Read Kissi Nsaŋ 6 Bible Online

Nsaŋ 6 - Kissi bible

Nsaŋ 6

¹O dɛnnda lan kɔɔli, mí Yeesu kɔannun o dalaa Kalile kɔngɔɔ pilɔɔ, o nda veelu vɛlɛ aa Tiberiade-o.

²Mí sɛ́lɛ́ bɛndoo del ndu kɔɔli le singi kaamaa o va vanaa lanàá-o.

³Mí Yeesu hel o pembei coo, mó kɔ cal lon nda kaandeŋaa ndɔa.

⁴Kafo-hiavaa-coo ndóò sɔɔnguu nin, kafo Yuifia pɛɛn.

⁵Yeesu tofaa, mó ca maa sɛ́lɛ́ bɛndoo va ndu kɔlan kɔɔli. Mó ɲuna Filipe aa: «Kuɛɛ naa n piandu yɛnin buloo le vannda ha dioo?»

⁶Nduyɛ le Filipe kɔlɔɔ solio daama ndóò ɲuna lende ni, kani ndóò sina nin ɲɛ o va hunɔɔ tosa-o.

⁷Mí Filipe mulul ndu aa: «N piondu bɛɛ buloo a volin sala vana baalaa le palɛi kɛmɛ lediin-ndon, o tiwnin vannda ha mì nda kpow a sɔla o pɔm-pɔmbɔ le.»

⁸Mí kaandennɔ ndɔɔ pilɛ, Andree puapilɛ Simɔn Piɛr-o dimul ndu aa:

⁹«Poombɔɔ pum nɔ bulula ɔrselan nanu tan ŋuɛɛnu a suwva nda ŋiɔn, kɛ kan co ɲɛ-ɲɛ le sɛ́lɛ́ bɛndu vaa nuaa le.»

¹⁰Mí Yeesu dimi aa: «La dimul vannda mà cal.» Bil puiyaa va o fonda kon taw. O kon má cal, ndáà va le vanpiaandua vàála ŋuɛɛnu.

¹¹Mí Yeesu cua bululan, mó mal balikaa, mó piɔw vanaa va lon-nda lan. Mó tosa vɛlɛ lende a suwva.

¹²Ndáà pumndo, mó dimul kaandeŋaa ndɔa aa: «La mɔɔsiaa bulula bingi-bingila lo lan, haliko ɲɛ-ɲɛ tambu le.»

¹³Má cɔwviaa lan, mí ɲɛla bingi-bingila vannda dema fulaa o bulula ŋuɛɛnula ɔrsela lan nin-ndan la pia kambɛilan tɔ́ a latiɔn.

¹⁴Vanaa kan cɔu dɛnɛ kaamaa Yeesu tosa kon-ndo, má dimi aa: «Vana-tɛɛngaa-diom Hala bɛnda le hunɔɔ o ceendo coo-o kpeekpei co hoo ni.»

¹⁵Yeesu sinaa maa a va ndu hunɔɔ baŋɔɔ mì ndóò siŋnun masaa, mó kɔannun vɛlɛ o pembei coo ndu pilɛ kpé.

¹⁶Paalen delɔɔ, mí kaandeŋaa ndɔa toal o dalaa kɔngɔ di.

¹⁷Má hel o dɛ̀ndɔ̀ɔ́ nin le kɔlan Kapɛrnaum o dalaa kɔngɔɔ pilɔɔ. Ɲumndan maa tol nin, Yeesu ndóò muungu vɔ nda o ibuŋ te.

¹⁸Mí hoeyii fùkù-fùkùei pum i can hɔŋndo, mí mɛnndan ma va biiŋɔnndo.

¹⁹Ndáà kɔlan o mɛnndan coo le kilola ŋuɛɛnu, te kon te kilola ŋɔmpum, má ca Yeesu hunɔɔ a ba dɛ̀ndɔ̀ɔ́ va-o o mɛnndan coo, mí siòònde bii nda.

²⁰Kɛ mí Yeesu dimul nda aa: «Siòòŋii bii niaa le!»

²¹Ndáà yeema le ndu cuaa o dɛ̀ndɔ̀ɔ́ nin, kɛ fɔ́ɔ́fɔ̀, mí dɛ̀ndɔ̀ɔ́ pilan lɛŋnden o kɔngɔ nda va kɔlan-ndo.

²²Diimandɔɔ, mí sɛ́lɛ́ lo o dalaa kɔngɔɔ pilɔɔ-o ca maa dɛ̀ndɔ̀ɔ́ ndu pilɛ kpé va lon ni, nduyɛ Yeesu ndóò luei o dɛ̀ndɛ̀ kon nin nda kaandeŋaa ndɔa le, kaandennda nda pilɛ kpé ndáà kɔɛ lenin ni.

²³Kɛ mí dɛ̀ndɛ̀la celen la fula Tiberiade, mí la hun o fonda Maalii ndóò dɔw buloo duaa mí vannda dia-o ikɛi.

²⁴Sɛ́lɛ́ kon cɔu maa Yeesu nda kaandeŋaa ndɔa a ve lon te, mí nda pila hel o dɛ̀ndɛ̀la lan nin, má kɔa Yeesu nuwviaa Kapɛrnaum.

²⁵Má kɔ saalun ndu o dalaa kɔngɔɔ pilɔɔ, má ɲuna ndu aa: «Vana bɛndoo, telen kuɛɛ n tiiya yɛ nanu?»

²⁶Mí Yeesu mulul nda aa: «I co niaa toɲaa dimul kpendekele, o co le kaamaala niaa ce lan te niaa co ya nuwviaa le, kɛ le bulu niaa de mí la pum-ndo.

²⁷La fafala le ɲɛdiaa nɔla mò tambu-o le, kɛ la fafala le ɲɛdiaa tembu loo, o tosa mi vana va yoomu le fɛɛn a fɛɛn-ndo, o Po vanacieo kenin niaa-o, kani ndu Hala Fuɲaa sui pondale ndɔlen ni.»

²⁸Má ɲuna ndu aa: «Yɛɛ naa n tosa yɛ mi kon va dɛnnda Hala lan?»

²⁹Mí Yeesu mulul nda aa: «Baala Hala-o co ni, mì la laalan vana o vem-ndo.»

³⁰Má ɲuna ndu aa: «Ɔ́ɔ̀ dɛnɛ kaamaa n co tosa haliko mi n ce mi n laalan nɔm-ndo? Ɔ́ɔ̀ dɛnɛ n co tosa-o!

³¹Fuɲaa naa de mane o lɛŋnde veselɛilen nin, maa mɛɛ o co o sɛvaa yɛ aa: ‹O ke nda ɲɛdiaa fula o halataala-o.› »

³²Mí Yeesu mulul nda aa: «I co niaa toɲaa dimul kpendekele, o co Moise le ke niaa ɲɛdiaa fula o halataala-o le, kɛ Fuɲa nuu ke niaa ɲɛdiaa kpeekpei fula o halataala-o ni.

³³Kani ɲɛdiaa Hala-o, ndu co o fula o halataala mó ke ceendo cindaa-o ni.»

³⁴O kon má dimul ndu aa: «Maalii va naa ɲɛdiaa kon keo lɔ́ɔ́-lɔ́ɔ̀.»

³⁵Mí Yeesu dimul nda aa: «Ya, ɲɛdiaa cindaa ya co ni. Vana hin pɛ o ya lo, yima nɛi ndu lɔ́ɔ́-lɔ́ɔ̀ le, vana laalan ya pɛ, kolɔɔ bii ndu lɔ́ɔ́-lɔ́ɔ̀ le.

³⁶Kɛ i dimul niaa ndi: la ce ya, kɛ nduyɛ la laalan te.

³⁷Vanaa kɛ́-kɛ̀ Pua ke ya pɛ, nda hunnin o ya lo, i solinin vɛlɛ vana hin o ya lo-o o dio le,

³⁸kani i fula o halataala mì toal le hɛnan ni tosa le, kɛ le hɛnan vana vem ya-o tosaa.

³⁹Nduyɛ, hɛnan vana vem ya-o co hoo ni, maa vana-vana hialun ya o vanaa o ke ya-a tɛɛn te, kɛ mì tindi nda, mà muungu yoomu o paale mɛɛlaa len.

⁴⁰Hɛnan Fuɲa nuu co kon ni, maa vannda kpow a mulul Poo hɔlla, mà laalan ndu, mà sɔla cinda fɛɛn-fɛɛndo. Ya yɛ, i minginin nda yoomu fulaa vanvílɛ́iya tɛɛn o paale mɛɛlaa len.»

⁴¹Mí Yuifia soaa sɔɔn pɔmbɔn a ndu le tùú o dimi maa ndu co ɲɛdiaa fula o halataala-o ni.

⁴²Má va dimio aa: «O co macoaa ndu le co Yeesu po Yosɛf-o le? N sina masinaa fuɲa ndɔ a kala ndɔ le? Kɛ le yɛɛ o co yɛɛ naa niko dimullo maa o halataala o fula ni?»

⁴³Mí Yeesu mulul nda aa: «La mɛi sɔɔn pɔmbɔn niaa pila tɛɛn.

⁴⁴Vana-vana nɔla hunɔɔ o ya lo le, fɔ mì Pua sim vana kon laci, i tindinin ndu fulaa vanvílɛ́iya tɛɛn o paale mɛɛlaa len.

⁴⁵O co o sɛvaa o sɛbɛla vanaa-tɛɛngaa-diom Hala-a nin aa: ‹Nda kpow a sɔlanin pɛɛkoo fulaa Hala o ba.› Vana-vana tuei pɛ Pua diom, mò cɛl pɛɛku ndɔɔ, ndu hin o ya lo.

⁴⁶Ken co dimi le maa vana pum ce nin Pua, vana fula o Hala lo-o kínɛí ce Pua ni.

⁴⁷I co niaa toɲaa dimul kpendekele, vana laalan pɛ, ndu sɔla cinda fɛɛn-fɛɛndo.

⁴⁸Ya, ya co ɲɛdiaa cindaa ni.

⁴⁹Fuɲaa niaa de mane o lɛŋnde veselɛilen nin, kɛ a kon kpede ma vu.

⁵⁰Kɛ vana de pɛ ɲɛdiaa fula o halataala-o, ndu vi le.

⁵¹Ya, ya co ɲɛdiaa kiyɛi tol fulaa o halataala-o ni. Te vanndo de pɛ ɲɛdiaa kon, o vanin yoomu le fɛɛn a fɛɛn. Ɲɛdiaa ya yɔngunin-ndo, ndu co dialun nun ni, haliko mi ceendo va yoomu.»

⁵²Mí Yuifia va sɛɛngianndo nda pila tɛɛn, ma va ɲunaa aa: «Vɛɛ o ke yɛnin naa dialun ndɔn le dioo?»

⁵³Mí Yeesu dimul nda aa: «I co niaa toɲaa dimul kpendekele, te la di dialun Po vanacieo, mì la kol kooma ndɔan te, mɛɛ yoomu venin niaa nin te.

⁵⁴Vana de pɛ dialun nun, mò kol kooma nian, ndu sɔla cinda fɛɛn-fɛɛndo. O kon, i tindinin ndu fulaa vanvílɛ́iya tɛɛn o paale mɛɛlaa len.

⁵⁵Kani balo kpeekpeiyo dialun nun co ni, ɲɛ kolaa kpeekpeiyo kooma nian ma co ni.

⁵⁶Vana de pɛ dialun nun mò kol kooma nian, ndu co ya nin, mì ya i va ndu nin.

⁵⁷Maa mɛɛ Pua co yoomu-o vem ya, mì va yoomu le ndu Pua yɛ, lende koni, vana de ya pɛ, ndu vanin yoomu le ya.

⁵⁸Ɲɛdiaa fula o halataala-o co kon ni. O co maa o fuɲaa niaa vi-a de-o le. Vana de pɛ ɲɛdiaa hoo, o vanin yoomu le fɛɛn a fɛɛn.»

⁵⁹Pɛɛkula Yeesu yɔngu o cɛi lekaando nin Kapɛrnaum-ndan la co lan ni.

⁶⁰Ndáà ciiyo ndu diomndo tueyɔɔ, mí kaandeŋaa ndɔa bɔɔ-bɔɔ a dimi aa: «Sɔɔn mun kendu bɔɔ, nɛ̀ɛ́ nɔla yɛ mun biyɔɔ?»

⁶¹Le tùú Yeesu ndóò sina maa kaandeŋaa ndɔa co sɔɔn pɔmbɔn a pɛɛku ndɔ kon o kɔɔ-o, mó ɲuna nda aa: «Vɛ̀ɛ̀ mì sɔɔn ya dimi mun-ndon pala niaa?

⁶²Te la hun cɔ yɛ pɛ niko Po vanacieo helɔɔ nɛɛ o va o tasendɔ-a, vɛ̀ɛ̀ niaa dimi yɛnin?

⁶³Kɔl Hala-o ke vana yoomoo ni. Diallon nɛŋi mako kɛ́-kɛ̀ le. Kɔl Hala-o a yoomoo sɔɔn ya dimul niaa-on co ni.

⁶⁴Kɛ vanaa pum a co niaa tɛɛn, a laalan te.» Kani o kandɔɔ pɔ́, Yeesu ndóò sina vanaa laalan te-a a vana óò malnin ndu vannda o ba-o.

⁶⁵Mó dimi vɛlɛ aa: «Lelan ya dimul niaa ni maa vana-vana nɔla hunɔɔ o ya lo le, te o co Pua le ke ndu le.»

⁶⁶Cɔn a telen kon, mí vanaa bɔɔ-bɔɔ o kaandeŋaa ndɔa tɛɛn a muungun kɔɔli, a cɛl lɛ le kɔlan ndu kɔɔli le.

⁶⁷O kon, mí Yeesu dimul kaandeŋaa tɔ́ a à ŋiɔnda aa: «Niaa bɛɛ la koennun te?»

⁶⁸Mí Simɔn Piɛr mulul ndu aa: «Maalii, o nɛ̀ɛ̀ lo naa n kɔa yɛnin? Nɔm nɔ sɔɔn yoomu fɛɛn-fɛɛnndon ni.

⁶⁹Naa n laalan ken, n sina maa nɔm co Krista ni, O-Diandaa Hala-o.»

⁷⁰Mí Yeesu mulul nda aa: «Vɛ̀ɛ̀ o co ya le hɛli niaa n'van tɔ́ a vanaa ŋiɔnda ha le? Kɛ nduyɛ, ɲina vɔɔndo luɛi vana pilɛ nin niaa tɛɛn.»

⁷¹Sɔɛi Yuda, po Simɔn Iskariɔt-o-e o va dimi kon lende ni, kani Yuda kon va hunɔɔ Yeesu malɔɔ vannda o ba ni. O va vana pilɛ o n'van tɔ́ a vanaa ŋiɔnda tɛɛn.