Read Kissi Dɛnnda kiilaa 20 Bible Online

Dɛnnda kiilaa 20 - Kissi bible

Dɛnnda kiilaa 20

¹Vɔkɔvɔkɔɔ cuvɔɔ, mí Pol bɔɔŋiaa vanaa laalannda, mó luei nda yoomuan. O kon kɔɔli, mó congun nda, mó kɔa Maseduan.

²Mó kei o lɛŋnde len nin, mó luei nda yoomuan a pɛɛkulan taw-taw. O kon kɔɔli, mó kɔa Krɛs,

³nɛɛ o cii paangon mún yáá-a. Telen o cii toosianndo le kɔlan Siri-o, mó tuɛi maa Yuifia yii ndu dúmbú. O kon mó tuu le keiyo Maseduan o muungoo.

⁴Mí Sopatɛr po Pirus fula Beeree-o, Aritarke, Sekundus fula Tesalonike-o, Kaus fula Dɛrbe-o, Timote, Tisik a Trofim, a fula o lɛŋnde Asii len nin-nda a liila ndu.

⁵Má hiaw naa laci, má kɔ cum naa Troas.

⁶Naa naa, kafo bulu toosian a lɛvɛn too hiovɔɔ, mí n koma luɛi o dɛ̀ndɔ̀ɔ́ nin Filipe. Palɛi ŋuɛɛnu o kon kɔɔli, mí n kɔ komal nda Troas. Mí n cii palɛi ndii ŋɔmmɛw lon.

⁷O paale tasele lɔ́ɔ́ coo, mí n bɔɔŋian le ɲɛdiaa dioo, mí Pol va sɔɛi o vannda lo. Ndóò yeema le hiovɔɔ diimandɔɔ, mó lo pɛɛkoo háá di-tɛɛndo.

⁸Fitinalan la va taw nɛɛ náà n bɔɔŋian o cɛi coocoo nin-nda.

⁹Langbanɔ felengoo pum va icali o kèédei dio-pɔmbɔɔ, diolan Etikɔs, mó hiawnun o lɔan cundun telen Pol va hiovɔɔ laci a pɛɛkoo-o. Mɛɛ o lɔl tei, mó hialun, mó del fulaa o cɛi coocoo yàándɔɔ. Mí vannda hun le ndu simio, kɛ a komal o vinnun.

¹⁰Mí Pol toal, mó kɔ tundun ndu coo, mó saa ndu baa, mó dimi aa: «Siòòŋii bii niaa le, o co yoomu.»

¹¹O kon kɔɔli, mó hel vɛlɛ, mó yimiyimi buloo, mó dia. Mó sɔaa vɛlɛ háá mí paalen se sia, o kon mó kɔannun.

¹²O kon kɔɔli, mí vannda hun a langbanɔ felengi kon, o va yoomu, mí dɛnɛ kon luei nda kpow yoomuan.

¹³Mí n hiaw nda laci le luɛyɔɔ o dɛ̀ndɔ̀ɔ́ nin le kɔlan Asɔs, nɛɛ naa n kɔ cua Pol-la. Lende ndóò tuu ni, kani ndóò yeema mì ndóò kɔɛ a n'pelu.

¹⁴Ndóò komallo naa Asɔs, mí n cua ndu o dɛ̀ndɔ̀ɔ́ nin, mí n kɔa Mitilɛn.

¹⁵Mí can ndon, mí n tiiya diimandɔɔ Kio. Paale len hiovɔɔ, mí n kei Samɔs. O kon kɔɔli, mí n tiiya Milɛt.

¹⁶Nduyɛ Pol ndóò cii nin tuu le keiyo o dɛ̀ndɔ̀ɔ́ nin Efɛs, mì ndóò hiownun, oo yeema le telen hivi o lɛŋnde Asii len nin te. O va keleŋaa le keiyo o nɛi oo nɛi coo, mì ndóò tiiya Yerusalɛm o paale kafo koavaalen coo.

¹⁷Pol lo Milɛt, mó veelu kaasoŋaa kɔlkalua va o kunda vanaa laalannda tɛɛn Efɛs ciee-a.

¹⁸Ndáà tiiyaa ndu ikɛi, mó dimul nda aa: «Kabi paale tasele ya hin Asii len, la sinà mɛɛ ya va kelaa a niaa o telenndan kpow bɛngu yɛ.

¹⁹I tosal Mɛlɛka baalaa o tuisin bɛndoo nin, a mɛmɛan o lahɔl, mí sɔla sangalan le dúmbúla Yuifia va ya yiiyo lan.

²⁰La sinà maa i vin niaa ɲɛ-ɲɛ le, o bɛnda le niaa-o pɛɛn. I pɛɛku niaa ndu vannda kpow o hɔl, mí kei vɛlɛ niaa ndu cɔm cɛilan nin.

²¹I veelu Yuifia a vanaa co N'Yuifi le-a le vulan baŋɔɔ Hala o labɛngunin, a le Maalii naa Yeesu laalanndo.

²²Sunsun, i co lakɔ Yerusalɛm mɛɛ Hala Kɔl-Diandaa co ya baŋɔɔ yɛ, i sinà ɲɛ komalnin ya lon te.

²³O ya sina daama-o co ni, o kobi oo kobi nin, Hala Kɔl-Diandaa co ya cɔmndo maa kaasoo a sangalan la co ya cumndo.

²⁴Kɛ yoomu nuu co ɲɛ-ɲɛ ya o hɔl te, haliko sii i tosa baala nuu a ɲaaloo, mì tosa ɲɛ Maalii Yeesu vem ya tosaa-o: kon co vannda Yoongu kɛndɛ kɛndɛi Hala-e tiiyallo-o ni.

²⁵I kei niaa kpow tɛɛn, mí pɛɛku niaa a Masale Hala len o kɔɔ, kɛ i sinà nihau maa vana ci lenin ya niaa tɛɛn te.

²⁶Lelan, mì dimul niaa hau toɲaa, te vana pilɛ o niaa tɛɛn mal pɛ nɛiyo, o ve lɛnin sɔɛi ni le.

²⁷Kani i cɔm niaa tuula Hala lan kpow, i vin niaa ɲɛ-ɲɛ le.

²⁸Niaa pila mandan, mì la nɔ hɔlten kunda saa Hala Kɔl-Diandaa yɔngu niaa le mandaa-o coo, mì la manda kunda vanaa laalaŋaa Hala kila a piɔ́m po ndɔ ndu pila-o o kɔɔ-o.

²⁹Kani i sinà maa i faŋan pɛ, vannda hun luɛinin niaa tɛɛn maa mɛɛ tunaa yondoa luɛi kunda cɔlua tɛɛn a hɛli o kɛ́-kɛ̀ le yɛ.

³⁰Niaa tɛɛn bɛɛ, vannda vanin còòlan dimio haliko mi vanaa laalannda del nda kɔɔli.

³¹Lelan, la va lahɔl mì la loonun maa vɔsilan tan yáá co hoo ni, niinoo a lɔan, i va niaa kanalanndo, hali a mɛmɛan o hɔl.

³²Nihau, i sɔɔ niaa Hala o ba a o kɛndɛi ndɔɛi bɛngu. O nɔ kpaayaa le niaa yoomuan lueiyo, mò tosal niaa dɛnɛ kɛndɔɔ taw, kpaaya o kɛsi teengen le vanaa co le ndu-a kpow-vo.

³³I fula ɲɛ pila lehɔl te, o va n'voli, te kon te a n'siani, te kon te vɛlɛ a volɔɔ-cuɛinan.

³⁴Niaa pila sinà maa ya pila va baalaa tosaa le o ya nɔ makoo-o sɔlaa ni, a le makola vanaa va ya kɔɔli-a nɛŋio.

³⁵O dɛnndan nin kpow, mí cɔm niaa maa mɛɛ mì vana tosa baalaa le vanaa bala fondoa-a malaa, mì vana loonun a sɔɔn Maalii Yeesu pila dimi-on aa: Vanndo ɲɔɔ keo hiow vana dɛnɛ kɛndɔɔ yɔngoo a vanndo nɔm ɲɔɔ keo.»

³⁶Pol ciiyo sɔɔn mun dimio, mó baŋ vulan, má tosa piɛilen nda ndaa kpow.

³⁷Mí nda kpow a caŋ, má kɔman ndu le ndu congɔnndo.

³⁸Le tùú o dimul nda maa ndáà ci lɛnin ndu loo mɔnɛi va nda ni. O kon kɔɔli, má liila ndu nɛɛ dɛ̀ndɔ̀ɔ́ va-a di.