Read Kissi 1Korɛntea 3 Bible Online

1Korɛntea 3 - Kissi bible

1Korɛntea 3

¹Puapilɛa nia, yáà tiwba sɔɛi niaa o lani maa vanaa Hala Kɔl-Diandaa co nin-nda le, kɛ mí soaa maa mɛɛ ya soaa vanaa ceenda o lani yɛ, mɛɛ ya dimul vanaa sɔla laalanndo sɛnɛi o Krista nin-nda sɔɔn yɛ.

²A nɔnɔan ya dɔw niaa balo ni, o co a ɲɛdiaa kàlà-kálà le, kani niáà tiwnin ba kon dioo le. Nduyɛ, sunsun bɛɛ la nɔla vɔ le, kani la co vɔ kelaa maa vanaa ceenda.

³Kani paŋalianndan a sɛɛngianndan la co vɔ niaa tɛɛn. Vɛ̀ɛ̀ o co vanaa ceenda le niaa co vɔ o kon mì la va kelaa o vanacieeyɛi nin te?

⁴Te o niaa tɛɛn, vana pum dimi pɛ aa: «Ya le Pol ya co ni», mì o pillo ndu dimi aa: «Ya le Apolɔs», vɛ̀ɛ̀ o co maa vanaa ceenda le niaa co dɛnndan tosaa o kon te?

⁵Nɛ̀ɛ́ co yɛ niko Apolɔs? Nɛ̀ɛ́ co yɛ Pol? Vanaa baala Hala-a daama naa n co ni, a niaa laalan o ba-a, maa mɛɛ Hala ke vana-vana vallo le tosaa yɛ.

⁶Ya Pol tɔl ni, mí Apolɔs pɔɔliaa, kɛ mí Hala tosa mí tɔlɔɔ hindu.

⁷Lelan, vana tɔl-lo nda vana pɔɔlia-o co ɲɛ-ɲɛ le, fɔ Hala, o tosa mó hindu-o.

⁸Kpen-kpen vana tɔl-lo nda vana pɔɔlia-o co ni, Hala dɔawnin vana-vana vɔ́ngɔ̀ mɛɛ baala ndɔɔ co yɛ.

⁹Kani vanaa co baalaa latulu a Hala-a naa n co ni. Niaa co ciɛi ndɔɛi ni.

¹⁰Maa mɛɛ kɛndɛi Mɛlɛka-e i yɔngun ya-e. Ya ya, i tosa baalaa maa vana caa baalaa taw-vo, mí kila cɛiyo, mí vana celen tangul lecoo. Kɛ, mɛɛ mì vana caa taw a mɛɛ n co cɔwva lecoo yɛ.

¹¹Kani vana nɔla mà kila cɛi celen lecoo le, fɔ o cuu nin kila-o, ndu co yɛ Yeesu ni.

¹²Vanaa pum a co tangullo o cɛi kilan kon-ndo coo a sianion, volin latámán, powta báà kàlàlan. A pum yɛ, a yɔmnde, foeende te kon te a tɛwvo.

¹³Kɛ dɛnnda vana-vana la fulanin ceen o paale yamɛi kiolunin-nden. Kani paale len, Mɛlɛka cɔɔmunin-ndan mì la fula ceen mɛɛ yinnden le dindi ɲɔɔ nuaa yɛ.

¹⁴Vana baŋɔɔ ndɔɔ lo pɛ o cɛi nda kila-o coo, mò simul yinnden, mɛɛ vana baŋ o cɛi-kilaa kon coo-o sɔlanin vɔ̀ngɔ̀ɔ́.

¹⁵Kɛ vana baala ndɔɔ ŋɔɛ pɛ, ndu sɔlanin vɔ̀ngɔ̀ le. Kɛ nduyɛ, ndu pila sɔlanin cindaa, kɛ maa mɛɛ vana kei o leyin nin.

¹⁶Cɛi-Hala-o niaa co ni, Hala Kɔl-Diandaa co niaa nin. Vɛ̀ɛ̀ la sínà ken te?

¹⁷Nduyɛ, te vanndo tɛɛmbuu pɛ Cɛi-Hala-o, mɛɛ Hala tɛɛmbuunin vana kon. Kani o diandaa Cɛi-Hala-o co ni, nduyɛ niaa co cɛi kon ni.

¹⁸Vana-vana huinun ndu pila le. Te vana pum o niaa tɛɛn yiyan pɛ maa o nɔ kɔlkalu ivanacieeyaa, mɛɛ o siŋnun diɔmndo mò sɔla kɔlkalu kpeekpeiyo.

¹⁹Kani kɔlkalu ceendo ho, diɔmnde o co Hala o hɔl ni, mɛɛ o co sɛvaa yɛ aa: «Mɛlɛka bii vanaa kɔlkalua a kɔlkalu nda vɔɔndo.»

²⁰O co vɛlɛ o sɛvaa aa: «Mɛlɛka sínà yiyannda vanaa kɔlkalua, o sínà maa ɲɛ fondoo fúú la co ni.»

²¹Lelan, vana-vana tiindan biilu vanndacieea le, kani le niaa ɲɔɔn kpow n co ni.

²²O va Pol, o va Apolɔs, te kon te Piɛr, o va ceendo, o va yoomoo, o va piɔ́mndo, o va ɲɛm n co sunsun-ndon, o va n co hunɔɔ-on, mun kpede le niaa n co ni.

²³Kɛ niaa niaa, le Krista niaa co ni, mì Krista ndu va o Hala-o.