Read Kissi Dɛnnda kiilaa 13 Bible Online

Dɛnnda kiilaa 13 - Kissi bible

Dɛnnda kiilaa 13

¹Vanaa-tɛɛngaa-diom Hala-a a vanaa pɛɛkaa latɔŋnda pum a va vanaa Krista-aa tɛɛn Antiɔs: Barnabas, Simeɔn o ndáà ke diolan aa Vana-Tiŋio-o, Lusius fula Sirɛne-o, Manaɛn sul nɛɛ pilɛ nda Herɔde-o, Herɔde va masalen tosaa Kalile-o pɛɛn, a Sol.

²Paale pilɛ, a va Mɛlɛka biiloo ma va o sumndo nin, mí Hala Kɔl-Diandaa dimul nda aa: «La kɛsul-la Barnabas nda Sol landɔ le baalaa tosaa, o ya hɛli nda-o. »

³O kon, ndáà ciiyo sumndo biyɔɔ a Hala piɛiyo, má handu nda balan coo, má mal nda kɔlan.

⁴Mí Hala Kɔl-Diandaa viam Barnabas nda Sol, má kɔa Selesii, má can ndon, má luɛi o dɛ̀ndɔ̀ɔ́ nin, má kɔa Siipre.

⁵Ndáà tiiyaa Salamine, má kandu vannda sɔɛi Hala-e tiiyallo o cɛila lekaanda Yuifia nin. Nsaŋ va nda ikɛi le nda malaa.

⁶Má kei o lɛŋnde ibungale va o mɛnndan tɛɛn-nden nin kpow, háá má kɔ tiiya Pafɔs. Má komal vana viamaa yavaa pum, óò siingun ndu pila vana-tɛɛngaa-diom Hala-o lon-ndo, diola ndɔlan Bar-Yeesu, Yuifinɔɔ o va ni.

⁷Ndu va Sɛrsius Polus masa-ibunga ndóò kendu kɔl taw-vo ikɛi ni. Mí Sɛrsius Polus kon viam vannda, má veelu Barnabas nda Sol, kani ndóò yeema mì ndóò tuei sɔɛi Hala-e.

⁸Kɛ mí Bar-Yeesu vana viamaa yavaa, o diola ndɔlan la va kon o krɛkiei nin aa Elimas-o simul nda, mó va vɛlɛ nɛilan nuwviaa le masa-ibungaa faŋaa o laalanndo coo.

⁹O kon mí Hala Kɔl-Diandaa va Sol ndáà veelu vɛlɛ aa Pol-lo nin-ndo tosa, mó tofa Elimas ciŋ,

¹⁰mó dimi aa: «Nɔm vana pɛ ho a kɔlkalu vɔɔndo, mà pia vɛlɛ a vannda huiyo-o sei, nɔm po ɲina vɔɔndo, nɔm vana yeema ho dɛnɛ sandaa kɛ́-kɛ̀ loo. Lɔ́ɔ́ kuɛɛ n pɛngi yɛnin nɛila sandaala Mɛlɛka lan tunduuo?

¹¹Sunsun, Mɛlɛka co nɔm lɔɔ, mà suma. Haa mì telen pum hiow, a cinin ɲɛ-tengaa ipalaa le.» Fɔ́ɔ́fɔ̀, mí ɲumndan ma toal Elimas o hɔl. Mó muungu iyaanayaanai vannda nuwviaa le ndu baa biyɔɔ.

¹²Masa-ibungaa cɔu dɛnɛ kon, mó laalan, mí pɛɛkula o sɔla a Mɛlɛka o kɔɔ lan la pilan ndu kɔllo.

¹³Mí Pol a vanaa va ndu kɔɔli-a a luɛi o dɛ̀ndɔ̀ɔ́ nin Pafɔs, má muungu Pɛrkɛn[4] o lɛŋnde Pamfilii len nin. Mí Nsaŋ mɛi nda lon, mó muungu Yerusalɛm.

¹⁴Má can Pɛrkɛn, má hiaw Antiɔs o lɛŋnde Pisidii len nin. Má kɔ luɛi o cɛi lekaanndo pum nin o paale pɛngiaalen coo, má cal.

¹⁵Ndáà ciiyo sɛbɛ tɔŋndo a sɛbɛla vanaa-tɛɛngaa-diom Hala-a dimio, mí simlacia cɛi lekaan kon dimul nda aa: «Puapilɛa naa, te la nɔ pɛ isɔɔ le vannda yoomuan lueiyo, mɛɛ la dimi.»

¹⁶O kon, mí Pol can, mó kpaa vannda a ba, mó dimi aa: «Niaa Israɛlla a niaa vanaa nɔ siòòŋii Hala-e-a, la yaŋ nilan.

¹⁷Hala Israɛlla hɛli fuɲaa naa mamaa. Mó tosa má kui telen nda va Esipte-o. O kon kɔɔli, mó soli nda o lɛŋnde len nin a kpaaya ndɔɔ.

¹⁸Mó dɔaw nda balo o lɛŋnde veselɛilen nin vɔsilan belehiɔɔlu.

¹⁹O kon kɔɔli, mó tɛɛmbuu vanaa-mangalaa-isɔɔa súúlan tan ŋɔmmɛw o lɛŋnde Kanaan-nden nin, mó ke nda lɛŋnde vanaa kan kɛ́ɔ.

²⁰Kon kpow tosan o vɔsilan kɛmɛ lehiɔɔlu beleŋuɛɛnu bɛngu. O kon kɔɔli, mó ke nda vanaa kialaa n'yamaa háá o telen Samiɛl-lo.

²¹O kon mí nda pila ɲuna masaa, mí Hala ke nda Sol, po Kis-o, fulaa o polale Bɛnyamɛn-nden nin, mí ndu tosa nda masalen coo vɔsilan belehiɔɔlu.

²²O kon kɔɔli, mí Hala kɛɛ Sol, mó hɛli David, mó siinguu ndu masaa. Mí Hala tɛnda seile ndɔlen aa: ‹I saalun David po Yisai-yo, o ya hini kɔl-lo, o tosanin ɲɛ-ɲɛ ya yeema.›

²³Mí Hala soli Yeesu, Vana Ciindiaa Israɛlla o polale ndɔlen coo mɛɛ ndu Hala dimi yɛ.

²⁴Lɔ́ɔ́ pá mí Yeesu hun, mí Nsaŋ pɛɛku Israɛlla kpow maa a mangala kela nda vɔɔndo, mà sɔla yinɔɔ.

²⁵Telen Nsaŋ va baala ndɔɔ siowvo-o, mó ɲuna aa: ‹O yiyan niaa nin, vana súú yɛɛ nɛ ya co yɛ? O co vana niaa co cumndo-o le ya co le. Ndu hunnin o ya kɔɔli, i co bɛɛ co ya timbi ndu samtalan o n'pelu le.›

²⁶Puapilɛa nia, niaa fula o polale Abraham-nden nin, mí la nɔ siòòŋii Hala-e, mí la va naa tɛɛn nanu-a, naa Hala cuu sɔɛi cindɛi he ni.

²⁷Vanaa va Yerusalɛm-nda a simlacia ndaa a sina Yeesu le, a bii sɔɔn vanaa-tɛɛngaa-diom Hala-a va nda dimullo o palɛi pɛngiaa yɛ́-yɛ́-i coo-on te. Kɛ má yaala Yeesu mɛɛ vanaa kan dimi yɛ le sɔɔn mun peeloo.

²⁸A sɔla nɛi oo nɛi ndáà yaala ndu le piɔ́mndo sɔlaa le, kɛ nduyɛ, má ɲuna Pilate maa o viom vannda ma dii ndu.

²⁹Telen nda cii ɲɛ-ɲɛ Sɛbɛ-Hala-o dimi a ndu o kɔɔ-o dimio, má tuisi ndu o yɔm singafilaa coo, má kumbu ndu o sɛiyo nin.

³⁰Kɛ mí Hala mingi ndu yoomu fulaa vanvílɛ́iya tɛɛn.

³¹Mí vanaa kɔɛ ndu kɔɔli Yerusalɛm fulaa Kalile-a a ca ndu o palɛi bɔɔ-bɔɔ bɛngu. Nda co sisa seyaa ndɔa vannda o hɔl ni.

³²Naa bɛɛ, Yoongu Kɛndɛ kon naa hin niaa tiiyallo ho ni: o Hala ndóò dimi le fuɲaa naa mamaa-o,

³³o cii ndu peelu le naa a mingi o mingi Yeesu yoomu fulaa vanvílɛ́iya tɛɛn-ndo, naa cuavaa ndaa imamaa pɛɛn, maa mɛɛ o co o sɛvaa o Sɛbɛ condii lisɛi nin bolle ndii ŋiin yɛ aa: ‹Nɔm co po nuu ni! Kandɔɔ hau, ya co fuɲa nɔm ni.›

³⁴Mí Hala ndóò dimi maa o solinin ndu fulaa vanvílɛ́iya tɛɛn, kɔɔle ndɔlen le sinin te. Mó dimi aa: ‹I kenin niaa ɲɛm diandan ya tuu le David-on, n vana nɔla laalanndo handɔɔ coo-on.›

³⁵O co vɛlɛ o sɛvaa nɛɛ celen aa: ‹A melnin vana lo o lediom coo a nɔm-ndo siɔu o sɛiyo nin te.›

³⁶Nduyɛ, David ciiyo Hala baalaa tosallo mɛɛ ndu Hala ndóò tuu yɛ, mó vu, má kumbu ndu fuɲaa ndɔa mamaa ikɛi, mó sia.

³⁷Kɛ vana Hala mingi yoomu fulaa vanvílɛ́iya tɛɛn-ndo si le.

³⁸Lelan, puapilɛa nia, mɛɛ mì la sina maa: o ndu Yeesu nin niaa tuɛi yoongu malɔɔ lahakio ni. Tɔŋ Moise-o tiwba niaa baŋaa le. Kɛ vana-vana laalan pɛ Yeesu, Yeesu baŋa ndu a hakila ndɔlan kpow.

³⁹

⁴⁰Lelan, la caa taw, yɔŋii ɲɛ vanaa-tɛɛngaa-diom Hala-a dimi a niaa o kɔɔ-o yɔŋnun niaa aa:

⁴¹‹La tofa vɔ, niaa vanaa pɛɛsaa pɛ haa nin-nda. Kɔndɔfillo bii niaa mì la cuu, kani i co dɛnɛ pum tosa o telen niaa, hali vana ce dɛnɛ kon-ndo hun dimul bɛɛ niaa, la laalannin te.›»

⁴²Pol nda Barnabas fulaa o cɛi lekaando nin, mí vannda tɛɛlun nda maa a muungu vɛlɛ o paale pɛngiaale celen coo, mà cɔɔlu isɔɔ o sɔɔn mun coo.

⁴³Bɔŋanndo cuvɔɔ, mí Yuifia bɔɔ-bɔɔ a vanaa sina Hala le-a, a va o kaannde Yuifia-a a del Pol nda Barnabas kɔɔli. Má suukan nda ndaa, má luei nda yoomuan maa a hiow laci a kɛndɛi Hala-e tiindanndo.

⁴⁴Paale pɛngiaalen lepilten tiiyaa, vana dimi tuŋ maa mí vanaa va o kobio nin-nda kpede a cuungian le sɔɛi Maalii-e nilan yaŋɔɔ.

⁴⁵Yuifia cɔu sɛ́lɛ́ kon, mí paŋalaa pia nda nin, má sɛɛngiaa Pol, má del ndu yeowlan.

⁴⁶O kon, mí Pol nda Barnabas dimul nda a tiindanndo kpendekele aa: «Ndóò bɛnda mì naa n dimul niaa fɔlɔn sɔɛi Hala-e. Kɛ le mɛɛ niaa co ndi kɛɔ, mì niaa pila va cɔnɔnndo maa la co vanaa bɛnda mì la sɔla yoomu fɛɛn-fɛɛn te yɛ, n co mulin o vanaa co N'Yuifi le-a lo.

⁴⁷Kani ɲɛ Maalii dimul naa-o co hoo ni aa: ‹I siinguu nɔm ɲɛ-tengaa vanaa-mangalaa-isɔɔa, haliko ma yoo vannda cindaa o lɛŋnden mɛɛlulan di.›»

⁴⁸Vanaa co N'Yuifi le-a tueyɔɔ sɔɔn mun, má dɔawnun ɲaale, má can sɔɛi Hala-e candɔɔ. Mí vanaa Hala ndóò hɛli le cinda fɛɛn-fɛɛndo sɔlaa-a kpow a laalan.

⁴⁹Mí sɔɛi Maalii-e i tiw o lɛŋnde len nin kpow.

⁵⁰Kɛ mí Yuifia luei vanlaandua lebɛaa nɔ siòòŋii Hala-e-a a vanpiaandua va vannda simndan laci o kobi kon nin-nda sɔɔn nin. Má luɛi Pol nda Barnabas yɛlen tollo, má toaw nda o bungɛi ken nin.

⁵¹O kon, má koaŋ cundu va nda o n'pelu-o, má kɔannun Ikoniɔm.

⁵²Mí kaandennda pia a ɲaaloo a á Hala Kɔl-Diandaa.