Read Kissi Dɛnnda kiilaa 2 Bible Online

Dɛnnda kiilaa 2 - Kissi bible

Dɛnnda kiilaa 2

¹Paale kafo koavaa[3] lee tiiyaa, mí vanaa laalannda kpow a cuungian nɛɛ pilɛ.

²Mí diomndo pum fula o lepilɔɔ o halataala maa diom hoeyii bɛndu, mó pia nɛɛ nda va icali cɛinin-nda.

³O kon má ca ɲɔɔ pum maa diɛɛmui leyin. Mí diɛɛmui ken i piɔvan, mí i cal vana-vana coo.

⁴Mí Hala Kɔl-Diandaa pia nda nin kpow, má kandu sɔɛi o sɔɔn celen nin mɛɛ Kɔl-Hala-o va nda cɔmndo le sɔɛi yɛ.

⁵Nduyɛ, Yuifia ndáà vo Hala-a pum a va Yerusalɛm, fulaa o lɛŋii co o ceendo coo-e kpow nin.

⁶Mɛɛ nda tuei diom kon, má cuungian sɛ́lɔ́ɔ́. Má dɔawnun kɔndɔfili taw, kani vana-vana va ɲɛ kaandennda va dimio-o tueyɔɔ o sɔɛi ndɔɛi nin.

⁷Mí kɔndɔfil bɛndoo bii nda, má ɲuna aa: «Vɛ̀ɛ̀ o co Kalilea le a co sɔɛi he nuaa le?

⁸Yɛɛ co yɛ niko tosaa mì vana-vana va ɲɛ nda co dimio-o tueyɔɔ o sɔɛi ndɔɛi o velun-nde nin?

⁹Nduyɛ, Partea, Mɛdea a Elamnda a co naa tɛɛn. Vanaa pum a fula Mesopotami, Yuda, Kapadɔse, Pɔn, a o lɛŋnde Asii len nin,

¹⁰Frisii a Pamfilii, a pum a fula Esipte a o tàndá Libii-o nin, o co Sirɛne ikɛi-yo. Vanaa pum a fula Rɔm,

¹¹Krɛte a Arabii, má hun nanu. Yuifia a pum co ni, a pum yɛ, má luɛi o kaannde Yuifia. Kɛ nduyɛ, n co ɲɛ nda co dimio-o tueyɔɔ o sɔɔn naan mangalan yɛ́-yɛ́-on nin, o nda co dimio a dɛnnda kaamaala Hala tosa lan o kɔɔ-o pɛɛn!»

¹²Má dɔawnun kɔndɔfili taw, ndáà nɔ mɛɛ dimia le. Má muungu ɲuunianndo vellaa-velle aa: «Dɛnɛ súú yɛɛ co yɛ hoo?»

¹³Kɛ vanaa pum va kaandennda mamɔɔ, ma va dimio aa: «Mɔiyan nda pim nuaa ni!»

¹⁴O kon mí Piɛr can kiilaa tɔ́ a ò pilɛa tɛɛn, mó heelu diomndo, mó dimul sɛ́lɔ́ɔ́ aa: «Niaa Yuifia a niaa vanaa co Yerusalɛm-nda, la yaŋ nilan ɲɛkɛndɛi o sɔɔn nun, mì la bii dɛnndan ndan bila.

¹⁵O co mamɔi le co vannda ha o lahɔl mɛɛ niaa co yiyanndo yɛ le. Kani lɛɛlɛ ŋɔmahiɔɔlundɔɔ kínɛí co vɔ diilɛn nuaa ni.

¹⁶Kɛ sɔɔn Yɔɛl vana-tɛɛngaa-diom Hala-o dimi-on co peelɔnndo ho ni aa:

¹⁷‹Hala dimi aa: O palɛi mɛɛlɛi, i saŋnin Kɔl nuu vanndacieea kpow coo. Poaa niaa a cuavaa niaa laandua siŋnunnin vanaa-tɛɛngaa-diom Hala-a. Langbaa felengia niaa canin vunduan, bɛndua yuuvɛiya sɔlnin lɔan.

¹⁸A toɲa, o palɛi ken, i saŋnin Kɔl nuu vanaa baalaa nia coo, a piaandua a à laandua pɛɛn, a siŋnunnin vanaa-tɛɛngaa-diom Hala-a.

¹⁹I tosanin dɛnnda kɔndɔfiltan coocoo o halataalaa nin, mì tosa tɔɔmaselelan o lɛŋnden coo nanu: koovan, yinnden a tindile ikumnden le vanin.

²⁰Paalen le siŋnunnin ɲumndan, mì paangei siŋnun koovan, lɔ́ɔ́ pá mì paale Mɛlɛka le len le tiiya, paale bɛndule len, paale tɔ́ɔ́le len pɛɛn.

²¹O kon, vana-vana pɛinin Mɛlɛka-o, ndu sɔlanin cindaa.›

²²Niaa Israɛlla, puapilɛa nia, la yaŋ nilan o sɔɔn mun! Yeesu fula Nasarɛt-o, langbanɔ kon Hala cɛl ndu niaa tɛɛn o dɛnnda kaamaalan nin, o dɛnnda kɔndɔfiltan nin a o tɔɔmaselela o va tosaa niaa tɛɛn-ndan nin, maa mɛɛ niaa sina kon válán yɛ.

²³Má mal ndu niaa o ba mɛɛ Hala ndóò tuu yɛ. Niaa dii ndu ni. Mɛɛ niaa mal ndu vanaa sina Hala le-a o ba, má baŋ ndu o yɔm singafilaa coo.

²⁴Kɛ mí Hala mingi ndu yoomu, mó soli ndu piɔ́mndo o ba, kani ndóò bɛnda mì ndóò lo o kpaaya piɔ́m kon bɛngu le.

²⁵Nduyɛ, David ndóò cii nin dimi a ndu o kɔɔ aa: ‹I co Mɛlɛka cɔnnɔnndo o hɔl tuŋ, kani o co ya o ba kɛndɔɔ coo, i delnin te.

²⁶Lelan, kɔl nuu co a ɲaaloo taw, kɔlkɛndɔɔ co ya, dialun nun bɛɛ n vanin o kɔlkɛsiaa nin.

²⁷Kani nɔm Mɛlɛka melnin ya kɔlan ciee-piɔ́m te, a cɛlnin mì ya vana baala nɔm n kɛsi landɔ-o tol o sɛiyo nin te.

²⁸A cɔm ya nɛila ke vana cindaa lan, ɲaaloo vanin ya o kɔl taw nɔm o hɔl.›»

²⁹Mí Piɛr hiaw laci a sɔɛi aa: «Puapilɛa nia, i co niaa toɲa kpeekpeiyo dimul: David fuɲa naa mama vuo, má kumbu ndu, sɛi ndɔɔ co vɔ o naa lo háá hau.

³⁰Kɛ vana-tɛɛngaa-diom Hala-o o yɔŋnun ni, ndóò sínà maa Hala óò cii nin ndu kpemaa yiilul maa vana pilɛ o polale ndɔlen nin va koma siŋnɔn masaa o fonda ndɔɔ.

³¹Tendul Krista-o fulaa vanvílɛ́iya tɛɛn ndóò ce pɔ́ lende ni, mó dimi aa: ‹O lo ciee-piɔ́m te, dialun ndɔn si o sɛiyo nin te.›

³²Nduyɛ, mí Hala mingi Yeesu ya co hoo sɔɛi ndɔɛi dimio-o yoomu, naa kpow n co lesei.

³³Mí Hala heelun ndu ikɛi, mó kɔ kɛsin ndu o ba kɛndɔɔ coo, mó sɔla Hala Kɔl-Diandaa, o Hala ndóò yii kpemaa-o pɛɛn. Mí ndu Yeesu sɛŋi naa ndu coo. Ndu niaa co cɔu mì la va tueyɔɔ sunsun nuaa ni.

³⁴Nduyɛ, David hel o halataala le, kɛ mó dimi aa: ‹Mɛlɛka dimul Maalii nuu aa: Hun mà cal-la o ba kɛndɔɔ coo,

³⁵i yeema mì mal yaamɔaa nɔmnda nɔm o ba bɛngu.›

³⁶Lelan, mɛɛ mì Israɛlla kpow a sínà toɲaa maa Yeesu niaa baŋ kon o yɔm singafilaa coo-o, ndu Hala siinguu Maalii a Krista ni!»

³⁷Mɛɛ vannda tuei sɔɔn mun, mí n pilan nda kɔltan ɲɛkɛndɛi. Má ɲuna Piɛr a kiilaa tɔ̀a aa: «Puapilɛa naa, yɛɛ naa n tosa yɛ?»

³⁸Mí Piɛr mulul nda aa: «La mangalan, mì vana-vana o niaa tɛɛn sɔla yinɔɔ o diola Yeesu lan, haliko mi hakila niaalan la malnun haki. O kon mì la sɔla ke Kɔl-Diandaa.

³⁹Kani ciɛi Hala cua-e co le niaa a le cuavaa niaa, i co vɛlɛ le vanaa co levil-la kpow a le vanaa-vanaa sɔlanin veeloo Hala naa o ba.»

⁴⁰Mí Piɛr dimul nda vɛlɛ sɔɔn celen taw, n pilan nda kɔltan mí n luei nda yoomuan-ndon. Mó sila nda aa: «La hiɔlun vanaa laasiannda ha!»

⁴¹Mí vanaa cɛl sɔɛi Piɛr dimi-e-a sɔla yinɔɔ. Paale len, vanaa handun vanaa laalannda coo-a va le vàálan tan yáá.

⁴²A va kelaa o pɛɛkula kiilaa va nda yɔngoo lan coo, a va vɛlɛ diom pilɛ. A va dioo nɛɛ pilɛ má va Hala piɛiyo latulu.

⁴³Sióónde i va vana-vana, kani kiilaa kan a va dɛnnda kaamaalan a dɛnnda kɔndɔfiltan tosaa o diola Hala lan.

⁴⁴Vanaa laalannda kpow a va diom pilɛ, a va ɲɛm ndan kpow kɛsio nɛɛ pilɛ.

⁴⁵A va ɲɛ nda sɔlaa a ɲɛm ndáà nɔ-on pisio, má va volin mun piɔvianndo mɛɛ mako vana-vana va yɛ.

⁴⁶Lepalaa-lepala, a va biuvɔnndo cuungianndo o Cɛi-Hala-o nin. A va ɲɛdiaa dioo cɛilan nin a kɔlkɛndɔɔ a o tuisinndo nin.

⁴⁷A va Hala biiloo, mí ɲɔɔ va vannda kpow hɛnanndo a nda. Ɛ̀ɛ̀ nduyɛ, lepalaa-lepala Maalii va vanaa va ciindaa sɔlaa-a handɔɔ o kunda ndaa coo.