Read Kissi Dɛnnda kiilaa 10 Bible Online

Dɛnnda kiilaa 10 - Kissi bible

Dɛnnda kiilaa 10

¹Langbanɔ pilɛ va Sesaree diolan Kɔrnɛil, ndu va simlacinɔ kunda vanaa cɔvaa kɛmɛa rɔmnda ni, kunda ndáà veelu vɛlɛ aa: «Kunda fula o lɛŋnde Italii len nin-ndo» pɛɛn.

²Ndu a yungu ndɔɔ a va yɔŋ vɔɔndo vou. Ndáà nɔ vɛlɛ siòòŋii Hala-e. O va vannda ɲɔɔn keo taw, mó va Hala piɛiyo lɔ́ɔ́-lɔ́ɔ̀.

³Paale pilɛ, lɛɛlɛ yàándɔɔ vaa le tiiyaa a paale yɔngannden, mó ca mɛlɛkanɔ Hala-o luɛyɔɔ o ndu lo cɛinin o vundulen nin, mó dimul ndu aa: «Kɔrnɛil.»

⁴Mí Kɔrnɛil tofa ndu ciŋ a siòònde, mó ɲuna aa: «Yɛɛ nɛ Maalii?» Mí mɛlɛkanɔɔ mulul ndu aa: «Mɛlɛka tuei piɛile nɔmnden, o naŋ kɔl a kɛndɛi n tosal vanaa bala fondoa-e. O pɔɛɛnun a nɔm te.

⁵Lelan viom vannda Yopé sunsun, mà kɔ hun nda Simɔn-a, o nda veelu aa Piɛr-o.

⁶O co o vana nda veelu aa Simɔn-ndo lo cɛinin, Simɔn tosa baala layáwvo-o pɛɛn, o cɛi ndɔɔ co o mɛmma ihɛllan kɔngɔ-o.»

⁷Mɛlɛkanɔ soo kon o ndu lo-o kɔnndan, mí Kɔrnɛil veelu buɛyaa ndɔa nda ŋiɔn a vana cɔw óò vo Hala mó va baalaa tosaa ndu o ba bɛngu-o.

⁸Mó cɔm nda dɛnnda tosan ndan kpow. O kon kɔɔli, mó viam nda Yopé.

⁹Diimandɔɔ, mɛɛ vanaa nda vem kan-nda tiiyaa Yopé ciee-lekɔɔ, mí Piɛr hel o sɛmtɛ a telen paalen le va nin le tiiyaa o pol-lo le Hala piɛiyo.

¹⁰Mí yiyan ma nɛi ndu, ndóò yeema mì ndóò de ɲɛdiaa. A lo ɲɛdiaa ndɔɔ bɛɛndiaa, mó ca ɲɔɔ pum fulaa o Hala, mó vow.

¹¹Mó ca halataalaa o kumbiaa: mí ɲɔɔ pum fula maa kola bɛndu, o va tolɔɔ mɛɛ vanndo bii ɲɔɔ o kpeŋun hiɔɔlon, mó va tuisio lɛŋ yɛ.

¹²Visia súú-súù ka a va lenin: visia pelun n'hiɔɔlu-a, a sasun lɛŋ-nda a yowva.

¹³Mí diomndo pum dimul ndu aa: «Piɛr, cɔn, dii mà de.»

¹⁴Mí Piɛr muli aa: «Ɛ-ɛ Maalii, kani kabi bɛɛ i di vɔ visi tanaa, te kon te ɲɛ dindu Mɛlɛka o hɔl too le.»

¹⁵Mí diom kon dimul ndu vɛlɛ o diinndɔɔ aa: «Ca ɲɛ Hala cii dindi-o o nɔɔlɛi le.»

¹⁶Mí kon tosan leyáá. Fɔ́ɔ́fɔ̀, mí ɲɛ kon helnun o halataala.

¹⁷Piɛr lo kɔllo keeliaa o kɔlɔ vundule o ce len-nden coo, mí vanaa Kɔrnɛil vem-nda va vannda ɲuuniaa le sinaa nɛɛ cɛi Simɔn-ndo va-a, má hun sim o bɛɔ sondoo.

¹⁸Má veelu, má ɲuna aa: «Vɛ̀ɛ̀ nanu Simɔn, o nda veelu aa Piɛr-o co o yiya ni?»

¹⁹Piɛr va vɔ kɔllo keeliaa o vundule len coo tuŋ, mí Hala Kɔl-Dianda dimul ndu aa: «Tofa vɔ, vannda co nɔm nuwviaa nda yáá.

²⁰Cɔn ma tol, mì la kɔɛ niaa ndaa. Siòòŋii bii nɔm te, kani ya vem nda ni.»

²¹Mí Piɛr toal, mó ɲuna nda aa: «Ya co vana niaa co nuwviaa-o ni. La vɛ hunɔɔ nanu?»

²²Má mulul ndu aa: «Kɔrnɛil co simlacinɔ vanaa cɔvaa kɛmɛa-o vem naa ni. Vana sandaa o co ni, o vo Hala-o, Yuifia kpow a co diola ndɔla kɛndɛlan dimio. Mɛlɛkanɔ diandaa Hala-o dimul ndu ni maa nɔm kɔ o ndu lo cɛinin, mò tuei ɲɛ n kɔ va ndu dimul-lo.»

²³O kon mí Piɛr luei nda o yiya. Diimandɔɔ, mó kɔa nda ndaa. Mí vannda a tiŋ a liila ndu fulaa Yopé.

²⁴Diimandɔɔ pilɔɔ, mó tiiya Sesaree ciee. Kɔrnɛil va nin nda cumndo. Ndóò cii nin vanayan ndɔn a caaŋaa ndɔa ndóò yeema taw-va veelu.

²⁵Telen Piɛr va luɛyɔɔ-o, mí Kɔrnɛil bɔŋa ndu, mó tundun, mó baŋ vulan ndu o labɛngunin.

²⁶Kɛ mí Piɛr simi ndu, mó dimul ndu aa: «Cɔn! Ya bɛɛ, vanacieo ya co ni.»

²⁷A lo baltan dɔvɔɔ nda Kɔrnɛil, mó luɛi cɛinin, mó komal vannda sɛ́lɔ́ɔ́ taw.

²⁸Mó dimul nda aa: «La sinà maa Yuifinɔɔ bɛnda mò sɔɔnguu vana co Yuifinɔ loo ikɛi, te kon te mò luɛi o ndu lo le. Kɛ, Hala cɔm ya maa i bɛnda mì ce vana-vana o nɔɔlɛi, te kon te o dindu ndu Mɛlɛka o hɔl too le.

²⁹Lelan, lɔ́ɔ́ niaa vem ya vannda veeloo-o, mí hun, i sɛɛngiaa le. Nduyɛ, i yeema mì sina kɔlɔ niaa veelu ya-o.»

³⁰Mí Kɔrnɛil muli aa: «O co nihau palɛi ihiɔɔlu, i va Hala piɛiyo o ya lo cɛinin o telen pilɔɔ hoo, o lɛɛlɛ yàándɔɔ a paale yɔngannden. Mí vanndo pum cɔmnun ya a volɔɔla ŋɛlɛngi-ŋɛlɛngi lan lekɔɔ o lepilɔɔ, mó dimul-la aa:

³¹‹Kɔrnɛil, Hala tuei piɛile nɔmnden. O loonun a ɲɛm n ke vanaa bala fondoa-on o kɔɔ.

³²Lelan, viom vannda Yopé o Simɔn-ndo, o nda veelu aa Piɛr-o. O co o yiya o Simɔn tosa baala layáwvo-o lo cɛinin o mɛmma ihɛllan kɔngɔ.›

³³Fɔ́ɔ́fɔ̀, mí viam vannda nɔm kɔɔli. Nduyɛ, a bɛɛndiaa hunɔɔ. Má cè niko naa kpow Hala o hɔl, haliko mi n tuei a ɲɛ-ɲɛ Mɛlɛka vem nɔm dimi o kɔɔ!»

³⁴O kon mí Piɛr cua sɔɛi, mó dimi aa: «I sina nihau lekɛ́ndɛi maa Hala hiyan vanndacieea le,

³⁵kɛ o vannda súúlan kpow nin, o vo ndu Hala mò va dɛnɛ sandaa tosaa-o, ndu hɛnan ndu ni.

³⁶O cuu Israɛlla sɔɛi ndɔɛi, sɔɛi ken i co Yoongu Kɛndɛ vana sɔla kɔlɲuloo a Yeesu Krista o kɔɔ-e ni, Yeesu co Maalii le vannda kpow-vo pɛɛn.

³⁷La sinà ɲɛ yɔŋnun cɔnɔnndo Kalile, kɔ bii niko háá o tàndá Yuda-o nin kpow-vo, ɲɛ yɔŋnun telen Nsaŋ cii yinɔɔ o va vannda sɔɛi ndɔɛi dimullo-o-o.

³⁸La sinà mɛɛ Hala pɔla Yeesu fula Nasarɛt-o a kpaaya Kɔl-Diandaa yɛ, a mɛɛ ndu Yeesu kei vannda dɛnɛ kɛndɔɔ tosal nɛɛ-nɛɛ ka yɛ. O va vanaa va o biyɔɔ nin ɲina vɔɔndo o ba-a kpow singio, kani Hala va ndu ikɛi.

³⁹Naa n co seiya le dɛnnda o tosa o lɛŋnde Yuifia nin a Yerusalɛm ciee lan kpow ni. Má baŋ ndu o yɔm singafilaa coo, má dii ndu.

⁴⁰Kɛ o paale yàándɔlen, mí Hala mingi ndu yoomu, mó cɔmnun vannda,

⁴¹o ve vannda kpow le, kɛ seyaa Hala ndóò cii nin hɛli-a pɛɛn. Naa naa, o tendul o tendul fulaa vanvílɛ́iya tɛɛn-ndo kɔɔli, mí n dia, mí n kol naa ndaa latulu.

⁴²Yeesu dimul naa le vannda Yoongu Kɛndɔɔ ho tiiyallo, mì n tɛndal nda vɛlɛ seilen maa: ndu Yeesu Hala hɛli le yamɛi kiolɔɔ vanaa co yoomu-a a vanvílɛ́iya tɛɛn ni.

⁴³Vanaa-tɛɛngaa-diom Hala-a kpow a tɛnda seilen a ndu o kɔɔ maa vana-vana laalan ndu pɛ, hakila vana kon la malnun haki o diola ndɔlan.»

⁴⁴Piɛr lo sɔɔn mun dimio, mí Hala Kɔl-Diandaa toal vanaa va ndu nilan yaŋɔɔ-a kpow coo.

⁴⁵Mí vanaa laalaŋaa fula Yuifia tɛɛn, má liila ndu-a dɔawnun kɔndɔfili taw le cɔ nda ce mí Hala Kɔl-Diandaa toal vanaa ve N'Yuifi le-a coo-o.

⁴⁶Kani a va nda tueyɔɔ sɔɛi o sɔɔn celen nin, má va bɔɔbɔɔyɛi Hala-e candɔɔ.

⁴⁷O kon, mí Piɛr ɲuna aa: «Vɛ̀ɛ̀ o bɛnda pá mi vana kɛɛ nihau vanaa sɔla haa Hala Kɔl-Diandaa maa naa-a yinɔɔ o mɛnndan nin?»

⁴⁸O kon mó dimul vannda, má sɔla yinɔɔ o diola Yeesu Krista lan. O kon kɔɔli, má tɛɛlun ndu aa o lo nda ndaa le palɛi pum.