Read Kissi 2Korɛntea 1 Bible Online

2Korɛntea 1 - Kissi bible

2Korɛntea 1

¹Ya Pol, kiilanɔ Yeesu Krista-o mɛɛ hɛnan Hala-o co yɛ, naa Timote puapilɛ naa. Naa n co sɛbɔɔ ho sɛva le vanaa Hala-a co Korɛnte-a a le vanaa diandaa kpow ni, á co o lɛŋnde Akaii len nin ba-ba fee-a.

²Màá Hala Fuɲa naa nda Maalii Yeesu Krista a ke niaa dɛnɛ kɛndɔɔ a kɔlɲuloo!

³N melnun Hala balika, Fuɲaa Maalii naa Yeesu Krista. Fuɲa nɔ ɲííye taw-vo o co ni, Hala ɲɔɔlu vana kɔllo o dɛnndan kpow nin-ndo.

⁴O co naa ɲɔɔloo o sangala naalan kpow nin, haliko mi naa bɛɛ n tiwba vanaa co o sangala súú-súù ka nin-nda ɲɔɔloo a ɲɔɔlu naa pila n sɔla ndu o ba-o.

⁵Kani mɛɛ sangalan la kui Krista coo le naa yɛ, lende koni naa n co ɲɔɔloo cɔɔloo sɔlaa o Krista nin ni.

⁶Te n co pɛ sangaa sɔlaa, le mɛɛ niaa sɔla ɲɔɔloo a cindaa yɛ ni. Te n co pɛ ɲɔɔloo sɔlaa, le mɛɛ niaa sɔla ɲɔɔloo, mì la biwnun o sangala pilɛla naa n co sɔlaa lan nin yɛ ni.

⁷Nduyɛ, n tiindan niaa ɲɛkɛndɛi, kani n sínà maa mɛɛ niaa sɔla sangaa naa ikɛi yɛ, lende koni niaa sɔla vɛlɛ ɲɔɔloo ni.

⁸Puapilɛa naa, n yeema mì la va o sínà lepɛŋndo nin te, le sanga naa n sanga Asii-yo. Kani n sɔla sanga bɛndoo háá mí yoomuan ma fula naa, n ve lɛ kɔl maa naa n cinda nin te.

⁹N va yiyanndo maa sɔɛi piɔ́m naa ndíì cuu nin kiolɔn. Kɛ nduyɛ, kon tosan haliko n tiindan naa pila le, kɛ mì n tiindan Hala, o mingì vanaa vi-a yoomu-o.

¹⁰Ndu baŋa naa ni, nduyɛ o baŋanin naa o piɔ́m vaa lende sondoo. A toɲa, n nɔ tiindanndo maa o baŋanin naa vɛlɛ.

¹¹Niaa bɛɛ, o bɛnda mì la va naa malaa o piɛilen nin, kani te vanaa bɔɔ-bɔɔ a piɛi pɛ le naa, Mɛlɛka co piɛile len muli. O kon vanaa bɔɔ-bɔɔ a sɔlanin kɛndɛi ken le naa mà mel Hala balika a naa o kɔɔ.

¹²Kani ɲɛ naa n nɔla mì n kelu yongaa a ndu o kɔɔ-o co hoo ni, kɔlta naalan la co seilen timbio mɛɛ naa n kela o ceendo nin yɛ, taam-taama niaa o hɔl. Kela diandaa a kela toɲaa o yɔŋnun ni, o fula Hala o ba-o, n tosa kon a kɔlkalu ivanacieeya le, kɛ o kɛndɛi Hala-e bɛngu.

¹³N co niaa ɲɛ celen sɛval te, fɔ o niaa nɔla dimio a sinaa-o. I laalan maa mɛɛ niaa síná naa ɲɛ-pɔmbɔ nuaa yɛ, la sinanin ɲɛkɛndɛi maa a naa kɔɔ niaa kialu yongaa ni, mì naa naa n kelu yongaa a niaa o kɔɔ paale Maalii naa Yeesu hunnin nden.

¹⁵Yáà nɔ kɔlkɛsiaa kon, yáà yeema mì yáà kɔ yil niaa, haliko mi niáà sɔla dɛnɛ kɛndɛ kon bɛmbɛ lediin.

¹⁶Nduyɛ, yáà yeema mì yáà kei o niaa lo, mì yáà hiow niko Maseduan. O kon kɔɔli, yáà va vɛlɛ pɛ muungoo fulaa Maseduan, yáà hin vɛlɛ o niaa lo haliko mi niáà liila ya le kɔlan Yuda.

¹⁷Kɛ nduyɛ, la yiyan te maa vana sɔɔn miun-miunndo ya co le tùú ya tuu kon mi kɛɛ tosa-o ni, te kon te maa i va pɛ tùúlan, o yiyan ivanacieeyaa nin kínɛí ya tùú lende ni, maa i cɛl pɛ, i kɛɛ vɛlɛ.

¹⁸Hala co ya lesei, sɔɔn naa n dimul niaa-on n co sɔɔn ya cɛl mì kɛɛ le.

¹⁹Kani sɔɛi Yeesu Krista Po Hala-o, o Silas, Timote a ya pila dimul niaa sɔɛi ndɔɛi-yo, o co sɔɛi vana cɛl mà kɛɛ le. Kɛ o ndu nin, oi koni co oi ni.

²⁰Kani Yeesu co Oi peelu kpemala Hala lan kpow-vo ni. Lelan, o ndu nin naa n dimi ni aa: «Amiina», mì Hala sɔla biiloo.

²¹Kani Hala pila simi naa yili o yoomoo nin Krista o ba bɛngu ni. Ndu hɛli naa ni.

²²O handu naa tɔɔmasele ndɔɔ coo, mó luei naa yiyan Kɔl-Diandaa o lakɔl, kon co landei le ɲɛm kɛndɛn o kɛsul naa-on ni.

²³Hala co ya lesei, te i dimi pɛ còòlan, mɛɛ i sɔla piɔ́mndo! Le niaa solio o sangaa nin ya kɛɛ muungu Korɛnte ni.

²⁴N co niaa baŋɔɔ mì la laalan te, kani la co a simaa yili o laalanndo coo, kɛ n yeema mì n mala niaa o dɛnɛ kɛndɛ niaa nin.