Read Kissi Dɛnnda kiilaa 28 Bible Online

Dɛnnda kiilaa 28 - Kissi bible

Dɛnnda kiilaa 28

¹Naa n fulaa o kɔngɔ, mí n tuɛi maa Malte lɛŋnde len le nɔ diolan ni.

²Mí vanaa co o lɛŋnde len nin-nda a tosal naa dɛnɛ kɛndɔɔ. Má biilu naa, má kiisuu yinnde bɛndulen, mí n balu len sɔ́, kani piɔɔ va siaa, hoeiye i va vɛlɛ.

³Mí Pol cuungiaa yɔmnde kundaa le vowvo o yin. Telen o va ndi vowvo-o, mí ɲɛ tuwvo komal hɔ̀ɔ̀lɔ́ɔ̀, mó fula, mó simbulun ndu o baa.

⁴Vanaa va o lɛŋnde len nin-nda cɔu hɔ̀ɔ̀lɔ́ kon o landanndo ndu o ba, má dimulan vellaa-velle aa: «Langbanɔɔ ho kɛɛ va vana diyaa n'vanndo le, kani mɛmma ihɛllan ma langa biondu ndu, kɛ dɛnɛ sandaa Hala-o cɛl-lɔ mo va yoomu le.»

⁵Kɛ mí Pol fasaŋa kɛw kon o yin, o sinan nɛi oo nɛi le.

⁶Vanaa kan va yiyanndo maa baa va ndu hindɔɔ, te kon te maa o va delɔɔ mi ndóò vi. Kɛ má viaw ka, ɲɛ-ɲɛ vɔɔn tosan ndu le. O kon, má mangala yiyanndo, má dimi aa hala Pol co ni.

⁷Fondaa pum va naa ikɛi lon, simlacinɔ lebol va o lɛŋnde len nin-ndo ndóò nɔ ndu ni, langbanɔ kon diolan Publius. Mó yiya naa ɲɛkɛndɛi maa caaŋaa ndɔ o ndu lo, mí n hivi palɛi ndii yáá.

⁸Fuɲa ndɔ va ihini o kpeloo coo. Diallon va ndu nɛiyo, o va vɛlɛ sɔndian-makòó. Mí Pol kɔ tofa ndu, mó piɛi Hala, mó handu ndu balan coo, mó singi ndu.

⁹O kon mí vanaa lanàà tɔ̀a va o lɛŋnde len nin-nda bɛɛ a hun, má sɔla siongɔɔ.

¹⁰Má ke naa bɛɛlen taw. Telen naa n va faŋanndo-o, má ke naa ɲɛ-ɲɛ naa n nɔ makoo le kɔlan.

¹¹Paangon mún yáá o kon kɔɔli, mí n faŋan, mí n luɛi o dɛ̀ndɛ̀ fula Alɛksandrii-o pum nin, ò tɔɔmasele Diɔskura[7] va o tuulaa coo-o. Dɛ̀ndɛ̀ kalaa yɛ, o fonda simiaa ladɛndɔɔ pum o lo ni mí sialten kpow le hiaw.

¹²Naa n tiiyaa Sirakus, mí n tosa palɛi ndii yáá.

¹³Cɔnɔnndo lon, mí n demul kɔngɔɔ, mí n tiiya Rekio. Mí hoeyii fula a ba too-e i hɔŋ. Palɛi ŋiin o kon kɔɔli, mí n tiiya Pusɔlɛs.

¹⁴Mí n komal puapilɛa pum o kobi kon nin, má tɛɛlun naa aa n hivi lɔ́ɔ́ pilɛ naa ndaa latulu. Kon yɔŋ ni, mí n kɔa Rɔm.

¹⁵Mɛɛ puapilɛa naa va Rɔm-nda tuei naa tɔ́ɔ́, má hun naa bɔŋa háá Apius o lɔ́ɔ́ nin a o Cɛila Yaala Yiyaa mialla. Pol cɔu nda dɔ́ɔ́, mó mel Hala balika, mó sɔla yoomuan.

¹⁶Naa n tiiyaa Rɔm, má dimi le Pol yiyaa landɔ, má soli kpalilnɔɔ le ndu hɔlla landɔɔ coo.

¹⁷Palɛi yaa o kon kɔɔli, mí Pol veelu simlacia Yuifia va Rɔm-nda o ndu lo. Mɛɛ nda cuungian, mó dimul nda aa: «Puapilɛa nia, i tɛɛmbuu isɔɔ oo isɔɔ a vanaa naa le, te kon te o naamula fuɲaa naa mamaa nin te. Kɛ nduyɛ, má bii ya Yerusalɛm, má mal-la rɔmnda o ba.

¹⁸Mí Rɔmnda ɲuuniaa ya, ndáà yeema mì ndáà soli ya o kaasoo, kani a ci tɛɛmbuu yáà bɛnda le piɔ́m sɔla le.

¹⁹Kɛ mí Yuifia kɛɛ, má baŋ ya, mí veelu Sesar. Nduyɛ, yáà yeema mì yáà handu vanaa nia isɔɔ coo le.

²⁰Lelan ya ɲuna ni mì hun soo o niaa lo. Kani le tiindan Israɛlla nɔ-o ya co o yɔlɔn nuaa ni.»

²¹Mí simlacia Yuifia mulul ndu aa: «N sɔla sɛbɛ kɛ́-kɛ̀ fulaa Yuda o diola nɔmndan te, paupilɛ naa kɛ́-kɛ̀ fula lon mò hun dimul naa sɔɛi vɔɔn a nɔm o kɔɔ le.

²²Kɛ n yeema mì n sínà yiyan nɔmndo. Kani n sínà maa vannda co nɔm cenelanndo nɛɛ-nɛɛ ka.»

²³O kon mí simlacia Yuifia hɛli paale celen le bɔɔŋian-ndo. Paale len tiiyaa, mí nda kpow a muungu Pol tofa nɛɛ o va o yiya-a. Cɔn idiiyo háá icɔllo, Pol va nda sɔɔn tɛɛsiallo a Masale Hala len o kɔɔ. O va nda kɔltan pilanndo a tɔŋ Moise-o a á sɔɔn vanaa-tɛɛngaa-diom Hala-a le nda sɔɛi Yeesu-e tiiyallo.

²⁴Mí vanaa pum a laalan sɔɔn o va dimi-on, kɛ a pum a laalan te.

²⁵Má sɛyan a sɛɛngianndan, mí Pol dimul nda aa: «Toɲaa mí Hala Kɔl-Diandaa soaa a sondo Esai, vana-tɛɛngaa-diom Hala-o,

²⁶mó dimi aa: ‹Kɔ dimul vannda ha aa: La tuɛinin ɲɛkɛndɛi, kɛ la biinin bila le, la tofanin, kɛ la cinin te.

²⁷Kani kɔlta vannda ha la bii isɔɔ le, a cii nilan baŋul mà kinda hɔltan, yɔŋii nda cɔ a hɔlta ndalan, mà tuei a nila ndalan, mà bii bila a kɔlta ndalan, yɔŋii nda hun ya o ibuŋ, mà sɔla siongɔɔ.›

²⁸Lelan, la sínà maa sɔɛi cinda fula Hala o ba-o yɔngunnin vanaa co N'Yuifi le-a, mà bii ndi.» [

²⁹Pol ciiyo kon dimio, mí Yuifia kɔannun, a va kɔlan a sɛɛngianndan taw nda pilaa tɛɛn[8].]

³⁰Vɔsilan tan tiɔn Pol cii o cɛi o va salaa-o nin ni. Lon vanaa va ndu hunɔɔ yilɔɔ-a va ndu komallo ni.

³¹O va vannda pɛɛkoo a masale Hala len o kɔɔ, mo va nda sɔɛi Maalii Yeesu Krista-e tiiyallo a tiindanndo kpede, ɲɛ-ɲɛ kuuna ndu le.