Read Kissi Nsaŋ 4 Bible Online

Nsaŋ 4 - Kissi bible

Nsaŋ 4

¹Yeesu sinaa maa Faliisia tuei maa ndu Yeesu co hiovɔɔ kaandennda sɔlaa le nda yinɔɔ a Nsaŋ,

²nduyɛ o co ndu pila le va yinɔɔ le, kaandeŋaa ndɔa a va vannda yinɔɔ ni,

³mó faŋan Yuda mó muungu Kalile.

⁴Le kɔlan ndon yɛ, mɛɛ mì ndóò kei o tàndá Samari-o nin.

⁵Mó tiiya o kobio pum o tàndá kon nin, diolan Sikar, o yondo Yakɔb ndóò ke Yosɛf po ndɔ-o ikɛi.

⁶Lon soon-kólaa Yakɔb-o va ni. Yeesu sangaa a kɔlan, mó kɔ cal o soon-kólaa kon ikɛi. Paalen le va nin le tiiyaa o pol.

⁷Mí vanalanɔ Samarinɔɔ pum hun mɛnndan kɔndɔɔ, mí Yeesu dimul ndu aa: «Ke ya mɛnndan mì kol!»

⁸Kaandeŋaa ndɔa ndáà kɔɛ ciee le ɲɛdiaa piondɔɔ.

⁹Mí vanalanɔ kon dimul ndu aa: «Nɔm Yuifinɔɔ a piɛi ya mɛnndan le kolɔɔ, ya Samarinɔɔ?» Kani Yuifia nɔ mako a Samaria le.

¹⁰Mí Yeesu mulul ndu aa: «Te nɔm óò sina pɛ ke Hala-o, a vana co nɔm hoo dimullo aa: ‹Ke ya mɛnndan mì kol›-lo, nɔm va ndu mɛmma kolan piɛi ni, mì ndóò ke nɔm mɛmma yɔngu vana cindaa-an.»

¹¹Mí cuaa mulul ndu aa: «Maalii, a nɔ ɲɛ kɔandaa mamɛn te, nduyɛ soon-kólaa yingila. Kuɛɛ nɔm óò fula yɛnin a mɛmma cindaama man?

¹²Mò va maa nɔm hiow Yakɔb fuɲa naa mama ke naa soon-kólaa ho-o ni? Ndu pila kol sindɛ mɛmma soondo ho nda poaa ndɔa a cɔlua ndɔa.»

¹³Mí Yeesu mulul ndu aa: «Vana-vana kol pɛ mɛnndan man, kolɔɔ bii vɛlɛ ndu,

¹⁴kɛ vana kol pɛ mɛmma ya co ndu yɔngu-an, kolɔɔ bii lɛnin ndu lɔ́ɔ́-lɔ́ɔ̀ le. Mɛmma ya co ndu man yɔngu-an ma siŋnunnin pee-lebollo ndu nin, mì mɛmma ndɔan ma kɔɛ háá o cinda fɛɛn-fɛɛndo nin.»

¹⁵Mí vuɛɛndo dimul ndu aa: «Maalii, ke ya mɛmma man, haliko kolɔɔ bii lɛ ya mì hin mamɛn kɔndɔɔ nanu le.»

¹⁶Mí Yeesu dimul ndu aa: «Kɔ veelu pɔnɔ nɔm mà muungu nanu.»

¹⁷Mí vuɛɛndo mulul ndu aa: «I nɔ pɔnɔ le.» Mí Yeesu dimul ndu aa: «A nɔ dí le dimio maa a nɔ pɔnɔ le.

¹⁸Kani a kei piaandua nda ŋuɛɛnu o ba. O n co sisa o ba-o, ndu bɛɛ co pɔnɔ nɔm te. Lelan taa dimi lende pɛ, a dimi toɲa.»

¹⁹Mí vuɛɛndo dimi aa: «Maalii, i ce maa vana-tɛɛngaa-diom Hala-o n co ni.

²⁰O pembei he coo fuɲaa naa biilu Hala ni, kɛ niaa Yuifia co dimio maa Yerusalɛm nɛɛ biilaa Hala-a co ni.»

²¹Mí Yeesu dimul ndu aa: «Vuɛɛndo laalan ya, telenndo co tiiya, la biilu lɛnin Pua o pembei he coo te kon te Yerusalɛm te.

²²Ɲɛ niaa sina loo niaa co biiloo ni, naa naa yɛ, ɲɛ naa n sina-o naa n co biiloo ni. Kani Hala Yuifia o ba cindaa fula ni.

²³Kɛ telen co tiiya, o cuu yɛ nin bɛɛ tiiya, mì vanaa biilaa kpeekpeiya biilu Pua o kɔllo a o toɲaa nin, kani vanaa biilaa vaa lende Pua co nuwviaa ni.

²⁴Kɔllo Hala co ni, lelan mɛɛ mì vanaa co ndu biiloo-a biilu ndu a kɔllo a o toɲaa nin.»

²⁵Mí vuɛɛndo dimul ndu aa: «I sina maa vana Mɛlɛka hɛli-o co hunɔɔ, Krista pɛɛn. Telen o hunnin-ndo, o tɛɛsialnin naa dɛnndan kpow.»

²⁶Mí Yeesu dimul ndu aa: «Ya kpeekpei co ndu ni, ya co hoo sɔɛi o nɔm ndo-o pɛɛn!»

²⁷A lo suukan kon, mí kaandeŋaa ndɔa hun, mí kɔndɔfillo bii nda le ndu komallo sɔɛi nda vanalanɔɔ. Kɛ vana-vana ɲuna ndu le sɔɛi nda va nda cua kon-nde o kɔɔ le.

²⁸Mí cuaa mal niko bonyii ndɔɛi, mó kɔa ciee, mó dimul vannda aa:

²⁹«La hun tofa vɔ langbanɔɔ pum, o cii ya dɛnnda ya tosa lan kpede dimul, o kɛɛ va ndu le co Krista le!»

³⁰Mí vanaa va o kobio nin-nda yom, má kɔa nɛɛ Yeesu va-a.

³¹O telen kon, kaandennda va Yeesu ɲɔɔloo aa: «Kɔɔfa, dio ɲɛdiaa!»

³²Kɛ mó dimul nda aa: «I nɔ ɲɛdiaa nuu, o niaa sina loo.»

³³O kon mí kaandennda va dimulanndo aa: «Mò va maa vanndo ke ndu ɲɛdiaa ni?»

³⁴Mí Yeesu dimul nda aa: «Ɲɛdiaa nuu co hɛnan vana vem ya-o tosaa a vali ndɔɔ siowvo ni.

³⁵Vɛ̀ɛ̀ nuaa le niaa co dimio le maa o lo paangon n'hiɔɔlu le kovɔɔlan tiiyaa. Kɛ ya, i co niaa dimul: la heelu vɔ hɔlla mì la tofa mɛɛ ciɛɔn vesa le kovɔɔ yɛ.

³⁶Vana koavaa co nin bɛɛ salaa sɔlaa, mo va kullon cuungiaa le cinda fɛɛn-fɛɛndo, haliko mi vana saŋaa nda vana koavaa dɔwnun ɲaale latulu.

³⁷Kani toɲaa sɔɛi taloo dimi-e co ni aa: ‹Hoo co saŋɔɔ, mì o pilɔɔ va kovɔɔ.›

³⁸I vem niaa kovɔɔ o ciɛi niaa tosa baala le-i nin, nɛɛ vanaa celen a tosa baalaa-a pɛɛn, o baala nda sanga tosaa-o nin niaa luɛi nuaa ni.»

³⁹Mí Samaria bɔɔ-bɔɔ laalan Yeesu o kobi kon nin le seile cua kon va timbio a ndu o kɔɔ-len aa: «O cii ya dɛnnda ya tosa lan kpede dimul.»

⁴⁰O kon Samaria hunɔɔ o ndu lo, má tɛɛlun ndu le lou nda ndaa latulu. Mó tosa lon palɛi ndii ŋiin.

⁴¹Mí vannda laalan vɛlɛ taw le sɔɛi ndɔɛi,

⁴²má va cuaa dimullo aa: «O co lɛ le ɲɛ n dimul naa-o le naa n laalan te, kani naa pila n tuei, nduyɛ n sina maa ndu co Vana ciindiaa ceendo lekɛ́ndɛi ni.»

⁴³Palɛi ŋiiŋii ken hiovɔɔ, mí Yeesu faŋan ndon le kɔlan Kalile.

⁴⁴Kani mí ndu pila ndóò timbi seilen aa: «Vana-tɛɛngaa-diom Hala-o sɔla biiloo o ndu lo le.»

⁴⁵Ndóò tiiyaa Kalile, mí Kalilea bɔŋa ndu a ɲaaloo, kani ndáà ce nin ɲɛ-ɲɛ ndóò tosa Yerusalɛm o kafoo coo. Bau nda bɛɛ a va o kafo ndáà kɔɛ kon-ndo.

⁴⁶O kon mí Yeesu muungu Kana o tàndá Kalile-o nin, nɛɛ ndóò mangala mɛnndan mɔiyan-nda. Simlacinɔ bɛndoo pum va Kapɛrnaum, po ndɔɔ va a nàá.

⁴⁷Ndóò tuɛyɔɔ maa Yeesu cɛn Yuda mó hun Kalile, mó kɔa o ndu lo, mó tɛɛlun ndu le tolɔɔ Kapɛrnaum le po ndɔɔ singio piɔ́mndo o ba.

⁴⁸Mí Yeesu dimul ndu aa: «Te o co mì la ce dɛnnda kɔndɔfiltan a kaamaalan te, la laalan dɔ́ɔ́ le!»

⁴⁹Mí simlacinɔ bɛndu kon dimul Yeesu aa: «Maalii, keleŋa lakɔ yɔŋii pole nilen le vunnun.»

⁵⁰Mí Yeesu dimul ndu aa: «Kɔ, po nɔmndo muungu yoomu.» Mí langbanɔ kon laalan a sɔɛi Yeesu dimul ndu-e, mó kɔannun.

⁵¹O lo o muungoo, má bɔŋan nda buɛyaa ndɔa. Má dimul ndu maa po ndɔɔ muungu yoomu.

⁵²Mó ɲuna nda telen o yɛlɛma-o. Má dimul ndu aa: «A lɛɛlɛ tasoo o paale yɔngannden ciɛi kpafii dialun tuwvon mal ndu ni.»

⁵³Mí fuɲa ndɔ sina dɔ́ɔ́ maa a telen kon kpeekpei Yeesu ndóò dimul ndu ni aa: «Po nɔmndo muungu yoomu.» O kon, mó laalan Yeesu nda vanaa va o ndu lo cɛinin-nda kpow.

⁵⁴Ndu yɔŋnun dɛnɛ kɔndɔfili diinndɔ Yeesu tósa telen o mal Yuda, mó hun Kalile-o kɔɔli ni.