Read Kissi Rɔmnda 10 Bible Online

Rɔmnda 10 - Kissi bible

Rɔmnda 10

¹Puapilɛa nia, yeemɛi co ya o kɔl-le, o ya co Hala piɛi le Israɛlla-o co ni, mà sɔla cindaa.

²Kani i co seile ndalen timbi, maa a fula diallon le dɛnɛ Hala-o, kɛ a nɔ kɔlkalu o dialun fulan mun nin te.

³Kani a siná dɛnɛ sandaa Hala-o le, mí nda pila a va kindinndo le dɛnɛ sandaa ndaa cɔmndo, a cɛl dɛnɛ sandaa Hala-o le.

⁴Nduyɛ mɛɛlula tɔŋndo la co Krista ni, haliko mi vanaa laalannda kpow a siŋnun vanaa sandaa.

⁵Mí Moise sɛva le dɛnɛ sandaa vana sɔla o tɔŋndo biyɔɔ nin-ndo aa: «Vana bii pɛ sɔɔn tɔŋndon mò kela lecoo, ndu sɔlanin cindaa.»

⁶Kɛ sandii fula o laalanndo nin-nde ndi dimi aa: «Dimin o kɔl nin te aa: ‹Nɛ̀ɛ́ hel-lɛnin o halataala?› Le kɔlan Krista tuisio lɛŋ nanu co kon ni.»

⁷Dimi vɛlɛ le aa: «Nɛ̀ɛ́ toal-lɛnin o soon nɔ lamɛɛlu loo nin?» Le Krista heeloo fulaa vanvílɛ́iya tɛɛn co kon ni.

⁸Yɛɛ sandii ken dimi yɛ niko? Aa: «Sɔɛi co nɔm ikɛi, nɔm o sondo a nɔm o kɔl.» Nduyɛ, sɔɛi laalaŋii ken naa n co vannda tiiyallo ni aa:

⁹«Taa sɔlɔlan pɛ a sondo nɔmndo maa Yeesu co Maalii ni, ma laalan o kɔl nɔmndo nin maa Hala tindi ndu fulaa vanvílɛ́iya tɛɛn, a sɔlanin cindaa.»

¹⁰Kani vana laalan pɛ a kɔllo, a sɔla dɛnɛ sandaa. Vana sɔlalan pɛ a sondo, a sɔla cindaa.

¹¹Sɛbɛ Hala-o dimi aa: «Vana-vana laalan ndu pɛ, siɛmbula biinin ndu le.»

¹²Lelan, hiyan co Yuifia a vanaa co N'Yuifi le-a tɛɛn te. Bau nda kpede, Mɛlɛka pilɔɔ nda nɔ ni, o co vanaa co ndu veeloo-a ɲɛm ndɔn keo-vo.

¹³Kani o dimin aa: «Vana-vana veelu pɛ diola Mɛlɛka lan o piɛilen nin, ndu sɔlanin cindaa.»

¹⁴Kɛ vɛ̀ɛ̀ nda veelu yɛnin vana nda laalan too? Vɛ̀ɛ̀ nda laalan yɛnin vana nda tui tɔ́ɔ́ loo? Nduyɛ vɛ̀ɛ̀ nda tuɛi yɛnin ndu tɔ́ɔ́, te o co mì vana yondal nda sɔɛi ndɔɛi le?

¹⁵Nduyɛ vɛɛ nɛ nda yonda yɛnin, te vana vim nda le? Maa mɛɛ o sɛvan yɛ aa: «O naŋ bɔɔ le vanaa kan cɔu hunɔɔ, vanaa co yoongula kɛndɛlan yondaa-a.»

¹⁶Kɛ o co vannda kpow le a cɛl Yoongu kɛndɔɔ le. Mí Esai dimi ndi aa: «Mɛlɛka, nɛ̀ɛ́ laalan yɛ sɔɛi naa n co yondaa-e?»

¹⁷Lelan, o tueyɔɔ nin laalanndo fula ni, ɲɛ vana tuɛi yɛ kon-ndo, o sɔɛi Krista-e nin o fula ni.

¹⁸Kɛ i co ɲuna: Mò va maa Israɛlla tui sɔɛi ken te? A tuei ndi tɛ́ɛ́. «Kani diom ndaa kɔɛ, mó tiw o lɛŋnden kpow coo, mí sɔɔn ndan tiiya o ceendo mɛɛlulan di.»

¹⁹I co vɛlɛ ɲuna: Mò va maa Israɛlla bii ndi bila le? Moise dimi ndi o tasendɔ aa: «I co niaa paŋalaa luei o kɔl a vanaa co vanaa-mangalaa-isɔɔ kpeekpei le-a, mì tosa, mì la tuulu kɔl a vanaa-mangalaa-isɔɔa kindu kɔl te-a.»

²⁰Mì Esai ndu tɔɔndan bɛɛ mò dimi le aa: «Vanaa ve ya nuwviaa le-a, nda saalun ya ni, mí cɔmnun vanaa ɲuna ya ɲɛ-ɲɛ le-a.»

²¹Kɛ a Israɛl o kɔɔ, mó dimi aa: «Niinoo kpɛŋ, i va vanaa tui haa isɔɔ le-a a vanaa sɛɛngiaa kan balan siɛndullo.»