Read Kissi 1Korɛntea 12 Bible Online

1Korɛntea 12 - Kissi bible

1Korɛntea 12

¹Puapilɛa nia, i yeema mì la va o sínà lepɛŋndo nin a valta kɔltan o kɔɔ le.

²Tuma niáà síná vɔ Hala loo, a va niaa nanɔɔ má va kɔlan a niaa le piɔmaa suu le-a sooloo.

³Lelan i yeema mì cɔm niaa maa vana-vana Kɔl Hala-o co pɛ nin, o dimi le aa: «Màá Yeesu dɔwnun danga!» Lende koni, vana-vana tiwba mò dimi le aa: «Yeesu, Maalii o co ni», te Kɔl-Diandaa co ndu nin te.

⁴Valtan la co yɛ́-yɛ́, kɛ Hala Kɔl-Diandaa pilɔɔ kpé yɔngu lan ni.

⁵Baalalan la co súúlan taw, kɛ Mɛlɛka pilɔɔ kpé.

⁶Kpekulan la co súúlan taw, kɛ Hala pilɔɔ kpé tosa lan lende vannda kpow nin ni.

⁷Nduyɛ Hala Kɔl-Diandaa yɔngun vana-vana le dɛnɛ kɛndɛ vannda kpow.

⁸Vana pum, mì Kɔl-Hala-o ke ndu sɔɔn kɔlkalon dimio, o pilɔɔ sɔɔn dɛnɛ sinaan mɛɛ Kɔl-Diandaa pilɛ kon co yɛ.

⁹Mì kɔl pilɛ kon ke vana pum laalanndo, mò ke vanndo pillo kpaayaa le vanaa lanàá singio,

¹⁰mì Kɔl-Hala pilɛ kon ke vana pum kpaaya le dɛnnda kɔndɔfiltan tosaa, o pum le diom Hala-o tɛɛnguuo, o pum le yiyanndan sinaa. O yɔngun vana pum le sɔɛi o sɔɔn mangalan celen nin, o pum le sɔɔn mangalan mun vannda hivullo.

¹¹Kɔl pilɛ kon kpé co dɛnnda lan tosaa ni, mò va vannda lan piɔwvo a pilɛn-pilɛnnda mɛɛ hɛnan ndɔɔ co yɛ.

¹²Nduyɛ, kɔɔle vanacieo len pilɛ le co ni, kɛ falon taw le nɔ ni. Falon n va bɛɛ sɛ́lɛ́ lende o kɔɔle len nin, kɔɔlen nden pilɛ kpé le co ni, lende koni Krista co ni.

¹³Kani naa kpow n sɔla yinɔɔ Kɔl-Diandaa pilɛ kon o ba, mí n siŋnun kɔɔle pilɛ len, vana va Yuifinɔ, vana va Yuifinɔ le. Vana va cɛ, vana vannun o ba nɔm coo, mí n sɔla Kɔl-Diandaa pilɛ kon le kolɔɔ.

¹⁴O co falei ndii pilɛ le i co diallon te, kɛ falon taw.

¹⁵Te pelei dimi pɛ aa: «O co ya le co baa le. Lelan i co o diallon coo le.» Kon kuuna ndi vaa falei ipilɛ o diallon nin te.

¹⁶Te nilen le dimi pɛ aa: «O co ya le co hɔlten te. Lelan i co o diallon coo le.» Kon kuuna len vaa falei ipilɛ o diallon nin te.

¹⁷Te kɔɔlen kpede léè va pɛ hɔlten, vɛ̀ɛ̀ léè tuɛi yɛnin? Te léè va yɛ pɛ nilan kpow, vɛ̀ɛ̀ léè saa yɛnin ɲɔɔn cun?

¹⁸Kɛ nduyɛ, Hala kɛsi ifalu oo ifalu o diallon nin mɛɛ hɛnan ndɔɔ co yɛ.

¹⁹Te kɔɔlen kpow léè va pɛ falei ndi pilɛ, kuɛɛ nɛ diallon mun-ngoo va yɛnin?

²⁰Lelan, falon co taw, kɛ kɔɔle pilɛlen kpé.

²¹Le hee, hɔlten le nɔla mì le dimul baa le aa: «I nɔ mako a nɔm te». Bollen bɛɛ, le tiwba mì le dimul pelon te aa: «I nɔ mako a niaa le.»

²²Kɛ falun naa n ca maa n nɔ mayoomu loon bɛnda mì n va naa o n'dial.

²³Nduyɛ falun naa n ca maa n co n'sɔvɛ taw loon, mun naa n hiow bɛɛlen keo ni. N naa n yiyan maa n niŋ bɛɛ loon naa n hiow caa vionɔɔ ni.

²⁴Kɛ nduyɛ, n vannda ca-on, n kumbu mun te. Kɛ, Hala toosiaa falun naan toosiaa pum, mó ke n vana ci n'sɔvɛ loon bɛɛle bɛndulen,

²⁵yɔŋii sɛiyanndo va o diallon nin, kɛ mì n nɔnnan hɔlten vellaa-velle.

²⁶Te falei ipilɛ sɔla pɛ sangaa, falun tɔ̀un kpow n sanga latulu a ndi. Te ipilɛ sɔla pɛ biiloo, n tɔ̀un kpow n dɔwnun ɲaale a falii ken latulu.

²⁷Niaa yɛ, kɔɔle Krista len niaa co ni, niaa a pilɛn-pilɛnnda kpow, dialun ndɔn niaa co ni.

²⁸Lelan, o vanaa laalannda tɛɛn, mí Hala kɛsi fɔlɔn kiilaa, diinndɔɔ vanaa-tɛɛngaa-diom Hala-a, yàándɔɔ vanaa pɛɛkaa. O kon kɔɔli, vanaa tosa dɛnnda kaamaalan-nda, o nda kɔɔli, vanaa nɔ kela singiaa lan-nda, vanaa mala vannda-a, simlacia a vanaa sɔaa o sɔɔn mangalan celen nin-nda.

²⁹Vɛ̀ɛ̀ nda kpow co kiilaa ni? Vɛ̀ɛ̀ nda kpow co vanaa-tɛɛngaa-diom Hala-a ni? Vɛ̀ɛ̀ nda kpow co vanaa pɛɛkaa ni? Vɛ̀ɛ̀ nda kpow tosa dɛnnda kaamaalan ni?

³⁰Vɛ̀ɛ̀ nda kpow nɔ ke singiaa n'vanndo ni? Vɛ̀ɛ̀ nda kpow sɔaa o sɔɔn mangalan celen nin ni? Vɛ̀ɛ̀ nda kpow tɛɛsiaa diomndan ni?

³¹Lelan, yeemɛi bii niaa le valta hiow naŋɔɔ lan nuwviaa. Kɛ i co nihau niaa nɛi hiow naŋɔɔ-o cɔm.