Read Kissi Dɛnnda kiilaa 25 Bible Online

Dɛnnda kiilaa 25 - Kissi bible

Dɛnnda kiilaa 25

¹Fɛstis tiiyaa o lɛŋnde len nin, palɛi ndii yáá o kon kɔɔli, mó can Sesaree le kɔlan Yerusalɛm.

²Mí bolii vanaa-solia-lasálàá a simlacia Yuifia sim ndu o hɔl, má cɛɛŋun Pol coo.

³Má baŋnun Fɛstis tɛɛlɔnndo maa o tosal nda dɛnɛ kɛndɔɔ, mò cɛl mò mingi Pol Yerusalɛm. Nduyɛ, ndáà cii nin Pol dúmbú yii le ndu diyɔɔ nɛi-tɛɛn.

⁴Kɛ mí Fɛstis muli aa: «Pol co o kaasoo Sesaree, ya pila co muungu lon sunsun.»

⁵Mó dimi vɛlɛ aa: «Te dɛnɛ vɔɔndo langbanɔ kon tosa ni, mɛɛ simlacia niaa liila ya Sesaree lon, mà kɔ cɛɛŋun ndu coo.»

⁶Mí Fɛstis tosa palɛi ndii ŋɔmaa, te kon te tɔ́ kpafii nda tɛɛn, o kon kɔɔli, mó kɔa Sesaree. Diimandɔɔ, mó kɔ cal nɛɛ kialaa n'yamaa, mó dimul vannda le hunɔɔ a Pol.

⁷Telen nda hin a ndu-o, mí Yuifia fula Yerusalɛm-nda balu ndu, má hɛɛndu ndu sɔɔn vɔɔnndon coo, kɛ a nɔla mun cɔmndo a toɲa le.

⁸Kɛ mí Pol kɔɔsa aa: «I tɛɛmbuu ɲɛ-ɲɛ a tɔŋ Yuifia o kɔɔ le, te kon te a Cɛi-Hala-o, te kon te vɛlɛ a Sesar le.»

⁹Fɛstis ndóò yeema mì ndóò tosa dɛnɛ hɛnan Yuifia-o, o kon mó ɲuna Pol aa: «Vɛ̀ɛ̀ a yeema mà kɔɛ Yerusalɛm, mà kɔ kiolu nɔm iyama ya o hɔl lon le dɛnɔɔ ho?»

¹⁰Mí Pol muli aa: «O fonda kialaa n'yama Sesar-o ya co isisi nuaa ni, nɛɛ nda bɛnda mà kelu ya iyama-a. Nɔm pila sinà sɔɛi he ɲɛkɛndɛi maa i tɛɛmbuu ɲɛ-ɲɛ a Yuifia le.

¹¹Nduyɛ, te i tɛɛmbuu yɛ pɛ isɔɔ, i ya bɛnda mì sɔla piɔ́mndo-e, i kɛɛ le. Kɛ te toɲa oo toɲa co o sɔɔn nda co ya hɛɛnduuo coo-on nin te, mɛɛ vana-vana melnin ya nda o ba le, o Sesar lo ya co lakɔ kɔɔsɔ ni.»

¹²Fɛstis ciiyo tundɔɔ nda vanaa ndɔa silaa, mó muli aa: «O Sesar lo n co lakɔ ni, mɛɛ a co lakɔ o ndu lo.»

¹³Palɛi pum o kon kɔɔli, mí masaa Akripa nda Berenise kɔa Sesaree le Fɛstis yilɔɔ.

¹⁴Le mɛɛ nda va palɛi bɔɔ-bɔɔ cii lon yɛ, mí Fɛstis cɔm masaa a dɛnɛ Pol-lo o kɔɔ aa: «Langbanɔ Felisi mɛi o kaasoo-o pum co nanu.

¹⁵Lɔ́ɔ́ ya kɔɛ Yerusalɛm-ndo, mí bolii vanaa-solia-lasálàá a kaasoŋaa kɔlkalua a cɛɛŋun a ndu o kɔɔ, má dimul-la maa ya yaala ndu le ndu diyɔɔ.

¹⁶Mí mulul nda maa rɔmnda dema vana yaala le piɔ́m sɔla le, te o co mì vana kon kɔɔsa fɔlɔn nda vanaa bii sei ndɔɔ-a, mà cɔm tɛɛmbuula nda bii sei ndɔɔ lan te.

¹⁷Lelan ndáà hunɔɔ nanu, i cum te, mí cal nɛɛ kialaa n'yamaa diimandɔɔ, mí dimul nda le hunɔɔ a langbanɔ kon.

¹⁸Mí vanaa bii sei ndɔɔ-a hun, kɛ a cɔm tɛɛmtuu kɛ́-kɛ̀ a ndu o kɔɔ mɛɛ ya va yiyanndo yɛ le.

¹⁹Sɛɛngianndo kínɛí va nda tɛɛn o sɔɛi dina ndaa coo a o sɔɛi langbanɔɔ pum coo ni. Langbanɔ diolan aa Yeesu, o vi mí Pol va dimio maa o co yoomu-o.

²⁰Mɛɛ sɔɛi kalɛi dɔw ya kɔndɔfili, mí ɲuna Pol te Yerusalɛm ndóò yeema ni mì nda kɔ kiolu ndu iyama.

²¹Kɛ mó dimi maa a manda sɔɛi ndɔɛi háá mì masa-bɛndoo sinà a ndi kɔɔ. Le hee mí dimul vannda le ndu mandaa háá lɔ́ɔ́ ya yaanin ndu o Sesar lo-o.»

²²Mí Akripa dimul Fɛstis aa: «Ya bɛɛ, i yeema mì tuei ndu diom.» Mí Fɛstis muli aa: «Siɔdii fɔ́ɔ́fɔ̀, a co ndu diom tuɛyɔɔ.»

²³O kon diimandɔɔ, mí Akripa nda Berenise hun o biilu lemasaa nin, má luɛi o cɛi kialaa n'yamaa nin nda simlacinɔ simlacia vanaa cɔvaa kɛmɛa a simlacia va o kobi kon nin-nda pum. Mí Fɛstis dimul vannda le hunɔɔ a Pol.

²⁴O kon kɔɔli, mí Fɛstis cua sɔɛi, mó dimi aa: «Masaa Akripa a niaa vanaa co nanu-a kpede, kámáá la ce langbanɔɔ ho! Yuifia kpow a bii ya seiyo Yerusalɛm a Sesaree ciee nanu a deŋio maa o bɛnda mò sɔla piɔ́mndo.

²⁵Ya yɛ, i ci tɛɛmbuu kɛ́-kɛ̀ o bɛnda mò sɔla piɔ́mndo le. Kɛ le tùú ndu pila yeema le kɔlan o masa bɛndoo lo-o, mí ca maa o co fisa mò kɔɛ.

²⁶I nɔ sɔɛi kpeekpei ya sɛval masa bɛndoo a ndu o kɔɔ le, lelan ya veelu ndu niaa kpow o hɔl ni, kɛ taama-taama nɔm masaa Akripa, haliko telen naa n ɲunanin ndu-o, mì sɔla ɲɛ pum le sɛvaa.

²⁷I ci ken dɛnɛ kɔlkalu le vana kaasoo yɔɔ Rɔm te, te i cɔm dɛnɛ o tɛɛmbuu-o vakpa le.»