Read Kissi 1Korɛntea 9 Bible Online

1Korɛntea 9 - Kissi bible

1Korɛntea 9

¹Vɛ̀ɛ̀ o co o ba nuu coo le ya co le? Vɛ̀ɛ̀ o co kiilaa le ya co le? Vɛ̀ɛ̀ i ci Maalii naa Yeesu le? Vɛ̀ɛ̀ o co niaa le co tɔnɔ vali fula o baala ya tosa le Maalii naa-o nin-ndo le?

²Hali mì vanaa celen a ci ya maa kiila le, kɛ le niaa niaa, kiilaa ya co ni. Kani niaa co tɔɔmasele kiilale nilen o Maalii nin ni.

³Kɔɔsɔ ya kɔɔsal vanaa co sɔɔn pɔmbɔn a ya-a co kon ni.

⁴Vɛ̀ɛ̀ i nɔ dí mì sɔla baloo, mì kol te?

⁵Vɛ̀ɛ̀ i nɔ dí mì hin a vanalanɔ laalanndo pum, mò va laa nuu maa mɛɛ kiilaa tɔ̀a, a puapilɛa Maalii-a, a puapilɛa Sefas-a a co tosaa yɛ le?

⁶Te o co kon te, vɛ̀ɛ̀ naa Barnabas koni bɛnda mì n tosa vallo le baloo dɔwnɔnndo ni?

⁷Nɛ̀ɛ́ sala yɛ saravusoo le vali o co tosaa lenin-ndo? Nɛ̀ɛ́ tɔal-lɛ nakɔ n'rɛsɛnndo mò kɛɛ kɔmnde ndɔlen dio? Nɛ̀ɛ́ manda yɛ cɔlua mò kɛɛ nɔnɔma ndan kolɔɔ?

⁸Vɛ̀ɛ̀ sɔɔn ivanaciean daama ya co dimio ni? Vɛ̀ɛ̀ o co ɲɛ pilɛ kon te tɔŋndo dimi le?

⁹Kani o co o sɛvaa o tɔŋ Mɛlɛka ke Moise-o nin aa: «Yii nawvo sondoo lɔ́ɔ́ o co maalon nɛiyo-o le.» Vɛ̀ɛ̀ Hala buulan pá le nawva?

¹⁰Vɛ̀ɛ̀ o co a naa o kɔɔ le o dimi sɔɛi ken te? A toɲa, a naa o kɔɔ o sɛva sɔɛi ken ni. Vana co vaa-o nda vana co ɲɛ kownunndo nɛwvo-o bɛnda mà tosa vallo o kɔlkɛsiaa nin maa a co hunɔɔ ɲɛ pum sɔla o vali ndaa nin.

¹¹Te n saŋ pɛ sɔɔn kɔl-lon niaa nin, vɛ̀ɛ̀ dɛnɛ vɔɔndo o co mì n sɔla tɔnɔɔ niaa nin ni?

¹²Te vanaa pum a nɔ pɛ di kon le ɲɛm mun sɔlaa niaa o n'dial, baa naa yɛ? Vɛ̀ɛ̀ n nɔ dí mì n sɔla mun hiovɔɔ o kon coo le? Kɛ n co di kon tofa le. N co dɛnndan kpow biuvɔn yɔŋii naa mingi sɔɛi Yeesu-e a makɔɔ.

¹³Niaa pila sínà maa vanaa co baalaa o Cɛi-Hala-o nin-nda, o cɛi kon nin koni nda sɔla ɲɛdiaa ndaa ni. Vanaa co sálàlan solio o fonda-loamaa-lasálàá coo-a bɛɛ, o sálàla lan nin ɲɛ nda diaa fula ni.

¹⁴Lende koni Maalii dimi ni, maa vanaa co vannda Yoongu kɛndɔɔ tiiyallo-a, balo ndaa bɛnda mò fula o Yoongu kɛndɔɔ nin.

¹⁵Kɛ ya ya, i tosa sɔɔn mun ikɛ́-kɛ̀ le, o co mì ɲɛm mun yɔngun ya le ya co sɛvaa ho le. Kani o co fisa mì vi, a lou ɲaaloo dɔwnɔnndo o kuundian kon nin.

¹⁶Nduyɛ, vannda Yoongu Kɛndɔɔ tiiyallo, kon co dɛnɛ kuundian le ya le, kani lelan ya sɔla veeloo ni. Dɛnɛ palaa co le ya, te i tiiyal vannda Yoongu kɛndɔɔ le.

¹⁷Te i tiiyal pɛ vannda Yoongu kɛndɔɔ a kɔl nuu, i sɔla vɔ̀ngɔ̀ɔ́. Kɛ te i tosa pɛ kon mò ve a kɔl ni le, mɛɛ baala yɔngun ya-o daama ya co tosa kon lende ni.

¹⁸Yɛɛ co yɛ niko sala nuu? Ndu co ɲɔɔ ya hɛnando le vannda Yoongu kɛndɔɔ tiiyallo fondo fúú ni, i nɔ mì ɲuna o yɔngun ya-o le diom kon dimio le.

¹⁹O va bɛɛ aa i co o ba nuu coo nuaa, i siŋnun cɛɔ le vannda kpow haliko mi sɔla vanaa bɔɔ-bɔɔ.

²⁰Mí i siŋnun maa Yuifinɔ le Yuifia sɔlaa. Mí yɔngun o tɔŋndo bɛngu le vanaa va o tɔŋndo bɛngu-a. Nduyɛ, i ve o tɔŋ bɛngu a kɔl ni le, kɛ le vanaa va o tɔŋndo bɛngu-a sɔlaa ya tosa kon ni.

²¹Le vanaa ve o tɔŋ bɛngu le-a, mí siŋnun maa vana ve o tɔŋ bɛngu loo. Kon co dimi le maa ya pila i ve o tɔŋ Hala bɛngu le, kɛ i va o tɔŋ Yeesu-o bɛngu, haliko mi yáà sɔla vanaa ve o tɔŋ bɛngu le-a ya tosa kon ni.

²²Mí siingun vana nɔ mayoomu loo vanaa yoomuma lepɛŋnda tɛɛn le nda sɔlaa. Mí cɛl dɛnnda vannda kpow haliko mi yáà kei o nɛi oo nɛi coo le vanaa pum ciindiaa.

²³I co kon kpow tosaa le sɔɛi Hala-e vannda tiiyallo haliko ma sɔla duaa ndɔɔ.

²⁴La sínà maa vanaa ɲaanun-nda kpow a ɲaanun o falle nin ni, kɛ vana pilɛ kpé sɔla salaa ni? La ɲaanun lende, mì la sɔla salaa.

²⁵Vannda va pɛ pisultan pɛɛkoo, a hendulun tɔŋnda kalalan. Le bɛɛle viw le len sɔlaa nda tosa kon ni. Kɛ naa naa, n co kon tosaa le bɛɛle co le lɔ́ɔ́-lɔ́ɔ̀ len sɔlaa.

²⁶Lelan, i co kiltan, kani i co ɲɛ pum kɔɔli, o co mɛ̀ɛ́-mɛ̀ɛ́ ka le. I co baa solio le kundɔɔ, kɛ o co le ihoei lɔɔ le.

²⁷Kɛ i co dialun nun yɛlen tollo, mì va sangaa handɔɔ coo, yɔŋii ya cii caanda pɛɛku mì ya pila del.