Read Kissi Rɔmnda 16 Bible Online

Rɔmnda 16 - Kissi bible

Rɔmnda 16

¹I yeema mì sɔɔ niaa Foebe o ba, yema naa co baalaa le vanaa laalannda Sankre-o,

²haliko mi la bii ndu o Maalii nin maa mɛɛ niaa vanaa laalannda bɛnda le vana biyɔɔ yɛ. O kɛ́-kɛ̀ o yeema pɛ, la mala ndu le kon, kani o co vanaa bɔɔ-bɔɔ malaa, ya pila bɛɛ.

³La yil-la caaŋaa nia naa n co baala Yeesu Krista-o tosaa latulu-a, Priska nda Akilas pɛɛn.

⁴A pisi yoomula ndalan le ya-a. O co ko ya le co nda nuavalio yilɔɔ le, kɛ vanaa laalaŋaa co n'yuif le-a kpow bɛɛ.

⁵La yil-la vɛlɛ vanaa laalaŋaa co cuungianndo biyɔɔ o la nda lo cɛinin-nda. Mì la yil-la Epainɛte ya kaola taw-vo, nda yɔŋnun vanaa tasea le Krista o lɛŋnde Asii len nin ni.

⁶Mì la yil-la Mari. O tosa bɔɔ baalaa le niaa.

⁷Mì la yil-la Andronikus nda Yunias, vanaa nia naa n va o biyɔɔ nin naa ndaa-a nda co ni. Vanaa kiilaa luɛi yii taw-va nda co ni, a del Krista kɔɔli ya tase.

⁸La yil-la Ampliatus, o ya kaola taw o Maalii nin-ndo.

⁹La yil-la Irbɛn, caan naa naa n va baalaa latulu o Krista nin-ndo nda Stasis ya kaola taw-vo.

¹⁰Mì la yil-la Apelɛs, o cɔm lekɛ́ndɛi maa vana Krista-o o co ni-o. Mì la yil yungu Aristobul-lo.

¹¹La yil-la Herodiɔn vana ni. Mì la yil-la yungu Narkise-o, a laalan Maalii-a.

¹²La yil-la Trifɛn nda Trifos. Baalaa pila nda co tosaa le Maalii ni. Mì la yil-la Pɛrside, o ya kaola taw-vo, baalaa pila ndu bɛɛ tosa le Maalii ni.

¹³La yil-la Rufu, o sɔla hɛlio o Maalii nin-ndo, mì la yil-la kala ndɔ, ya bɛɛ kala nuu o co ni.

¹⁴La yil-la Asinkrite, Flekɔn, Hɛrmɛs, Patrobas, Hɛrmas a puapilɛa co nda o bɛngu coo-a.

¹⁵Mì la yil-la Filolɔk nda Yuli, Nere nda yema ndɔ, a Olimpas a vanaa diandaa co nda o bɛngu coo-a.

¹⁶La yilan vellaa-velle a kɔɔmianndo. Kundala vanaa laalannda kpede la yil nda.

¹⁷Puapilɛa nia, i co niaa sila, la mandan a vanaa luei piɔvianndo o kundaa tɛɛn-nda, a luei kan vannda o pɔwlan nin a pɛɛku niaa sɔla-o o kɔɔ-a pɛɛn. La faŋan nda kɔɔli few.

¹⁸Kani vanaa vaa lende, o co Krista Maalii naa le nda co baalaa tosallo le, kɛ dembela ndalan sii, a co keiyo sondo yeelaa a vannda sangalaa, mà va vanaa nɔ taasi le-a hɔlla hiŋndo.

¹⁹Niaa niaa, vannda kpede a sínà maa vanaa biyaa isɔɔa niaa co ni, lelan ya naŋ kɔl a dɛnɛ niaa ni. Nduyɛ i yeema mì la va vanaa kɔlkalua a dɛnɛ kɛndɔɔ o kɔɔ, mì la va vanaa diandaa a dɛnɛ vɔɔndo o kɔɔ.

²⁰O lo cobe mì Hala ke vana kɔlɲuloo-o pusu Setana niaa o labɛngunin. Màá kɛndɛi Maalii naa Yeesu-e va niaa coo.

²¹Timote caan ni naa n co baala pilɔɔ-o yil niaa, Lusius, Yasɔn a Sosipatɛr vanaa nia bɛɛ a yil niaa.

²²Ya Tɛrtius sɛva sɛbɔɔ ho-o bɛɛ, i yil niaa o Maalii nin.

²³Kais yil niaa. O ndu lo cɛinin ya co ni, o ndu lo cɛinin koni vannda cuungian le kaannden ni. Eraste, o co vana mandaa bolofaa le kobio-o yil niaa, Kartis puapilɛ naa bɛɛ yil niaa. [

²⁴Màá kɛndɛi Maalii naa Yeesu-e i va niaa coo kpow[1]!].

²⁵N candun Hala[2]! Ó nɔ kpaayaa le niaa yoomuan lueiyo o laalanndo nin-ndo, maa mɛɛ Yoongu kɛndɛ ya cuu niaa-o a sɔɛi Yeesu Krista ya tiiyal niaa-e co yɛ, a mɛɛ sɔɛi vianaŋii naa n sɔla Hala o ba-e i co yɛ. O Yoongu kɛndɛ kon nin Hala co kaamaa co o viannanndo kabi masindɛ-o cɔmndo ni.

²⁶Sunsun, o co o cɔmnan kpendekele. O kon mí vanaa súúla yɛ́-yɛ́a co n'yuif le-a a sínà yoongu kon o sɛbɛla vanaa-tɛɛngaa-diom Hala-a nin. Hala co le fɛɛn a fɛɛn-ndo dimi ndu ni, haliko mi vannda súúlan kpow a laalan ndu, mà bii sɔɛi ndɔɛi.

²⁷Hala nɔ kɔlkaloo ndu pilɛ kpé-o biiloo bɛnda o Yeesu Krista nin le fɛɛn a fɛɛn ni. Amiina!