Read Kissi Dɛnnda kiilaa 9 Bible Online

Dɛnnda kiilaa 9 - Kissi bible

Dɛnnda kiilaa 9

¹O telen kon, Sol va hiovɔɔ laci a kaandeŋaa Yeesu-a kɔngɔlanndo le nda diwvo. Mó kɔa o bolle vanaa-solia-lasálàá lo,

²mó ɲuna ndu sɛbɛla di lan le kɔlan o cɛila lekaanda va Damas lan nin. O kon te ndóò komal pɛ vanpiaandua, te kon te vanlaandua, mì ndáà va kelaa o nɛi kon coo, ndóò bii nda, ndóò yiw nda, ndóò hin a nda Yerusalɛm.

³Mɛɛ o kandu tiiya Damas ikɛi, mí ɲɛ-tengaa pum fula o halataala o lepilɔɔ, mó balu ndu.

⁴Mí Sol del lɛŋ, mó tuɛi diomndo pum ndu dimullo aa: «Sol, Sol, le yɛɛ nɛ n co yɛ ya yɛlen tol-lo?»

⁵Mí Sol ɲuna aa: «Nɔm nɛ̀ɛ́-nɛ̀, Maalii?» Mí diomndo muli aa: «Ya ni, Yeesu n co yɛlen tollo-o.

⁶Kɛ cɔn mà kɔɛ ciee. A kɔ dimulnin nɔm ɲɛ n bɛnda ma tosa-o.»

⁷Mí vanaa va kɔlan Sol kɔɔli-a sim, a nɔla sɔɛi le. A va diomndo tueyɔɔ, kɛ a ve vana cɔ le.

⁸Mí Sol can lɛŋ. Mó tofa, kɛ o tiwba ɲɛ-ɲɛ cɔu le. Má bii ndu baa, má kɔa a ndu Damas ciee.

⁹Mó cii palɛi ndii yáá o sumɛiyo, o di le, o kol te.

¹⁰Kaandennɔ pilɛ va Damas diolan Ananias. Mí Mɛlɛka cɔmnun ndu o vundulen nin, mó veelu ndu aa: «Ananias», mó muli aa: «Má cè ya, Mɛlɛka!»

¹¹Mí Mɛlɛka dimul ndu aa: «Cɔn ma kɔɛ o nɛi nda veelu aa Nɛi-Sandaa-o, mà kɔ luɛi o Yuda lo cɛinin, mà ɲuna. Langbanɔ pilɛ fula Tarse diolan Sol, o co Hala piɛiyo lon,

¹²o langa cɔ vanndo o vundulen nin diolan Ananias, vana kon luɛi, mó handu ndu balan coo, haliko mo ce vɛlɛ.»

¹³Kɛ mí Ananias muli aa: «Mɛlɛka, vanaa bɔɔ-bɔɔ a dimul-la sɔɔn a langbanɔ kon o kɔɔ, má dimul-la vɛlɛ dɛnnda vɔɔnnda o tosal vanaa nɔmnda Yerusalɛm-ndan.

¹⁴Handɔɔ o kon coo, o hin nanu a di o sɔla fulaa bolii vanaa-solia-lasálàá o ba-o le vanaa-vanaa co diola nɔmndan biiloo yiwvo.»

¹⁵Kɛ mí Mɛlɛka dimul Ananias aa: «Kɔ! I cii langbanɔ kon hɛli, i keinin a ndu o kɔɔ, mì cɔm vanaa-mangalaa-isɔɔa a masaa ndaa diola nilan, kɔ bii niko vanaa nia, Israɛlla pɛɛn.

¹⁶Ya pila cɔmnin ndu sanga kɛ́-kɛ̀ o co hunɔɔ sɔla o diola nilan.»

¹⁷O kon, mí Ananias kɔa, mó kɔ luɛi cɛinin, mó handu Sol balan coo, mó dimul ndu aa: «Puapilɛ nuu Sol, Maalii Yeesu vem ya ni, o cɔmnun nɔm o nɛi lɔ́ɔ́ n va hunɔɔ-o, haliko mi hɔlta nɔmndan la kumbin vɛlɛ, mà pɛ a Hala Kɔl-Diandaa.»

¹⁸Fɔ́ɔ́fɔ̀, mí ɲɛlan lapum la fula Sol o hɔl maa lakɛl, mí la deli. Mí hɔltan la kumbin ndu. O kon mó can, mó sɔla yinɔɔ.

¹⁹O kon kɔɔli, mó dia ɲɛdiaa, mó sɔla yoomuan. Mí Sol tosa palɛi taw nda kaandeŋaa va Damas-a.

²⁰Fɔ́ɔ́fɔ̀, mó kandu vannda pɛɛkoo o cɛila lekaanndan nin maa Yeesu co Po Hala-o ni.

²¹Mí vanaa va ndu diomndo tueyɔɔ-a kpow a dɔawnun kɔndɔfili, má va dimio aa: «Vɛ̀ɛ̀ o co langbanɔɔ ho le va vanaa va Hala piɛiyo o diola Yeesu lan-nda saangiaa Yerusalɛm te? Vɛ̀ɛ̀ o co le nda yiwvo mò kɔɛ a nda o bolii vanaa-solia-lasálàá lo le o hin nanu nuaa le?»

²²Lepalaa-lepala Sol va hiovɔɔ laci a nda kɔltan pilanndo o sɔɔn o va nda dimullo-on nin. Yuifia va Damas-a a nɔla lɛ ndu ɲɛ-ɲɛ dimul te, kani o va nda cɔmndo maa Yeesu co Krista ni.

²³Palɛi bɔɔ-bɔɔ o kon kɔɔli, mí Yuifia yii Sol dúmbú le ndu diyɔɔ,

²⁴kɛ mí Sol tuɛi a dúmbú nda kalaa o kɔɔ. Lepalaa-lepala, icɔl oo icɔl, a va mɛngɛlaa o diola luɛyaala kobio le ndu diyɔɔ.

²⁵Kɛ icɔllo pum, mí kaandennda cua ndu, má tuisi ndu o kambɛiyo nin o kpakio kɔɔli.

²⁶Sol tiiyaa Yerusalɛm, mó kindin le sɔɔnguuo kaandennda ikɛi. Kɛ mí nda kpow a vo ndu, kani a ve laalan te maa o siŋnun kaandennɔ kpeekpeiyo.

²⁷Mí Barnabas can nda ndu, mó kɔa a ndu o kaandennda lo. Mó kɔ cɔm nda mɛɛ Mɛlɛka cɔmnun ndu Sol nɛi-tɛɛn yɛ, mɛɛ o dimul ndu sɔɔn yɛ, a mɛɛ o tosa kaannden vannda o hɔl kpendekele Damas ciee o diola Yeesu lan yɛ.

²⁸Cɔn nin ɲinkon, mí Sol va nda kaandennda Yerusalɛm ciee. O va heeloo a tuusoo nda ndaa latulu, mó va vannda sɔɛi Mɛlɛka-e tiiyallo kpendekele o diola Maalii lan.

²⁹Mó suukan nda Yuifia dimi krɛkiei-ya, má hiŋan diomndan. O kon mí kan a can nɛilan nuwviaa le ndu diyɔɔ.

³⁰Vanaa laalannda tueyɔɔ sɔɛi ken, má kɔa a Sol Sesaree, faŋanndo lon, má kɔa a ndu Tarse.

³¹O kon mí vanaa Krista-aa va Yuda, Kalile a Samari-a kpow sɔla kɔlɲuloo. Mí Hala Kɔl-Diandaa tosa má sɔla yoomuan, má hindu, a va kelaa o nɛila Mɛlɛka lan coo.

³²Mí Piɛr kei o lɛŋnde len nin kpow, mó kɔa vanaa laalaŋaa va Lida-a yilɔɔ.

³³Mó komal langbanɔ pilɛ lon diolan Enee, vɔsilan laŋɔmaa o va ihini, kani vana bɛvɛiyo o va ni.

³⁴Mí Piɛr dimul ndu aa: «Enee, Yeesu Krista singi nɔm! Cɔn ma cua vala nɔmndo.» Fɔ́ɔ́fɔ̀, mí Enee can.

³⁵Mí vanaa va Lida-a kpow a haa Saron a ca ndu, má laalan Mɛlɛka.

³⁶Kaandennɔ laandu pilɛ va Yopé diolan Tabita, o krɛkiei nin aa «Dɔrkas». O va vannda dɛnɛ kɛndɔɔ tosallo lɔ́ɔ́-lɔ́ɔ̀, mó va vɛlɛ vanaa bala fondoa malaa.

³⁷O telen kon, mó del a nàá, mó vu. Ndáà ciiyo ndu pulɔɔ, má kɔ kɛsi ndu cɛinin o cɛi coocoo nin.

³⁸Nduyɛ, Lida ve Yopé levil te. Kaandennda Yopé tueyɔɔ Piɛr tɔ́ɔ́ Lida, má vim ndu kiilaa nda ŋiɔn, má kɔ dimul ndu aa: «A yandi, yangaa le, hun cɔ́-cɔ́.»

³⁹Fɔ́ɔ́fɔ̀, mí Piɛr kɔa nda ndaa. Ndóò tiiyaa, má kɔa a ndu cɛinin o cɛi coocoo nin. Mí vanlaandua piaandaa ndaa vi-a kpow a kɔ balu ndu a caŋndo. Má cɔm ndu domalan a ɲɛ-ɲɛ celen Dɔrkas toosiaa lɔ́ɔ́ o va yoomu-o.

⁴⁰Mí Piɛr soli nda kpow o dio, mó baŋ vulan, mó piɛi Hala. O kon kɔɔli, mó muli hɔlla nɛɛ vana vílɛ́i kon va-a, mó dimi aa: «Tabita, cɔn.» Mí Tabita kumbi hɔltan. Ndóò cɔu Piɛr, mó can, mó cal.

⁴¹Mí Piɛr bii ndu baa, mó simi ndu. O kon kɔɔli, mó veelu niko vanaa laalannda a vanlaandua piaandaa ndaa vi-a, mó cɔm nda ndu.

⁴²Mí dɛnɛ kon tiw Yopé sɔ́, mí vanaa bɔɔ-bɔɔ laalan Mɛlɛka.

⁴³Mí Piɛr viaw Yopé ciee, o Simɔn tosa baala layáwvo-o lo.