Read Kissi Rɔmnda 1 Bible Online

Rɔmnda 1 - Kissi bible

Rɔmnda 1

¹Ya Pol, vana baala Yeesu Krista-o co sɛbɔɔ ho sɛvaa ni. Ya veelun le siŋnɔnndo kiilaa, mí siŋnun teengen le vannda Yoongu kɛndɔɔ tiiyallo-o.

²Yoongu kɛndɛ kon Hala ndóò yii sindɛ kpemaa a sondo vanaa-tɛɛngaa-diom Hala-a o sɛbɛ ndɔ diandaa nin ni.

³A Po ndɔɔ o kɔɔ Yoongu kɛndɛ kon soo ni, o velun o falon nin fulaa o polale David len coo-o.

⁴Mó cɔmnun vanndacieea a kpaaya bɛndoo o Kɔl-Diandaa nin maa Po Hala-o o co ni, le tùú o tendul fulaa vanvílɛ́iya tɛɛn-ndo.

⁵O ndu kɔɔli naa n sɔla kɛndɛi ni, mí n siŋnun kiilaa le vanaa-mangalaa-isɔɔa kpow sɔɛi ndɔɛi dimullo haliko ma cɛl ndi, mà laalan.

⁶Niaa bɛɛ, vanaa Yeesu Krista veelu-a niaa co ni.

⁷Niaa vanaa-vanaa Hala kaola mí la va Rɔm, niaa veelun aa vanaa diandaa-a pɛɛn. Màá Hala Fuɲa naa a Maalii Yeesu Krista tosal niaa dɛnɛ kɛndɔɔ mò ke niaa kɔlɲuloo!

⁸Ɲɛ tasoo, i mel Hala nuu balika o diola Yeesu Krista lan le niaa kpow, kani laalan niaa kela tɔ́ɔ́ o ceendo coo kpow.

⁹Hala ya co baalaa tosallo a kɔl nuu o Yoongu kɛndɛ Po ndɔɔ yondaa nin-ndo co ya lesei, maa telen oo telen ya va pɛ piɛilen, i co yiyanndo niaa coo

¹⁰o piɛile nilen nin. I co lambanndo ɲunaa le niaa kɔlan yilɔɔ, te Hala cɛl pɛ.

¹¹Kani yeemɛi co ya taw le niaa cɔu, mì yoo niaa ke kɔllo pum, haliko mi la sim yili.

¹²Kon tosanin ni mì n kɔ sɔla yoomuan vellaa-velle le laalan naa n nɔ naa niaa-o.

¹³Puapilɛa nia, i yeema mì la sina maa i co kɔngɔlanndo lɔ́ɔ́-lɔ́ɔ̀ le niaa kɔlan yilɔɔ (kɛ háá hau, i sɔlan-ndɔ ba le), haliko mi niaa bɛɛ sɔla vannda pum o niaa lo, mɛɛ ya sɔla nda vanaa-mangalaa-isɔaa tɔ̀a tɛɛn yɛ.

¹⁴Kuee pilaa co ya, kuee vanaa sinaa dɛnɛa a o vanaa sina dɛnɛ le-a, kuee vanaa kɔlkalua a o vanaa nɔ kɔlkalu le-a.

¹⁵Lelan yeemɛi co ya taw le niaa co Rɔm-nda Yoongu kɛndɔɔ tiiyallo.

¹⁶Siɛmbula co ya le vannda Yoongu kɛndɔɔ tiiyallo le, kani kpaaya Hala ciindiaa vannda-o co kon ni, kandɔɔ a Yuifia kɔ bii niko a vanaa co N'Yuifi le-a.

¹⁷Kani Yoongu kɛndɛ kon cɔm maa Hala siinguu vanndacieea vanaa sandaa le laalanndo. Nduyɛ laalan kon tiw. Maa mɛɛ o sɛvan yɛ aa: «Vana sandaa vanin yoomu le laalan ndɔɔ.»

¹⁸Kɔltuw Hala-o cɔmnun ceen fulaa o halataala le dɛnnda vɔɔnndan kpow a le dɛnɛ sandaa lepɛŋ vanndacieea co tosaa-o. A co toɲaa vionɔɔ a dɛnnda vɔɔnnda nda co tosaa lan.

¹⁹Nduyɛ ɲɛ vanndacieea bɛnda mà sina a Hala o kɔɔ-o co nda o hɔl kpendekele, Hala pila cɔm nda ndu ni.

²⁰Bau kabi Hala cɔw ceendo, kpaaya ndɔ lɔ́ɔ́-lɔ́ɔ̀-o a halayɛi ndɔɛi vana ci lei cɔmnun kpendekele o dɛnnda ndɔlan nin le mɛɛ vannda bii lan bila yɛ. Lelan vanndacieea nɔ lɛ mɛɛ dimia le.

²¹Kani ndáà síná Hala tɛ́ɛ́, kɛ a ke ndu biilu bɛnda le ndu Hala-o le, a mel ndu balika le. Mí yiyannda ndalan la luei nda o laasianndo nin, mí kɔlta ndala idiɔmndan la luei nda o ɲumndan nin.

²²Nda pila va sangalanndo maa a kendu lakɔl, kɛ a siŋnun diɔmnda.

²³Má mangala biilu Hala tembu loo a tuuliaala ɲɛm tambu-on: tuuliaala vanndacieea, la yowva, la visia pelun hiɔɔlua a la visia sasun lɛŋ o kɔlan-nda.

²⁴Lelan Hala mal nda dɛnnda vɔɔnnda kɔlta ndalan láà yeema lan tosaa ni. O kon, mí nda pila tuisin siɛmbulan o dialun ndan nin.

²⁵A cii còòlan mingi o fonda toɲa Hala-o, má va ɲɛm Hala cɔw-von biiloo a mun baalaa tosallo yɔŋii nda biilu Hala cɔw ɲɔɔn kpow-vo, o biiloo co le ndu le fɛɛn a fɛɛn-ndo pɛɛn. Amiina!

²⁶Lelan Hala mal nda ni, má del yeemɛi vɔɔŋii tuisi nda siɛmbulan-nde kɔɔli, kani laandua ndaa co lɛ kpelemɔɔsaa tosa mɛɛ vanndacieea bɛnda le tosaa yɛ le.

²⁷Lende koni vanpiaandua bɛɛ a co tosaa ni, a co lɛ kpelemɔɔsaa tosa a vanalanɔ le. Le kpelemɔɔsaa tosaa nda pila vanpiaandua vellaa-velle yeemɛi co nin nda heelanndo ni. Vanpiaandua co dɛnnda lasiɛmbulan tosaa a vanpiaandua celen, mì nda pila va sala laasian ndaa sɔlaa.

²⁸Le tùú nda kɛɛ le Hala sinaa-o, mó mal nda a kɔlkalu nda laasi-laasio, má luɛi dɛnnda vana bɛnda le tosa le lan tosaa.

²⁹A co a piaa a dɛnnda sendu le lan kpow: laasianndo, yeemɛi bɛnduei, kɔlvesɛiyo, paŋalaa, yeemɛi diuvaa n'vannde, cɔlɔbalan, vannda huiyo a kɔlkalu vɔɔndo. A co vannda diolan tɛɛmbuuo,

³⁰congulan, Hala simullo, caanda yeowlan, yongaa, sangalanndo, yɔŋ vɔɔn bɛndu-bɛndoo a nila kalulan a vanaa velu nda-a.

³¹A kindu lakɔl te, a lo o lediom coo le, a kendu bɔɔ nilan, a nɔ iɲíí le.

³²Kɛ nduyɛ, a siná yamɛi Hala-e pɛɛngu maa vanaa-vanaa co dɛnnda lan tosaa, piɔ́mndo co le nda ni. O tasoo, nda pila co dɛnnda lan tosaa, mà sim vɛlɛ vanaa co lan tosaa-a kɔɔli.