Read Kissi Dɛnnda kiilaa 14 Bible Online

Dɛnnda kiilaa 14 - Kissi bible

Dɛnnda kiilaa 14

¹Mí Pol nda Barnabas kɔ luɛi vɛlɛ o cɛi lekaan Yuifia nin Ikoniɔm lon, má sɔaa háá mí Yuifia a vanaa ve N'Yuifi le-a taw a laalan.

²Kɛ Yuifia pum laalan te, má luei vanaa ve N'Yuifi le-a pum sɔɔn nin le nda yiyannda vɔɔnndan yɔngoo a puapilɛa ndaa o kɔɔ.

³Kɛ nduyɛ, mí Pol nda Barnabas a cii telen vilɛi Ikoniɔm ciee. A va sɔɛi a laalanndo, kani ndáà tiindan Mɛlɛka, mí Mɛlɛka cɛl, má tosa dɛnnda kaamaalan a dɛnnda kɔndɔfiltan le cɔmndo maa toɲaa sɔɛi nda va dimio a kɛndɛi ndɔɛi o kɔɔ-e va ni.

⁴Mí vanaa va o kobi kon nin-nda a piɔvian: mí a pum sim Yuifia kɔɔli, mí a pilla nda sim kiilaa kɔɔli.

⁵Mí Yuifia, vanaa ve N'Yuifi le-a, a simlacia ndaa a cɛlan le Pol nda Barnabas saangiaa, má cɛlan vɛlɛ le nda viiyo a powtan.

⁶Kɛ vanaa ŋiɔŋaa kan sinaa sɔɛi ken, má kɔ vinivinin o kobila va Likaoni lan nin: Listre, Dɛrbe a o sɔndɔkɔlta ndalan nin.

⁷Má kɔ tiiyal vannda Yoongu Kɛndɔɔ lon.

⁸Langbanɔ pilɛ va Listre, vana bɛvɛiyo o va ni. Kabi o violɔn ndɔɔ, o cen mò kɔɛ le.

⁹O va Pol nilan yaŋɔɔ. Mí Pol tofa ndu ciŋ. Mɛɛ o ce maa ndóò laalan le cindaa sɔlaa,

¹⁰mó yonda aa: «Cɔn ma sim o pelun nɔmndon coo!» Mí langbanɔɔ can ɲaali, mó kandu kɔlan.

¹¹Mɛɛ sɛ́lɔ́ɔ́ ce ɲɛ Pol tosa-o, má yonda o sɔɛi ndɛi likaoni-e nin aa: «Halaa siŋnun maa n'vanndaciee, a tol naa tɛɛn.»

¹²O kon má ke Barnabas diolan aa: «Seus», Pol ndu aa: «Hɛrmɛs», kani ndu va nda sɔɔn hivullo ni.

¹³Mí vana-solia-lasálà Seus-o, o máán ndɔɔ va o kobio sondoo-o hun a navaa tovaa nda bayiaa peengela nda vil o yoei, má baa nda o labolo-a o diola kobio sondoo. Vana-solia-lasálà kon a sɛ́lɛ́ va lon-ndo ndáà yeema mì ndáà solul kiilaa kalaa sálàlan.

¹⁴Kɛ Barnabas nda Pol tueyɔɔ sɔɛi ken, má sɛɛsian volɔɔlan lekɔɔ, má luɛi sɛ́lɛ́ kon tɛɛn, má yonda aa:

¹⁵«Le yɛɛ nɛ niaa co yɛ ho tosaa? Naa bɛɛ, vanndacieea daama naa n co maa niaa ni. Yoongu Kɛndɔɔ naa hin niaa tiiyallo ni, haliko mi la mal piɔmaa fondoa sooloo, mì la mulul Hala nɔ yoomoo o ba-o hɔlla, o cɔw halataalaa, lɛŋnden, mɛmma ihɛllan a ɲɛm co lenin-ndon kpow-vo.

¹⁶Paandu, mó mal vanndacieea kpow kelaa mɛɛ nda yeema yɛ.

¹⁷Kɛ nduyɛ, Hala co niaa dɛnnda kɛndɛlan tosallo lɔ́ɔ́-lɔ́ɔ̀: kani o co niaa piɔɔ tuisullo fulaa o halataala o telen bɛnda-o, o co niaa vɛlɛ baloo yɔngoo mì kɔlta niaalan la va piɔu a ɲaaloo.»

¹⁸Kɛ a sɔɔn dimulun nda mun-ndon kpede, o ve sɔɛi bɛɛn-bɛɛn le nda kuunaa sálàla lan solio le.

¹⁹Mí Yuifia pum a can Antiɔs a Ikoniɔm, má muluti sɛ́lɔ́ɔ́. Má vii Pol a powtan, má sasu ndu o kobio kɔɔli, a va yiyanndo maa o vi.

²⁰Kɛ telen kaandennda balu ndu-o, mó can, mó muungu ciee. Diimandɔɔ, mó kɔa Dɛrbe nda Barnabas.

²¹Ndáà ciiyo Yoongu Kɛndɔɔ dimio o kobio Dɛrbe nin, mí vanaa bɔɔ-bɔɔ a siŋnun kaandennda. O kon kɔɔli, má kei Listre, Ikoniɔm, má muungu Antiɔs.

²²A va kaandennda yoomuan lueiyo, má va nda silaa le lou o laalan ndaa coo aa: «Mɛɛ mì n ce sangalan taw le luɛyɔɔ o Masale Hala len nin.»

²³O kunda vanaa Hala-a kɛ́-kɛ̀ nin, má kɛsi simlacia, má piɛi Hala, má bii sumndo, má sɔaa nda Mɛlɛka nda laalan-ndo o ba.

²⁴O kon kɔɔli, má kei Pisidii, má kɔ tiiya Pamfilii.

²⁵Ndáà ciiyo sɔɛi Hala-e dimio Pɛrkɛn[5], má kɔa Atali.

²⁶Má can ndon, má luɛi o dɛ̀ndɔ̀ɔ́ nin, má muungu Antiɔs o lɛŋnde Siri len nin. Antiɔs lon nda sɔɔ nda Hala nɔ kaolaa-o o ba ni, le dɛnnda kɛndɛla nda tosa lan.

²⁷Mɛɛ nda tiiya Antiɔs, má bɔɔŋiaa vanaa Krista-aa, má downun nda kona a ɲɛ-ɲɛ Hala tosal nda, a mɛɛ o kumbil vanaa ve N'Yuifi le-a dioo, mí nda bɛɛ a laalan yɛ.

²⁸Mí Pol nda Barnabas cii telen vilɛi nda vanaa laalannda Antiɔs ciee.