Read Kissi Rɔmnda 5 Bible Online

Rɔmnda 5 - Kissi bible

Rɔmnda 5

¹Le tùú naa n sɔla dío le laalanndo-o, kɔlɲuloo co naa tɛɛn naa Hala-aa o kɛndɛi Maalii naa Yeesu Krista-e bɛngu ni.

²Le ndu naa n sɔla kɛndɛi naa n co hee nin-nde ni, i naa n sɔla a laalanndo-e. Nduyɛ n nɔla mì n kuundian le tiindan naa n nɔ o biilu Hala-o nin-ndo.

³Hiovɔɔ o kon coo, hali n co bɛɛ o sangaa nin, n nɔla mì n kuundian, kani n sinà maa o sangaa nin biuvɔnndo fulà ni,

⁴mì biuvɔnndo hin a dialun kalan o tɔɔndanndo nin, mì dialun kalan mun hin a kɔlkɛsiaa.

⁵Nduyɛ, kɔlkɛsiaa hui vana le, kani Kɔl-Diandaa kennun naa-o tosá ni mí kaola Hala-o tiw o kɔlta naalan nin sɔ́.

⁶Tuma naa n nɔ vɔ mayoomu loo, mí Krista vu le naa vanaa lahakia o telen kelun-ndo.

⁷O kendu le cɛlɔɔ mì vana vi le vana sandaa. Bɔɔle mì vanndo pum cɛl le vuo le vana tosaa dɛnɛ kɛndɔɔ.

⁸Kɛ mí Hala cɔm naa kaola ndɔɔ, bau n vannun ndɔ vanaa lahakia, mí Krista vu le naa.

⁹Sunsun yɛ, kooma ndɔan ma tosa mí n siŋnun vanaa sandaa Hala o hɔl. Hiovɔɔ o kon coo, o ciindiaanin naa le kɔltuw Hala-o.

¹⁰Kani, telen naa n va yaamɔaa Hala-va-o, mí ndu pila mingi bɛndaa naa ndaa tɛɛn a piɔ́m Po ndɔɔ sɔla-o. Kodinte mɛɛ bɛndaa co nin naa tɛɛn naa ndaa nuaa yɛ, o ciindiaanin naa a yoomu Po ndɔɔ.

¹¹Hiovɔɔ o kon coo, n nɔla mì n kuundian o Hala nin Maalii naa Yeesu Krista o ba bɛngu. Ndu tosá ni mì bɛndaa muungu naa tɛɛn naa Hala-aa.

¹²Lelan, mɛɛ hakio luɛi o ceendo nin le vanacieo ndu pilɛ mí haki kon hun a piɔ́mndo yɛ, lende piɔ́mndo kei vanndacieea kpow coo ni. Kani nda kpede a tosa hakio.

¹³Lɔ́ɔ́ pá mí tɔŋndo sinan, hakio va nin o ceendo nin, kɛ le mɛɛ tɔŋ ve vɔ le yɛ, vanáà bii vana le tɔŋ tɛɛmbua le.

¹⁴Kɛ nduyɛ, cɔn o telen Adam-ndo háá hun bii a telen Moise-o, piɔ́mndo va hɛnan ndɔɔ tosaa vanndacieea coo, hali vanaa tosa haki maa haki Adam-ndo le-a. Adam va vundule vana va hunɔɔ-o ni.

¹⁵Kɛ vana tuu tɛɛmbuu vanacieo a ke Hala-o le. I co toɲa maa vanaa bɔɔ-bɔɔ vi le tɛɛmbuu vana pilɛ kon, kɛ kɛndɛi Hala-e ndi hiow polon. Kɛndɛi o tosal vanndacieea fondo fúú o vanacieo ndu pilɛ nin-nde, o co Yeesu Krista-o pɛɛn, ndi tol vanaa bɔɔ-bɔɔ coo ni.

¹⁶Ke Hala kon yɛ, kɔmnde ndɔlen le co maa kɔmnde haki vanacieo ndu pilɛ tosa-o le. Kani vana pilɛ kpé tosa hakio ni, Adam pɛɛn, mí vanndacieea kpow a sɔla yaalaa. Kɛ o tɛɛmbuulan taw kɔɔli, mí kɛndɛi Hala-e ke vanndacieea kpow dio.

¹⁷I co toɲa maa piɔ́mndo cɔm kpaaya ndɔɔ le haki vanndo ndu pilɛ tosa-o. Lelan, vanaa sɔla kɛndɛi bɛnduei a dɛnɛ sandaa-a tosanin masalen Yeesu pilɛ kon o ba bɛngu o ceendo coo.

¹⁸Lelan, le tɛɛmbuu vanacieo ndu pilɛ, mí vanndacieea kpow a sɔla yaalaa. Lende vɛlɛ koni, le dɛnɛ sandaa vanndo ndu pilɛ, mí vanndacieea kpow a sɔla dɛnɛ sandaa, o kon má sɔla cindaa.

¹⁹Le sɔɛi biyɛi lepɛŋii vanndo ndu pilɛ, mí vanaa bɔɔ-bɔɔ a siŋnun vanaa lahakia. Lende vɛlɛ koni, le sɔɛi biyɛi vanndo ndu pilɛ, mí vanaa bɔɔ-bɔɔ a siŋnun vanaa sandaa Hala o hɔl.

²⁰Nduyɛ, tɔŋndo ndu hin, haliko mi yɔŋ vɔɔndo kui, kɛ nɛɛ yɔŋ vɔɔndo kui pɛ, lon kɛndɛi Hala-e ndi hiaw kuiyo ni.

²¹Nduyɛ, mɛɛ hakio tosa masalen a piɔ́mndo o kɔɔ yɛ, lende koni kɛndɛi co masalen tosaa a dɛnɛ sandaa o kɔɔ ni, le vanndacieea yoomu fɛɛn-fɛɛndo yɔngoo Maalii naa Yeesu Krista o ba bɛngu.