Read Kissi Dɛnnda kiilaa 26 Bible Online

Dɛnnda kiilaa 26 - Kissi bible

Dɛnnda kiilaa 26

¹Mí Akripa [6]dimul Pol aa: «A tiwba mà soo, mà kɔɔsa le nɔm pila.» O kon mí Pol heelu baa, mó kɔɔsa aa:

²«Masaa Akripa, i naŋ hau kɔl le sɔɛi nɔm o hɔl, le nɔm sɔɔn Yuifia co ya hɛɛnduuo coo-on cɔmndo,

³nduyɛ, a sínà naamula ndalan a sɔɔn nda co sɛɛngianndan coo-on ɲɛkɛndɛi. Lelan, i co nɔm tɛɛlɔn mà biwnun, mà yaŋ ya nilan.

⁴Yuifia kpow a sínà vana ya yɔŋnun kabi o cuaambɔyɛi nii nin-ndo, a sínà vɛlɛ mɛɛ ya kela vanaa nia tɛɛn yɛ, a mɛɛ ya kela Yerusalɛm yɛ.

⁵A sínà ya, o co lɛhau le. Te nda pila cɛl pɛ, mà tɛnda seilen, a co sinà maa i yɔŋnun vana pilɛ o vanaa handu pelei kpéŋ-kpéŋ o sɔɔn dinan naan coo-a tɛɛn, dina Faliisia pɛɛn.

⁶Sunsun yɛ, le tùú ya co sɔɔn Hala dimul fuɲaa naa mamaa-on tiindanndo-o nda hin a ya o fonda kialaa n'yamaa nuaa ni.

⁷Vanaa fula o polama tɔ́ a mamiɔmma yungu naa nin-nda bɛɛ a nɔ tiindanndo maa Hala nda co kon biiloo idii a icɔl-lo co sɔɔn mun peelu. Ɛ̀ɛ̀ nduyɛ, masaa Akripa, le tiindan ya nɔ kon-ndo Yuifia co ya sɔɔn mun hɛɛnduuo coo nuaa ni.

⁸Niaa Yuifia yɛ, le yɛɛ nɛ niaa co yɛ kɛɛ laalan maa Hala nɔla mò mingi vanaa vi-a yoomu?

⁹Ya bɛɛ, i va yiyanndo le keiyo o nɛi oo nɛi coo le diola Yeesu fula Nasarɛt-o cɔlɔbaa.

¹⁰Ɲɛ ya tosa Yerusalɛm-ndo yɔŋnun kon ni. I mal vanaa laalaŋaa bɔɔ-bɔɔ o kaasoo. Nduyɛ, bolii vanaa-solia-lasálàá ndáà ke ya di kon ni, te ndáà va vɛlɛ pɛ yamɛi ndɛi kiolɔɔ le nda diyɔɔ, yáà cɛl.

¹¹Palɛi bɔɔ-bɔɔ, i va keiyo o cɛila lekaandan nin le vanaa laalaŋaa kan saangiaa, yáà yeema le nda baŋɔɔ mì ndáà mal laalan ndaa. Mɛɛ sɔɛi pala ya tei, mí va nda kɔlan kɔɔli o kobila isumial tan nin.

¹²Paale pilɛ, mí bolii vanaa-solia-lasálàá ke ya dio le kɔlan Damas le vanaa laalannda biyɔɔ.

¹³I lo kɔlan, paalen léè va nin le tiiyaa o pol, mí ca pangele bɛndoo fulaa o halataala, ndóò hiow ɲɛ-tengaa lepalaa diondɔɔ, mó balu ya tengaa naa vanaa va ya kɔɔli-a.

¹⁴Mí naa kpow n deli lɛŋ, mí tuɛi diomndo pum ya dimullo o aramei nin aa: ‹Sol, Sol, le yɛɛ nɛ n co yɛ ya yɛlen tollo? Fondo fúú n co ya simullo ho ni, mɛɛ visio simul tinda vana co ndu mandaa-o nuaa yɛ pɛɛn.›

¹⁵Mí ɲuna aa: ‹Nɔm nɛ̀ɛ́-nɛ̀ Maalii?› Mí Maalii mulul-la aa: ‹Ya Yeesu n co yɛlen tollo-o ni.

¹⁶Kɛ cɔn mà sim. Ya cɔmnun nɔm ni. I cii nɔm hɛli mà siŋnun vana baala nuu. A vanin sei nuu le vanaa celen dɛnnda n ce hau lan ndan tiiyallo, mà dimul nda vɛlɛ la n canin-ndan.

¹⁷I kandanin nɔm Yuifia a vanaa celen tɛɛn, a ya co nɔm haa vomɔɔ tɛɛn-nda.

¹⁸I co nɔm vomɔɔ mà kɔ kumbi nda hɔltan, mà soli nda o ɲumndan nin, mà ce ɲɛ-tengaa. Mà soli nda o kpaaya Setana-o bɛngu, mà muungu Hala o ibuŋ. O kon taa laalan ya pɛ, a sɔlanin hakio malɔɔ, mà sɔla vɛlɛ kɛ́ ndaa vanaa Hala-a tɛɛn.›»

¹⁹O kon mí Pol hiaw laci a sɔɛi, mó dimi aa: «Nuaa ni masaa Akripa, i kɛɛ vundule komal-la fulaa o halataala len diom tueyɔɔ le.

²⁰Kɛ vanaa co Damas-a a haa Yerusalɛm ya kandu yoongu kalaa tiiyallo ni, o kon kɔɔli, mí pɛɛku haa o tàndá Yuda-o nin kpow a vanaa-mangalaa-isɔɔa. Mí dimul nda maa a mal yɔŋnda vɔɔnnda ndalan, mà mangalan, mà mulul Hala hɔlla, mà tosa dɛnnda cɔm maa a mangalan ndan.

²¹Le hee Yuifia bii ya o Cɛi-Hala-o nin ni, má nuwviaa nɛilan le ya diyɔɔ.

²²Kɛ háá paalen nden hau, Hala nɔ ya baa coo tuŋ. I co vɔ nanu le vannda kpede seilen nden tɛndallo, cuaambɔa a kaasonnda. I co ɲɛ-ɲɛ celen dimi le, mɛɛ ɲɛ vanaa-tɛɛngaa-diom Hala-a dimio a ɲɛ Moise dimi maa o co hunɔɔ tosanndo kínɛí.

²³Kon co ni maa mɛɛ mì Krista ndóò sanga, mì ndóò yɔŋnun vana tasoo le tendullo fulaa vanvílɛ́iya tɛɛn, mì ndóò dimul Yuifia a vanaa co N'Yuifi le-a sɔɛi ɲɛ-tengaa yɔngu vana cindaa sɔlaa-o.»

²⁴Pol lo sɔɔn mun cɔmndo, mí Fɛstis yonda aa: «Poo nɔm a seema! Pɛɛku bɛndoo cii nɔm bollen hiŋ!»

²⁵Mí Pol mulul ndu aa: «Vana bɛndoo, i seema le. Sɔɔn kɔlkalon a sɔɔn toɲan ya co dimio nuaa ni.

²⁶Masa ya co sɔɔn mun dimullo-o sinà dɛnndan ndan, lelan i tiwba mì soo ndu o hɔl a tiindanndo. Nduyɛ, i laalan maa o kɛ́-kɛ̀ co ndu mial te, kani o co dɛnnda hiow o vionnɔn nin te.

²⁷Vɛ̀ɛ̀ lende le masaa Akripa? Vɛ̀ɛ̀ a laalan sɔɔn vanaa-tɛɛngaa-diom Hala-a dimi-on? I sinà maa a laalan.»

²⁸Mí Akripa dimul Pol aa: «Vɛ̀ɛ̀ a yeema mà siinguu ya vana laalanndo o telen bingi bɛngu?»

²⁹Mí Pol muli aa: «O va le telen bingi, o va vɛlɛ le telen vilɛi, i co Hala piɛi, haliko mi nɔm a vanaa co ya diom tueyɔɔ hau-va kpow siŋnun maa ya, o co mɛɛ ya co o yɔlɔn nuaa yɛ le dɛ!»

³⁰O kon mí masaa-ou, masa-ibungaa-ou, Berenise-ou a vanaa va lon-nda kpow a can,

³¹má kɔ tundu. Má dimulan vellaa-velle aa: «Langbanɔɔ ho tɛɛmbuu dɛnɛ oo dɛnɛ vana dii ndu le, te kon te mì vana mal ndu o kaasoo le.»

³²Mí Akripa dimul Fɛstis aa: «Te langbanɔɔ ho ndóò cii nin Sesar masa lebollo veelu le, o va malɔɔ sɔla.»