Read Kissi Dɛnnda kiilaa 1 Bible Online

Dɛnnda kiilaa 1 - Kissi bible

Dɛnnda kiilaa 1

¹Teofil kɛndɔ sei[1]! I sɛva dɛnnda Yeesu kandu tosaa lan a pɛɛkula o kandu yɔngoo lan kpow o sɛbɛ tasoo[2] nin,

²kɔlan háá paale o hel o halataala len. Lɔ́ɔ́ o hun hel o halataala, mó yɔngu kiilaa ndɔa o hɛli-a silalan o kpaaya Hala Kɔl-Diandaa bɛngu.

³O piɔ́m ndu Yeesu sɔla-o kɔɔli, mó cɔmnun nda, mó cɔm nda vɛlɛ tɔɔmaselelan taw maa o muungu yoomu. Palɛi belehiɔɔlu o cɔmnun nda ni, mó dimul nda sɔɔn a Masale Hala len o kɔɔ.

⁴Paale pilɛ, o va ɲɛdiaa dioo nda ndaa, mó dimul nda aa: «La fáŋàn Yerusalɛm te, la cum ɲɛ Fuɲa nuu dimi le niaa yɔngoo-o. Ɲɛ yáà dimul niaa sɔɛi ndɔɛi-yo pɛɛn.

⁵Kani o mɛnndan nin Nsaŋ yin vannda ni, kɛ niaa niaa, palɛi bendu lɛ le, mì la sɔla yinɔɔ Hala Kɔl-Diandaa.»

⁶Kiilaa va a cuungiannda nɛɛ pilɛ, má ɲuna Yeesu aa: «Maalii, vɛ̀ɛ̀ sisa n co masale Israɛlla mingi o fonda ndɔɔ ni?»

⁷Mó mulul nda aa: «O co niaa le bɛnda mì la sina telenndan a palɛi Fuɲa nuu pila kɛsi a kpaaya ndɔɔ-e le.

⁸Kɛ la sɔlanin kpaayaa lɔ́ɔ́ Kɔl-Diandaa toalnin niaa coo-o. O kon, la siŋnunnin seyaa nia Yerusalɛm ciee, o tàndá Yuda-o nin a o lɛŋnde Samari len nin kpow, kɔlan tiiyaa háá o lɛŋnden mɛɛlulan.»

⁹Mɛɛ Yeesu cii sɔɔn mun dimi, mó hel o halataala, kiilaa ndɔa va ndu tofaa. O kon kɔɔli, mí yumbuyumboo kumbu ndu, a ci lɛ ndu le.

¹⁰A lo tofaa o halataalaa nin nɛɛ Yeesu va helnɔnndo-a, mí langbaa nda ŋiɔn a fula nda ikɛi o lepilɔɔ a volɔɔla humbulan lekɔɔ,

¹¹má dimul nda aa: «Niaa Kalilea ha, le yɛɛ nɛ niaa co yɛ tofaa o halataala? Yeesu faŋan hoo niaa ikɛi, mó hel o halataala-o hunnin vɛlɛ mɛɛ niaa ce ndu kɔlan o halataala nuaa yɛ.»

¹²O kon, má faŋan o pembii nda veelu aa Pembii Oliv-e, má muungu Yerusalɛm. Pembii ken i co kobio levil te, i co le kɔla kilo pilɛ a tala.

¹³Ndáà muungoo Yerusalɛm, má kɔ luɛi o cɛi-lenin va o cɛi coocoo pum nin-ndo nin, nɛɛ ndáà bɔɔŋian lɔ́ɔ́-lɔ́ɔ̀-a. Nda yɔŋnun haa ni: Piɛr, Nsaŋ, Nsaki, Andre, Filipe, Tomas, Bartelemi, Matie, Nsaki po Alfee-o, Simɔn vana cɔlɔba le lɛŋnde ndɔlen baŋaa-o a Yude po Nsaki-o.

¹⁴Nda kpow, a va Hala piɛiyo o diom pilɔɔ nin nda vanlaandua, a Mari kalaa Yeesu a pɔmbɔa Yeesu-a.

¹⁵Paale pilɛ, mí vanaa laalannda cuungian, a va le vannda kɛmɛ bidiin. Mí Piɛr can nda tɛɛn, mó dimi aa:

¹⁶«Puapilɛa nia, mɛɛ mì ɲɛ Hala Kɔl-Diandaa ndóò dimi o Sɛbɛ-Hala-o nin-ndo ndóò peelun. Ɲɛ ndóò dimi a sondo David-o le Yuda-o pɛɛn. Yuda sim kon vannda laci le Yeesu biyɔɔ-o.

¹⁷O va vana pilɛ naa tɛɛn, mí n va baalaa ho tosaa naa ndaa.

¹⁸Mó piandu lɛŋnden a volin o sɔla a dɛnɛ vɔɔndo-on, mó del a ikɛsu, mí demboo sɛɛsa, mí ɲɛm va ndu nin-ndon kpow n sɛŋin.

¹⁹Mí vannda Yerusalɛm kpow a tuɛi dɛnɛ kon, má ke yondo kon diolan o sɔɛi ndɛi nin aa: ‹Hakɛldama›, kon co dimio ni aa: ‹Lɛŋnde makòó len›.

²⁰Nduyɛ, o co o sɛvaa o Sɛbɛ condii lisɛi nin aa: ‹Màá calta ndɔlan la lo fondo! Màá vana-vana cal lɛ lon te!› O co vɛlɛ o sɛvaa aa: ‹Màá vana celen muungu o fonda ndɔɔ!›

²¹Nduyɛ, telen Yeesu va kɔlan a naa mo va muungoo a naa-o kpow, vannda va naa kɔlan kɔɔli,

²²kandɔɔ telen Nsaŋ va vannda yinɔɔ-o, kɔlan háá paale Yeesu faŋan naa tɛɛn, mó hel o halataala len. Lelan, mɛɛ mì vana pilɛ o vanaa kan tɛɛn siŋnun seiyo maa naa a tendul Yeesu-o o kɔɔ.»

²³O kon má tuu vanaa ŋiɔn: Yosɛf, o ndáà veelu vɛlɛ aa Barsabas, te kon te aa Yustus-o, a Matias.

²⁴O kon kɔɔli, má piɛi Hala aa: «Maalii, a sínà yiyannda vannda kpow, cɔm vana n hɛli o vanaa ŋiɔnda ha tɛɛn

²⁵le baala lekiilaa ho tosaa-o, baala Yuda mal ho, mó kɔa o fonda ndóò bɛnda le kɔlan-ndo pɛɛn.»

²⁶Ndáà malɔɔ siondei, mí sionnden le bii Matias, o kon má handu ndu o kunda kiilaa tɔ́ a ò pilɛa coo.