Read Kissi Dɛnnda kiilaa 11 Bible Online

Dɛnnda kiilaa 11 - Kissi bible

Dɛnnda kiilaa 11

¹Mí kiilaa a vanaa laalaŋaa va Yuda-a tuɛi maa vanaa ve N'Yuifi le-a bɛɛ a bii sɔɛi Hala-e.

²Lɔ́ɔ́ Piɛr muungu Yerusalɛm-ndo, mó hiŋan diomndan nda vanaa laalaŋaa dii tomaa-a, má dimi aa:

³«A luɛi o vanaa dii tooma le-a lo, mì la dia niaa ndaa.»

⁴O kon, mí Piɛr cɔm nda ɲɛ óò yɔŋnun-ndo o polalen.

⁵Mó dimul nda aa: «I va Hala piɛiyo Yopé ciee, mí vow, mí ca vundulen. Ɲɔɔ pum va tolɔɔ fulaa o halataala maa kola bɛndu, má saa ndu o kpengun hiɔɔlon, mó toal háá nɛɛ ya va-a.

⁶Mí tofa lenin ɲɛkɛndɛi, mí ca visia pelun hiɔɔlua, visia yondoa, a sasun lɛŋ-nda a yowva.

⁷O kon kɔɔli, mí tuɛi diomndo pum ya dimullo aa: ‹Cɔn Piɛr, dii mà de.›

⁸Kɛ mí muli aa: ‹Ɛ-ɛ Maalii, kani kabi bɛɛ ɲɛ tana, te kon te ɲɛ co o nɔɔlɛi Mɛlɛka o hɔl-lo luei-yɔ ya o sondo le.›

⁹Mí diomndo dimi vɛlɛ fulaa o halataala aa: ‹O bɛnda ma ce ɲɛ Hala cii dindi-o o nɔɔlɛi le.›

¹⁰Mí kon tosan le yaa. O kon kɔɔli, mí ɲɛ kon kpow muungu helnɔnndo o halataala.

¹¹O telen pilɛ kon, mí langbaa yaa nda vem o ya lo fulaa Sesaree-a tiiya nɛɛ naa n va cɛinin-nda.

¹²Mí Hala Kɔl-Diandaa dimul-la maa ya kiisan te, maa i kɔ naa ndaa. O kon, mí puapilɛa kan a liila ya nda ŋɔmpum, mí n kɔ luɛi o Kɔrnɛil-lo cɛinin.

¹³Mí ndu cɔm naa mɛɛ mɛlɛkanɔɔ cɔmnun ndu o ndu lo cɛinin yɛ, mó dimi aa: ‹Viom vannda Yopé, mà kɔ veelu Simɔn, o nda veelu aa Piɛr-o.

¹⁴O dimulnin nɔm sɔɔn, n yɔngunin nɔm a yungu nɔmndo kpow cindaa sɔlaa-on.›

¹⁵Mɛɛ ya kandu sɔɛi nda o lani, mí Hala Kɔl-Diandaa toal nda coo mɛɛ o tol naa coo o tasendɔ yɛ.

¹⁶O kon, mí yiyan dɔ́ɔ́ a sɔɛi Maalii dimi-e aa: ‹O mɛnndan nin Nsaŋ ndu yin ni, kɛ niaa niaa, la sɔlanin yinɔɔ a Hala Kɔl-Diandaa.›

¹⁷Ɛ̀ɛ̀ nduyɛ, te Hala ke nda pɛ ke pilɔɔ maa naa laalan Maalii Yeesu Krista-a, vɛ̀ɛ̀ yáà kuuna nin Hala hɛnan ndɔɔ tosaa ni?»

¹⁸Mɛɛ nda tuei sɔɔn mun, mí nda kpow a mei, má candu Hala aa: «Mɛɛ Hala cɛl mì vanaa co N'Yuifi le-a bɛɛ mangala kelala ndalan, mà sɔla ciinda kpeekpeiyo.»

¹⁹Mí vanaa laalaŋaa sɛŋin le yɛle tolaalen, o diyɔɔ nda dii Etiɛn-ndo kɔɔli-a kɔa háá Fenisi, Siipre, a Antiɔs, Yuifia kínɛí nda va sɔɛi Hala-e tiiyallo ni.

²⁰Nduyɛ, mí vanaa pum o nda tɛɛn a can Siipre a Sirɛne, má kɔa Antiɔs, má tiiyal vanaa ve N'Yuifi le-a Yoongu Kɛndɛ Maalii Yeesu-o.

²¹Kpaaya Maalii-o va nda coo, mí vanaa bɔɔ-bɔɔ laalan, má cɛl Yeesu o kɔlta ndalan nin.

²²Vanaa Krista-aa va Yerusalɛm-nda tueyɔɔ sɔɛi ken, má viam Barnabas Antiɔs.

²³Mɛɛ o tiiya, mó ca mɛɛ Hala va nda kɛndɛi tosallo yɛ, mó dɔawnun ɲaale, mó luei nda kpow yoomuan le lou a yiinan-nda a Maalii o kɔl pilɔɔ nin.

²⁴Nduyɛ, vana kɛndɔɔ Barnabas va ni, Hala Kɔl-Diandaa a laalanndo va ndu o piaa nin. Lelan, mí vanaa bɔɔ-bɔɔ a del Mɛlɛka kɔɔli.

²⁵O kon kɔɔli, mí Barnabas kɔa Tarse le Sol nuwviaa.

²⁶Mɛɛ o saalun ndu, mó hun nda ndu fulaa Antiɔs. Vɔsio kpulukuu, a va kɔlan o bɔŋannda vanaa Krista-aa, má va vannda taw pɛɛkulan yɔngoo. Antiɔs lon nda kandu kaandennda veeloo ni aa vanaa Krista-a.

²⁷O telen kon, mí vanaa-tɛɛngaa-diom Hala-a can Yerusalɛm, má kɔa Antiɔs.

²⁸Mí vana pilɛ o nda tɛɛn, diolan Akabus, o can a kpaaya Hala Kɔl-Diandaa, mó dimul vannda siɔdii lacio maa yima fofolan ma va hunɔɔ luɛyɔɔ fɔ́ɔ́fɔ̀, o ceendo ho coo kpede. (Telen Klode va masalen tosaa-o dɛnɛ kon yɔŋnun ni.)

²⁹O kon, mí kaandennda tuu le ɲɔɔn cuungiaa mɛɛ vana-vana óò tiwba sɔlaa yɛ, le puapilɛa ndaa va Yuda-a malaa.

³⁰Má tosa lende. Má soli ɲɛm mun, má yɔngu Barnabas nda Sol, mí nda yoo kaasoŋaa kɔlkalua Yuda ɲɛm-kéan ndan mun.