Read Kissi 1Korɛntea 4 Bible Online

1Korɛntea 4 - Kissi bible

1Korɛntea 4

¹Lelan mɛɛ mì la ce naa maa vanaa baalaa Krista-a a vanaa bɛnda maa cɔm sɔɔn vianaŋun Hala-on-nda.

²Nduyɛ vana yɔngu ɲɔɔ le mandaa-o bɛnda mò va vana lo o lediom coo-o.

³Ya ya, buulan co ya mì la kelu ya iyama, te kon te mì vanaciee kelu ya iyama le, ya pila bɛɛ i kilun iyama le.

⁴Kɔl nuu co válán. Ɛ̀ɛ̀ nduyɛ, o va bɛɛ lende, kon cɔm te maa i tɛɛmbuu ɲɛ-ɲɛ le. Mɛlɛka co vana kialu ya iyama-o ni.

⁵Lelan, la kialu vɔ ɲɛ-ɲɛ iyama le, háá mì telen kelun-ndo tiiya. Maalii hin pɛ, o solinin dɛnnda co o ɲumndan nin-ndan ceen, mò cɔm yiyannda co vannda o lakɔltan. O kon vana-vana sɔlanin biilu ndɔɔ fulaa Hala o ba.

⁶Puapilɛa nia, le ya pila a le Apolɔs ya dimi sɔɔn mun kpow ni, haliko mi niáà sɔla pɛɛkoo, mí niáà bii taloo ho bila aa: «La hiilu ɲɛ-ɲɛ o ɲɛ sɛvan ho-o nin te.» Vana-vana o niaa tɛɛn tosa yonga mò biilu vana pilɛ hiovɔɔ vanndo pilɔɔ coo le.

⁷Kani o nɛi kuɛɛ coo n co yɛ yiyanndo maa a hiow caanda? Ɲɛm n nɔ-on kpow, vɛ̀ɛ̀ o co Hala le ke nɔm mun te? Te o co yɛ pɛ lende, le yɛɛ nɛ n co yɛ niko lisanndo maa o co ke le nda ke nɔm mun te?

⁸Ɲɛ-ɲɛ niaa yeema pɛ, la cii sɔla. La cii nin bolofaa sɔla. La kandu masalen tosaa, naa naa n co n'masa le, vɛ̀ɛ̀ lende le? Màá niáà siŋnun ko n'masa, o kon mì naa n tosa masalen naa niaa!

⁹Kani o yiyan nuu nin, naa Hala kɛsi o fonda mɛɛlaa ni, bau o bɛnda mì n sɔla piɔ́mndo. N siŋnun vanaa lɛŋnden kpede co tofaa-a, mɛlɛkaa a vannda kpow bɛɛ a co naa tofaa.

¹⁰Diɔmnda naa n co le Krista ni, kɛ niaa niaa, vanaa kɔlkalua pila niaa co o ndu nin ni. N nɔ mayoomu le, kɛ niaa la nɔ yoomuan. N nɔ lebɛɛ le, kɛ niaa la nɔ bɛɛlen.

¹¹Háá telenndo ho, yiaan ma co naa nɛiyo, kolɔɔ bii naa, n nɔ volɔɔla cuɛinan te, a co naa lɔɔ, a co kɔlan a naa nɛɛ-nɛɛ ka.

¹²N co lalle kiolɔɔ o baalaa nin. A co naa yeowlan, mì n va duaa dɔvɔɔ. A co naa yɛlen tollo, mì n va biwnɔnndo.

¹³A tɛɛmbuu pɛ naa diolan, n tɛɛlun nda. Háá sunsun, a co naa cɔu maa nɔ́ɔ́ sál, nɔɔ le ceendo kpede.

¹⁴I co niaa sɔɔn mun sɛval, o co le niaa lasiɛmbu tuisi le, kɛ le niaa silaa maa cuavaa nia ya kaola taw-va.

¹⁵Kani hali la nɔ bɛɛ vannda vaalan tɔ́ le niaa nɛila Krista lan cɔmndo, fuɲaa ndu pilɛ kpé niaa nɔ o Yeesu Krista nin ni, ya siŋnun fuɲa kon ni, le cuu ya cuu niaa yoongu kɛndɔɔ-o.

¹⁶Lelan i co niaa tɛɛlɔn, la va maa ya.

¹⁷Le hee, i co Timote po ni ya kaola taw-vo vomɔɔ o niaa lo, vana lo o lediom coo a Mɛlɛka-o o co ni. O yiyalannin niaa nɛila ya co kelaa coo o Krista nin-ndan a mɛɛ ya co keiyo pɛɛkoo vanaa laalannda tɛɛn nɛɛ-nɛɛ ka yɛ.

¹⁸Vanaa pum a co yongaa sɔɛi niaa tɛɛn, vana ca ko bɛɛ aa i co lɛ lakɔ o niaa lo le.

¹⁹Kɛ te Maalii cɛl pɛ, i kɔanin o niaa lo. O kon, o venin ko sɔɔn vanaa yongaa kan co dimio-on kínɛí le ya i sinanin te, kɛ mì kɔ sínà vɛlɛ kpaaya nda nɔ-o.

²⁰Kani Masale Hala len le co n'sɔɔ le, kɛ kpaaya le co ni.

²¹Ɔ́ɔ̀ o hɛnan niaa-o? Vɛ̀ɛ̀ i kɔ o niaa lo a siondoolen baa i kɔ bɛɛn-bɛɛn a kaolaa o piaa ya o kɔl?