Read Kissi Rɔmnda 4 Bible Online

Rɔmnda 4 - Kissi bible

Rɔmnda 4

¹Vɛ̀ɛ̀ naa n dimi yɛnin a Abraham o kɔɔ, o yɔŋnun fuɲa naa mamaa o falon nin-ndo? Yɛɛ o sɔla yɛ?

²Te ndóò va pɛ maa le dɛnndan Hala ndóò ce Abraham vana sandaa ni, mɛɛ ndóò nɔla mì ndóò kuundian. Kɛ o nɔla kuundianndo Hala o hɔl te.

³Kani Sɛbɛ Hala-o dimi aa: «Mɛɛ Abraham laalan Hala, mí Hala ca ndu vana sandaa le ken.»

⁴Vana co baalaa tosaa-o, sala ndɔɔ cɔmnun maa ikɛndɛ le, ɲɛ o nɔ dí le sɔlaa-o co kon ni.

⁵Kɛ te vanndo tosa ɲɛ le, mò laalan Hala maa o kialu vana lahakio iyama, laalan vana kon cɔmnun maa dɛnɛ sandaa.

⁶Lende koni vɛlɛ ni, vana Hala ke dio, o co le dɛnnda ndɔlan too, vana kon sɔla dɛnɛ kɛndɔɔ. Maa mɛɛ David dimi yɛ aa:

⁷«Dɛnɛ kɛndɔɔ co le vanaa kan, vanaa Hala mal haki le dɛnnda ndala vɔɔnndan-nda, vanaa hakila ndalan la vɔɔsun-nda!

⁸Dɛnɛ kɛndɔɔ co le vana kon, vana Mɛlɛka co lɛ haki ndɔɔ cɔm coo loo!»

⁹Mò va maa le vanaa dii toomaa-a kínɛí dɛnɛ kɛndɛ kon co ni baa le vanaa dii tooma le-a bɛɛ? Kani n co dimio maa: «Mí Hala ca Abraham vana sandaa le laalan ndɔɔ».

¹⁰Kɛ telen kuɛɛ laalan kon cɔmnun yɛ ndu coo lende? Telen o va nin falenɔ-o ni baa telen o va vɔ kɔ̀ndénɔ-o? Telen ndóò dii-yɔ tooma loo, o va vɔ kɔ̀ndénɔ.

¹¹Tooma Abraham dii-o, tɔɔmasele dɛnɛ sandaa o yɔŋnun le ndu ni. Ndóò dii-yɔ bɛɛ tooma kon te, mó sɔla dío le laalanndo. Lelan o co vɛlɛ fuɲaa vanaa laalannda kpow ni, hali a dii tooma le-a, haliko mi Hala cɛl nda maa vanaa sandaa.

¹²Ndu koni co fuɲaa vanaa dii tomaa-a ni, o co ko le tooma nda dii-o daama le, kɛ le kela nda co o nɛila Abraham fuɲa naa lan coo-o. La o kela coo, lɔ́ɔ́ ndóò dii-yɔ toomaa loo lan.

¹³Mí Hala yiilu Abraham a cuavaa ndɔa imamaa kpemaa, maa a sɔlanin ceendo kɛ́ɔ. O ve le mɛɛ o va tɔŋndo biyɔɔ yɛ le, kɛ le tùú ndóò ce ndu vana sandaa le laalan ndɔɔ-o o yiilu ndu kpema kon ni.

¹⁴Te le tɔŋndo biyɔɔ vana sɔla kɛ́ɔ ni, mɛɛ fondo fúú laalanndo co ni, o kon kpema Hala-o bɛɛ ndu del.

¹⁵Kani tɔŋndo hun a kɔltuwvo ni. Nɛɛ tɔŋ co yɛ le, tɔŋ tɛɛmbua ve vɛlɛ lon te.

¹⁶Lelan, le laalanndo naa n sɔla ɲɛm Hala yii kpemaa le naa keo-von ni, vɛ̀ɛ̀ kɛndɛi le co ken te! O kon, kpema kon co le vanaa-vanaa co cuavaa-imamaa Abraham-nda: a co o tɔŋndo bɛngu-a a á laalan vɛlɛ maa ndu Abraham fuɲa naa faw-faw-vo-a.

¹⁷Maa mɛɛ o sɛvan yɛ aa: «I siinguu nɔm fuɲaa le vanaa-mangalaa-isɔɔa bɔɔ-bɔɔ». Fuɲa vanaa kan o co vana o laalan-ndo o hɔl ni, Hala pɛɛn. O yɔngu vanvílɛ́iya yoomoo, mó tosa mí ɲɛm co lon fula.

¹⁸Tiindan kɛ́-kɛ̀ ve lɛ le, kɛ mí Abraham tiindan. Mó laalan Hala, le ken o siŋnun «fuɲa-mamaa le vanaa-mangalaa-isɔɔa bɔɔ-bɔɔ» ni, maa mɛɛ ndíì dimulun ndu yɛ aa: «Lende cuavaa nɔmnda vanin sɛ́lɛ́ ni.»

¹⁹Ndóò nɔ nin le vɔsilan kɛmɛ, mó muungu maa vana vílɛ́i. Sara laa ndɔ bɛɛ, sɔngɔ ciee-piɔ́m koni o va nin ni. Kɛ a kon kpow, Abraham vi n'dial o laalanndo nin te.

²⁰Sika bii ndu mò kɛɛ kpema Hala yiilu ndu-o laalan te, kɛ mí laalan ndɔɔ luei ndu yoomuan, mó biilu Hala.

²¹Ndóò síná válán maa Hala nɔ kpaayaa le sɔɛi o yii kpemaa-e peeloo.

²²Lelan Hala ce Abraham vana sandaa ni.

²³Kɛ o co le ndu pilɛ kínɛí le o sɛvan te aa: «Mí Hala ca ndu vana sandaa»,

²⁴o sɛvan vɛlɛ le naa, naa Hala canin vanaa sandaa le laalan naa n laalan ndu vana tindi Maalii naa Yeesu fulaa vanvílɛ́iya tɛɛn-ndo-o.

²⁵Le tɛɛmbuula naalan nda mal ndu vannda o ba ni, mó tendul le naa dio keo.