Read Kissi Rɔmnda 9 Bible Online

Rɔmnda 9 - Kissi bible

Rɔmnda 9

¹Toɲaa ya co dimi o Krista nin ni, o co lacòò le ya co dimio le, kɔl nuu bɛɛ co lesei o Hala Kɔl-Diandaa nin maa:

²kɔl tambɛi bɛndoo a mɔnɛi tuŋ co ya o kɔl ni.

³Kani i va yeemaa mì ya piláà dɔwnun danga mì yáà sɛyan a Krista le dɛnɛ kɛndɛ puapilɛa nia, a co vanaa nia o falon nin-nda,

⁴Israɛlla pɛɛn, a Hala siinguu cuavaa ndɔa, mí biilu ndɔɔ va nda coo-a. A o yiilu kpemala ndɔlan-nda, a nɔ tɔŋndo a kannden-nda.

⁵A fuɲaa ndaa mamaa yɔŋnun vanaa bɛndua o laalanndo nin-nda, a Krista co ɲɔɔn kpow bollen-ndo fula o polale ndalen coo o falon nin-nda. Màá biiloo va le Hala le fɛɛn a fɛɛn! Amiina!

⁶O co dimi le maa sɔɛi Hala-e nɔ lɛ tɔnɔ le. Kani vanaa-vanaa fula o Israɛl nin, o co nda kpow le a co Israɛlla kpeekpei le.

⁷Kani cuavaa-imamaa Abraham-nda nda co ni, o co mɛɛ nda co kpede yɛ le nda co cuavaa Abraham-nda le. Kani mí Hala dimul Abraham aa: «O Isake nin cuavaa-imamaa ya yiilu nɔm kpemaa-a fulanin ni.»

⁸Kon co dimio ni maa o co cuavaa velun o falon nin-nda le a co cuavaa Hala-a le, kɛ cuavaa kpemaa co cuavaa nɔ diolan o polalen coo-a ni.

⁹Sɔɛi kpemɛi ken co hee ni aa: «A telenndo ho, i muungunin nanu, nduyɛ Sara sɔlanin hɔ́ɔ́ piaandoo.»

¹⁰O co ka ken te, Rebeka bɛɛ, telen o cua folio vanndo ndu pilɛ kpé o ba-o, Isaake fuɲa mamaa pɛɛn,

¹¹cɛlɛkpɛa kan ndáà vilun-ndɔ le, aa tosa vɔ dɛnɛ kɛndɛ, te kon te dɛnɛ vɔɔn te, mí i dimulun Rebeka aa: «Kaasonɔɔ tosalnin o pɔmbɔɔ baalaa.» O dimi kon haliko mi tuu Hala ndóò tuu-o ndóò peelun, o co le dɛnndan te, kɛ le hɛnan vana hɛli-o.

¹³Maa mɛɛ i sɛvan yɛ aa: «I kaola Yakɔb, mí kɛɛ Esau.»

¹⁴Vɛɛ naa n dimi yɛnin vɛlɛ? Mò va maa Hala sendu le? O co lende le i co le.

¹⁵Kani mó dimul Moise aa: «Vana ya ce pɛ ɲia, i ce ndu ɲia, vana ya tuinun pɛ iɲíí, i tuinun ndu iɲíí.»

¹⁶Lelan, o co hɛnan vana pila le, o co vɛlɛ le kindin vana pila le, kɛ le mɛɛ Hala nɔ ɲííye yɛ.

¹⁷Kani mí sɔɛi Hala-e dimulun masaa Esipte aa: «I siinguu nɔm masaa haliko mi cɔm kpaaya nuu o nɔm nin, mì diola nilan la kela tɔ́ɔ́ o lɛŋnden kpow coo.»

¹⁸Lelan, vana o yeema pɛ le ɲííye tuinɔnndo, o tuinun ndu iɲíí, vana o yeema pɛ vɛlɛ le nilan kindio, o kindi ndu nilan.

¹⁹Bɔɔle mì vana pum ndu dimi aa: «Mì le yɛɛ Hala kalaa co yɛ naa niko tɔ́ɔ́yaa biyɔɔ? Kani nɛ̀ɛ́-nɛ̀ kuuna yɛnin ndu hɛnan ndɔɔ tosaa?»

²⁰Kɛ nɛ̀ɛ́-nɛ̀ nɔm co yɛ, le simndan sɛɛngianndo niaa Hala? Kpɛɛnɛi puului nda cɔw-ve i ɲuna pá vana cɔw ndi-o aa: «Le yɛɛ nɛ n cɔw yɛ ya nuaa?»

²¹Vɛ̀ɛ̀ o co vana cɔavaa n'kpɛɛnɔɔ le tosa ɲɛ o yeema-o a puuloo le! A puulu lindaa pilɔɔ, o nɔla mò cɔw kpɛɛnɛi sɔvɛi te kon te kpɛɛnɛi nɔ mako lei.

²²Hala yeema le kɔltuw ndɔɔ cɔmndo haliko mi vannda sina kpaaya ndɔɔ. Nduyɛ, biwnɔnndo pila o biwnun a vanaa kɔltuw ndɔɔ va le nda-a ni. Kɛ nduyɛ telenndo ndóò tiiya nin le tambii ndɛi.

²³Kɛ mó yeema le cɔmndo mɛɛ kpɛ́ biilu ndɔɔ co o bɔɔ le kpɛɛnɛn o tuinun iɲíí-yon yɛ, n o cɔw le biiloo-on pɛɛn.

²⁴Naa n co yɛ kpɛɛnɛn mun ni, o tasoo, naa o veelu fulaa Yuifia tɛɛn-nda, kɛ kɔ bii niko a vanaa fula vanaa-mangalaa-isɔɔa celen tɛɛn-nda.

²⁵Maa mɛɛ o dimi ndi o sɛbɛ Osee-o nin yɛ aa: «Vanaa ve vanaa ni le-a, i veelunin nda aa a nia, mì veelu vanaa-mangalaa-isɔɔa yáà kaola le-a aa vanaa hɛnan ya-a.

²⁶O kon hali nɛɛ nda va nda dimullo aa ‹La co vanaa ni le›-a, a veelunin nda lon aa: ‹Cuavaa Hala yoomaa.›»

²⁷Mí Esai bɛɛ yonda a Israɛl o kɔɔ aa: «Hali Israɛlla ndáà va bɛɛ sɛ́lɛ́ maa sióónde o mɛmma ihɛllan kɔngɔ nuaa, vanaa pilɛn-pilɛŋaa lonin-nda kínɛí sɔlanin cindaa ni.

²⁸Kani Mɛlɛka keleŋanin sɔɛi o dimi-e peelu o lɛŋnden coo kpede.»

²⁹Maa mɛɛ Esai kalaa ndóò dimi o tasendɔ yɛ aa: «Te Mɛlɛka co ɲɔɔn kpow bollen-ndo ndóò mel naa cuavaa-imamaa le, maa Sodɔm náà n vanin ni, mì náà n velan a Komɔr.»

³⁰Vɛɛ naa n liima yɛ niko sɔɛi he? Vanaa ve dí nuwviaa le-a sɔla dío, di sɔlan a laalanndo-o.

³¹Israɛlaa va yɛ tɔŋ ke vana dio-o nuwviaa-a sɔla tɔŋ kalaa le.

³²Le kɔlɔ yɛɛ nɛ kon? Kani o co a laalan te Iraɛlla va ndu nuwviaa le, kɛ le dɛnnda ndalan cɔmndo. Mí ken yɔŋnun pow boŋaa le nda,

³³maa mɛɛ i co i sɛvaa yɛ aa: «Má cè ya pow boŋaa kɛsio Siɔn! Pow kpova mal vana-o. Kɛ vana laalan pɛ ndu, o luusian te.»