Read Kissi Dɛnnda kiilaa 19 Bible Online

Dɛnnda kiilaa 19 - Kissi bible

Dɛnnda kiilaa 19

¹Telen Apolɔs va Korɛnte-o, mí Pol balu lɛŋnde maluaŋnden, mó tiiya Efɛs. Mó komal kaandennda pum lon,

²mó ɲuna nda aa: «Vɛ̀ɛ̀ la sɔla pá Hala Kɔl-Diandaa lɔ́ɔ́ niaa laalan-ndo?» Má mulul ndu aa: «N tui bɛɛ le maa Hala Kɔl-Diandaa co.»

³O kon mí Pol ɲuna nda aa: «Yinɔɔ yɛɛ nɛ niaa sɔla yɛ niko?» Má muli aa: «Yinɔɔ Nsaŋ yin naa-o naa n sɔla ni.»

⁴Mí Pol dimul nda aa: «Vanaa va cɛlɔɔ le kelala ndalan mangalaa-a Nsaŋ yin ni, mó va nda dimullo maa a laalan vana va hunɔɔ ndu kɔɔli-o, Yeesu pɛɛn.»

⁵Mɛɛ nda tuei sɔɔn mun, má sɔla yinɔɔ o diola Maalii Yeesu lan.

⁶Mí Pol handu nda balan coo, má sɔla Hala Kɔl-Diandaa, má muungu sɔɛi o sɔɔn celen nin, má va sɔɔn Hala-on tɛɛnguo.

⁷Kpow-kpow a va le n'van tɔ́ a vanaa ŋiɔn.

⁸Mí Pol luɛi o cɛi lekaando nin. Paangon n yaa, o va sɔɛi a kɔlkɛsiaa. A Masale Hala len o kɔɔ o va sɔɛi ni, mó va kindinndo le vanaa va ndu nilan yaŋɔɔ-a kɔltan biyɔɔ a sɔɛi ndɔɛi.

⁹Kɛ mí vanaa pum nda tɛɛn a kindi nilan, má kɛɛ le laalanndo, má va sɔɔn vɔɔnndon dimio vannda kpow o hɔl a nɛi Maalii-yo o kɔɔ. Le hee, mí Pol faŋan nda kɔɔli, mó kɔannun a kaandeŋaa ndɔa, o va nda pɛɛkoo lɔ́ɔ́-lɔ́ɔ̀ o cɛi pɛɛkaa Tiranus-o nin.

¹⁰Vɔsilan tan tiɔn o va kon tosaa, o kon mí vanaa va o lɛŋnde Asii len nin-nda: Yuifia a vanaa ve N'Yuifi le-a a tuɛi sɔɛi Maalii-e.

¹¹Hala va dɛnnda kaamaalan tosaa a Pol,

¹²háá mí vannda a va kɔlan a kolala-ipɛngɛlan, te kon te minsɔlɔla Pol pilian ndan o vanaa lanàá lo, mí vanaa lanàà kan a va siongɔɔ sɔlaa, mí ɲinaa vɔɔnda a va nda fulaa nin.

¹³Yuifia pum a va balɔɔ, má va keiyo ɲinaa vɔɔnda tovɔɔ vanaa lanàá kɔɔli. Má va dimio aa: «I co niaa soli o diola Yeesu lan, Yeesu Pol co sɔɛi ndɔɛi dimio-o!»

¹⁴Vana-solia-lasálà bɛndoo pum va, diolan Seva, poaa ndɔa nda ŋɔmmɛw a va ɲɛ kon tosaa ni.

¹⁵Kɛ paale pilɛ, mí ɲina vɔɔndo mulul nda aa: «I sinà Yeesu, i sinà vɛlɛ Pol, kɛ niaa niaa, nɛ̀ɛ̀aa niaa co yɛ?»

¹⁶O kon mí vana ɲina vɔɔn kon va kon kɔɔli-o toal nda coo, mó nɔla nda kpow, mó soaŋ nda soŋɔɔ pila, má fula cɛinin a kiltan tumnda fondo a á boolɔnndan lekɔɔ.

¹⁷Efɛsea kpow, Yuifia a vanaa ve N'Yuifii le-a tueyɔɔ sɔɔn mun, mí siòònde bii nda, má ke diola Maalii Yeesu lan bɛɛlen.

¹⁸Mí vanaa laalannda hun taw, má sɔlɔlan yɔŋnda vɔɔnnda ndalan vannda kpow o hɔl.

¹⁹Mí vanaa mangalaa bɔɔ-bɔɔ a hun a sɛbɛla ndalan, má loam ndan vannda kpow o hɔl. Ndáà tuuvo vɔngu sɛbɛla lan, mó bɛnda volin latámán vaalan beleŋuɛɛnu.

²⁰O kon mí sɔɛi Maalii-e i tiw, mí i sɔla kpaayaa.

²¹Dɛnnda lan hiovɔɔ, mí Pol tuu le keiyo Maseduan a Akaii le kɔlan Yerusalɛm. Mó dimi aa: «Lɔ́ɔ́ ya tiiyanin lon-ndo, mɛɛ mì kɔɛ vɛlɛ Rɔm.»

²²Mó viam vanaa va ndu malaa-a nda ŋiɔn Maseduan, Timote nda Eraste, mí ndu pila lonnun Asii le telen pum.

²³O telen kon, mí sɛɛngian bɛndoo can a nɛi Maalii-o o kɔɔ.

²⁴Langbanɔ pilɛ va diolan Demetrius, a volin latámán ndóò tosa baalaa ni, tuuliala cɛila máánnda Artenis hala laandoo ndóò toosiaa ni. Vanaa va baala kon-nda a va tɔnɔɔ sɔlaa taw.

²⁵O kon mó bɔɔŋiaa vanaa ndáà caa baala pilɛ kon-nda, mó dimul nda aa: «La sinà maa n co tɔnɔɔ sɔlaa taw o baala naa ho nin.

²⁶Nduyɛ, la co cɔu, la co vɛlɛ tueyɔɔ ɲɛ langbanɔ nda veelu kon aa Pol-lo co tosaa-o, o co dimio maa halaa vanndaciee cɔw-va co n'hala le. Nduyɛ, vanaa bɔɔ-bɔɔ a co ndu delɔɔ kɔɔli, o co ko Efɛs nanu le, kɛ vana dimi tuŋ maa o lɛŋnde Asii len nin kpow.

²⁷Nduyɛ, te vana cee le, vannda co vali naa hoo pɛɛsa, handɔɔ o kon coo, mì tɔ́ɔ́ bɛndu Artemis hala-laandoo ho nɔ-o tambu. O kon mì bɔɔbɔɔyɛi ndɔɛi tambu, ndu hala-laandu vannda co ho sooloo o lɛŋnde Asii len nin a o ceendo coo kpow-vo.»

²⁸Mɛɛ nda tuei sɔɔn mun, má tambu kɔltan taw, má can yondaa aa: «Artemis hala Efɛsea co o bɔɔ!»

²⁹O kon mí vɔkɔ-vɔkɔɔ can o kobio nin kpow. Mí vannda bii Kaius nda Aristarkus, aa fula Maseduan má va Pol liilaa-a, má kɔa a nda o falii kobio.

³⁰Pol ndóò yeema mì ndóò cɔmnun sɛ́lɔ́ɔ́, kɛ mí vanaa laalannda kuuna ndu.

³¹Mí simlacia pum, á yɔŋnun caaŋaa Pol-la-a va ndu diomndan yoo, má va ndu tɛɛlɔnndo maa o kɔa o falii kobio le.

³²Vɔkɔvɔkɔɔ va sɛ́lɔ́ɔ́ tɛɛn telen kon, kɛ vanaa bɔɔ-bɔɔ a ve bɛɛ sina kɔlɔ ndáà cuungian kon-ndo le.

³³Mí vanaa pum a cɔm Alɛksandre sɔɛi ken lenin, mí Yuifia pum a hivi ndu vannda laci. Mí Alɛksandre heelu baa le nda kpaa, ndóò yeema mì ndóò soo vannda o hɔl.

³⁴Kɛ mɛɛ nda sina maa Yuifinɔɔ o va ni, mí nda kpow a yonda diom pilɛ aa: «Artemis, hala Efɛsea co o bɔɔ!» Haa le lɛɛlɛla tiɔn, a va yonda pilɛ kon.

³⁵Kɛ nduyɛ, mí vana sɛvaa kobio nɔla sɛ́lɔ́ɔ́ kpaa, mó dimul nda aa: «Efɛsea sei, vannda kpow a sinà maa Efɛs co cɛi hala Artemis piɔm bɛndoo kandaa ni, maa ndu co vɛlɛ tɔɔmasele tuula ndɔ fula o halataala mó del-lo ni.

³⁶Vana-vana tiwba mò sɛɛngiaa ken te. Lelan, la ɲulul kɔltan, la tosa ɲɛ-ɲɛ a lakil te.

³⁷La hin a vannda ha nanu, nduyɛ a ciimbuu ɲɛ-ɲɛ o máánndan nin te, a dimi sɔɔn tana a hala-laandu naa o kɔɔ le.

³⁸Te Demetrius a vanaa ndɔa baalaa yeema pɛ le cɛɛŋɔnndo a vanndo o sondo, fonda kialaa n'yamaa co, vanaa kialaa n'yamaa co vɛlɛ, lon nda bɛnda mà kɔ cɛɛŋun ni.

³⁹Te la nɔ yɛ pɛ sɔɔn celen le dimio, mɛɛ la cɔm mun mɛɛ tɔŋndo dimi yɛ.

⁴⁰Te nuaa ni, mɛɛ vannda co naa tɔ́ɔ́yaa biyɔɔ, mà dimi maa naa n tosa ni mì vɔkɔ-vɔkɔɔ a dɛnnda tosan hau lan-ndan la yɔŋnun. Kani n nɔ ɲɛ-ɲɛ naa n cɔm a bɔɔŋian vannda ha bɔɔŋian nuaa-o o kɔɔ le.»

⁴¹Ndóò ciiyo diomndan ndan dimio, mó mingi vannda o la nda lo.