Read Kissi Nsaŋ 9 Bible Online

Nsaŋ 9 - Kissi bible

Nsaŋ 9

¹Yeesu lo hiovɔɔ, mó ca langbanɔɔ pum, o sumɛiyo o velun ni.

²Mí kaandeŋaa ndɔa ɲuna ndu aa: «Kɔɔfa, le yɛɛ nɛ langbanɔɔ ho velun yɛ o sumɛiyo? Mò va maa le haki vanaa velu ndu-a o suma ni baa le haki ndu pila tosa-o?»

³Mí Yeesu muli aa: «O co le haki ndɔ ndu pila, te kon te le haki vanaa velu ndu-a le o suma le, kɛ haliko mi kpaaya Hala-o cɔmnun o ceen ndɔɔ nin.

⁴Mɛɛ mì n tosa baala vana vem ya-o telen paalen le co vɔ-o. Ɲumndan ma tol pɛ, vana nɔla baalaa le.

⁵Telen ya co o ceendo coo-o, ya co ɲɛ-tengaa ceendo ni.»

⁶Ndóò ciiyo dimio lende, mó tufu lɔluan lɛŋ, mó linda puuloo a man. O kon mó sui vana sumɛi kon looli kalaa o hɔltan coo,

⁷mó dimul ndu aa: «Kɔ pulun o fonda mamɛnndo Siloe». Siloe kon co dimio ni aa: «Viomɔɔ». Mí vana sumɛi kon kɔa lon, mó kɔ pulun, telen o va muungoo-o, mó ca.

⁸Mí vanaa nda cal nɛɛ pilɛ-a a vanaa ce ndu paandu ɲɔɔn piɛiyo-a va ɲunaa aa: «O co langbanɔɔ ho le ndóò cal le vannda ɲɔɔn piɛiyo le?»

⁹Mí a pum va dimio aa: «Ndu kpeekpei co hoo ni!» Mí a tiŋ nda va sɛɛngiaa aa: «O co ndu le, velanndo ni.» Kɛ mí vana sumɛiyo pila va dimio aa: «Ya kpeekpei ni!»

¹⁰O kon má ɲuna ndu niko aa: «Vɛ̀ɛ̀ hɔltan la looku yɛ nɔm kumbin?»

¹¹Mó muli aa: «Langbanɔ nda veelu hoo aa Yeesu-o linda puuloo ni, mó sui ya o hɔl, mó dimul-la maa ya kɔ pulun Siloe. Mí kɔa lon, mí pulun, o kon ya ce nuaa ni.»

¹²Má dimul ndu aa: «Kuɛɛ langbanɔ kalaa co yɛ?» Mó muli aa: «I sina le.»

¹³Má kɔa a langbanɔ sɔla kon siongɔɔ-o o Faliisia lo.

¹⁴Nduyɛ, o paale pɛngiaalen coo Yeesu ndóò linda puuloo lende ni, mó kumbi langbanɔɔ hɔltan.

¹⁵Mí Faliisia bɛɛ ɲuna ndu mɛɛ o looku cɔ yɛ. Mó dimul nda aa: «Loolio o sui ya o hɔltan coo ni, mí pulun, mí ca.»

¹⁶Mí vannda pum a va dimio Faliisia tɛɛn aa: «Langbanɔɔ ho co vana Hala le, kani o ke paale pɛngiaalen lebɛɛ le.» Mí a pum nda va dimio aa: «Vɛ̀ɛ̀ vana lahakio ndu looku yɛnin dɛnnda kaamaala vaa nuaa tosa?»

¹⁷O kon má muungu, má ɲuna vɛlɛ vana va kon o sumɛiyo-o aa: «Nɔm niko, vɛ̀ɛ́ n yiyan yɛ a langbanɔ kumbi nɔm hoo hɔltan-ndo?» Mó muli aa: «Vana-tɛɛngaa-diom Hala-o o co ni.»

¹⁸Kɛ Yuifia laalan maa o sumɛi le langbanɔ kon va mó ca le few. Le hee, má veelu vanaa po kalaa,

¹⁹má ɲuna nda aa: «Vɛ̀ɛ̀ po niaa dimi maa o sumɛiyo niaa velu ndu ni-o co hoo ni? Vɛɛ o looku yɛ niko cɔu?»

²⁰Mí yungu po kon a muli aa: «Naa n sina maa po naa ni, o sumɛiyo o velun ni.

²¹Kɛ n sina mɛɛ o looku cɔ yɛ le, hali vana kumbi ndu hɔltan-ndo, n sina ndu le. La ɲuna ndu pila, o co lɛ cuaambɔ le o co le, o cɔmnin niaa mɛɛ dɛnɔɔ tosalan ndu yɛ.»

²²Vanaa po kon a suu lende fondo le, kani ndáà nɔ siòònde a Yuifia, kani mí Yuifia ndáà cɛlan maa vana-vana dimi pɛ kpendekele maa Yeesu co Krista ni, a soli ndu o cɛi lekaando nin.

²³Lelan vanaa ndɔa dimi ni aa: «La ɲuna ndu pila, o co lɛ cuaambɔ le.»

²⁴Mí Faliisia veelu vɛlɛ langbanɔ va kon paandu o sumɛiyo-o, má dimul ndu aa: «Naa n sina maa vana lahakio vana singi nɔm kon-ndo co ni, lelan dimul naa toɲaa le Hala.»

²⁵Mó mulul nda aa: «Ya ya, i sina le te vana lahakio o co ni. Sɔɛi ndii pilɛ kpé ya sina ni: vana sumɛiyo ya va paandu ni, kɛ nihau, i co cɔu.»

²⁶Má ɲuna ndu aa: «Yɛɛ o yɔŋ yɛ nɔm? Vɛɛ o looku yɛ nɔm hɔltan kumbi?»

²⁷Mó mulul nda aa: «I dimul nihau niaa ndi, la yeŋ ya lani le. Le yɛɛ niaa yeema yɛ vɛlɛ ndi tueyɔɔ? Mò va maa yeemɛi niaa bɛɛ nɔ le siŋnɔnndo kaandeŋaa ndɔa ni?»

²⁸Má yeow ndu, má dimi aa: «Nɔm co kaandennɔ ndɔɔ ni. Naa naa, kaandeŋaa Moise-a naa n co ni.

²⁹N sina maa mí Hala ndóò soaa o Moise lo, kɛ hoo ndu, n sina nɛɛ o fula le!»

³⁰Mí langbanɔɔ mulul nda aa: «Ken kpeekpei co dɛnɛ kɔndɔfillo ni, la sina nɛɛ o fula le. Nduyɛ, ndu kumbi ya hɔltan ni.

³¹N sina maa Hala mulul vanaa lahakia piɛilen te. Kɛ vana biilu Hala pɛ mo tosa hɛnan ndɔɔ, o mulul vana kon piɛilen.

³²Lepilɛ bɛɛ n tui-yɔ maa vanndo kumbi vana velun o sumɛiyo-o hɔltan te.

³³Te langbanɔɔ ho ndóò ve vana Hala-o le, ndóò nɔla nin ɲɛ-ɲɛ tosaa le.»

³⁴Má mulul ndu aa: «Nɔm pila kpow, o hakio nin n velun ni, nɔm kon hun naa pɛɛkoo ni!» Má ɲindu ndu o bɛ́ɛ̀.

³⁵Mɛɛ Yeesu tuɛi maa a cii ndu soli o bɛ́ɛ̀, mó komal ndu, mó ɲuna ndu aa: «A laalan pá Po vanacieo?»

³⁶Mí langbanɔɔ muli aa: «Nɛ̀ɛ́-nɛ̀ kon Maalii, haliko mi laalan ndu.»

³⁷Mí Yeesu dimul ndu aa: «A ce ndu, ndu co hoo sɔɛi o nɔm ndo ni.»

³⁸Mó dimi aa: «I laalan, Maalii». O kon, mó baŋ vulan Yeesu o labɛngunin.

³⁹Mí Yeesu dimul ndu aa: «I hin le yamɛi kiolɔɔ o ceendo ho coo, haliko mi vanaa sumɛiya ce, mì vanaa co cɔu-va suma.»

⁴⁰Faliisia va ndu ikɛi-ya pum tueyɔɔ sɔɔn mun, má ɲuna ndu aa: «Mò va maa naa bɛɛ vanaa sumɛiya naa n co ni?»

⁴¹Mí Yeesu mulul nda aa: «Te niáà va pɛ vanaa sumɛiya, niáà nɔnin haki le. Kɛ la co nin dimio aa: ‹N co cɔu:› lelan hakio co niaa kuee.»