Read Kissi Nsaŋ 3 Bible Online

Nsaŋ 3 - Kissi bible

Nsaŋ 3

¹Langbanɔɔ pum va Faliisia tɛɛn, diolan Nikodɛm, simlacinɔ Yuifia pilɛ o va ni.

²Mó hun o Yeesu lo icɔllo, mó dimul ndu aa: «N sina maa vana pɛɛkaa Hala vem-ndo n co ni, kani vana-vana nɔla kaamaala n co lan tosaa lan tosa le, te o co mì Hala va ndu ikɛi le.»

³Mí Yeesu mulul ndu aa: «I co nɔm toɲaa dimul, vana-vana nɔla mò ce masale Hala len te, mɛɛ mò velun violɔn sɛnɛi.»

⁴Mí Nikodɛm dimul ndu aa: «Vɛɛ vanacieo nɔla yɛ vɛlɛ violɔn te o yuuva nin pɛ? O nɔla lɛ muungoo kala ndɔ o dembe mò velun te?»

⁵Mí Yeesu mulul ndu aa: «I co nɔm toɲaa dimul, te vanacieo vilun a mɛnndan, mò velun a Kɔl Hala-o le, o nɔla luɛyɔɔ o masale Hala len nin te.

⁶O velun a falon-ndo, falon ndu co ni, o velun yɛ a Kɔl Hala-o o, kɔllo ndu co ni.

⁷Kɔndɔfili bii nɔm le ɲɛ ya dimul nɔm maa, mɛɛ mà velun violɔn sɛnɛi-yo le.

⁸Nɛɛ hoeiye yeema-a, lon i hɔŋ ni, mà tuei ndi diom. Kɛ a sinà ba i co fulaa-o le, a sinà vɛlɛ ba i co kɔlan-ndo le. Lende koni o co vɛlɛ le vana-vana velun a Kɔl Hala-o ni.»

⁹Mí Nikodɛm ɲuna ndu aa: «Vɛɛ ken i nɔla mì i tosan?»

¹⁰Mí Yeesu mulul ndu aa: «Nɔm co vana pɛɛkaa tɔ́ɔ́ bɛndoo Israɛl-lo, vɛ̀ɛ̀ a co dɛnndan ndan bila biyɔɔ le?

¹¹I co nɔm toɲaa dimul kpendekele, sɔɔn naa n sina-on naa n co dimio ni, mì n va seilen timbio a dɛnnda naa n ce lan o kɔɔ, kɛ la co vɔ seile naalen cɛlɔɔ le.

¹²Te la laalan telen ya co niaa sɔɔn co o lɛŋnden coo-on dimullo le, vɛ̀ɛ̀ niaa laalan yɛnin telen ya dimulnin niaa sɔɔn vaa o halataala?

¹³Vana-vana hel o halataala le, fɔ vana tol fulaa o halataala-o, Po vanacieo pɛɛn.

¹⁴Mɛɛ Moise heelu kɛw idaɲaa o lɛŋnde veselɛilen nin yɛ, fɔ mì Po vanacieo sɔla heeloo lende,

¹⁵haliko vana-vana laalan ndu pɛ, o sɔla cinda fɛɛn-fɛɛndo.

¹⁶Kani Hala kaola ceendo háá mó yɔngu Po ndɔ pilɔɔ, haliko vana-vana laalan ndu pɛ, o kue o ɲánndávàà le, kɛ o sɔla yoomu fɛɛn-fɛɛndo.

¹⁷Kani Hala vim Po ndɔɔ o ceendo coo le ceendo iyama kilul te, kɛ haliko mi ceendo sɔla cindaa ndu o ba.

¹⁸Yamɛi co le vana laalan ndu-o le, kɛ yamɛi vana laalan ndu loo i cuu nin kiolɔɔ, kani o laalan Po pilɛ Hala-o le.

¹⁹Yamɛi ken co yɛ hee ni: Ɲɛ-tengaa hin o ceendo coo, mí vanndacieea kaola ɲumndan hiovɔɔ ɲɛ-tengaa coo, kani dɛnnda ndalan la niŋ te.

²⁰Kani vana-vana va pɛ dɛnɛ vɔɔndo tosaa, nɛyɔn ɲɛ-tengaa va ndu ni, o fula o ɲɛ-tengaa le, yɔŋii dɛnnda vɔɔnnda o co coo lan la fula ceen.

²¹Kɛ vanndo va pɛ dɛnɛ toɲaa tosaa, o ɲɛ-tengaa o fula ni, haliko mi vannda sina kpendekele maa dɛnnda hɛnan Hala lan o co tosaa ni.»

²²O kon kɔɔli, mí Yeesu kɔa nda kaandeŋaa ndɔa o tàndá Yuda-o nin, mó kɔ va lon nda ndaa, mó va vannda yinɔɔ.

²³Nsaŋ bɛɛ va vannda yinɔɔ Enɔn, Salim ikɛi, kani fondala mamɛnndan la va lon taw, mì vannda va kɔlan ndon le yinɔɔ sɔlaa.

²⁴Kani ndáà mel-lɔ Nsaŋ o kaasoo le.

²⁵Mí sɛɛngianndo can kaandeŋaa Nsaŋ-nda tɛɛn nda Yuifinɔɔ pum a dɛnɛ dindinndo o kɔɔ.

²⁶Má kɔa o Nsaŋ-ndo, má kɔ dimul ndu aa: «Kɔɔfa, vana va nɔm hoo ikɛi Yurdɛn peo leeloo, ma timbi seilen a ndu o kɔɔ-o cɛn vannda yinɔɔ, vannda kpow a co kɔlan o ndu lo.»

²⁷Mí Nsaŋ muli aa: «Vanacieo nɔla ɲɛ-ɲɛ sɔlaa le, te o co mì ɲɛ kon yɔngun ndu fulaa o halataala le.

²⁸Niaa pila co ya lesei, mí dimi maa o co ya le co Krista le, kɛ ndu Krista laci nda vem ya ni.

²⁹Vana co lanɔɔ cuaa sɛnɛi-yo, le ndu lanɔ sɛnɛi kon co ni. Kɛ te caaŋoo vana co lanɔɔ cuaa sɛnɛi-yo tuei pɛ ndu vana co kon lanɔɔ cuaa-o sɔɛi, ɲɔɔ hɛnan ndu taw. Lende koni ɲaale bɛndoo co ya o kɔl ni.

³⁰Fɔ mì tɔ́ɔ́ ndɔɔ hel, mì tɔ́ɔ́ nuu tol.»

³¹«Vana fula coocoo-o, ndu hiow vannda kpow, vana co o lɛŋnden coo-o, le lɛŋnden ndu co ni, a sɔɔn co o lɛŋnden coo-on o kɔɔ o soaa ni. Kɛ vana fula o halataala-o, ndu hiow vannda kpow,

³²a ɲɛ o ce mó tuɛi-yo o kɔɔ o co seilen timbio ni, kɛ vana-vana co seile ndɔlen cɛlɔɔ le.

³³Vana-vana cɛl pɛ seile ndɔlen, ndu cɔm maa toɲaa Hala co ni,

³⁴kani sɔɔn Hala-on vana Hala vem-ndo dimi ni, kani taw-taw Hala yɔngu Kɔl-Diandaa ni.

³⁵Fuɲaa kaola Poo, mó sɔaa ndu dɛnndan kpede o ba.

³⁶Vana laalan pɛ Poo, ndu sɔla yoomu fɛɛn-fɛɛndo. Vana kɛɛ pɛ le Poo laalanndo, ndu sɔlanin yoomu kon te, kɛ kɔltuw Hala-o vanin vana kon coo.»