Read Kissi 1Korɛntea 15 Bible Online

1Korɛntea 15 - Kissi bible

1Korɛntea 15

¹Puapilɛa nia, i co niaa Yoongu kɛndɛ ya tiiyal niaa-o yiyalan, o niaa cɛl mì la sim lecoo yili-o.

²Yoongu kɛndɛ kon ciindiaanin niaa ni, te la lo pɛ lecoo ɲɛkɛndɛi mɛɛ ya dimul niaa ndu yɛ. Kɛ te la lo lecoo le, laalan niaa siŋnun fúú.

³O ya sɔla-o, ndu fɔlɔn ya pɛɛku niaa ni, maa Krista vi le hakila naalan maa mɛɛ o sɛvan yɛ.

⁴Má kumbu ndu, o paale yàándɔlen coo, mó tendul maa mɛɛ o sɛvan yɛ.

⁵Mó cɔmnun Piɛr, o kon kɔɔli, mó cɔmnun kiilaa tɔ́ a à ŋiɔnda.

⁶O kon kɔɔli niko, mó cɔmnun puapilɛa o lepilɔɔ, ndáà hiow n'van kɛmɛ leŋuɛɛnu. Vanaa kan a bɔɔ-bɔɔ a co vɔ yoomu, a pum a vi.

⁷O kon mó cɔmnun Nsaki, o kon kɔɔli, mó cɔmnun kiilaa kpow.

⁸O mɛɛlulan kpɔŋ, mó cɔmnun ya pila, ya vana co hoo maa vana velun telen vialaa ndɔɔ ndóò tiiya vɔ loo-o.

⁹Nduyɛ, o kiila tɛɛn kpow, ya co o sɔvɛ taw le ni, i co bɛɛ o sɔvɛ le ya veeloo aa kiilaa le, kani i tol kunda Hala-o yɛlen.

¹⁰Kɛ nduyɛ, kɛndɛi Hala-e tosa ni mì va mɛɛ ya co nuaa yɛ, kɛndɛi o tosal-la ken-nde i yɔŋnun fúú le. Kani i tosa vallo hiovɔɔ kiilaa kan kpow coo, o co ya pila le tosa vali kon te, kɛ kɛndɛi Hala-i co ya coo-e.

¹¹Lelan, o va ya, o va nda, sɔɛi pilɛi he kpé naa n co niaa tiiyallo ni, ndi ko niaa laalan yɛ ni.

¹²Nduyɛ, te n dimul niaa pɛ maa Krista tendul fulaa vanvílɛ́iya tɛɛn, le yɛɛ nɛ vanaa pum niaa tɛɛn a co yɛ dimio maa vanvílɛ́iya a muungunin yoomu le?

¹³Te o va yɛ pɛ maa vanvílɛ́iya tendulnin te, mɛɛ Krista tendul te.

¹⁴Nduyɛ te Krista tendul-lɛ le, mɛɛ pɛɛkuu fondoo fúú naa n co niaa ni, mɛɛ laalan niaa bɛɛ connun fúú.

¹⁵Te o va yɛ pɛ lende, mɛɛ seile lacòòvalen naa n dimi a Hala o kɔɔ ni, kani n dimi maa o mingi Krista yoomu. Te o mingi yɛ Krista yoomu le, mɛɛ vanaa vi-a bɛɛ a muungu lɛnin yoomu le.

¹⁶Nduyɛ taa muungu yoomu le, mɛɛ Krista bɛɛ muungu yoomu le.

¹⁷Nduyɛ te Krista muungu yoomu le, mɛɛ laalan niaa siŋnun fúú, la co vɔ o hakila niaalan nin.

¹⁸Vanaa ndáà laalan Krista má vu-a bɛɛ a lo.

¹⁹Te o va yɛ pɛ maa le ceendo ho daama naa n tiindan Krista ni, mɛɛ naa mɔnɛi hiawnin biyɔɔ a vannda kpow.

²⁰Kɛ nihau, Krista tendul, ndu yɔŋnun vana tasoo fulaa vanvílɛ́iya tɛɛn ni.

²¹Vana pilɛ kpé tosa ni mí piɔ́mndo hun, vana pilɛ kpé tosanin vɛlɛ ni mì vannda muungu yoomu.

²²Mɛɛ Adam yɔŋnun sabu mí piɔ́mndo va vannda kpow kuee yɛ, lende koni Krista yɔŋnun sabu le tendul vanvílɛ́iya ni.

²³Kɛ vannda a pilɛn-pilɛnnda a hunnin o polalen. Krista co vana tasoo ni. O ndu kɔɔli, vanaa vanin a ndɔa lɔ́ɔ́ o hunnin-ndo-a.

²⁴O kon, mɛɛlulan la tiiya. Telen kon o minginin Hala Fuɲaa masalen o ba ni, mò tɛɛmbuu masalen a kpaayala lemalan kpow.

²⁵Kani mɛɛ mò tosa masalen háá mò nɛw yaamɔaa ndɔa a n'pelu.

²⁶Yaamɔɔ o tɛɛmbuunin o mɛɛlulan kpɔŋ-ndo co piɔ́mndo ni.

²⁷Nduyɛ, o co o sɛvaa aa: «Hala kɛsi ndu ɲɔɔn kpow a ba bɛngu.» Kɛ te o dimi pɛ aa «kpow», kon co dimi le maa ndu Hala co lecoo, kani ndu kɛsi ndu ɲɔɔn kpow o ba bɛngu ni.

²⁸Nduyɛ, telen ɲɔɔn kpow n vanin Krista o ba bɛngu-o, ndu pila, o co Poo-o tuisinnin Hala o labɛngu, o sɔɔ ndu ɲɛm mun o ba-o pɛɛn, haliko mi Hala cua fondaa kpow o ɲɔɔn kpow nin.

²⁹Te vana muungu yɛ yoomu le, vɛ̀ɛ́ nɛ vanaa co yinɔɔ sɔlaa o fonda vanvílɛ́iya-a tosa yɛnin? Te vanaa vi-a muungunin yoomu le, le kɔlɔ yɛɛ nda sɔla yɛ niko yinɔɔ le nda?

³⁰Naa yɛ niko, le kɔlɔ yɛɛ nɛ naa pila n co yɛ o dɛnɛ palaa nin lɔ́ɔ́-lɔ́ɔ̀?

³¹Puapilɛa nia, piɔ́mndo co ya biondɔɔ lɔ́ɔ́-lɔ́ɔ̀ le tùú ya co lisanndo a niaa o sondo o Maalii naa Yeesu Krista nin-ndo.

³²O dimi ivanacieeyaa nin, te vanvílɛ́iya a muungu lɛnin yoomu le, ɔ́ɔ̀ tɔnɔ naa sɔla mí n simul visia yondoa, mí n cɔlɔba nda Efɛs-o? Mɛɛ vanaa pum a dìmì yɛ aa: «N dionnun mì n kolnun, kani n co hunɔɔ vu siɔdii.»

³³Niaa pila huinun te, maa mɛɛ o dimin yɛ aa: «Canyan vɔɔnndon tɛɛmbuu naamula kɛndɛlan ni.»

³⁴La tosa dɛnɛ sandaa, la tosa lahaki le, kani a pum a sínà Hala le, i ya co hee dimio-e co dɛnɛ lasiɛmbu le niaa.

³⁵Mì vana pum ɲuna dɔ́ɔ́ aa: «Vɛ̀ɛ̀ vanvílɛ́iya a muungu yɛnin yoomu? Kɔɔle súú yɛɛ nda nɔ yɛnin?»

³⁶Niaa diɔmnda haa? Kúlún niaa saŋ-ndon nɔla pá vulɔɔ te n si fɔlɔn te?

³⁷Nduyɛ, la va pɛ saŋɔɔ, o co tum vil-lo le niaa saŋ te, kɛ kulle, bɔɔle maale, te kon te kulii ɲɛ celen.

³⁸O kon kɔɔli, Hala yɔngu kulii ken kɔɔlen mɛɛ o hɛnan yɛ. O yɔngu yɛi oo yɛi kɔɔle bɛnda a ndu len-ndo.

³⁹Ɲaa yoomaa kpow a nɔ kɔɔle pilɛ le, kɔɔle vanndacieea le co tengen, kɔɔle visia le co tengen, kɔɔle yowva le co tengen, kɔɔle suwva bɛɛ le co tengen.

⁴⁰Kɔɔle ɲɔɔn o halataala a mun o lɛŋnden coo bɛɛ le co ɲɛ pilɛ le. Ɲɔɔn o halataala a mun o lɛŋnden coo n nɔ naŋɔɔ pilɛ le.

⁴¹Paalen le nɔ diondɔɔ ndɔ, paangei i nɔ diondɔɔ ndɔ. Loeon bɛɛ n nɔ diondɔɔ ndɔ, diondɔɔ loi pum co tengen a diondɔɔ loi pilɛi.

⁴²Lende ɲɔɔ vanin o tendul vanvílɛ́iya ni. A kɔɔle vu len nda kumbun ni, mà tendul a kɔɔle vi le len.

⁴³A va pɛ kɔɔle len kumbɔɔ, a kundu len o mɔnɛi nin a o kpaaya lepɛŋndo nin, kɛ le va pɛ tendullo, le tendul a biiloo a á kpaaya bɛndoo.

⁴⁴A dialun ivanacieeyan nda kumbun ni, mà tendul a dialun kɔllon. Te dialun ivacieeyan n co pɛ, mɛɛ dialun kɔllon bɛɛ n co.

⁴⁵Nduyɛ o sɛvan aa: «Vanaciee tasoo, o co Adam-ndo, o falun ivanacieeyaan nin o va ni, kɛ Adam mɛɛlaa ndu, kɔl yɔngu vana yoomoo-o o yɔŋnun ni.»

⁴⁶O co kɔllo le co o tasoo le, dialun ivanacieeyan ni, o kon kɔɔli dialun kɔllon.

⁴⁷Adam tasoo a puuloo Mɛlɛka toosiaa ndu ni, kɛ o diinndɔɔ ndu, o halataala o fula ni.

⁴⁸Mɛɛ vana cɔwnun a puuloo-o co yɛ, lende vanaa co o ceendo coo-a co ni. Mɛɛ vana fula o halataala-o co yɛ, lende ɲɛm co o halataala-on n co ni.

⁴⁹Mɛɛ naa n velan a vana cɔwnun a puuloo-o yɛ, lende koni naa n velannin a vana fula o halataala-o ni.

⁵⁰Puapilɛa nia, ɲɛ ya co dimio-o co hoo ni, dialun puulon a koovan nɔla kɛ Masale Hala len sɔlaa le. Lende vɛlɛ koni, ɲɛ vu-o nɔla mò va ɲɛ pilɛ a ɲɛ vi loo le.

⁵¹I co niaa sɔɛi viannan-nde dimul. Naa kpow n vinin te, kɛ naa kpow n mangalanin,

⁵²o telen bingi bɛngu, o biɔŋɔɔ lepilɔɔ, lɔ́ɔ́ bulu mɛɛlaa hɔŋnunnin-ndo. Kani buloo soaanin mì vanvílɛ́iya tendul, a venin a siovɛi le, o kon naa bɛɛ n mangalanin.

⁵³Kani mɛɛ mì dialun sia-on n siŋnunn dialun si loon, mì dialun vu-on n siŋnun dialun vi loon.

⁵⁴Lɔ́ɔ́ dialun sia-on siŋnunnin dialun si loon-ndo, mì dialun vu-on siŋnun dialun vi loon, o kon sɔɛi sɛvan-nde peelun aa: «Sɔɛi piɔɔ́mnde i cuu, dɛnndan kpow la hiawnin.»

⁵⁵«Òó piɔ́mndo, ɔ́ɔ̀ kpaaya nɔmndo? Òó piɔ́mndo, ɔ́ɔ̀ kefii nɔmnde?»

⁵⁶Kefii piɔ́mnde i co hakio ni, kpaaya hakio co tɔŋndo ni.

⁵⁷Kɛ biiloo co le Hala, o yɔngu naa nɔlaa o Maalii naa Yeesu Krista nin-ndo.

⁵⁸Lelan, puapilɛa nia hɛnan ya taw-va, la sim yili. La kpeeŋian te. La yɔngun lɔ́ɔ́-lɔ́ɔ̀ o baala Maalii-o nin, mì la sínà maa baala niaa co tosaa o Maalii nin-ndo co fúú le.