Read Kissi Dɛnnda kiilaa 4 Bible Online

Dɛnnda kiilaa 4 - Kissi bible

Dɛnnda kiilaa 4

¹Piɛr nda Nsaŋ a lo vannda sɔɔn dimullo, mí vanaa-solia-lasálàá, bolii vanaa va Cɛi-Hala-o hɔlten-nda a Sadusea a hun sim nda ikɛi.

²Má tambu kɔltan taw, kani kiilaa va vannda pɛɛkoo, má va nda dimullo maa Yeesu tendul, kon co ni maa vanvílɛ́iya bɛɛ a tendulnin fulaa ciee-piɔ́m.

³Má bii nda, má kinda nda o kaasoo háá diimandɔɔ, kani paalen léè del nin.

⁴Kɛ nduyɛ, o vanáà tuei sɔɔn mun-nda tɛɛn, mí vanaa bɔɔ-bɔɔ laalan, mí kunda vanaa laalannda cɔɔlun háá vannda vàálan tan ŋuɛɛnu.

⁵Diimandɔɔ, mí simlacia Yuifia, kaasoŋaa kɔlkalua a vanaa pɛɛkaa latɔŋnda cuungian Yerusalɛm ciee.

⁶Hanne bolle vanaa-solia-lasálàá va lon, a Kaife, a Nsaŋ, a Alɛksandre a á vanaa va o yungu bolle vanaa-solia-lasálàá nin-nda kpow.

⁷Má hun a Piɛr nda Nsaŋ nda o hɔl, má ɲuna nda aa: «A kpaaya kuɛɛ, te kon te o diola nɛ̀ɛ́-nɛ̀ niaa singi yɛ langbanɔ ho?»

⁸Mɛɛ Hala Kɔl-Diandaa pɛ Piɛr nin, mó dimul nda aa: «Niaa simlacia co vannda simndan laci-a a niaa kaasoŋaa kɔlkalua sei!

⁹Vannda co naa hau ɲunaa le dɛnɛ kɛndɛ naa n tosal namtanɔɔ-o, le sinaa mɛɛ o looku mò sɔla siongɔɔ yɛ.

¹⁰Nduyɛ, mɛɛ mì niaa kpow sina hee, mì Israɛlla bɛɛ a sina maa: o diola Yeesu Krista fula Nasarɛt-o lan, o niaa baŋ o yɔm singafilaa coo, mí Hala mingi ndu yoomu fulaa vanvílɛ́iya tɛɛn-ndo lan langbanɔ co hoo isisi niaa o hɔl-lo sɔla siongɔɔ ni.

¹¹A ndu Yeesu o kɔɔ Sɛbɛ Hala-o dimi ni aa: ‹Pow vanaa cɔavaa cɛiya viow-vo siŋnun pow kilaa cɛiyo.›

¹²Cindaa sɔlan o vana celen nin te, kani o ceendo coo, diola kɛ́-kɛ̀ la yɔngun vanndacieea tɛɛn te, la naa n sɔla cindaa kɔɔli lan.»

¹³Mɛɛ vanaa kialaa n'yamaa lelɛŋnda ce Piɛr nda Nsaŋ sɔɛi válán a kɔlkɛsiaa, má sina vɛlɛ maa vanndacieea daama, aa sɔla lapɛɛku le-a nda va ni, mí kɔndɔfillo bii nda taw. O kon má bii bila maa vanaa va nda Yeesu-a latulu-a nda va ni.

¹⁴Kɛ a va langbanɔ sɔla siongɔɔ-o cɔu isisi nda ikɛi, a muli ɲɛ-ɲɛ celen te.

¹⁵O kon, má dimul nda le fulaa o bɛ́ɛ̀. O kon kɔɔli, má koma cal niko o sɔɛi ken coo.

¹⁶Má ɲuunian aa: «Vɛɛ naa n co yɛ yɔŋ a vannda ha? Kani Yerusalɛmnda kpow a sina maa nda tosa dɛnɛ kaamaa hoo ni, n tiwba kon sɛɛngiaa le.

¹⁷Nduyɛ, o bɛnda mì sɔɛi he tiw vannda tɛɛn te. Lelan, n vueinun nda mì n kuunan nda, a soaa lɛ o vana-vana lo o diola Yeesu lan te.»

¹⁸O kon kɔɔli, má veelu nda, má kuuna nda maa a soaa lɛ le, te kon te a pɛɛku lɛ vannda o diola Yeesu lan lɔ́ɔ́-lɔ́ɔ̀ le.

¹⁹Kɛ mí Piɛr nda Nsaŋ mulul nda aa: «Niaa pila kiolu vɔ yamɛi he, sɔɛi niɛi biyɔɔ a sɔɛi Hala-e biyɔɔ, o kuɛɛ bɛnda yɛ Hala o hɔl?

²⁰Naa naa, n kɛɛnin ɲɛ naa n tuei mí n ca-o dimi le.»

²¹O kon, mí simlacia kialaa iyamaa lelɛŋnda kɔngɔlan nda vɛlɛ, o kon kɔɔli, má mal nda. A ci nɛi oo nɛi nda tuisi nda sangaa coo le. Kani vannda kpow a va Hala candɔɔ le dɛnɛ oo tosan kon-ndo.

²²Langbanɔ sɔla kon siongɔɔ kaamaa-o ndóò nɔ nin vɔsilan hiovɔɔ belehiɔɔlu coo.

²³Mɛɛ nda mal nda, mí Piɛr nda Nsaŋ muungu caaŋaa ndaa ikɛi, má kɔ downun nda kona a ɲɛ-ɲɛ bolii vanaa-solia-lasálàá a kaasoŋaa kɔlkalua dimul nda-o.

²⁴Ndáà tueyɔɔ sɔɔn mun, mí nda kpow a piɛi Hala o diom pilɔɔ nin aa: «Mɛlɛka, nɔm cɔw halataalaa, lɛŋnden, mɛmma ihɛllan a ɲɛm co lenin-ndon kpow ni.

²⁵Nɔm tosa ni mí Hala Kɔl-Diandaa luɛi David fuɲa naa mamaa nin, David vana nɔm baala pɛɛn, mó dimi aa: ‹Le yɛɛ nɛ vanaa-mangalaa-isɔɔa co yɛ vɔkɔ-vɔkɔ hoo? Le yɛɛ nɛ vannda co yɛ dúmbúlan yiiyo o fondoo coo?

²⁶Le yɛɛ masaa lelɛŋnda co yɛ cɔnɔnndo mà va cuungianndo nda simlacia le Mɛlɛka nda Vana o pɔla-o simullo?›

²⁷I co toɲa, maa mí Herɔde nda Pɔnse-Pilate a cɛlan o kobio ho nin nda vanaa-mangalaa-isɔɔa celen, a Israɛlla, má yii Yeesu dúmbú, Yeesu vana baala diandaa nɔmndo, o n hɛli mo va Krista-o pɛɛn.

²⁸Nduyɛ, lende nda peelu sɔɔn kɛ́-kɛ̀ nɔm óò tuu o tasendɔ-on ni, n kɛ́-kɛ̀ nɔm óò tuu a kpaaya nɔmndo.

²⁹Tofa vɔ niko mɛɛ nda co naa kɔngɔlanndo sunsun yɛ. Cɛl mì buɛyaa nɔmnda dimi sɔɛi nɔmnde a kɔlkɛsiaa.

³⁰Siɛndi ba nɔmndo mì vannda sɔla siongɔɔ, mì dɛnnda kaamaalan a dɛnnda kɔndɔfiltan la tosan o diola Yeesu, vana baalaa diandaa nɔmndo.»

³¹Mɛɛ nda cii Hala piɛi, mí fonda ndáà cuungian coo-o ɲiiya. Mí Hala Kɔl-Diandaa pia nda nin kpow, má kandu Sɔɛi Hala-e dimio a kɔlkɛsiaa.

³²Nda kpow aa nɔ kɔl pilɔɔ a yiyan pilɔɔ. Vana-vana ve dimi le maa le ndu pila ɲɛm ndɔn co ni, kɛ le nda kpow ɲɛ vana-vana va ni.

³³Kiilaa va hiovɔɔ laci a seile Maalii Yeesu tendul fulaa vanvílɛ́iya tɛɛn-nden timbio a kpaayaa. Nduyɛ, Hala va nda duaa dɔvɔɔ taw.

³⁴O nda tɛɛn, vana-vana ve a lepɛŋ te. Kani vanaa nɔ yondolan, te kon te cɛilan-nda va lan pisio, má va hunɔɔ a volin mun,

³⁵má va kiilaa mun yɔngoo. Mí nda nda va vannda mun piɔwvo mɛɛ vana-vana ndóò nɔ makoo yɛ.

³⁶Leviinɔ pilɛ va lon, diolan Yosɛf, fulaa Siipre, o kiilaa ndáà ke diolan aa Barnabas-o (kon co dimio ni aa vana luei vannda yoomuan-ndo).

³⁷Yosɛf kon ndóò nɔ yondoo, mó pisi ndu, mó hun a volin mun, mó yɔngu kiilaa.