Read Kissi 1Korɛntea 6 Bible Online

1Korɛntea 6 - Kissi bible

1Korɛntea 6

¹Te sɔɛi pum keekan pɛ vana pilɛ o niaa vanaa laalaannda tɛɛn nda caan ndɔ vana laalanndo, vɛ̀ɛ̀ o vanaa sínà Hala le-a lo o kɔ mò kɔ cɛɛŋun ni?

²Vɛ̀ɛ̀ la co sínà maa vanaa diandaa le a kialunin yamɛi vanaa ceenda le? Te o va yɛ pɛ maa niaa kialunin ceendo iyama ni, vɛ̀ɛ̀ mì la bumba sɔɔn pɔm-pɔmbɔn toosiaa niaa pilaa tɛɛn?

³Vɛ̀ɛ̀ la co sínà le maa naa kialunin mɛlɛkaa iyama ni? Te o co yɛ pɛ lende, vɛ̀ɛ̀ mì la bumba sɔɔn ceendo ho toosiaa?

⁴Nduyɛ, te sɔngɔlan la va pɛ niaa vanaa laalannda tɛɛn, mɛɛ vanaa co ɲɛ-ɲɛ vanaa laalannda o hɔl te-a kialunin niaa iyama ni.

⁵Sɔɛi ya co hee dimi-e i co bɔɔ sɔɛi lasiɛmbu le niaa. Vɛ̀ɛ̀ vana pum co niaa tɛɛn, o nɔ kɔlkaloo, mò tiwba yaman kiolɔɔ puapilɛa ndɔa tɛɛn te?

⁶Éé niaa! Mɛɛ mì puapilɔɔ kɔ bii sei puapilɛ ndɔɔ o vanaa co vanaa laalan te-a lo?

⁷Kɔɔsɔla co lan niaa vanaa laalannda tɛɛn-ndan la cɔm ni maa la cuu delɔɔ. Te caan nɔm tosal nɔm pɛ sandii lepɛŋnde, le yɛɛ nɛ mà kɛɛ biuvɔn lende? Te o ciimbuu nɔm pɛ, le yɛɛ nɛ mà kɛɛ malɔɔ lende?

⁸Kɛ niaa co dɛnɛ sandaa lepɛŋndo tosaa ni, mì la va vanaa celen ciimbuuo, a co puapilɛa niaa vanaa laalannda-a pɛɛn.

⁹Niaa pila sínà maa vanaa sendu le-a lueinin o Masale Hala len nin te. La huinun te: vanaa-vanaa co keiyo suundaa, vanaa soolaa n'piɔmnda, vanaa kei suundaa a langbaa felengia-a, vanpiaandua tosa kpelemɔsaa a caaŋaa ndaa vanpiaandua-a,

¹⁰vuiya, vanaa nɔ hɔlte ɲɛ-sɔlaa-a, vanaa kolaa mamɔiya, vanaa co vannda yeowlan-nda a vanaa co caanda delɔɔ coo-a a lueinin o Masale Hala len nin te.

¹¹Nduyɛ lende vanaa pum niaa tɛɛn a va paandu ni. Kɛ mí la sɔla pulɔɔ diandaa Mɛlɛka-o, mí la sɔla diondɔɔ le hakila niaalan, mí la siŋnun vanaa dɛnɛ sandaa Mɛlɛka-a o diola Maalii Yeesu Krista lan a á Kɔl-Diandaa Hala naa.

¹²La co dimio aa: «I nɔ dí mì tosa dɛnndan kpow.» I co toɲa, kɛ o co dɛnndan kpow le la mala vana le. I dimul-lɔ niaa: «I nɔ dí mì tosa dɛnndan kpow, kɛ i cɛl mì yeemɛi kɛ́-kɛ̀ i siinguu ya cɛ le.»

¹³La co vɛlɛ dimio aa: «Le ɲɛm dian demboo co ni, mì demboo ndu va le ɲɛm dian.» Kɛ nduyɛ, Hala tɛɛmbuunin ndan tan tiɔn kpow. Diallon n co le suunda le, le Mɛlɛka n co ni, mì Mɛlɛka ndu va le diallon.

¹⁴Hala mingi Maalii yoomu fulaa vanvílɛ́iya tɛɛn-ndo minginin vɛlɛ naa yoomu a kpaaya ndɔɔ.

¹⁵Vɛ̀ɛ̀ la sínà le maa le Krista dialun nian co ni? Vɛ̀ɛ̀ mì la cua dialun Krista-on, mì la mɔɔsiaa mun a dialun vana co suundaa-o? Kɛì-kɛì bɛɛ!

¹⁶Vɛ̀ɛ̀ la sínà le maa vana yiinan pɛ nda vana co suundaa-o, ndu siŋnun kɔɔle pilɛ len nda ndu ŋiɔn te? Kani o co o sɛvaa aa: «O kon mì vanapɔnɔɔ nda vanalanɔɔ siŋnun dialle ipilɛ.»

¹⁷Kɛ nduyɛ, vana-vana holnun pɛ Maalii, mɛɛ nda ndu co kɔl pilɔɔ ni.

¹⁸La vow balan o suundaa nin te! Yɔŋnda vɔɔnnda celennda vanndo tosa lan la pilan ko dialun ndɔn te, kɛ vana vow pɛ baa o suundaa nin, o tɛɛmbuu dialun ndɔn ndu pilan.

¹⁹La sínà le maa dialun nian n co Cɛi-Mɛlɛka Hala Kɔl-Diandaa ni, o co niaa nin-ndo pɛɛn, o niaa sɔla Hala o ba-o? La co a ba niaa le.

²⁰Hala pendu niaa a vɔngu bɛndoo ni. Lelan la biilu ndu a dialun nian a á kɔlta niaalan.