Read Kissi Dɛnnda kiilaa 17 Bible Online

Dɛnnda kiilaa 17 - Kissi bible

Dɛnnda kiilaa 17

¹Mí Pol nda Silas kei Anfipolis a Apoloni, má tiiya Tesalonike nɛɛ Yuifia ndáà nɔ cɛi lekaando-a.

²Mí Pol komal nda lon mɛɛ o dema tosa yɛ. Palɛi pɛngiɛi iyaa, à va sɔɛi o Sɛbɛ Hala-o coo,

³o va nda tɛɛsiallo a nda cɔmndo maa mɛɛ mì Krista ndóò sanga, mì ndóò tendu fulaa vanvílɛ́iya tɛɛn. Mó dimul nda vɛlɛ aa: «Yeesu ya co hoo niaa sɔɛi ndɔɛi dimullo-o, ndu co Krista ni.»

⁴Mɛɛ sɔɔn mun pilan Yuifia pum kɔltan, má del Pol nda Silas kɔɔli, mí Krɛkia bɔɔ-bɔɔ, áà nɔ siòòŋii Hala-e-a, a vanlaandua lebɛɛa pum a del vɛlɛ ndu kɔɔli.

⁵Kɛ mí paŋalaa can Yuifia tɛɛn. Le hee, má kei vanaa kelannda nuwviaa o nɛilan coo, má luɛi nda nin, o kon mí vɔkɔ-vɔkɔɔ can o kobi kon nin. Má kɔa o Yasɔn ndo cɛinin le Pol nda Silas nuwviaa, ndáà yeema mì ndáà kɔɛ a nda sɛ́lɔ́ɔ́ o hɔl.

⁶Kɛ a komal nda lon te. O kon má kɔa a Yasɔn nda vanaa laalannda a pum vanaa kialaa n'yamaa kobia o hɔl, má yonda aa: «Langbaa ha co keiyo vannda palaa o lɛŋnden coo kpow, má cè nda nihau nanu.

⁷Yasɔn yiya nda o ndu lo ni. Nda kpow co sɔɔn masa Rɔm simullo má va dimio maa masa celen co diolan Yeesu.»

⁸Mɛɛ sɛ́lɔ́ɔ́ a simlacia kan a tuei sɔɔn mun, má buulan.

⁹O kon, má baŋ Yasɔn a vanaa laalaŋaa tɔ̀a maa a soli vilion taw, o kon mà mal nda.

¹⁰Ɲumndan tolɔɔ dɔ́ɔ́, mí vanaa laalannda liila Pol nda Silas Beeree. Mɛɛ nda tiiyaa lon, má kɔ luɛi o cɛi lekaan Yuifia nin.

¹¹Mí Yuifia va Beeree-a bii nda ɲɛkɛndɛi hiovɔɔ biyɔɔ haa Tesalonike a bii nda-o coo. Má cɛl sɔɛi Hala-e a kɔlta ndalan kpede. Lepalaa-lepala, a va Sɛbɛ Hala-o yaasiaa le sinaa te toɲaa sɔɔn Pol va dimi-on co ni.

¹²Mí vanaa bɔɔ-bɔɔ nda tɛɛn laalan, o kon mí vanlaandua lebɛɛ-a a vanpiaandua taw a laalan vɛlɛ o Krɛkia tɛɛn.

¹³Kɛ Yuifia va Tesalonike-a tueyɔɔ maa Pol va sɔɛi Hala-e dimio Beeree, má kɔa, má kɔ dɔaw vannda sɔɔn nin, mí vɔkɔ-vɔkɔɔ can sɛ́lɔ́ɔ́ tɛɛn.

¹⁴Fɔ́ɔ́fɔ̀, mí vanaa laalannda liila Pol a kpengii mɛmma ihɛl-le. Kɛ mí Silas nda Timote lonnun Beeree.

¹⁵Mí vanaa va Pol liilaa-a a kɔa háá Atɛn. O kon kɔɔli, má muungu, má hun dimul Silas nda Timote maa a keleŋa ndu Pol komal.

¹⁶Telen Pol va Silas nda Timote cumndo Atɛn-ndo, mó tambu kɔl taw le sooluula o va cɔu lapiaa o kobi kon nin-ndan.

¹⁷A va sɛɛngianndo nda Yuifia a á vanáà nɔ siòòŋii Hala-e-a o cɛi lekaanndo nin, má va vɛlɛ sɛɛngianndo lepalaa-lepala nda vanaa o va bɔŋanndo-a.

¹⁸Vanaa kɔlkalua del Epikuri nda Stoise kɔɔli-a a pum a va ndu sɛɛngiaa. Mí a pum a va ɲunaa aa: «Yɛɛ vana tombolaa ho yeema yɛ dimio?» Mí a pum nda dimi aa: «Bɔɔle a halaa mialla o kɔɔ o co sɔɛi nuaa ni.» Le tùú nda tuei Pol sɔɛi a Yoongu Kɛndɛ Yeesu-o o kɔɔ a á tendul ndɔɔ fulaa vanvílɛ́iya tɛɛn-ndo o kɔɔ-o nda va dimio lende ni.

¹⁹O kon má bii ndu, má kɔa a ndu o vanaa kialaa n'yamaa kobia lo, má ɲuna ndu aa: «Vɛ̀ɛ̀ a nɔla mà cɔm naa pɛɛku sɛnɛi n co hoo sɔɛi ndɔɛi-yo?

²⁰Kani sɔɔn naa n dema tueyɔɔ loon n co naa dimullo ni. N yeema mì n sina mun kɔlɔlan.»

²¹Nduyɛ, sɔɔn sɛnɛiyon kínɛí vanaa va Atɛn-nda kpow a mialaa va lon-nda ndáà kei dimio ni, te kon te yaŋnɔnndo.

²²O kon mí Pol can, mó sim vanaa kialaa n'yamaa kobi-a tɛɛn, mó dimi aa: «Niaa Atɛnnda, i dɔw taasi maa o nɛi oo nɛi coo, vanaa dinaa niaa co ni.

²³Kani telen ya va balɔɔ o kobi niaa nin-ndo, mí tofa sooluula niaalan. Mí komal bɛɛ fonda-loamaa-lasálàá pum a sɛvaa ho lecoo aa: ‹Le hala vana sina loo›. Ɛ̀ɛ̀ nduyɛ, o niaa co kon piɛiyo la sina ndu loo, sɔɛi ndɔɛi ya co niaa tiiyilallo ho nuaa ni.

²⁴Hala cɔw lɛŋnden a ɲɛm co lenin-ndon kpow-vo, ndu co Vana bɛndoo o halataalaa a o lɛŋnden coo ni, o cel o cɛila-halala vanndacieea cɔw lan nin te.

²⁵O nɔ mako mì vana yɔngu ndu ɲɛ-ɲɛ le, kani ndu ke vana yoomoo, kɔllo a ɲɛm tɔ̀un kpow ni.

²⁶O soli vanaa-mangalaa-isɔɔa kpow vana pilɛ o ipulu, haliko ma tiw o lɛŋnden kpow coo. Mó kialu telenndan, mó hendul nda vɛlɛ pɛɛngula fondala ndáà bɛnda le calle lan.

²⁷Hala tosa kon haliko mi vannda nuwviaa ndu. Bɔɔle taa keeliaa pɛ balan ndu kɔɔli, a komalnin ndu. Nduyɛ, o co vana-vana levil naa tɛɛn te.

²⁸Kani: ‹O ndu nin naa nɔ yoomoo, kpaaya biiŋuanndo a co naa n co-o ni.› Maa mɛɛ vanaa sɛvaa niaa pum a dimi yɛ aa: ‹Cuavaa ndɔa naa bɛɛ n co ni.›

²⁹Le mɛɛ naa n co cuavaa Hala-a yɛ, n yiyan te maa Hala celen co, o velan a piɔm n'sianio, o n'volio, te kon te o lapowvo-o, o vanacieo yiyan mó cɔaw-vo.

³⁰Hala co lɛhau telen vannda ve ndu kon sina loo tofa le, kɛ sunsun o co nda veeloo, nɛɛ-nɛɛ nda co, haliko ma mangala kelala ndalan.

³¹Kani o cii paalen kiolɔɔ, paale o kialunin vannda kpow iyama o sandei nin-nden, vana o hɛli-o tosanin kon ni. O cɔm vannda kpow tɔɔmasele kon a tindi o tindi ndu fulaa vanvílɛ́iya tɛɛn-ndo.»

³²Ndáà tueyɔɔ Pol sɔɛi a tendul vanvílɛ́iya o kɔɔ, mí vanaa pum can ndu mamɔɔ, mí a pum nda dimi aa: «Lɔ́ɔ́ celen a dimul naa.»

³³O kon mí Pol faŋan nda kɔɔli.

³⁴Kɛ mí vanaa pum o nda tɛɛn a del ndu kɔɔli, má laalan ndu, nda yɔŋnun haa ni: Denis, ó va o kunda vanaa kialaa n'yamaa kobia nin-ndo, a cuaa pum diolan aa Damaris, handɔɔ vanaa celen lecoo.