Read Kissi 1Korɛntea 5 Bible Online

1Korɛntea 5 - Kissi bible

1Korɛntea 5

¹Vannda co ya dimullo lɔ́ɔ́-lɔ́ɔ̀ maa vanaa pum a co dɛnnda nɔɔlɛilan tosaa niaa tɛɛn, dɛnnda nɔɔlɛila co bɛɛ tosan hali vanaa sínà Hala le-a tɛɛn-ndan pɛɛn, maa vana pum co nda lanɔɔ fuɲa ndɔ.

²Nduyɛ la co yongaa sɔɛi. Óò bɛnda mì mɔnɛi ndíì bii niaa taw, mí niáà soli vana tosa dɛnɛ kon-ndo niaa tɛɛn.

³O va bɛɛ aa i co niaa ikɛi o falon nin te, kɛ i co niaa ikɛi o kɔllo nin. I cii yamɛi vana tosa dɛnnda lan-ndo kiolɔɔ o diola Maalii Yeesu lan, maa niaa ikɛi ya co ni.

⁴Nduyɛ, lɔ́ɔ́ niaa cuungiaanin o diola Maalii naa Yeesu lan-ndo, i vanin niaa tɛɛn o kɔllo nin, kpaaya Maalii Yeesu-o cɔmnunnin niaa tɛɛn.

⁵O bɛnda mì la mal vana vaa lende Setana o ba, haliko mi dialun ndɔn tambu, mì kɔl ndɔɔ sɔla cindaa o paale Maalii Yeesu len.

⁶Kuundian niaa niŋ te. La sínà maa lɛvɛnndo ɲɛ-pɔmbɔ nɔla mò heelu kpeyan buloo.

⁷La faŋa lɛvɛn hakio, mì la siŋnun maa kpeyan lindan sɛnɛiyo, o kon lɛvɛn venin niaa nin te. Kani Krista siŋnun saa téndóó le naa, le kafo-hiavaa-coo, Krista nda baŋ o yɔm singafilaa coo-o pɛɛn.

⁸Lelan n tosan kafoo, o co a lɛvɛn paandu le, o co vɛlɛ a lɛvɛn dɛnɛ haki, te kon te dɛnɛ kɔlvesɛi le, kɛ bulu toosian a lɛvɛn too co dɛnɛ sandaa a toɲaa ni.

⁹O sɛbɛ tase ya sɛval niaa-o nin, mí yáà dimul niaa maa canyɛi kɛ́-kɛ̀ i va niaa tɛɛn niaa vanaa co dɛnnda nɔɔlɛilan tosaa-a le.

¹⁰Kɛ kon co dimi le maa la kiolun vanaa vaa lende kɔɔli o ceendo ho coo le, te kon te vanaa nɔ yeemɛi ɲɛ-sɔlaa taw-va, te kon te vanaa del vannda coo-a, te kon te vɛlɛ vanaa sooluu piɔmnda-a. Kani te lende ni, mɛɛ faŋanndo niaa faŋannin o ceendo ho coo ni.

¹¹Kɛ sunsun, vanaa ya dimi maa ɲɛ-ɲɛ va niaa tɛɛn te-a a co haa ni, vana-vana dimi pɛ maa puapilɛ niaa o co ni, kɛ mò va: vana sundaa, te kon te vana nɔ hɔlte ɲɛ-sɔlaa-o, te kon te vana soolaa n'piɔmndo, te kon te vana sondo kalaa, te kon te vana kolaa mamɔiyo, te kon te vuiyo. La dia bɛɛ niaa vana vaa lende le.

¹²Nduyɛ, o co sɔɛi ni mì kelu vanaa co vanaa Krista le-a iyama le. Hala kialunin nda iyama ni. Kɛ vɛ̀ɛ̀ o co niaa le bɛnda mì la kelu vanaa co o kunda vanaa laalaŋaa niaa co tɛɛn-nda iyama le? Maa mɛɛ sɛbɛ Hala-o dimi yɛ aa: «La soli vana vɔɔn kon niaa tɛɛn.»