Read Kissi Dɛnnda kiilaa 7 Bible Online

Dɛnnda kiilaa 7 - Kissi bible

Dɛnnda kiilaa 7

¹Mí bolle vanaa-solia-lasálàá ɲuna Etiɛn aa: «Vɛ̀ɛ̀ toɲaa nda co dimio ho a nɔm o kɔɔ nuaa ni?»

²Mí Etiɛn muli aa: «Puapilɛa nia, fuɲaa nia, la yaŋ ya nilan! Tuma fuɲa naa mamaa Abraham va vɔ caltan Mesopotami, ndóò kue vɔ calle Haran too, mí Hala nɔ biiloo-o cɔmnun ndu,

³mó dimul ndu aa: ‹Faŋan lɛŋnde nɔmnden a yungu nɔmndo, mà kɔɛ o lɛŋnde ya cɔmnin nɔm-nden nin.›

⁴O kon mí Abraham faŋan Babilɔn, mó kɔ cal Haran. Fuɲa ndɔ vuo, mí Hala faŋa ndu lon, mó cuu ndu o lɛŋnde niaa co leen-nden nin.

⁵Hala ke ndu lɛŋnde len mì le va ɲɛ ndɔ le, hali nɛɛ kɛsiaa ipelu bɛɛ o ke ndu le. Kɛ mó dimul ndu maa o hun kenin ndu lɛŋnde len kɛ́ɔ, ndu a cuavaa ndɔa imamaa. Nduyɛ o telen kon, Abraham ndóò nɔ vɔ hɔ́ɔ́ le.

⁶Mí Hala dimul ndu aa: ‹Cuavaa nɔmaa imamaa kɔ calnin fɛɛn o sumialle o lɛŋnde pilalen nin. A siinguunin nda cɛa, mà saangiaa nda taw o vɔsilan kɛmɛ lehiɔɔlu bɛngu.

⁷Kɛ i kialunin vanaa-mangalaa-isɔɔa nda vanin o ba o cɛlen nin-nda iyama. O kon kɔɔli, a fulanin o lɛŋnde len nin, mà hun biilu ya o fondaa ho.›

⁸O kon kɔɔli, mí Hala yii kpemaa a Abraham, tɔɔmasele kpema kon co toomaa diyɔɔ ni. O kon mí Abraham vialu Isaak. Palɛi ŋɔmaa o kon kɔɔli, mó dii ndu tooma. Mí Isaak ndu vialu Yakɔb, mí ndu bɛɛ dii Yakɔb tooma. Mí Yakɔb ndu vialu fuɲaa naa mamaa tɔ́ a à ŋiɔnda, mó dii nda tooma.

⁹Puapilɛa Yosɛf-a a va ndu Yosɛf paŋalaa, má pisi ndu haliko mo va cɛɔ Esipte. Kɛ Hala va ndu ikɛi.

¹⁰Mí Hala soli ndu o sangalan kpow nin. Mó ke ndu kɔlkaloo, mí ɲɔɔ hɛnan masaa Esipte a ndu. Mí masa kon siinguu ndu masa ibungaa le lɛŋnde Esipte len kpow a le yungu ndɔɔ kpow.

¹¹Kɛ nduyɛ, mí yima fofolan ma luɛi o lɛŋnde Esipte len nin a o lɛŋnde Kanaan-nden nin. Mí sanga bɛndoo toal fuɲaa naa mamaa coo, a ve lɛ balo sɔla le.

¹²Yakɔb tueyɔɔ maa maalon va Esipte, mó viam fuɲaa naa mamaa lon. Viomɔɔ tasoo yɔŋnun kon ni.

¹³Mɛɛ nda kɔɛ o diinndɔ, mí Yosɛf cɔɔmun puapilɛa ndɔa, o kon mí masa Esiptea sina yungu Yosɛf-o.

¹⁴O kon mí Yosɛf viam vannda le hunɔɔ a fuɲa ndɔ Yakɔb a á yungu ndɔɔ kpow, a va faw-faw vannda belaŋɔmmɛw a vanaa ŋuɛɛnu.

¹⁵O kon kɔɔli, mí Yakɔb muungu Esipte, mó kɔ vu lon, mí fuɲaa naa mamaa bɛɛ a vu.

¹⁶Má muungu a dialun ndan Sikɛm, má kɔ kumbu mun o sɛi Abraham ndóò pendu poaa Hamɔr-a o ba, Sikɛm lon-ndo nin.

¹⁷Mɛɛ telen Hala ndóò tuu le sɔɔn o dimi a Abraham-ndon peeloo-o sɔɔnguu, mí vanaa naa a kui taw-taw Esipte.

¹⁸O kon mí vana celen siŋnun masaa o lɛŋnde Esipte len nin. Ndóò sina ɲɛ-ɲɛ a Yosɛf o kɔɔ le.

¹⁹Mí masa kon pala fuɲaa naa mamaa, mó saangiaa nda saangiaa pila, mó baŋ nda le cɛlɛkpɛa ndaa viovɔɔ, haliko ma vi.

²⁰O telen kon nda velu Moise ni, ó va salama kɛndɔɔ Hala o hɔl-lo. Paangon mún yáá, a va ndu mandaa o fuɲa ndɔ lo cɛinin.

²¹Ndáà vionɔɔ ndu, mí cua laandu masaa Esipte-o kɔ cua ndu, mó kɔa a ndu, mó kɔ suili ndu maa hɔ́ɔ́ ndɔ ndu pila.

²²O kon mí Moise pɛɛku dɛnɛ sinaa Esiptea kpow, mó siŋnun vana kpaayaa o sɔɔn ndɔn a o dɛnnda ndɔlan nin.

²³Mɛɛ Moise sɔla vɔsilan belehiɔɔlu, mó yiyan le kɔlan vanaa ndɔa yilɔɔ, Israɛlla pɛɛn.

²⁴Ndóò cɔu Esiptenɔɔ vana pilɛ saangiaa o puapilɛa ndɔa tɛɛn, mó kɔ saala le ndu, mó mingi màá, mó dii Esiptenɔ kon.

²⁵Moise va yiyanndo maa puapilɛa ndɔa va yiyan maa a ndu o kɔɔ Hala va nda baŋa fulaa o cɛlen nin ni, kɛ nda ve ken sina le.

²⁶Diimandɔɔ, mí Moise komal puapilɛa ndɔa cɔlɔbaa. Mó kindin, mó toosiaa nda sɔɔngɔɔ tɛɛn, mó dimi aa: ‹Caaŋaa nia, puapilɛa niaa co ni. Le yɛɛ nɛ niaa co yɛ niaa pilaa mɔnɛi lueinanndo?›

²⁷Kɛ mí o va caan ndɔ saangiaa-o ɲindu Moise, mó ɲuna ndu aa: ‹Nɛ̀ɛ́ siinguu yɛ nɔm simlacinɔɔ a vana kialaa n'yamaa le naa?

²⁸A yeema mà dii ya mɛɛ n dii Esiptenɔɔ cɛi yɛ?›

²⁹Moise tueyɔɔ sɔɔn mun, mó sɔndan, mó kɔannun o lɛŋnde Madian-nden nin. Mó kɔ vialu poaa nda ŋiɔn ndon.

³⁰Vɔsilan belehiɔɔlu o kon kɔɔli, mí mɛlɛkanɔɔ cɔmnun Moise o yinnde biyaa len nin o bɔɔ nin, o lɛŋnde veselɛilen nin, o pembei Sinai ikɛi.

³¹Moise cɔu dɛnɛ kon, mó dɔawnun kɔndɔfili. Kɛ telen o va sɔɔnguuo macɛlu le tofaa-o, mó tuɛi diom Mɛlɛka-o ndu dimullo aa:

³²‹Ya co Hala fuɲaa nɔmaa mamaa ni, Hala Abraham-ndo, Hala Isaak-o a Hala Yakɔb-o pɛɛn.› Mí Moise ɲiiya a siòònde, o tɔɔndan ndɛ le tofaa le.

³³O kon mí Mɛlɛka dimul ndu aa: ‹Solin samtalan o n'pelu, kani fonda n sim hoo coo-o, fonda diandaa o co ya Mɛlɛka o hɔl ni!

³⁴I ce sanga bɛndu co yungu nuu coo Esipte-o vakpa. I tuei cɛɛŋɔnnda ndalan, le nda baŋaa ya tol ni. Sunsun, kɔ, i yeema mì i vem nɔm Esipte.›

³⁵Moise Israɛlla ndáà kɛɛ kon má dimi aa: ‹Nɛ̀ɛ́ siinguu yɛ nɔm simlacinɔɔ a vana kialaa n'yamaa naa coo-o?›, o ndu lo Hala vem mɛlɛkanɔɔ le ndu dimullo mo va simlacinɔ naa a vana baŋaa naa ni, ndu Moise mɛlɛkanɔɔ cɔɔmun kon o bɔɔ nin-ndo pɛɛn.

³⁶Ndu soli nda o lɛŋnde Esipte len nin ni, mó tosa dɛnnda kaamaalan a dɛnnda kɔndɔfiltan o lɛŋnde len nin, o mɛmma ihɛlma makpɛ̀ndɛ̀an taŋɔɔ, a o vɔsila belehiɔɔlula nda cii o lɛŋnde veselɛilen nin-ndan bɛngu ni.

³⁷Moise kon dimul vɛlɛ Israɛlla ni aa: ‹Hala vimnin niaa vana-tɛɛngaa-diom Hala-o, o co maa ya-o, fulaa o puapilɛa nia tɛɛn.›

³⁸Telen vannda ndáà cuungian o lɛŋnde veselɛilen nin-ndo, ndu koni va vɛlɛ kiilalen mɛlɛkanɔ nda va suukanndo o pembei Sinai coo-o tɛɛn nda fuɲaa naa mamaa ni. Mí Moise sɔla sɔɔn yɔngu vana cindaa-on Hala o ba le naa mun tɛɛngullo.

³⁹Kɛ fuɲaa naa mamaa ndáà yeema mì ndáà tuei ndu diom te. Má pɛɛsa ndu, má yiyan le muungɔnndo Esipte.

⁴⁰Má dimul Aarɔn aa: ‹Cow naa piɔmndo, mì ndu va hala naa le naa kɔlan laci. Kani Moise soli hoo naa o lɛŋnde Esipte len nin-ndo, n sina ɲɛ yɔŋnun ndu-o le.›

⁴¹O kon má toosiaa naw téndóó, má solul piɔm kon sálàá, má dɔawnun ɲaale le ɲɛ nda pila cɔwnun kon a laba-o.

⁴²Kɛ mí Hala mulul nda kɔɔ, mó mal nda ɲɛm co o halataala-on sooloo. Maa mɛɛ o co o sɛvaa o sɛbɛla vanaa-tɛɛngaa-diom Hala-a nin yɛ aa: ‹Niaa cuavaa Israɛlla sei, mò va maa sálàla n'cɔlulan a sálàla kpeyanndan niaa va ya solullo o vɔsila belehiɔɔlula niaa cii nɛi-tɛɛn o lɛŋnde veselɛilen nin-ndan bɛngu ni?

⁴³Ɛ-ɛ, kɛ mí la cua cɛi-kola-toandaa hala nɔ diolan aa Molɛk-o, a loei Refan, hala niaa, piɔmaa niaa toosiaa le nda vulan baŋɔɔ o labɛngunin-nda pɛɛn. Lelan ya bɛɛ, i co niaa soli o lɛŋnde niaalen nin, mì yɛɛ niaa Babilɔn lekɔɔli.›

⁴⁴Fuɲaa naa mamaa ndáà nɔ cɛi-kola-toandaa-labɔɔŋianndo o lɛŋnde veselɛilen nin, o sɛbɛ kpemaa va nin-ndo. Má toosiaa ndu mɛɛ Hala ndóò cɔm Moise le ndu toosiaa yɛ kpafii.

⁴⁵Ndáà sɔlaa cɛi-kola-toandaa-labɔɔŋian kon, má kɔa a ndu o lɛŋii Hala tuw nda vanaa-mangalaa-isɔɔa laci-e nin, telen Yosue va nda simndan laci-o. Mí cɛi kon lo lon háá o telen David-o.

⁴⁶Mí Hala tosal David dɛnɛ kɛndɔɔ, mó ɲuna ndu Hala haliko mi ndóò tengul Hala Yakɔb-o fonda calaa.

⁴⁷Kɛ nduyɛ, Salomɔn tengul ndu cɛi kalaa ni.

⁴⁸Kɛ Hala-Hiow-Ɲɔɔn kpow-vo cel o cɛila vanndacieea cɔw lan nin te. Maa mɛɛ vanaa-tɛɛngaa-diom Hala-o dimi yɛ aa:

⁴⁹‹Halataalaa co kpɛŋɛ ni lemasaa ni, lɛŋnden le co ɲɛ ni kɛsiaa n'peloo ni. Cɛi súú yɛɛ nɛ niaa nɔla yɛnin ya tengullo? Fonda kuɛɛ va yɛnin fonda ni pɛngiaa kpeekpeiyo?

⁵⁰Ɲɛm mun kpow, a ba ya cɔw mun ni.›

⁵¹Mí Etiɛn hiaw laci a sɔɛi, mó dimul nda aa: ‹Niaa vanaa bolii kalaa ha, niaa dii haa toma o kɔlta niaalan nin te-a, la kendu bɔɔ nilan! Fuɲaa niaa niaa vel ni. La co Hala Kɔl-Diandaa simullo lɔ́ɔ́-lɔ́ɔ̀!

⁵²Fuɲaa niaa mamaa lekɛ́ndɛi niaa vel ni! Vana-tɛɛngaa-diom Hala kon co le, o fuɲaa niaa mamaa kɛɛ yɛlen tollo. A cii vanaa va sɔɛi a hunɔɔ vana sandaa ndu pilɛ kpé dimio-a diw. Sunsun yɛ niko, niaa bɛɛ cii ndu baa kei o mundu, mí la dii ndu.

⁵³La sɔla tɔŋ Hala-o fulaa mɛlɛkaa o ba, kɛ la bii ndu le.›»

⁵⁴Mɛɛ vanaa kialaa n'yamaa lelɛŋnda tuei diomndan ndan, mí ɲɔɔ pala nda taw, má va ciŋndon sɔmndo le ndu.

⁵⁵Kɛ Etiɛn va o piaa a Hala Kɔl-Diandaa, mó tofa halataalaa, mó ca biilu Hala-o, Yeesu va isisi Hala o ba kɛndɔɔ coo.

⁵⁶Mó yonda aa: «La tofa vɔ, i co halataalaa cɔu o kumbiaa, Po vanacieo co isisi Hala o ba kɛndɔɔ coo.»

⁵⁷O kon mí vannda kinda nilan, má yonda kpélén. Mí nda kpede a toal ndu coo,

⁵⁸má soli ndu o cieo kɔɔli, má kɔ del ndu viiyo a powtan le ndu diyɔɔ. Mí seiya a mɛi volɔɔla ndala cuɛinanndan langbanɔ felengoo pum o labɛngunin diolan Sol.

⁵⁹Telen nda va ndu viiyo a powtan-ndo, mí Etiɛn piɛi Hala aa: «Maalii Yeesu, bii kɔl nuu.»

⁶⁰O kon kɔɔli, mó del vula baŋaa, mó yonda coocoo aa: «Maalii, mal nda haki le haki ndaa ho!» Mɛɛ o cii kon dimi, mó malnun kɔl.