Read Kissi 1Korɛntea 7 Bible Online

1Korɛntea 7 - Kissi bible

1Korɛntea 7

¹I mulul-lɔ niko niaa le sɔɔn niaa ɲuna ya o sɛbɛ niaa nin-ndon. O co dɛnɛ kɛndɛ, te o va pɛ mì vanapɔnɔɔ puu lanɔ le.

²Kɛ nduyɛ, yɔŋii vana vow balan o dɛnnda nɔɔlɛilan nin, o co fisa mì vanapɔnɔ oo vanapɔnɔ nɔ lanɔɔ o ndɔɔ, nduyɛ mì vanalanɔɔ oo vanalanɔ bɛɛ nɔ pɔnɔɔ o ndɔɔ.

³Vanapɔnɔɔ bɛnda mò tosal laa ndɔ ɲɛ o bɛnda le ndu tosallo-o, mì vanalanɔɔ bɛɛ tosal pɔnɔ ndɔ ɲɛ o bɛnda le ndu tosallo-o.

⁴Vanalanɔɔ nɔ kpaaya dialun ndɔn ndu pilan coo ndu pilɛ le, pɔnɔ ndɔ bɛɛ. Lende vɛlɛ koni ni, vanapɔnɔɔ nɔ kpaaya dialun ndɔn ndu pilan coo ndu pilɛ le, laa ndɔ bɛɛ.

⁵Pɔnɔɔ a lanɔɔ bɛnda mà kɛyan cɛinin te, fɔ dɔ́ɔ́ ma cɛlan le telen bingi cuaa le piɛilen. Kɛ nduyɛ, te telen kon cuu dɔ́ɔ́ pɛ, a muungu diom pilɛ, yɔŋii Setana tɔɔndan nda, kani a tiwnin kɔlta ndalan ba le.

⁶Ɲɛ niaa bɛnda le tosaa-o ya co dimio ho ni, kɛ o co kangalan te.

⁷Yáà yeema mì vanpiaandua kpow ndáà va maa ya, kɛ nduyɛ Hala yɔngu vannda valtan yɛ́-yɛ́ le tosaa. O ke pɛ vanndo hoo vallo pum, o mulin, o ke vana celen vali celen.

⁸Niaa vanaa cel-lɔ o nɔlan te-a a vanlaandua piaandaa ndaa vi-a, o ya co niaa dimullo co hoo ni, ndóò va bɔɔ dɛnɛ kɛndɛ mì niaa lonnun yembu maa ya.

⁹Kɛ nduyɛ, te la nɔla kɔlta niaalan te, o co fisa mì vana-vana yil lanɔɔ, te kon te mò cal o nɔu, a lou a yeemɛi bɛnduei o lakɔl.

¹⁰Le vanaa connun nin o nɔ̀u nin-nda yɛ, o ya co niaa dimul-lo co hoo ni (nduyɛ o co ya le o co fula o sondo le, kɛ Mɛlɛka ni), vanalanɔɔ bɛnda mò kɛɛ pɔnɔ ndɔ le,

¹¹te o kɛɛ yɛ pɛ ndu, mɛɛ o kɔ cal lɛ vanapɔnɔ celen o ba le. Te o co yɛ kon te, mɛɛ o muungu o pɔnɔ ndɔ lo. Lende vɛlɛ koni, o bɛnda mì vanapɔnɔɔ kɛɛ laa ndɔ le.

¹²Le niaa vanaa tɔ̀a yɛ, ɲɛ ya co niaa dimul-lo co hoo ni (o co Maalii le dimi le). Te vana laalanndo nɔ pɛ lanɔɔ, mì laa ndɔ kon ve vana laalan te, kɛ nduyɛ mò cɛl le loo pɔnɔ ndɔ o ba, pɔnɔ kon bɛnda mò kɛɛ ndu le.

¹³Te vana laalanndo co pɛ o nɔu pɔnɔ laalan too o ba, kɛ nduyɛ mì pɔnɔ ndɔ kon cɛl le loo nda ndu, mɛɛ ndu lanɔ kon bɛnda mò kɛɛ ndu le.

¹⁴Kani vanapɔnɔ nɔ laalan too sɔɔnguu Hala ikɛi laa ndɔ kɔɔli, mì vana pɔnɔ ndɔ co vana laalan too sɔɔnguu Hala ikɛi laa ndɔ kɔɔli. Kɛ te i yɔŋnun lende le, cuavaa vanaa ŋiɔŋaa kan a siŋnun maa vanaa nɔɔlɛi Hala o hɔl, nduyɛ a diandaa nda co ni.

¹⁵Kɛ nduyɛ, te vana laalan too yeema pɛ le kɔnndan, o kɔnnun. O dɛnɛ vaa lende nin, puapilɛ naa te kon te yema naa nɔ dí mò mal ndu. Kani Hala veelu naa haliko mi n va o kɔlɲuloo nin.

¹⁶Nɔm vanalanɔɔ laalan hoo-o, vɛ̀ɛ́ n sínà yɛnin maa a tiwnin ba mà ciindiaa pɔnɔ nɔm? Te kon te, nɔm vanapɔnɔ laalan hoo-o, vɛ̀ɛ́ n sínà yɛnin maa a ciindiaanin laa nɔm?

¹⁷Kɛ nduyɛ, o bɛnda mì vana-vana va kelaa mɛɛ Mɛlɛka ke ndu, mó sɔla veeloo Hala o ba yɛ. Ɲɛ ya co vanaa laalannda kpow pɛɛkoo-o co kon ni.

¹⁸Te vana pum cii nin pɛ toomaa diyɔɔ, mì Hala veelu ndu, ndu bɛnda lɛ mò siŋnun vana dii tooma loo le. Te vana pum ndóò dii-yɔ tooma le, mó sɔla veeloo, ndu bɛnda lɛ mò dii tooma le.

¹⁹Vana dii tooma, vana dii tooma le, kon co ɲɛ-ɲɛ le, tɔŋnda Hala lan biyɔɔ co bollen ni.

²⁰Vana-vana vannun mɛɛ o va mí Hala veelu ndu yɛ.

²¹Lɔ́ɔ́ pá mí Hala veelu nɔm, te cɛɔ n va ni, mɛɛ tambu kɔl a ken te. Kɛ taa nɔla pɛ hɔ́ɔ́yɛi sɔlaa, mɛɛ tosa kon.

²²Kani vana sɔla pɛ veeloo Mɛlɛka o ba telen o co cɛɔ-vo, o sɔla hɔ́ɔ́yɛi Mɛlɛka o ba. Lende vɛlɛ koni, vana vannun pɛ o hɔ́ɔ́yɛi nin telen o sɔla veeloo-o, mɛɛ cɛ Krista-o o co ni.

²³A vɔngu báà kalaa Mɛlɛka pendu niaa ni. Lelan, la siŋnun cɛa vanndacieea le.

²⁴Puapilɛa nia, mɛɛ niaa va mí Mɛlɛka veelu niaa le vaa vanaa ndɔ yɛ, la hiow laci a vaa lende o ba ndɔɔ bɛngu.

²⁵Le felengia sínà vɔ dɛnɛ vanapɔnɔ le-a yɛ, Maalii dimul-la isɔɔ a nda o kɔɔ le, kɛ yiyan nuu ya co dimi ni, ya Mɛlɛka ce ho ɲia mó siinguu ya vana o nɔla mò tiindan-ndo-o pɛɛn.

²⁶Le mɛɛ sangalan la co sunsun yɛ, i ce maa o co fisa mì vana-vana vannun mɛɛ o co yɛ.

²⁷Taa nɔ lanɔɔ pɛ, mɛɛ nuwviaa lanɛi le ndu kɛɛ le. Nɔm nɔ yɛ lanɔ le, mɛɛ yil lanɔ o nɔ̀u nin te.

²⁸Kɛ taa yil pɛ vanalanɔɔ o nɔ̀u nin, a tosa haki le. Kɛ vanaa cɛlan pɛ le nɔu, sangala co o ceendo coo lan taw la komal nda ni. Nduyɛ, i hɛnan mì la sɔla sangala lan te.

²⁹Puapilɛa nia, ɲɛ ya yeema mì dimul niaa-o co hoo ni, kani telenndo cuu nin tiiya. Kandɔɔ sunsun, vanaa nɔ laandua-a siŋnun maa a nɔ n'laandu le,

³⁰mì vanaa co caŋndo-a siŋnun maa a co caŋ te, mì vanaa co ɲaaloo-a nda siŋnun maa a co a ɲaale le. Mì vanaa co ɲɔɔn piinduo-a siŋnun maa ɲɛ co nda o ba le.

³¹Mì vanaa co makolan solin-ndo a ɲɛm ceendo ho-a siŋnun maa n co nda bɛɛ mako nɛŋul te, kani ceendo ho co hunɔɔ hiovɔɔ.

³²I yeema mì la nɔ buulan o buulan te. Vana nɔ lanɔ le, ndu kɔllo o landu o dɛnnda Maalii lan coo ni, mò kindikindin le Mɛlɛka hɛnanndo.

³³Kɛ vana yil lanɔɔ o nɔ̀u nin-ndo ndu, dɛnnda ceenndan ndan o landu kɔllo coo ni, haliko mo nuwviaa nɛilan le laa ndɔ ndu hɛnanndo.

³⁴O kon o siŋnun dɔ́ɔ́ vana nɔ valtan kundalan tan tiɔn le tosaa-o. Lende vɛlɛ koni, vanalanɔ co o nɔ loo, te kon te cua laandu sínà vɔ dɛnɛ vanapɔnɔ loo, ndu co buulanndo le dɛnnda Maalii lan, haliko mi dialun ndɔn a kɔl ndɔɔ dendu Mɛlɛka o hɔl. Kɛ o co o nɔu-vo ndu co buulanndo le dɛnnda ceenndan, le mɛɛ o kindin mò nɛŋi pɔnɔ ndɔ kɔl-lɛ.

³⁵I co niaa hee dimullo, le niaa malaa, o co le niaa baŋɔɔ kangalan te, kɛ le mɛɛ niaa lo kelaa o nɛi toɲaa coo mì la yɔngun kpow o vali Mɛlɛka-o nin ndu pilɛ kpé yɛ.

³⁶Te vanapɔnɔɔ pum yiyan pɛ maa o co dɛnɛ kɛndɛ mò manda balufaa ndɔ, mì telen nda bɛnda le calle o nɔ̀u nin-ndo tiiya, mɛɛ o tosa mɛɛ o yeema yɛ, o ve dɛnɛ haki le ndu le. O bɛnda mà cal o nɔ̀u nin.

³⁷Kɛ te o kelun pɛ o kɔl, mì vana beŋ ndu le, mì ndu pila bii kɔl ndɔɔ, mò manda balufaa ndɔ sínà vɔ dɛnɛ vanapɔnɔ loo, mɛɛ ndu hiow caa tosa.

³⁸Lelan vana-vana yil pɛ balufaa ndɔ sínà vɔ dɛnɛ vanapɔnɔ loo o nɔ̀u nin, mɛɛ ndu caa tosa. Kɛ vana yil ndu o nɔ nin too hiow caa tosa.

³⁹Vanalanɔɔ bɛnda mò va o yiinan a pɔnɔ ndɔ telen pɔnɔ ndɔ co vɔ yoomu-o. Kɛ te pɔnɔ ndɔ vi pɛ, mɛɛ o tiwnin ba mò cal o nɔ celen nda vana o yeema-o, kɛ fɔ mò va vana Hala-o.

⁴⁰Nduyɛ, o vannun pɛ lende, mò cue lɛ pɔnɔ celen te, lende o hiaw vaa a kɔlkɛndɛ. Ɲɛ ya yiyanndo co kon ni. Nduyɛ i nɔ kɔl maa ya bɛɛ Kɔl Mɛlɛka-o co ya kɔɔli.