Read Kissi Dɛnnda kiilaa 18 Bible Online

Dɛnnda kiilaa 18 - Kissi bible

Dɛnnda kiilaa 18

¹O kon kɔɔli, mí Pol faŋan Atɛn, mó kɔa Korɛnte.

²Mó komal Yuifinɔ pilɛ lon diolan Akilas, fulaa Pɔn. Ndóò hin ko sɛnɛi fulaa Itali nda Prisil laa ndɔ, kani mí Klode dimul Yuifia kpow maa a faŋan Rɔm. Mí Pol kɔa nda yilɔɔ.

³Le tùú nda va baala pilɔɔ tosaa-o, cɛila-kolala-toandaalan ndáà toosiaa ni, mó kɔ luɛi o yiya o nda lo, má va baalaa latulu.

⁴Pol va sɔɛi lɔ́ɔ́-lɔ́ɔ̀ o palɛi pɛngiɛi coo o cɛi lekaando nin, o va vɛlɛ nɛilan nuwviaa le Yuifia a Krɛkia kɔltan pilanndo.

⁵Kɛ Silas nda Timote hunɔɔ fulaa Maseduan, mí Pol muungu vannda pɛɛkoo daama, mó va Yuifia dimio o hɔl maa Yeesu co Krista ni.

⁶Kɛ le mɛɛ Yuifia va ndu simullo ma va ndu yeowlan yɛ, mó koaŋ cundu va o doma ndɔɔ-o, mó dimul nda aa: «Te la sɔla lɛ cindaa le, mɛɛ a niaa pila ken fula ni, o co lɛ sɔɛi ni le co ken te. O hau kɔɔli, o vanaa co N'Yuifi le-a lo ya co lakɔ ni.»

⁷Mó faŋan ndon, mó kɔ luɛi o langbanɔ pilɛ lo cɛinin, diolan Titius Sustus, vana va Hala biiloo-o, o cɛi ndɔɔ ndóò holnun cɛi lekaando-o.

⁸Mí Krispis simlacinɔ cɛi lekaando nda yungu ndɔɔ kpow a laalan Maalii. Mí Korɛntea bɔɔ-bɔɔ a va Pol nilan yaŋɔɔ-a bɛɛ a laalan, má sɔla yinɔɔ.

⁹Icɔllo pum, mí Mɛlɛka dimul Pol o vundulen nin aa: «Siòòŋii bii nɔm te. Hiow laci a sɔɛi, mɛi le.

¹⁰Kani i co nɔm ikɛi. Vana-vana nɔlanin nɔm simullo mò yɔŋ nɔm ɲɛ le, bau i nɔ vannda taw o kobio ho nin.»

¹¹Mí Pol cii vɔsio a paangon mún ŋɔmpum Korɛnte ciee, o va vannda sɔɛi Hala-e tiiyallo.

¹²Tuma Kaliɔn va masa-ibunga Rɔmnda Akaii ciee-o, mí Yuifia cɛlan, má simul Pol. Má kɔa a ndu nɛɛ kialaa n'yamaa.

¹³Má dimi aa: «Langbanɔɔ ho co vannda kɔltan mangalaa mà va Hala biiloo, kɛ o co mɛɛ tɔŋndo dimi yɛ le.»

¹⁴Pol ndóò yeema mì ndóò cua sɔɛi, kɛ mí Kaliɔn dimul Yuifia aa: «Éé niaa Yuifia ha! Te ndóò va pɛ aa dɛnɛ sendu loo, te kon te dɛnɛ vɔɔndo ni, i va biwnɔn mì yáà yaŋ niaa nilan.

¹⁵Kɛ le mɛɛ o co dɛnɛ lasɛɛngianndo o diomndan lapum coo, o diolan coo a o tɔŋ niaa pilaa coo yɛ, la toosiaa sɔɔn mun niaa pilaa tɛɛn, i kilu sɔɔn vaa nuaa iyama le.»

¹⁶O kon, mó soli nda nɛɛ kialaa n'yamaa.

¹⁷Mí nda kpow a del Sɔstɛne, simlacinɔ cɛi lekaanndo coo, má lɔaa ndu vanaa kialaa n'yamaa o hɔl, kɛ Kaliɔn vowlul nda sondo le.

¹⁸Mí Pol tosa telen vilɛi Korɛnte ciee. O kon kɔɔli, mó faŋan vanaa laalannda, mó luɛi o dɛ̀ndɔ̀ɔ́ nin, mó kɔa Siri nda Priska a Akilas. Lɔ́ɔ́ pá mó kɔa, mó sendin, kani ciɛi ndóò cua ni.

¹⁹Má tiiya Efɛs, mí Pol faŋan Priska nda Akilas-a, mó kɔa o cɛi lekaando nin, mó kɔ cal suukanndo nda Yuifia.

²⁰Má ɲuna ndu maa lo vɔ lon, kɛ o cɛl te.

²¹Tuma o va nda faŋanndo-o, mó dimul nda aa: «Te Hala cɛl pɛ, i muungunin nanu.» O kon kɔɔli, mó faŋan Efɛs, mó kɔa o dɛ̀ndɔ̀ɔ́ nin.

²²Mó kɔ toal Sesaree. Mó kɔa fɔlɔn Yerusalɛm le vanaa Hala-a yilɔɔ. Faŋanndo lon, mó kɔa Antiɔs.

²³Mó lo lon le telen pum. O kon kɔɔli, mó muungu, mó kei o fondala yɛ́-yɛ́la va Kalasii a Frisii lan, mó luei kaandennda kpow yoomuan.

²⁴Mí Yuifinɔ pilɛ, diolan Apolɔs, fulaa Alɛksandrii tiiya Efɛs. Ndóò caa sɔɛi taw, ndóò sina vɛlɛ Sɛbɛ-Hala-o ɲɛkɛndɛi.

²⁵Ndóò sɔla pɛɛkoo a nɛila Maalii lan o kɔɔ, nduyɛ o va vannda pɛɛkoo mó va nda Yoongu kɛndɔɔ tiiyallo a kɔlkɛndɔɔ a á ɲaaloo ɲɛkɛndɛi a Yeesu o kɔɔ, o ve biondɔɔ le. Kɛ yinɔɔ Nsaŋ ndóò yin vannda-o daama ndóò sɔla vɔ ni.

²⁶Mó kandu sɔɛi vannda o hɔl a kɔlkɛsiaa o cɛi lekaanndo nin. Mɛɛ Priska nda Akilas tuei ndu diom, má kɔa a ndu o nda lo cɛinin, má cɔɔlu ndu nɛi Hala-o cɔm.

²⁷Apolɔs ndóò yeema le kɔlan Akaii. Mí puapilɛa luei ndu yoomuan le kɔla lan. Má sɛval kaandeŋaa va lon-nda sɛbɔɔ haliko mi ndáà caa ndu biyɔɔ. Mɛɛ o tiiya, mó mala vanaa laalannda o kɛndɛi Hala-e bɛngu.

²⁸Kani mó nɔla Yuifia a sondo vannda kpow o hɔl, mó cɔm vɛlɛ o Sɛbɛ Hala-o nin maa Yeesu co Krista ni.