Read Kissi Dɛnnda kiilaa 21 Bible Online

Dɛnnda kiilaa 21 - Kissi bible

Dɛnnda kiilaa 21

¹Tuma naa n sɛyan naa ndaa-o, mí n luɛi o dɛ̀ndɔ̀ɔ́ nin, mí n kɔa sanaa Kɔs. Diimandɔɔ, mí n tiiya Rɔde, mí n can ndon, mí n kɔa Patara.

²Mí n kɔ komal dɛ̀ndɔ̀ɔ́ lon, o va kɔlan Fenisi. Mí luɛi, mí n kɔa.

³Naa n tiiya Siipre ikɛi, mí n kei kobi kon a matow, mí n kɔa a kpengii lɛŋnde Siri len. Mí n kɔ simi dɛ̀ndɔ̀ɔ́ Tir, nɛɛ volɔɔla va o dɛ̀ndɔ̀ɔ́ nin-ndan láà bɛnda le tolɔɔ-a.

⁴Mí n komal kaandennda pum, mí n hivi palɛi ndii ŋɔmmɛw lon naa ndaa. Mí Hala Kɔl-Diandaa cɔmnun nda, má dimul Pol maa o kɔa Yerusalɛm te.

⁵Kɛ palɛi ken hiovɔɔ, mí n bii nɛiyo le kɔlan. Mí nda kpow a liila naa, laandua ndaa a cuavaa ndaa, háá má soli naa o cieo kɔɔli. Mí n baŋ vulan o mɛmma ihɛllan kɔngɔ, mí n piɛi Hala.

⁶O kon kɔɔli, mí n congan vellaa-velle, mí n luɛi o dɛ̀ndɔ̀ɔ́ nin, mí nda nda muungun o la nda lo.

⁷Mí n can Tir, mí n hiaw laci, mí n kɔa Ptolemais. Mí n yil puapilɛa naa lon, mí n hivi paalen naa ndaa.

⁸Diimandɔɔ, mí n muungu, mí n tiiyaa Sesaree. Mí n kɔ luɛi o Filipe vana yondaa diom Hala-o lo cɛinin, mó yiya naa. Filipe kon va vana pilɛ o vanaa ŋɔmmɛvaa naa n hɛli Yerusalɛm-nda tɛɛn.

⁹Ndóò nɔ cuavaa felengia nda hiɔɔlu, aa sina vɔ dɛnɛ vanapɔnɔ le-a, a va diom Hala-o tɛɛnguuo.

¹⁰Mí n hivi palɛi bɔɔ-bɔɔ lon, mí vana-tɛɛngaa-diom Hala-o pum fula Yuda diolan Akabus.

¹¹Mó hun nɛɛ naa n va-a, mó cua yaule Pol-ten, mó yiwnun balan a pelon, mó dimi aa: «Hala Kɔl-Diandaa dimi maa nuaa Yuifia co vana nɔ yáwlen-nden ndo yii Yerusalɛm ni. O kon kɔɔli, a malnin ndu vanaa sina Hala le-a o ba.»

¹²Mɛɛ naa a vanaa va Sesaree-a tuei sɔɔn mun, mí n tɛɛlun Pol maa o kɔa Yerusalɛm te.

¹³Kɛ mó muli aa: «Le yɛɛ nɛ niaa co yɛ caŋndo mì la va ya kɔllo tɛɛmbuuo? Kani o co le ya yiiyo daama le ya co o bɛɛndianndo le, kɛ haliko mi sɔla vɛlɛ piɔ́mndo Yerusalɛm o diola Maalii Yeesu lan.»

¹⁴Mɛɛ naa n bumba ndu, mí n mɛinun, mí n dimi aa: «Màá Mɛlɛka tosa hɛnan ndɔɔ!»

¹⁵Palɛi ken hiovɔɔ, mí n toosian, mí n kɔa Yerusalɛm.

¹⁶Mí kaandennda Sesaree pum a liila naa lon. Má yaa naa o langbanɔ va naa yiya-o lo, diolan ndu Mnasɔn, fulaa Siipre, vana óò laalan Hala kabi sindɛ-o.

¹⁷Naa n tiiyaa Yerusalɛm, mí puapilɛa sɛɛna naa a ɲaaloo.

¹⁸Diimandɔɔ, mí Pol kɔa o Nsaki lo naa ndaa, mí kaasoŋaa kɔlkalua kunda vanaa laalannda kpede a cuungian.

¹⁹Pol ciiyo nda yilɔɔ, mó downun nda kona o lepola dɛnnda Hala tosa o baala ndɔɔ nin vanaa ve N'Yuifi le-a tɛɛn ndan, mó cɔm tɔmaseloo a ndu pila o kɔɔ.

²⁰Mɛɛ nda tuei sɔɔn mun, má candu Hala. O kon kɔɔli, má dimul Pol aa: «Puapilɛ naa, a ce mɛɛ Yuifia taw a siŋnun vanaa Krista-aa yɛ, nda kpow a co vɛlɛ tɔŋndo biyɔɔ ɲɛkɛndɛi.

²¹Nduyɛ, vannda dimul nda maa nɔm co Yuifia co vanaa celen tɛɛn-nda pɛɛkoo maa a mulul tɔŋ Moise-o kɔɔ, maa nɔm dimul nda vɛlɛ aa a díì cuavaa ndaa tooma le, maa a kelà vɛlɛ o naamula Yuifia coo le.

²²Vɛɛ naa n tosa yɛnin? Kani a co tueyɔɔ maa a tiiya nanu.

²³Lelan, tosà ɲɛ naa n co nɔm dimullo. N nɔ langbaa pum nanu nda hiɔɔlu, a cii yoolen bàá o Hala lo.

²⁴Kɔ niaa ndaa, mì la tosà faleŋun dindianndon, mà sala ɲɛ nda nɔ le salaa-o, haliko ma sendi niaa. O kon, vannda kpow a sinanin maa o co sɔɔn toɲa le nda dimi a nɔm o kɔɔ le, kɛ mà sinà maa nɔm bɛɛ, o tɔŋ Moise-o coo n co kelaa ni.

²⁵Le vanaa co yɛ N'Yuifi le-a yɛ, a siŋnun vanaa laalannda-a, n co nda sɛbɔɔ sɛval, mì n dimul nda yiyan naa maa o bɛnda mà de visin nda co sálàlan solio o máánndan nin-ndon te, a dia visin cɔlua nda ŋɔw bololan mó vu-o le, maa a mandan vɛlɛ a dɛnɛ suundaa.»

²⁶Diimandɔɔ, mí Pol kɔa a vanaa hiɔɔlua kan, mó tosa faleŋii dindiannde nda ndaa. O kon kɔɔli, mó kɔa o Cɛi-Hala-o, mó dimul nda telenndo a palɛi dindin kon va cuvɔɔ-e, kon co ni maa telen vana-vana oo bɛnda le sálàá solio-o.

²⁷Palɛi ŋɔmmɛvii dindiaŋii ken va nin le cuvɔɔ, mí Yuifia va o lɛŋnde Asii len nin-nda a ca Pol o Cɛi-Hala-o nin. Má luei sɛ́lɔ́ɔ́ kpow sɔɔn nin, má bii ndu,

²⁸má yonda aa: «Israɛlla sei, la mala naa! Langbanɔɔ ho co keiyo vannda pɛɛkoo nɛɛ-nɛɛ ka le vanaa naa, tɔŋ naa, a le Cɛi-Hala naa hoo simullo ni. Sunsun, o cii vanaa co N'Yuifi le-a luei o Cɛi-Hala-o nin, mó nɔɔliaa fonda-diandaa hoo.»

²⁹Le tùú ndáà ce Trofime fula Efɛs-o nda Pol o kobi kon nin-ndo nda va dimio lende ni. A va yiyanndo maa Pol óò luei ndu o Cɛi-Hala-o nin ni.

³⁰Mí vɔkɔ-vɔkɔɔ tiw o kobio nin kpow, vannda va kɔlan ba-ba fee. Má bii Pol, má soli ndu o Cɛi-Hala-o nin. Fɔ́ɔ́fɔ̀, má kindiaa diolan.

³¹A lo nɛilan nuwviaa le ndu diyɔɔ, mí vannda kɔ dimul simlacinɔ simlacia vanaa cɔvaa kɛmɛa rɔmnda maa poopoo cɛn Yerusalɛm ciee kpow.

³²Fɔ́ɔ́fɔ̀, mó cua simlacinɔ vanaa cɔwva a vanaa cɔwva, má kɔa a kiltan kpengii sɛ́lɔ́ɔ́ va-e. Sɛ́lɔ́ɔ́ cɔu simlacinɔ kon a vanaa cɔwva, má pɛngi Pol lɔɔ.

³³O kon mí simlaci-vanaa cɔwva kan sɔɔnguu Pol ikɛi, mó simi ndu, mó dimul vannda le ndu yiiyo o yɔlɔn kundalan tan tiɔn. O kon kɔɔli, mó ɲuna le sinaa vana súú Pol va-o a ɲɛ o va tosaa-o.

³⁴Kɛ vana-vana va sɔɛi ndɔ dimi o sɛ́lɔ́ɔ́ tɛɛn. Simlacinɔ cɔw kon bii ɲɛ-ɲɛ bila o vɔkɔ-vɔkɔ kon nin te. O kon mó dimul vannda maa a yɔɔ Pol o kpakio nin.

³⁵Ndáà tiiyaa a Pol o sɛmtɔɔ coo, mí vanaa cɔwva kɔa a ndu, kani sɛ́lɔ́ɔ́ va a kɔl tambɛiyo,

³⁶má va ndu kɔlan kɔɔli a yondaa aa: «La dii ndu!»

³⁷Mɛɛ nda va Pol lueiyo o kpakio nin, mó ɲuna simlacinɔ vanaa cɔvaa kɛmɛa aa: «Vɛ̀ɛ̀ a cɛl pá mì dimi ɲɛ pum?» Mí simlacinɔ kon ɲuna ndu aa: «Vɛ̀ɛ̀ a soaa krɛkiei?

³⁸Vɛ̀ɛ̀ o co nɔm te co langbanɔ Esiptenɔ cɛn pɛi, mó luei vannda seesiɛi, mó kɔa a vanaa diuvaa n'vannda vàála hiɔɔlu o lɛŋnde veselɛilen nin-ndo le?»

³⁹Mí Pol muli aa: «Yuifinɔɔ ya co ni, Tarse o lɛŋnde Silisii len nin ya velun ni, Tarse kobi tɔ́ɔ́ pɛɛn. A yandi, cɛl mì soo o vannda ha lo.»

⁴⁰Mí simlacinɔ kon cɛl. O kon mí Pol sim o sɛmtɔɔ coo, mó kpaa vannda a ba. Ndáà meiyo, mó soaa o nda lo o aramei nin aa: