Read Kissi Dɛnnda kiilaa 5 Bible Online

Dɛnnda kiilaa 5 - Kissi bible

Dɛnnda kiilaa 5

¹Kɛ nduyɛ, langbanɔ pilɛ va lon diolan Ananias, má cɛlan nda Safira laa ndɔ le yondo ndaa pisio.

²Má cɛlan vɛlɛ, mó faŋa volion baa pilɔɔ le ndu pila. Mó kɔa a n tɔ̀un, mó kɔ yɔngu kiilaa.

³Kɛ mí Piɛr ɲuna ndu aa: «Ananias, le yɛɛ nɛ n kumbil-lɛ Setana kɔl nɔmndo le Hala Kɔl-Diandaa còòlan dimullo, má faŋa volin n pisi yondoo-on baa pilɔɔ le nɔm pila?

⁴Nɔm óò tiwba mí nɔm óò manda yondo kon, te kon te, mɛɛ nɔm óò cii ndu pisi yɛ, mí nɔm óò manda volin mun. Kɛ le yɛɛ nɛ n tosa yɛ dɛnɛ vaa nuaa? O co vanaciee le n dimul còòlan te, kɛ Hala n dimul còòlan nuaa ni.»

⁵Ananias tueyɔɔ sɔɔn mun, mó del, mó vu. Mí siòòŋii bɛnduei bii vanaa tuei dɛnɛ kon-nda kpow.

⁶Mí langbaa felengia hun simbulu dialun ndɔn o kolaa nin, má kɔ kumbu ndu.

⁷Lɛɛlɛla yaa hiovɔɔ o kon kɔɔli, mí laa ndɔ luɛi, o sina ɲɛ óò yɔŋnun-ndo le.

⁸Mí Piɛr ɲuna ndu aa: «Dimul-lɔ ya, vɛ̀ɛ̀ vɔngu niaa pisi yondo niaa-o co hoo ni?» Mó muli aa: «Oi, ndu ni.»

⁹O kon mí Piɛr dimul ndu aa: «Le yɛɛ nɛ niaa cɛlan yɛ le Hala Kɔl-Diandaa huiyo? Tofa vɔ! Vanaa kumbu pɔnɔ nɔm-nda co o dio nuaa ni. Nɔm bɛɛ a co lakɔ a nɔm.»

¹⁰Fɔ́ɔ́fɔ̀, mó del lɛŋ kiilaa o hɔl, mó malnun kɔl. Mɛɛ langbaa felengia luɛi, má komal ndu o vilɔɔ. Má kɔa a ndu, má kɔ kumbu ndu pɔnɔ ndɔ ikɛi.

¹¹Mí siòòŋii bɛnduei bii vanaa laalannda kpow a vanaa-vanaa tuei dɛnnda lan.

¹²Dɛnnda kaamaalan a dɛnnda kɔndɔfiltan taw kiilaa tosa vannda tɛɛn ni. Vanaa laalannda va cuungianndo o tongo Salomɔn-ndo bɛngu lɔ́ɔ́-lɔ́ɔ̀.

¹³Kɛ vana-vana celen ve tɔɔndan le nda luɛyɔɔ tɛɛn te. Nduyɛ vannda va sɔɔn kɛndɔn dimio taw a nda o kɔɔ.

¹⁴Sɛ́lɔ́ɔ́ va hiovɔɔ laci a kuiyo, vanpiaandua a vanlaandua va Maalii laalanndo, mí kunda vanaa laalannda va cɔɔlɔnndo.

¹⁵Mí vannda kandu hunɔɔ a vanaa lanàá o nɛilan coo, má va nda yɛɛmbuuo o ɲɛla hinialan coo a o valalan coo, o kon te Piɛr ndóò va pɛ hiovɔɔ, vundule ndɔlen léè pilan vana pum o nda tɛɛn.

¹⁶Mí vanaa bɔɔ-bɔɔ fula vɛlɛ o cieon va Yerusalɛm balɔɔ-on, má hun a vanaa lanàá, a vanaa ɲinaa vɔɔnda va kɔɔli-a. Mí nda kpow a sɔla siongɔɔ.

¹⁷O kon mí bolle vanaa-solia-lasálàá a Sadusia va ndu ikɛi-ya kpow pia a paŋalaa ca, má yiyan le ɲɛ pum tosaa.

¹⁸O kon má bii kiilaa kalaa, má kinda nda o cɛi kaasu lelɛŋndo nin.

¹⁹Kɛ icɔllo, mí mɛlɛkanɔ Maalii-o kumbi diola luɛyaala cɛi kaaso kalaa, mó soli nda, mó dimul nda aa:

²⁰«La kɔ sim o Cɛi-Hala-o nin, mì la kɔ dimul vannda sɔɔn ke vana yoomu sɛnɛiyo-on kpow.»

²¹Mí kiila tosa mɛɛ nda dimul nda yɛ. Paalen siɔu dɔ́ɔ́, má kɔa o Cɛi-Hala-o nin, má kandu vannda pɛɛkoo. Mɛɛ bolle vanaa-solia-lasálàá a vanaa va ndu ikɛi-ya hin, má veelu vanaa kialaa n'yamaa lelɛŋnda a simlacia lelɛŋnda Israɛl kpow. Má viam vannda le kɔlan kiilaa kan cuaa o kaasoo le hunɔɔ a nda.

²²Kɛ buɛyaa kan kɔlan, a komal nda lon te. Má muungu, má kɔ dɔawnun kona aa:

²³«N komal cɛi kaasoo o kindaa ɲɛkɛndɛi, kpalilaa cumulaa va o fondala ndalan o diola luɛyaalan sondolan. Kɛ mɛɛ naa n kumbi, n komal vana-vana lenin te.»

²⁴Bolle vanaa va Cɛi-Hala-o cumullo-a a bolii vanaa-solia-lasálàá tueyɔɔ sɔɔn mun, a dimi mɛ̀ɛ́-mɛ̀ɛ́ le. Má ɲunan le ɲɛ va hunɔɔ tosan a dɛnɛ kon o kɔɔ-o.

²⁵O kon kɔɔli, mí vanndo hun, mó dimul nda aa: «La tofa vɔ, vanaa niaa kinda o kaasoo-a co nihau o Cɛi-Hala-o nin, a co vannda pɛɛkoo.»

²⁶O kon, mí bolle kpalilaa cumulaa kɔa a vanaa cɔwva, má hun a kiilaa kan o bɛɛn-bɛɛndo nin, kani siòònde va nda yɔŋii vannda vii nda a powtan.

²⁷Mɛɛ nda hin a kiilaa kalaa, má kɔ simi nda vanaa kialaa n'yamaa lɛlɛŋnda o hɔl. Mí bolle vanaa-solia-lasálàá can nda sɔɔn hɛɛnduuo coo aa:

²⁸«N kuuna niaa ndi pɛ́-pɛ́ maa la pɛɛku lɛ vannda o diola Yeesu lan te. Kɛ la tofa vɔ mɛɛ niaa pei Yerusalɛmnda pɛɛkula niaala lan nin yɛ. La yeema vɛlɛ mì la mingi naa kooma piɔ́m langbanɔ kon o lebol.»

²⁹Mí Piɛr nda kiilaa tɔ̀a a muli aa: «Diom Hala-o biyɔɔ co fisa a diom vanndacieea biyɔɔ.

³⁰Hala fuɲaa naa mamaa mingi Yeesu yoomu fulaa vanvílɛ́iya tɛɛn, Yeesu niaa baŋ o yɔm singafilaa coo-o.

³¹Mó heelun ndu ikɛi, mó kɔ kɛsin ndu o ba ndɔ kɛndɔɔ coo, mó siinguu ndu Masaa a Vana Ciindiaa, haliko mi Israɛlla mal yɔŋ vɔɔndo, mà mangalan, mì hakila ndalan la malnun haki.

³²Naa n co seiya le dɛnnda lan ni, naa a Kɔl-Diandaa Hala yɔngu vanaa co sɔɛi ndɔɛi biyɔɔ-a pɛɛn.»

³³Vanaa kialaa n'yamaa tueyɔɔ sɔɔn mun, má tambu kɔltan, o kon má tuu le nda diwvo.

³⁴Kɛ vana pilɛ va o vanaa kialaa n'yamaa lelɛŋnda tɛɛn, diolan Kamaliɛl, faliisinɔ a vana dɛnɛ sinaa bɛndu latɔŋndo o va ni, o vannda kpow a va bɛɛlen keu-vo. Mó can, mó dimi maa a sòli vɔ kiilaa le telen bingi.

³⁵O kon kɔɔli, mó dimul nda aa: «Niaa Israɛlla sei, la caa taw a ɲɛ niaa yeema le tosaa a vannda ha-o.

³⁶O co nin lɔ́ɔ́ levil, mí Teudas can, mí ndu pila siingun vana lebɛɔ, mí vannda del ndu kɔɔli, a va le n'van kɛmɛ lehiɔɔlu. Kɛ má dii ndu, mí vanáà del ndu kan kɔɔli-a piɔl, o kon vana tui lɛ ɲɛ-ɲɛ a ndu o kɔɔ le.

³⁷O ndu kɔɔli, mí Yuda fula Kalile-o hun telen nda va vannda diolan sɛvaa-o. Mí vannda taw a del vɛlɛ ndu kɔɔli. Ndu bɛɛ, má dii ndu. Mí vanáà del ndu kan kɔɔli-a bɛɛ a piɔl.

³⁸Lelan sunsun, yiyan nuu co hoo ni, la mulul lɛ vannda ha le, la mal nda mà kɔɛnnun. Kani te yiyannda ivanacieea lan tuula ndalan a dɛnnda ndalan la co ni, la co hunɔɔ itambu.

³⁹Kɛ te Hala o ba la co yɛ fulaa ni, la nɔlanin ndan tɛɛmbuu le. Lelan la caa dɛ, yɔŋii niaa pila simul Hala!» O kon mí vanaa kialaa n'yamaa lelɛŋnda cɛl yiyan Kamaleɛl cɔm kon-ndo,

⁴⁰má kɔ veelu kiilaa kalaa, má dimul vannda, má lɔaa nda. O kon kɔɔli, má kuuna nda le sɔɛi o diola Yeesu lan, má mal nda, má kɔannun.

⁴¹Mí kiilaa faŋan vanaa kialaa n'yamaa o hɔl a ɲaaloo taw le tùú Hala cɛl má sɔla sangaa o diola Yeesu lan-ndo.

⁴²Lepalaa-lepala, a ve pɛngi hiovɔɔ laci a vannda pɛɛkoo o Cɛi-Hala-o nin a o la nda lo cɛilan nin te. A va nda vɛlɛ Yoongu Kɛndɛ Yeesu Krista-o tiiyallo.