Read Kissi Dɛnnda kiilaa 6 Bible Online

Dɛnnda kiilaa 6 - Kissi bible

Dɛnnda kiilaa 6

¹O telen kon, kaandennda va kuiyo, mí Yuifia va krɛkiei sɔɛi-ya a va cɛɛŋɔnndo a Yuifia pilacea. Má va dimio maa a va vanlaandua piandaa ndaa vi-a pɔɛɛnɔnndo le nda balo nda va nda piɔwvo lepalaa oo lapala-o yɔngoo.

²O kon mí kiilaa tɔ́ a à ŋiɔnda mɔɔsiaa kaandennda kpow nɛɛ pilɛ, má dimul nda aa: «O bɛnda mì n mal sɔɛi Hala-e vannda dimullo le baloo piɔwvo le.

³Lelan, puapilɛa naa, la hɛli vanpiaandua nda ŋɔmmɛw niaa tɛɛn, a nɔ diola kɛndɛlan, mà pia a Hala Kɔl-Diandaa-a, a nɔ kɔlkaloo-a, mì n yɔngun nda baala kon.

⁴Naa naa, n hiawnin laci a Hala piɛiyo mì n va sɔɛi Hala-e dimio.»

⁵Mí tuu kon hɛnan vannda. O kon, má hɛli Etiɛn, vana óò laalan taw mí ndóò pia a Hala Kɔl-Diandaa-o, handɔɔ Filipe, Prokɔr, Nikanɔr, Timɔn, Parmenas a Nikola óò fula Antiɔs mí ndóò va paandu o dina Yuifia-o.

⁶Má hun a nda kiilaa o hɔl. Mí kiilaa handu nda balan coo, má piɛi Hala le nda.

⁷O kon, mí sɔɛi Hala-e sɛŋin, mí kaandennda keleŋa kui Yerusalɛm. Mí vanaa-solia-lasálàà bɔɔ-bɔɔ a laalan.

⁸Mí Hala pei Etiɛn a kɛndɛi a á kpaayaa, o va dɛnnda kaamaalan a dɛnnda kɔndɔfiltan tosaa vannda tɛɛn.

⁹Kɛ mí sɛɛngianndan la can Etiɛn nda vanaa va o cɛi lekaando nin-nda tɛɛn, cɛi ndáà veelu aa: Cɛi lekaan cɛa sɔla baŋaa-a-o, a vanaa fula Sirɛn a Alɛksandrii-a kɔ bii niko a vanaa fula Silisii-a a haa Asii.

¹⁰Kɛ a tiwba ndu simullo le, kani a kɔlkalu Hala Kɔl-Diandaa ke ndu-o o va sɔɛi ni.

¹¹O kon má luei vannda sɔɔn nin a volion, haliko mi ndáà dimi aa: «N tuei Etiɛn sɔɔn tanan dimio a Moise a á Hala o kɔɔ.»

¹²Má luei vannda sɔɔn nin, kaasoŋaa kɔlkalua a vanaa pɛɛkaa latɔŋnda, má kɔ bii Etiɛn, má kɔa a ndu vanaa kialaa n'yamaa lelɛŋnda o hɔl.

¹³Má bɛɛndiaa seyaa lacòòvaa pum, mí kan a dimi aa: «Langbanɔɔ ho co pɛngi sɔɔn vɔɔnndon dimio a fonda-diandaa ho o kɔɔ le, o co vɛlɛ mun dimio a tɔŋ Moise-o o kɔɔ.

¹⁴N tuei ndu dimio maa Yeesu fula Nasarɛt-o tɛɛmbuunin Cɛi-Hala-o ho, mò mangala vɛlɛ naamula Moise tɛɛngul naa lan.»

¹⁵Vanaa kialaa n'yamaa lelɛŋaa kɛ́-kɛ̀ a va lon a va Etiɛn tofaa, má ca hɔlaa ndɔa maa hɔlaa mɛlɛkanɔ.