Read Kissi Dɛnnda kiilaa 15 Bible Online

Dɛnnda kiilaa 15 - Kissi bible

Dɛnnda kiilaa 15

¹Mí vanaa pum fula Yuda a Antiɔs, má va puapilɛa pɛɛkoo aa: «Te la dii toomaa mɛɛ tɔŋ Moise-o dimi yɛ le, la tiwba mi la sɔla cindaa le.»

²Pol, Barnabas a vanaa kan cɛlan o dɛnɛ kon coo le, má sɛɛgian taw. O kon má tuu maa Pol, Barnabas a vanaa pum a kɔ Yerusalɛm, mà kɔ komal kiilaa a kaasoŋaa kɔlkalua kunda vanaa laalannda le sɔɛi kalɛi.

³Mí vanaa Hala-a Antiɔs liila nda. Má kei Fenisi a Samari, má dimul vannda mɛɛ vanaa co N'Yuifi le-a a va Hala hɔlla mulullo yɛ. Mí puapilɛa kan kpow a dɔawnun ɲaale taw a tuu kon.

⁴Mɛɛ nda tiiyaa Yerusalɛm, mí kunda vanaa laalannda, kiilaa a kaasoŋaa kɔlkalua kunda vanaa laalannda sɛɛna nda, má dɔawnun kona a dɛnnda Hala tosa a nda lan o kɔɔ.

⁵Kɛ mí Faliisia pum, aa siŋnun vanaa laalannda-a a va dimio aa: «Mɛɛ mì vanaa laalaŋaa co N'Yuifi le-a dii toomaa, mì vana dimul nda vɛlɛ le tɔŋ Moise-o biyɔɔ.»

⁶O kon mí kiilaa a kaasoŋaa kɔlkalua kunda vanaa laalannda cuungian le sɔɛi kalɛi tofaa lenin.

⁷Mɛɛ nda viow sɛɛngianndo tei, mí Piɛr can, mó dimi aa: «Puapilɛa nia, la sina maa o co lɛhau le Hala hɛli ya niaa tɛɛn le vanaa co N'Yuifi le-a Yoongu Kɛndɔɔ tiiyallo le, haliko ma tuei, ma laalan.

⁸Hala, o sinà yiyannda vanndacieea-o cɔm maa o cɛl nda le tùú o ke nda Hala Kɔl-Diandaa maa naa-o.

⁹O hiyan naa le, o cii nda kɔltan dindi le laalan nda laalanndo.

¹⁰Le yɛɛ nɛ niaa co yɛ niko Hala kɔllo tɛɛmbuuo? La yeema mì la siilu vanaa laalannda volɔɔ fuɲaa naa mamaa, te kon te niaa pilaa tiwba cuaa loo?

¹¹Kɛ ɲɛ naa n bɛnda mì n laalanndo co hoo ni: o kɛndɛi Maalii Yeesu-e bɛngu naa n sɔla cindaa ni, nduyɛ lende koni nda bɛɛ sɔla ndu ni.»

¹²O kon mí nda kpow a mei, má yaŋ Barnabas nda Pol nilan, má cɔm nda dɛnnda kaamaalan a dɛnnda kɔndɔfilta Hala tosa a nda vanaa co N'Yuifi le-a tɛɛn ndan.

¹³Ndáà ciiyo, mí Nsaki cua sɔɛi, mó dimi aa: «Puapilɛa nia, la yaŋ ya nilan.

¹⁴Simɔn langa cii cɔm mɛɛ Hala hɛli fɔlɔn vanaa-mangalaa-isɔɔa sina Hala le-a, má siŋnun vanaa ndɔa yɛ.

¹⁵Nduyɛ, lende ɲɛ vanaa-tɛɛngaa-diom Hala-a soo-o co ni, kani o co o sɛvaa aa:

¹⁶‹O kon kɔɔli, i hunnin vɛlɛ mì mingi cɛi David del-lo toosiaa, i minginin ndu tangul, mì mingi ndu simi.

¹⁷O kon vanaa tɔ̀a kpow a nuwviaanin ya Mɛlɛka, vanaa-mangalaa-isɔɔa diola nilan la co biilɔnndo tɛɛn-nda.› Mɛlɛka dimi lende ni,

¹⁸o cɔm vannda tuula ndɔlan kabi sindɛ-o pɛɛn.

¹⁹Mó hiaw laci a dimio aa: ‹Lelan, o ya yiyan-ndo co hoo ni, n saangian vanaa sina Hala le-a le, a co Hala hɔlla mulullo-a.

²⁰Kɛ n sɛvɛlan nda sɛbɔɔ, mì n dimulun nda maa a dia ɲɛm vannda co halaa fondoa sálàlan solullo-on te, a suunda le, a dia visin visi nda kundikundi mì koovan ma lo ndu nin-ndo le, a dia vɛlɛ koovan te.

²¹Kani o co nin lɔ́ɔ́ levil, mí vannda co tɔŋ Moise-o vanaa celen pɛɛkoo o kobila yɛ́-yɛ́lan nin, a co vɛlɛ ndu dimio o cɛila lekaandan nin o palɛi pɛngiɛi coo lɔ́ɔ́-lɔ́ɔ̀.›»

²²O kon, mí kiilaa, kaasoŋaa kɔlkalua kunda vanaa laalannda a vanaa Hala-a kpow a tuu le vanaa pum o nda pila tɛɛn hɛlio, le nda vomɔɔ Antiɔs nda Pol a Barnabas-a. Má hɛli Yuda o ndáà veelu vɛlɛ aa Barsabas-o nda Silas, a va simlacia puapilɛa ndaa tɛɛn-nda.

²³Má viam nda le sɛbɔɔ ho yɔɔ, o va o sɛvaa aa: «Naa kiilaa, kaasoŋaa kɔlkalua kunda vanaa laalannda a naa puapilɛa niaa, n yil niaa puapilɛa naa co vanaa co N'Yuifi le-a tɛɛn Antiɔs, Siri a Silisii-a.

²⁴N tuei maa vanaa pum cɛn naa tɛɛn nanu, má kɔ luei niaa kɔndɔfillo a buulanndo o lakɔl a sɔɔn ndan. Nduyɛ, n vim vana-vana le.

²⁵Lelan, naa kpow n cii cɛlan, mí n hɛli vannda le nda vomɔɔ o niaa lo nda puapilɛa naa hɛnan naa-a: Barnabas nda Pol,

²⁶a yɔngun le baala Maalii naa Yeesu Krista-o tosaa-a.

²⁷N co vɛlɛ Yude nda Silas vomɔɔ o niaa lo, mà kɔ tiinda diomndo o sɔɔn naa n co mun sɛvaa-on coo.

²⁸Kani Hala Kɔl-Diandaa a naa pilaa bɛnda mì n handu niaa sangala celen coo, faŋanndo o sɔɔn n co niaa mun kuee kangalan-ndon coo le:

²⁹la dia visin nda co halaa fondoa sálàlan solullo-on te. La dia kooma cɔlua te kon te visin visi nda kundikundi mí koovan ma lo ndu nin-ndo le, la suunda le. Te la kpakpala pɛ dɛnndan ndan kpow, mɛɛ o naŋ. La lɔl kɛndɛ!»

³⁰O kon mí vanaa nda vem kan-nda bii nɛiyo, má kɔa Antiɔs. Má kɔ bɔɔŋiaa vanaa laalannda nɛɛ pilɛ, má yɔngu nda sɛbɔɔ.

³¹Má dimi sɛbɛ kalaa, mí vannda kpow a dɔawnun ɲaale a sɔɔn va lenin, mí n luei nda yoomuan-ndon.

³²Mí Yude nda Silas va vanaa-tɛɛngaa-diom Hala-a dimul vanaa laalannda sɔɔn taw le nda yoomuan lueiyo, a le nda simio yili o laalanndo coo.

³³Telen pum o kon kɔɔli, mí vanaa laalaŋaa kan a dɔaw nda duaa, le mɛɛ nda muungu kɛndia vanaa vem nda-a o ibuŋ yɛ.

³⁴Kɛ mí Silas ca maa o va fisa mì ndóò lonnun Antiɔs.

³⁵Mí Pol nda Barnabas lo Antiɔs, a va hiovɔɔ laci a vanaa celen sɔɛi Maalii-e pɛɛkoo.

³⁶Telen pum o kon kɔɔli, mí Pol dimul Barnabas aa: «N muungu mì n kɔ yil puapilɛa naa o kobila naa n kei sɔɛi Maalii-e dimi lan nin kpow, mì n sina mɛɛ nda koma va yɛ.»

³⁷Barnabas ndóò yeema mì Nsaŋ, o nda veelu vɛlɛ aa Marke-o ndóò kɔɛ nda kɔɔli,

³⁸kɛ mí Pol ca maa o ve yiyan kɛndɛ le, kani a va vɔ Pamfilii, mó faŋan nda kɔɔli, o liila lɛ nda o baala ndaa nin te.

³⁹Má sɛɛngian taw. O mɛɛlulan, má sɛiyan. Mí Barnabas cua Marke o dɛ̀ndɔ̀ɔ́ nin le kɔlan Siipre.

⁴⁰Mí Pol ndu hɛli Silas. Vanaa laalannda ciiyo Mɛlɛka piɛiyo le nda, má kɔannun.

⁴¹Mí Pol kei Siri a Silisii, mó luei vanaa Hala-a yoomuan.