Read Kissi Dɛnnda kiilaa 16 Bible Online

Dɛnnda kiilaa 16 - Kissi bible

Dɛnnda kiilaa 16

¹Pol tiiyaa Dɛrbe, mó hiaw Listre. Mó kɔ komal kaandennɔɔ pilɛ lon diolan Timote. Yuifinɔɔ kalaa Timote yɔŋnun ni, ndóò laalan Hala. Fuɲa ndɔ ndu, Krɛkenɔɔ o va ni.

²Vanaa laalaŋaa va Listre-a a haa Ikoniɔum a va sɔɔn kɛndɔn dimio taw a Timote o kɔɔ.

³Mí Pol yiyan le kɔlan nda ndu. Le tùú Yuifia va o lɛŋnde len nin-ndo, mó dii ndu tooma, kani ndáà sínà maa Krɛkinɔɔ fuɲa ndɔ yɔŋnun ni.

⁴Telen Pol nda Silas a va keiyo o kobilan nin-ndo, má va vanaa laalannda sɔɔn kiilaa a simlacia Yerusalɛm dimi-on tɛɛngullo, a va vɛlɛ nda dimullo le sɔɔn kalan biyɔɔ.

⁵Vanaa Hala-a va hiovɔɔ laci a yoomuan sɔlaa, mí vanaa laalannda va kuiyo lepalaa-lepala.

⁶Telen nda va keiyo Frisii a o lɛŋnde Kalasii len nin-ndo, mí Hala Kɔl-Diandaa kuuna nda sɔɛi Hala-e dimio.

⁷Ndáà tiiyaa Misii ikɛi, má kindin le keiyo Bitinii, kɛ mí Kɔl Yeesu-o kuuna nda.

⁸O kon má kei Misii, má toal Troas.

⁹Icɔllo pum, mí Pol ca vundulen: mí Maseduannɔɔ pum sim ndu o hɔl, mó tɛɛlun ndu aa: «Hun Maseduan mà mala naa.»

¹⁰Pol ciiyo vundule len cɔu, mí n bɛɛndian fɔ́ɔ́fɔ̀, le kɔlan Maseduan ndon, kani mí n sina lekɛ́ndɛi maa Hala ndóò veelu naa le kɔlan vanaa va o kobi kon nin-nda Yoongu Kɛndɔɔ tiiyallo ni.

¹¹Mí n luɛi o dɛ̀ndɔ̀ɔ́ nin, mí n can Troas, mí n kɔa Samotrase sanaa. Diimandɔɔ, mí n tiiya Neapolis.

¹²Faŋanndo lon, mí n kɔa háá Filipii, kobi lebol va o lɛŋnde Maseduan nden nin-ndo, kobi rɔmnda va icali nin taw-vo pɛɛn. Mí n hivi palɛi bɔɔ-bɔɔ o kobi kon nin.

¹³O paale pɛngiaalen coo, mí n can ciee, mí n kɔa o peo kɔngɔ. N va yiyanndo maa n va fondaa pum komal, nɛɛ Yuifia piɛi Hala-a. Mí n cal, mí n soaa vanlaandua va a cuungiannda o fonda kon-nda o lani.

¹⁴Vanalanɔ pilɛ va nda tɛɛn diolan Lidi, fulaa o kobio Tiatir. Kolala siaŋala volototola báà kalalan ndóò pisi ni, o va Hala piɛiyo. O va naa nilan yaŋɔɔ, mí Mɛlɛka kumbi ndu kɔllo le ɲɛ Pol va dimio-o tueyɔɔ ɲɛkɛndɛi.

¹⁵Mɛɛ o sɔla yinɔɔ nda yungu ndɔɔ kpede, mó veelu naa aa: «Te la laalan pɛ maa vana laalan Mɛlɛka-o ya co ni, mɛɛ la hun mì la va o yiya o ya lo cɛinin.» Mó baŋ naa, mí n cɛl kangalan.

¹⁶Paale pilɛ, n va kɔlan nɛɛ nda piɛi Hala-a, mí cɛ laandoo pum hun le naa bɔŋaa. Ɲina vɔɔndo pum va ndu nin, ɲina kon va tosaa ni mó va sɔɔn siɔdii laci-on dimio. Nduyɛ, vanaa ndɔa bɛndua va volion sɔlaa taw a sɔɔn siɔdii laci o va mun dimio-on.

¹⁷Mó del naa kɔlan kɔɔli naa Pol-aa, mó va yondaa aa: «Vannda ha co vanaa baalaa Hala-Hiow-Ɲɔɔn-Kpow-vo-a ni, nɛi yɔngu vana cindaa sɔlaa-o nda co niaa tiiyallo ho nuaa ni!»

¹⁸O lo ɲɛ kon tosaa lende háá, mí palɛi bɔɔ-bɔɔ i hiaw. O mɛɛlulan, mí ɲɔɔ pala Pol, mó mulin, mó dimul ɲina kon aa: «O diola Yeesu lan, fula cuaambɔɔ ho nin!» Fɔ́ɔ́fɔ̀, mí ɲina kalaa fula.

¹⁹Vanaa ndɔa bɛndua cɔu maa a sɔla lɛnin n'voli cuaambɔɔ kon kɔɔli le, má bii Pol nda Silas, má kɔa a nda o simlacia lelɛŋnda lo o fonda fɛkɛi va o kobi kon nin-ndo.

²⁰Má kɔa a nda o vanaa kialaa n'yamaa rɔmnda lo, má dimi aa: «Vannda ha co naa palaa o kobio ho nin ni. Yuifia nda co ni,

²¹naamula naa Rɔmnda bɛnda mì n cɛl, mì n kela vɛlɛ coo le lan nda co vannda pɛɛkoo ni.»

²²O kon mí sɛ́lɔ́ɔ́ bɛɛ simul nda. Mí simlacia lelɛŋnda a dimul vannda le nda domalan solio lekɔɔ, má viam nda, má lɔaa nda a siondei.

²³Mɛɛ nda soŋ nda tei, má kɔ mal nda o kaasoo. Má dimul vana cumulaa cɛi kaasoo kpéŋ-kpéŋ maa o nɔ nda hɔlten coo.

²⁴Mɛɛ o tuei sɔɔn mun, mí ndu bɛɛ kɔ kinda nda o cɛile pɔmbɔle lenin-nde va o cɛi kaaso kon nin-nden nin di, mó luei nda pelon o kpɛɛɔ.

²⁵Di-tɛɛndo kandɔɔ tiiyaa, mí Pol nda Silas a va Hala piɛiyo, má va ndu condon solullo. Vanaa kaasoa tɔ̀a va nda nilan yaŋɔɔ.

²⁶Fɔ́ɔ́fɔ̀, mí lɛŋnden le ɲiiya taw, mí cɛi kaaso kon hiilun háá nɛɛ nda kandu ndu cɔvɔɔ lɛŋ-nda. Mí diolan kpow la kumbin o lepilɔɔ, mí yɔlɔn ndáà yiw vanaa kaasoa-on kpow n tiimbun.

²⁷Mí kpalilnɔ kon tiandu. Mɛɛ o ce diola lan lakumbiaa, mó cua mɔɛi ndɔɛi cɔwve le diinɔnndo, kani o va yiyanndo maa vanaa kaasoa ɲaanun.

²⁸Kɛ mí Pol yonda aa: «Tosalan dɛnɛ vɔɔn te! N co nanu kpow.»

²⁹O kon mí kpalilnɔɔ ɲuna ɲɛ-tengaa, mó luɛi a kiltan o cɛi kaasoo nin a ɲiiyaa, mó kɔ del Pol nda Silas o labɛngunin.

³⁰O kon kɔɔli, mó soli nda, mó ɲuna nda aa: «Pua sei, yɛɛ ya tosa yɛ mì sɔla cindaa?»

³¹Má mulul ndu aa: «Laalan Maalii Yeesu, mà sɔla cindaa niaa yungu nɔmndo.»

³²O kon má tiiyal ndu niko sɔɛi Hala-e nda vanaa va o ndu lo cɛinin-nda.

³³O lɛɛlɛ pilɛ kon bɛngu, mí kpalilnɔ kalaa kɔa a nda o ɲumma bɛnduma man nin le nda boolɔnndan pulɔɔ. O kon kɔɔli, o cum ndɛ cum celen te, mó sɔla yinɔɔ nda yungu ndɔɔ kpede.

³⁴Mó kɔa a Pol nda Silas o ndu lo cɛinin, mó kɔ ke nda ɲɛdiaa, mí ndu a yungu ndɔɔ kpede a naŋ kɔl le laalan nda laalan Hala-o.

³⁵Ɲɔɔ tengaa, mí simlacia lelɛŋaa rɔmnda viam vannda le kɔlan kpalilnɔɔ dimullo maa o mal vanaa kan.

³⁶Mí kpalilnɔ kon kɔ dimul Pol sɔɛi ken aa: «Simlacia lelɛŋnda vem vannda o ya lo maa ya mal niaa. Lelan, la tiwba mi la kɔɛnnun. La kɔ va kɛndɛ!»

³⁷Kɛ mí Pol dimul vanaa nda vem kan-nda aa: «A lɔɔ naa vannda kpow o hɔl, a kilu naa iyama le, naa yɛ rɔmnda naa n co ni, má mal naa o kaasoo. A yeema niko mà mal naa o vionɔnndo nin? N cɛl ndi le! Mɛɛ mì nda pila hin mà hun soli naa!»

³⁸Mí vanaa ndáà vem kan-nda muungu, má kɔ dimul simlacia lelɛŋnda sɔɔn mun. Ndáà tueyɔɔ maa rɔmnda Pol nda Silas va ni, mí siòònde bii nda.

³⁹Má kɔ ɲɔɔlu nda, má soli nda o kaasoo. Má tɛɛlun nda le faŋanndo o kobi ndaa nin.

⁴⁰Pol nda Silas fulaa o kaasoo, má kɔa o Lidi lo, má kɔ komal puapilɛa ndaa lon. Ndáà ciiyo nda yoomuan lueiyo, má kɔannun.