Read Kissi Dɛnnda kiilaa 3 Bible Online

Dɛnnda kiilaa 3 - Kissi bible

Dɛnnda kiilaa 3

¹Paale pilɛ, Piɛr nda Nsaŋ va kɔlan o Cɛi-Hala-o a paale yɔngannden, o lɛɛlɛ yàándɔɔ, telen ndáà piɛi Hala-o.

²Langbanɔ va namtanɔɔ kabi o violɔn ndɔɔ-o va o dio luɛyaa Cɛi-Hala-o ikɛi, dio ndáà veelu aa: «Naŋɔɔ»-o. Lon ndáà hun a ndu lɔ́ɔ́-lɔ́ɔ̀ ni, le vanaa va hunɔɔ o Cɛi-Hala kon nin-nda ɲɔɔn piɛiyo.

³Ndóò cɔu Nsaŋ nda Piɛr luɛyɔɔ, mó piɛi nda volion.

⁴Má muli hɔlla a kpengii o va-e, mí Piɛr dimul ndu aa: «Tofa vɔ naa!»

⁵Mó tofa nda ɲɛkɛndɛi, kani o va yiyanndo maa o va ɲɛ pum sɔla nda o ba.

⁶Mí Piɛr dimul ndu aa: «I nɔ ivoli le, i nɔ vɛlɛ isiani le, kɛ o ya nɔ-o ya co nɔm yɔngu ni: o diola Yeesu Krista fula Nasarɛt-o lan, cɔn mà kɔɛ!»

⁷O kon kɔɔli, mí Piɛr bii ndu ba kɛndɔɔ le ndu malaa cɔnɔnndo. Fɔ́ɔ́fɔ̀, mí pelun ndɔn a kpelenkpelennda ndɔlan la simulu.

⁸Mó huulu, mó kandu kɔlan. Mó luɛi nda kiilaa kan o Cɛi-Hala-o nin, mó va kɔlan a huuloo a á Hala candɔɔ.

⁹Mí vannda kpow a ca ndu kɔlan a Hala candɔɔ.

¹⁰Mɛɛ nda sina maa langbanɔ va icali vannda ɲɔɔn piɛiyo o dio luɛyaa nda veelu aa «Naŋɔɔ-o» ni, mí kaamaa bɛndoo bii nda, má dɔawnun kɔndɔfili le ɲɛ yɔŋnun ndu kon-ndo.

¹¹Le tùú langbanɔɔ ve lɛ Piɛr nda Nsaŋ faŋan kɔɔli loo, mí vannda kpow a dɔawnun kɔndɔfili, má hun a kiltan nɛɛ nda va o falii Cɛi-Hala-o nin, o tongo Salomɔn-ndo bɛngu-a.

¹²Piɛr cɔu dɛnnda lan, mó ɲuna nda aa: «Niaa Israɛlla ha, le yɛɛ nɛ niaa co yɛ kɔndɔfillo dɔwnɔnndo le siongɔɔ langbanɔɔ ho? Le yɛɛ nɛ niaa co yɛ naa tofaa mì la va yiyanndo maa a kpaaya naa pilaa, te kon te maa ɲíí nɛi i tosa ni mó kɔa?

¹³Hala Abraham-ndo, Hala Isaak-o a Hala Yakɔb-o, a yɔŋnun fuɲaa naa mamaa-a cɔm kpaaya ndɔɔ o diola vana ndɔ baalaa Yeesu lan ni. Yeesu niaa pila mal masalen o ba, mí la kɛɛ ndu Pilate o hɔl-lo pɛɛn. Nduyɛ, mí Pilate ndóò dimi le ndu malɔɔ.

¹⁴Niaa yɛ, mí la kɛɛ vana Diandaa, o co vana Sandaa Mɛlɛka o hɔl-lo pɛɛn. Mí la ɲuna le vana diyaa n'vanndo malɔɔ.

¹⁵Mí la tosa, má dii vana nɔ yoomoo o ba-o, kɛ mí Hala mingi ndu yoomu fulaa vanvílɛ́iya tɛɛn. Naa n co seiya ni.

¹⁶A laalanndo a o diola Yeesu lan langbanɔ niaa co hoo cɔu, mì la sina ndu-o simul nuaa ni. Le laalan o laalan o diola Yeesu lan-ndo o sɔla siongɔɔ niaa kpow o hɔl nuaa ni.

¹⁷Nduyɛ, puapilɛa nia, i sínà maa niaa a simlacia niaa, la bii ɲɛ niaa tosa kon a ndu-o bila le.

¹⁸Kɛ ɲɛ Hala ndóò dimi paandu a sondola vanaa-tɛɛngaa-diom Mɛlɛka-a kpow-vo peelun lende ni, maa mɛɛ mì Krista ndóò sanga.

¹⁹Lelan, la mangalan, mì la mal yɔŋ vɔɔndo, mì la mulul Hala hɔlla, haliko mo ɲumi hakila niaalan.

²⁰O kon, Mɛlɛka yɔngunin niaa telenndan le pɛngio, mò cuu niaa Krista, vana o hɛli kabi paandu le niaa-o, Yeesu pɛɛn.

²¹Sunsun, mɛɛ mò lo vɔ o halataala háá mì paale Hala minginin dɛnndan kpow o polalen nden le tiiya, maa mɛɛ o dimi lɔ́ɔ́ kon sɔɛi ken a sondola vanaa-tɛɛngaa-diom Hala-a diandaa yɛ.

²²Kani mí Moise dimi aa: ‹Mɛlɛka, o co Hala niaa-o cuunin niaa vana-tɛɛngaa-diom Hala-o maa ya, fulaa o puapilɛa nia tɛɛn. La tuei ndu diom mì la bii ɲɛ-ɲɛ o hun dimulnin niaa.

²³Vana-vana kɛɛ pɛ le sɔɔn vana-tɛɛngaa-diom Hala kon biyɔɔ, Hala solinin ndu vanaa ndu Hala-a tɛɛn, mò sɔla piɔ́mndo.›

²⁴Nduyɛ, vanaa-tɛɛngaa-diom Hala-a kɛ́-kɛ̀ kei, kandɔɔ Samiɛl, a vanaa hin ndu kɔɔli-a kpede a soo a dɛnnda co yɔŋnɔnndo o palɛi he bɛngu lan o kɔɔ.

²⁵Niaa co cuavaa vanaa-tɛɛngaa-diom Hala-a kan ni, a Hala yii kan kpemaa a fuɲaa naa mamaa, mó dimul Abraham aa: ‹Vanaa-mangalaa-isɔɔa o ceendo coo kpow a sɔlanin duaa cuavaa nɔmnda o ba bɛngu.›

²⁶Le niaa Hala cuu vana ndɔ baalaa ni. O cuu ndu haliko mi vana-vana mal kela ndɔ vɔɔndo, mì la sɔla duaa.»