Read Kissi Rɔmnda 11 Bible Online

Rɔmnda 11 - Kissi bible

Rɔmnda 11

¹Mɛɛ i co ɲuna: Mò va maa kɛɔ Hala kɛɛ vanaa ndɔa ni? O kɛɛ nda le! Kani ya bɛɛ, Israɛlnɔɔ ya co ni, cua imama Abraham-ndo, fulaa o polale Bɛnyamɛn-nden nin.

²O co kɛɛ le Hala kɛɛ vanaa ndɔa o síná o tasendɔ-a le. La sínà ɲɛ sɛvan a Elii o kɔɔ-o le? Mó cɛɛŋun a Israɛlla o sondo o Hala lo aa:

³«Mɛlɛka, a cii vanaa-tɛɛngaa-diom Hala-a nɔmnda diw, má koombiaa fondala nɔmnda solia lasálàlan. Ya pilɛ kpé lo ni, ya bɛɛ, a cɛn le ya diyɔɔ.»

⁴Kɛ mí diom Hala-o mulul ndu aa: «I mandalan vannda vàálan tan ŋɔmmɛw, a beŋ vulan Baal o labɛngunin te-a.»

⁵Lende koni i co sunsun ni, vanaa tɔ̀a a co, a kɛndɛi Hala-e i hɛli-a.

⁶Nduyɛ, te o va pɛ maa le kɛndɛi o hɛli nda ni, mɛɛ o co lɛ le dɛnndan te. Te o co yɛ lende le, mɛɛ kɛndɛi ve lɛ ikɛndɛ le.

⁷Yɛɛ yɔŋnun yɛ hoo? Ɲɛ Israɛlla va nuwviaa-o, a sɔla kon te. Kɛ mí vanaa hɛlin-nda nda sɔla ndu. Vanaa tɔ̀a nda, nila kalulan nda tosa ni,

⁸maa mɛɛ o sɛvan yɛ aa: «Háá paalen nden haw, Hala yɔngu nda dialun vílɛ́in bɛndu-bɛndon, mó suumiaa nda yɔŋii nda cɔ, mó kindi nda nilan yɔŋii nda tuei.»

⁹Mí David bɛɛ dimi aa: «Màá ɲɛdiaa nda kafoo siŋnun yaŋɔɔlen le nda, yala nda haw nin mà del-lo pɛɛn. Màá a sɔla sangaa le tɛɛmbuula ndalan.

¹⁰Màá pundaa tol nda o lahɔl yɔŋii nda cɔ, tosa mì kɔɔlan la va nda la tundanndan lɔ́ɔ́-lɔ́ɔ̀, la sandu le pɛ.»

¹¹Lelan i co ɲuna: Mò va maa boŋio Israɛlla boŋi nuaa má deli ni? O co lende le i yɔŋnun te! Kɛ le tɛɛmbuu ndaa vanaa co N'Yuifi le-a sɔla cindaa ni, haliko mi Yuifia paŋala nda.

¹²Nduyɛ, te ceendo pɛl pɛ tɔnɔ o tɛɛmbuu ndaa nin, mí vanaa co N'Yuifi le-a pɛl tɔnɔ o delɔɔ ndaa nin, mɛɛ taa hun mangalan pɛ, tɔnɔ kon ndu hiawnin ba.

¹³I co niaa dimul, niaa co N'Yuifi le-a, maa kiilaa le vanaa co N'Yuifi le-a ya co ni. Lelan, i naŋ kɔl le baala kennun ya kon-ndo.

¹⁴I nɔ kɔlkɛsiaa maa te i dimi pɛ lende, ken co kɔl paŋalaa luei vanaa naa n co súú pilɔɔ-a nin, o kon mì vanaa pum a sɔla cindaa.

¹⁵Kani te siɛinɔn ndaa tosa pɛ mì ceendo muungu Hala o ibuŋ, mɛɛ yɛɛ tosan yɛnin, taa mingi pɛ hɔlla o Hala lo? Kon co macoaa mɛɛ vanvílɛ́iya-a muungu yoomu nuaa yɛ.

¹⁶Nduyɛ, te kunda tase ɲɛdiaa co pɛ o diandaa, mɛɛ o diandaa ɲɛdiaa tɔu bɛɛ co ni. Te puundun yɔmndon co pɛ n'diandaa, mɛɛ n'diandaa lɛwvon bɛɛ n co ni.

¹⁷Kɛ te lɛwvon pum kilin pɛ, mì nɔm co lɛvii yɔm yondo-ei-yo sɔla holɔɔ o fonda ndɔɔ, haliko ma va tando co fulaa o puundun yɔm nda tɔl-lo-o sɔlaa,

¹⁸mɛɛ kuundian lɛvun nda kili mun-ndon coo le. O va bɛɛ ma va kuundian, kɛ sinà pɛɛngu maa o co puundon te vil nɔm te, kɛ nɔm vil o puundon ni.

¹⁹Bɔɔle mà dimi aa: «Kɛ lɛvun mun nda kili ni, mí ya sɔla holɔɔ o fonda ndaa.»

²⁰Toɲaa ken ndi co ni. Le laalan nda lepɛŋndo n sɔla kilio ni, mì nɔm va o holaa le laalanndo. Lelan kuundian te, kɛ siòònde va nɔm,

²¹kani te Hala mɛi lɛvun fula o yɔmndo kpeekpei-yon ndon te, mɛɛ nɔm bɛɛ o mɛinin nɔm lon te.

²²Lelan tofa vɔ vanakɛndɛyɛi Hala-e a dɛnɛ ndɔ kindiaa: o kindi dɛnɔɔ le vanaa del-la, nduyɛ vanakɛndɛyɛi ndɔɛi co le nɔm, taa lo pɛ o vana kɛndɛi nin, te kon te, nɔm bɛɛ a sɔlanin kiolɔɔ.

²³Vanaa kan yɛ, taa lo o nila kalulan nin te, a hun sɔlanin holɔɔ, kani Hala nɔ kpaaya o mingi nda holɔɔ-o.

²⁴Te nɔm lɛvii va o yɔm yondoo-e sɔla pɛ kiolɔɔ, mà hol nɔm o yɔm nda tɔl-lo, vɛ̀ɛ̀ lɛvii yɔm nda tɔl-lo ndi pala yɛ mingi holɔɔ o yɔm i va-o?

²⁵Puapilɛa nia, i yeema mì la pɔw dɛnɛ kɔndɔfillo ho le, yɔŋii niaa pila cɔnnun vanaa kɔlkalu. Israɛlla pum a lonin nila kalulan tosaa háá mì vanaa sina Hala le-a kpow a muungu Hala o ibuŋ.

²⁶O kon mí Israɛlla kpow a sɔla cindaa maa mɛɛ o sɛvan yɛ aa: «Vana baŋaa fulanin Siɔn, mò ɲindu vanaa tosaa dɛnnda vɔɔŋaa co o cuavaa-imamaa Yakɔb-a tɛɛn-nda ikɛi.

²⁷Kpema ya yiilunin nda lɔ́ɔ́ ya faŋanin hakila ndalan-ndo co kon ni.»

²⁸Le kɛɛ nda kɛɛ yoongu kɛndɔɔ-o, yaamɔaa Hala-a nda co ni, kon yɛ le dɛnɛ niaa kɛndɔɔ o tosan ni. Kɛ a ba hɛli Hala-o o kɔɔ, Hala kaola nda le fuɲaa ndaa mamaa.

²⁹Kani ke Hala-o a veelu ndɔɔ mangalan te.

³⁰Lɔ́ɔ́ kon, mí la kɛɛ Hala diom, kɛ sunsun, Hala tuinun niaa iɲíí le tùú Israɛlla kɛɛ Hala diom-ndo.

³¹Lende koni, a kɛɛ Hala diom sunsun haliko mi Hala tuinun niaa iɲíí, kɛ haliko mi nda bɛɛ sɔla ɲíí Hala-e tuinɔnndo.

³²Kani Hala tosa mí vanndacieea kpow a luɛi o nila kalulan nin, haliko mo tuinun nda kpow iɲíí.

³³Bolofaa Hala-o co o bɔɔ dɛ! Kɔlkalu ndɔɔ a dɛnɛ sinaa ndɔɔ yingila bɔɔ, vana sínà yiyannda ndɔlan te, vana nɔla tuula ndɔlan bila biyɔɔ le.

³⁴Nɛ̀ɛ́ sina yɛ yiyan Mɛlɛka-o? Nɛ̀ɛ́ yɔŋnun yɛ vana silaa ndɔɔ?

³⁵Nɛ̀ɛ̀ fɔlɔn ke yɛ nin ndu ɲɛ, haliko mi ndu bɛɛ sɔla ɲɛ ndu o ba?

³⁶Kani ndu o ba ɲɛ-ɲɛ fula ni, ndu toosiaa ɲɛ-ɲɛ ni, le ndu ɲɛ-ɲɛ co ni. Biiloo co le ndu le fɛɛn a fɛɛn! Amiina.