Read Kissi Rɔmnda 2 Bible Online

Rɔmnda 2 - Kissi bible

Rɔmnda 2

¹Éé nɔm vanacieo! Nɔm co yaman caanda kiolɔɔ-o, mɛ̀ɛ́-mɛ̀ɛ́ n va, a nɔ mɛɛ kɔɔsaa le, kani le dɛnɛ n co yamɛi caanda kiolɔɔ-o, nɔm bɛɛ co ndu tosaa, mɛɛ nɔm pila cii yaalan.

²N sina maa a toɲaa Hala kilu vanaa vaa lende yamɛi ni.

³Éé nɔm vanacieo! Nɔm co hoo yaman caanda kiolɔɔ-o, kɛ nduyɛ, nɔm pila bɛɛ co dɛnnda nda co tosaa lan tosaa, a co yiyanndo maa a hialunnin yamɛi Hala-e?

⁴Te kon te vɛ̀ɛ̀ a co vanakɛndɛyɛi bɛndui Hala-e, biuvɔn ndɔɔ a dɛnɛ kɛndɛ ndɔɔ yii luɛyɔɔ le? A co sínà le maa le mangalan nɔmndo Hala co kon kpow tosaa ni?

⁵Kɛ le tùú n co nila kalulan tosaa mà va kɛɔ dɛnnda lan bilaa biyɔɔ-o, kɔltuw bɛndu Hala-o hun toalnin nɔm coo o paale kɔltuwlen coo, paale yamɛi sandɛi Hala-e fulanin ceen-nden.

⁶O salanin vana-vana mɛɛ dɛnnda ndɔlan la co yɛ.

⁷O kenin vanaa co biuvɔnndo le dɛnɛ kɛndɔɔ tosaa-a yoomu fɛɛn-fɛɛndo, a co kindinndo le biiloo, bɛɛlen a si lɔ́ɔ́-lɔ́ɔ̀-o sɔlaa-a pɛɛn.

⁸Kɛ o tuisinin kɔltuw ndɔɔ a hiilɛi ndɔɛi vanaa sɛɛngiaa ndu, má kɛɛ toɲaa, má muungu bollen vowvo o dɛnɛ vɔɔndo nin-nda coo.

⁹Dɛnɛ palaa a ɲɛ kindilaa vanin le vana-vana co dɛnɛ vɔɔndo tosaa, kandɔɔ a Yuifia, kɔ bii a vanaa co N'Yuifi le-a.

¹⁰Kɛ nduyɛ, biiloo, bɛɛlen a kɔlɲuloo vanin le vana-vana co dɛnɛ kɛndɔɔ tosaa, kandɔɔ a Yuifia, kɔ bii a vanaa co N'Yuifi le-a.

¹¹Kani Hala hiyan vannda le.

¹²Vanaa tosa hakio a siná tɔŋndo le-a kpow, nda sɔlanin yaalaa mɛɛ tɔŋndo dimi yɛ le. Kɛ vanaa síná tɔŋndo, kɛ má tosa hakio-a kialunnin iyama mɛɛ tɔŋndo dimi yɛ.

¹³O co le tɔŋndo tueyɔɔ le vana sɔla dío Hala o hɔl te, kɛ vanaa co tɔŋndo biyɔɔ-a, nda Hala kenin dio ni.

¹⁴Te vanaa sínà Hala le-a, a nɔ tɔŋ te-a tosa pɛ ɲɛ tɔŋndo dimi-o, mɛɛ tɔŋndo nda co le nda pila ni, hali mà nɔ tɔŋ te.

¹⁵Kon co cɔmndo ni maa dɛnɛ tɔŋndo co o sɛvaa nda o lakɔl, kɔlta ndalan la co lesei le ken. Yiyannda ndalan bɛɛ la co lesei, lan la yaala nda lɔ́ɔ́ lepum ni, mì la cɔm nda kɔɔsɔɔ.

¹⁶Ken fulanin ceen o paale Hala tosanin mì Yeesu Krista kelu dɛnnda viannannda vanndacieea yamɛi len, maa mɛɛ Yoongu kɛndɛ ya co dimio-o co yɛ.

¹⁷Tofa-vɔ, nɔm pila co veelɔnndo aa Yuifnɔɔ, a tiindan tɔŋndo, a co lisanndo maa a sínà Hala,

¹⁸maa a sínà hɛnan ndɔɔ, maa a nɔlà dɛnnda hiow naŋɔɔ lan kɔlɔɔ solio, kani a pɛɛku tɔŋndo.

¹⁹A laalan maa vana co vanaa sumɛiya tindaa see-o n co ni, ɲɛ-tengaa le vanaa co o ɲumndan nin-nda,

²⁰maa vana pɛɛkaa le vanaa kindu lakɔl te-a, a vana pɛɛkaa cuaambɔa, kani a pɛɛku tɔŋndo má síná toɲaa.

²¹Kɛ nɔm co caanda pɛɛkoo-o, vɛ nɔm pila pɛɛkun te? A co vannda yondallo maa vana yɔŋ levui le, vɛ mì nɔm pila va vuilen tosaa?

²²A co dimio maa vana suunda le, vɛ mì nɔm pila va suundaa? Piɔmnda nɛinun nɔm, kɛ nduyɛ a co kɔlan ɲɛm co o máánndan nin-ndon ciimbuuo.

²³A co kuundianndo maa a sínà tɔŋndo, kɛ a co Hala bɛ̀ɛ̀lan tɛɛmbuuo a tɔŋ n co tɛɛmbuuo-o.

²⁴Maa mɛɛ o sɛvan yɛ aa: «Sɔɔn tanan dimin a diola Hala lan o kɔɔ vanaa súúla celen tɛɛn le niaa vanaa sínà Hala-a.»

²⁵I co toɲa maa o naŋ mì vana dii toomaa, te vana kela pɛ o sɔɔn tɔŋndo dimi-on coo. Kɛ vana tɛɛmbuu pɛ tɔŋndo, mɛɛ tooma n dii-o siŋnun maa lekɔ̀ndé.

²⁶Te kɔ̀ndénɔɔ kela pɛ mɛɛ tɔŋndo dimi yɛ, vɛ̀ɛ̀ a kɔ̀ndéle ndɔle len kpede, o co maa falenɔ le o co le?

²⁷Hali mì vanndo dii tooma o falon nin te, kɛ te o co pɛ kelaa o sɔɔn tɔŋndo dimi-on coo, mɛɛ ndu yaalanin nɔm. Kani nɔm síná hoo tɔŋndo, má dii toomaa-o co sɔɔn tɔŋndo dimi-on biyɔɔ le.

²⁸O co dɛnnda vana ca a lehɔltan te la tosa mì vana va Yuifinɔ le, o co vɛlɛ toomaa o diallon nin te cɔm ken te.

²⁹Kɛ Yuifinɔ kpeekpeiyo, ndu co vana co dɛnndan tosaa a kɔl ndɔɔ-o ni. Tooma kɔllo co tooma kpeekpeiyo ni, o fula Kɔl Hala-o o ba-o, o co ɲɛ co o sɛvaa-o le. O co n'vanndaciee o ba le candɔɔla vana kon la fula le, kɛ Hala o ba.