔnnun naa niaa.» Má fula, má luɛi o dɛ̀ndɔ̀ɔ́ nin. Kɛ icɔl kon pii a bii ɲɛ-ɲɛ le.

⁴Paalen siɔu, Yeesu va o kɔngɔɔ coo, kɛ kaandennda ve sina maa Yeesu le.

⁵Mí Yeesu dimul nda aa: «Poaa la sɔla pá ɲɛ le dioo?» Má mulul ndu aa: «Ɛ-ɛ.»

⁶Mó dimul nda aa: «La vuu yalaa dɛ̀ndɔ̀ɔ́ o ba kɛndɔɔ coo, mì la soli.» O kon má vuu yalaa, mí suwva luɛi taw-taw, a ve le ndu nɔla solio le.

⁷O kon mí kaandennɔ Yeesu ndóò kaola-o dimul Piɛr aa: «Maalii ni se.» Simɔn Piɛr tueyɔɔ dɔ́ɔ́ maa Maalii ni, mó vownun volɔɔla ndɔlan, kani kɔɔle fondo o va ni, mó del o mɛnndan nin.

⁸Mí kaandeŋaa tɔ̀a nda va hunɔɔ o dɛ̀ndɔ̀ɔ́ nin a yalaa nanɔɔ a suwva lenin, kani a ve kɔngɔɔ levil te, sɔngɔ dunndo kɛmɛ lediin va nda tɛɛn a kɔngɔɔ ni.

⁹Ndáà tolɔɔ lɛŋ, má ca yinnde ladɛngulten, suwvo a buloo va lecoo.

¹⁰Mí Yeesu dimi aa: «La hun a suvaa niaa langa cua kan-nda.»

¹¹Mí Simɔn Piɛr hel o dɛ̀ndɔ̀ɔ́ nin, mó nan yalaa lɛŋ, suvaa bɛndua kɛmɛ beleŋuɛɛnu a yaa va a piaa lenin ni, kɛ a sɛ́lɛ́ bɛndu nda va kon lenin-ndo kpow, yalaa sɛɛsa le.

¹²Mí Yeesu dimul nda aa: «La hun dio.» O kaandeŋaa ndɔa tɛɛn, vana-vana tɔɔndan mò ɲuna ndu vana o co-o le, kani a va sinaa maa Maalii ni.

¹³Mí Yeesu sɔɔnguu, mó cua buloo, mó ke nda ndu, mó ke nda vɛlɛ suwvo.

¹⁴Kabi Yeesu muungu yoomu fulaa vanvílɛ́iya tɛɛn, kon yɔŋnun bɛmbɛ yàándɔɔ le Yeesu kaandeŋaa ndɔa cɔmnɔnndo ni.

¹⁵Ndáà ciiyo dioo, mí Yeesu ɲuna Simɔn Piɛr aa: «Simɔn po Yonas-o, vɛ̀ɛ̀ a kaola ya pá hiovɔɔ mɛɛ haa kaola ya yɛ?» Mó mulul ndu aa: «Oi Maalii, a sínà maa i kaola nɔm.» Mí Yeesu dimul ndu aa: «Landu hɔlla saa cuavaa nia coo!»

¹⁶Mó ɲuna ndu vɛlɛ ɲuna diinndɔɔ aa: «Simɔn po Yonas-o, vɛ̀ɛ̀ a kaola ya pá?» Mí Piɛr mulul ndu aa: «Oi Maalii, a sínà maa i kaola nɔm.» Mí Yeesu dimul ndu aa: «Va vana mandaa saa nia.»

¹⁷Mó ɲuna ndu o yàándɔɔ aa: «Simɔn po Yonas-o, vɛ̀ɛ̀ a kaola ya pá?» Mí kɔllo tambu Piɛr le peelu Yeesu peelu ndu sɔɛi ken ɲunaa bɛmbɛ leyáá-o. O kon mó mulul ndu aa: «Maalii, a sínà dɛnndan kpow, a sínà maa i kaola nɔm.» Mí Yeesu dimul ndu aa: «Landu hɔlla saa niaa coo.

¹⁸I co nɔm toɲaa dimul kpendekele, telen n va felengi-o, nɔm pila va yáwlen yiinɔnndo ni, mà va kɔlan nɛɛ nɔm óò yeema-a, kɛ telen n yuuvanin-ndo, a siɛndinin balan mì vana celen yii nɔm yáwlen, mò kɔɛ a nɔm nɛɛ n yeemanin te-a.»

¹⁹A mɛɛ Piɛr ndóò sɔlanin piɔ́mndo, mò ke Hala biiloo yɛ o kɔɔ Yeesu va sɔɛi lende ni. Yeesu ciiyo sɔɛi o ndu lo, mó dimul ndu aa: «Del-la kɔɔli!»

²⁰Piɛr mulinndo, mó cannun kaandennɔ Yeesu ndóò kaola-o nda kɔɔli, ó va o sɛɛŋan Yeesu o ibuŋ telen nda va ɲɛdiaa icɔllo dioo mi ndóò ɲuna Yeesu-o aa: «Maalii, nɛ̀ɛ́-nɛ̀ mal-lɛnin nɔm vannda o ba?»

²¹Mɛɛ o ce ndu, mí Piɛr dimul Yeesu aa: «Hoo yɛ Maalii, yɛɛ hun yɔŋnun yɛnin ndu?»

²²Mí Yeesu mulul ndu aa: «Te i yeema pɛ mò lo yoomu háá mi hin, mò va maa mako nɔm co kon ni? Nɔm hun ya kɔɔli tuŋ!»

²³O kon kɔɔli, mí sɔɛi ken tiw vanaa laalannda tɛɛn maa kaandennɔ kon ndu vinin te. Nduyɛ Yeesu ndóò dimul ndu maa o vinin te le, kɛ nuaa ndóò dimul ndu ni aa: «Te i yeema pɛ mò lo yoomu háá mi hin, mò va maa mako nɔm co kon ni?»

²⁴Kaandennɔ co seilen timbio a dɛnnda lan o kɔɔ-o sɛva lan ni. N sinà yɛ maa toɲaa seile ndɔlen le co ni.

²⁵Yeesu tosa vɛlɛ dɛnnda celen taw, te vanáà tɛɛsiaa lan pɛ o sɛvaa nin, i sina le, te sɛbɛla sɔɔn kalan mun sɛvan nin-ndan láà sul o ceendo coo.